IJAI 16 - Bibəl ta Sar̄

Moab dəje ɓē kə́ Jerusalem kadə̄ dḭḭ̄n

¹ Ngār gə̄ kə́ Moab ədan̄ na: Ḭ́ḭḭ̄ kə bal batə̄ gēé mbal̄ kə́ dəla loo tə́ āwīiń ādī kɔ́ɔ̄ ɓē, āwīiń ādī mban̄g kə́ Juda, dɔ mbal̄ Siyo̰ tə́.

² Dəyá̰ kə́ Moab gə̄ i loo gə̄ ń de gə̄ a teēn̄ man̄ Arnon tū tə́ ní tə́. Nin̄ ton̄ i tītə̄ yel̄ gə̄ kə́ a̰ȳn̄ naā beé, yel̄ gə̄ kə́ tə̄ɓān̄də́ kɔ̄ɔ́ kem ɓēdə́ tə́ kadə̄ a̰ȳ aw̄n̄ sa̰y beé.

³ De kə́ Moab gə̄ dəjen̄ Jerusalem na: Ādə̄jí kɔjə̄, ún ndūí yā rāā yá̰á̰ kógə̄ḿ, ūtə̄ gidəjí dan kadaá yā ngɔ̄məńjí, tītə̄ loo kə́ ndɔ̄ɔ́ kə́ ənī til dɔ loo tə́ beē. Ī-ɓɔ̄ɔ̄ dɔ mā̰ȳ rɔ̄ɔ̄ yājí gə̄. Ngé gə̄ ń a̰ȳn̄ naā ní, ī-lōō teē kə gíŕdə́ dɔɔ́.

⁴ Ə́ya̰ mā̰ȳ rɔ̄ɔ̄ yājí gə̄ ādə̄ ndin̄ ɓēé looí, ādə̄də́ loo ādə̄ ndin̄ tū tə́ najə̄ yā nge nujə loo tə́. Nge rējə̄jí a ndi ngándáńg alé, gír nujə loo a gān̄g. Nge nujəjí a əya̰ ɓē yājí ba a aw̄.

⁵ Loo ń noō tə́ ngōn̄ kaa Dabid a ndi dɔ kōr̄ kāgə̄ mbang yā Dabid tə́, ko̰o̰ ɓē yān a too ngándáńg kə ta kūl̄ kem majə yāí. Ni a to tītə̄ nge gān̄g sarya kə́ əndā kumən gír ɓōĺ ndū najə̄ tə́ ō, təngā loo gān̄g sarya kə́ gōtə́ tə́ ō.

Jerusalem a sāā rāā yá̰á̰ kógə̄ḿ tām̄ yā ɓē kə́ Moab tə́ alé

⁶ J-oō najə̄ kɔjə rɔ̄ yā ɓē kə́ Moab. I kɔjə rɔ̄ kə́ ngá̰ý kə́ ba̰ý beē! I kem sōl̄ yá̰a̰ aĺ kə́ ba̰ý beē! Banī najə̄ ń ni-ɔr̄ ní i najə̄ kə́ kem wōȳ karī.

⁷ Ngɔlaā ní Moab gə̄ a nōōn̄ i Moab, de gə̄ malang a nōōn̄ i mbée. Nin̄ a sō̰mə́n̄ ō, a ndə̄ngān̄ gotə makəla kan̄ nduú gə̄ ń kété a rāān̄ kem ɓē kə́ Kir Heres tə́ ní ō. Tɔ́gə́də́ teē malang kɔ̄ɔ́.

⁸ Yá̰á̰ kə́ kem ndɔr̄ kə́ Hesəbon tə́ gə̄ oyən̄ kɔ̄ɔ́, tītə̄ kāgə̄ nduú gə̄ kə́ Sibəma beé. Kété ní, kasə kan̄ kāgə̄ nduú gə̄ ngeé ń toō rāā ngol gə̄ kə́ dɔ nápar de gə̄ tə́. Kété ní kāgə̄ nduú ngeé ń toō ton̄ ta kaw̄ kə̄ Yajer, nin̄ əɓan̄ kə̄ loo gə̄ tə́ dəla loo tə́. Ta jīdə́ kə́ tɔ̄ɔ̄ gə̄ alən̄ bátə́ ta kaw̄ kə̄ gidə bā bo tə́.

⁹ I tām̄ najə̄ ń toō tə́ n m̄-nōō kə de kə́ Yajer gēé tām̄ yā kāgə̄ nduú gə̄ kə́ Sibəma tə́ ní. M-ā m̄-ɓōkə́ man̄ kumḿ gíŕsí tə́, ḭ̄ Hesəbon ō, ḭ̄ Elale ō. Tām̄ kɔĺ rɔ̄ɔ̄ ɓār̄ dɔ kan̄ nduú yāsí tə́ ō, dɔ kan̄ nduú yāsí kə́ ə́jaī tə́ ō.

¹⁰ Rɔ̄nel̄ kə́ ngá̰ý al̄ naā gətóo kɔ̄ɔ́ kem ndɔr̄ kāgə̄ yāsí gə̄ kə́ kan̄ tə́. Deē oō kōō pā, aláa kōō kɔŕ rɔ̄nel̄ kem ndɔr̄ kāgə̄ nduú gə̄ tə́ to̰ alé. Kasə nduú gətóo kem jóon gə̄ tə́, deē mbə́rē kan̄ nduú to̰ alé. Kɔŕ kə́ kənda yá̰a̰ gōtə́ to̰ gətóo.

¹¹ I tām̄ najə̄ ń noō tə́ n kemḿ nōō dɔ ɓē kə́ Moab tə́ ní. Nōō yāḿ ɓār̄ tītə̄ kōō kənde kənde kə́ kugə kənīń pā beé. m̄-nōō tām̄ yā Kir Heres tə́.

¹² Moab gə̄ ɔrən̄ loo kal̄ tə́ ta kaw̄ kə̄ dɔɔ́, adə̄ de gə̄ a̰a̰n̄də́. Nin̄ aw̄n̄ ndɔ̄yɔ̄ɔ́ loo yādə́ kə́ yā ɓōĺ gidə tə́, banī nge ń noō a rāā yá̰a̰ alé.

¹³ Najə̄ kə́ dɔ Moab tə́ ń Kɔ́ɔ̄ɓē əda kété ní n toó.

¹⁴ Ba ngɔlaā ní Kɔ́ɔ̄ɓē əda na: Ɓāl̄ mətá ta asə naā anī, de kə́ bo gə̄ kə́ Moab ō, Moab gə̄ ń nin̄ i ngá̰ý ō ní, nin̄ i yá̰á̰ kógə̄ḿ to̰ alé. Ngé gə̄ ń a na̰yn̄ ní, nin̄ i sḛý beē, ngá̰ý aĺ bátə́.