IJAI 15 - Bibəl ta Sar̄

Nōō rɔ̄ kə́ dɔ ɓē kə́ Moab tə́

¹ Najə̄ kə́ tām̄ yā ɓē kə́ Moab tə́. A̰á̰ā̰, ndɔ̄ɔ́, kem ndɔ̄ kə́ kógə̄ḿ beē tə́, nujən̄ ɓē kə́ Ar kə́ Moab tə́ kɔ̄ɔ́. Ni gətóo kɔ̄ɔ́ i ndɔ̄ɔ́ kem ndɔ̄ kə́ kógə̄ḿ beē tə́. A̰á̰ā̰, ndɔ̄ɔ́ kem ndɔ̄ kə́ kógə̄ḿ beē tə́, nujən̄ ɓē kə́ Kir kə́ Moab tə́ kɔ̄ɔ́. Ni gətóo kɔ̄ɔ́ i ndɔ̄ɔ́ kem ndɔ̄ kə́ kógə̄ḿ beē tə́.

² De kə́ Dibon gə̄ aw̄n̄ nōó loo ndɔ̄ȳ gə̄ tə́. Moab gə̄ unən̄ pā yo kem ɓē kə́ Nebo tə́ ō, Medeba tə́ ō. Dɔ de gə̄ malang i kə́ dəsā kɔ̄ɔ́ ō, mbāý de gə̄ malang i kə́ kəja kɔ̄ɔ́ ō.

³ Nin̄ əlan̄ kūbə̄ kəhɔ ndoō rɔ̄də́ tə́ njə̄rān̄neée kum róbə kɔsə gə̄ tə́. Nin̄ ran̄ kə̄ ta kújə gə̄ tə́ ō, kə̄ ndágə loo gə̄ tə́ ō ənīnəń pā yo ō, de gə̄ malang nōōn̄ ō.

⁴ De kə́ Hesəbon gə̄ ō, Elale gə̄ ō, ɓārə́n̄ yá̰a̰ kadə̄ dḭḭ̄n̄də́. Deē ra i Yahas gē a oō kōōdə́. I tām̄ najə̄ ń toō tə́ n Áskar kə́ Moab gə̄ əgan̄ kɔŕ ní. Tɔ́gə́də́ ur̄ wak kɔ̄ɔ́.

⁵ m̄-ɓāŕ yá̰a̰ kadə̄ dḭḭ̄mə̄n̄ yā rāań kə ɓē kə́ Moab. De kə́ Moab gə̄ a̰ȳn̄ naā bátə́ ugə̄n̄ Soar, aw̄n̄ bátə́ ugə̄n̄ Egəlat Selisiya. Nin̄ alə̄n̄ kadə Luhit tə́ ta kaw̄ dɔɔ́ kə nōó. Nin̄ əgan̄ kɔŕ dɔ róbə́ kə́ Horonaim tə́ ədan̄ na: Yá̰a̰ malang i kə́ nujə kɔ̄ɔ́. I yá̰á̰ kə́ to kum kaȳ aĺ kə́ to ɓōĺ ngá̰ý kə́ ba̰ý beē!

⁶ Dang man̄ kə́ Nimrim tél i dəla loo kə́ rɔ̄nel̄ gətóo tū tə́. Kāgə̄ gə̄ tutən̄ ō, mu gətóo kɔ̄ɔ́ ō. Yá̰á̰ kə́ to ɓōĺ gətóo.

⁷ I tām̄ najə̄ ń toō tə́ n de gə̄ ɔyn̄ gotə yá̰a̰ kənge yādə́ kə́ na̰y gə̄ kɔ̄ɔ́ ní, gotə yá̰a̰ kənge yādə́ gə̄ ń nin̄ rāān̄ bátə́ ba ngɔ̄mə̄n̄ ní. Nin̄ ɔyn̄ aw̄nəń kə̄ kété sa̰y ɓáý, gidə man̄ kāgə̄ popəliye gə̄ tə́ kə̄ nú.

⁸ De gə̄ ɓārə́n̄ yá̰a̰ kə gō gidə ɓē kə́ Moab kadə̄ dḭḭ̄n̄də́. Kɔŕ yo ɓār̄ bátə́ ugə̄ Egəlaim, ɓār̄ bátə́ ugə̄ dɔ bəlo man̄ gə̄ kə́ Elim tə́.

⁹ Ngōn̄ man̄ ń teē Dimon ní, mósə taā loo kum tə́. Kɔ́ɔ̄ɓē əda na: M-ā m-ə́la kə yá̰á̰ kə́ to kum kaȳ aĺ kə́ rang gə̄ Dimon ɓáý to̰. Moab gə̄ ń teēn̄ ta yo tə́ á ndin̄ kem ɓē yādə́ tə́ ní, ɓɔl kógə̄ḿ a ənīdə́ rɔ̄ɔ̄!