IJAI 14 - Bibəl ta Sar̄

De gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, tél reēn̄

¹ Kɔ́ɔ̄ɓē a a̰a̰ kum tō ndoō yā Jakob. A̰á̰ā̰, ni a ɔjə ɓáý to̰ kadə̄ i ni n gə̄rā Israel ní. Ni a əndā Israel gə̄ dɔ nang yādə́ tə́ ō, tə̄rā gə̄ a ɓoon̄ rɔ̄də́ naā tə́ sedə́ ō, a télən̄ kojə yā Jakob gə̄ ō.

² Gotə gír de kə́ rang gə̄ a reēn̄ sāā Israel tə́ yā tél kaw̄ seneé gogə́ dɔ nang yān tə́. Loo ń noō tə́ gír deē yā Israel gə̄ a əhɔn̄ de gə̄ ngeé ń toō ɓəlo tə́, dəngam gē dəyá̰ gē, dɔ nang yā Kɔ́ɔ̄ɓē tə́. Ngé gə̄ ń əhɔnən̄ dəngáý kété ní, ni a əhɔdə́ dəngáy i tītə̄ ń noō, ngé gə̄ ń kété rējə̄nən̄ ní, ni a téĺ kɔ́ɔ̄də́ i tītə̄ ń noō.

Ta tɔ̄l̄ ta mbang kə́ Babilon

³ Israel, ndɔ̄ kógə̄ḿ tə́ anī, Kɔ́ɔ̄ɓē a adī kadə̄ ɔ̄r̄ koō gō ka̰a̰ tápə̄ yāí tə́, gō yá̰a̰ gə̄ ń nā̰ā̰īn̄ tə́ ní ō, gō kəhɔń əhɔīn̄ ɓəlo kə́ ngan̄g adə̄ ī-ger̄ tə́ ní ō.

⁴ Kum mbang ngeé ń noō tə́ ní, ā ún pā tə́dá ń toō yā mbóoń kə mban̄g kə́ Babilon, ā ə́da na: Nge ń rējə̄jí kə ko̰o̰ ɓē yānneé ní gətóo kɔ̄ɔ́! Gíŕ yá̰a̰ rāā yān kə́ kə dɔ́nɔ́ gān̄g kɔ̄ɔ́! Nōō rɔ̄ i tām̄ yān tə́.

⁵ Kɔ́ɔ̄ɓē nujə ko̰o̰ ɓē yā ngé kem ndul gə̄ kɔ̄ɔ́. ni tétə̄ kāgə̄ ko̰o̰ ɓē

⁶ ń ənda nápar de gə̄ kə wōngōó kanjə̄ dəba ō, rējə̄də́ kə tɔ́gɔ́ ō, rāādə́ adə̄ a̰a̰n̄ tápə̄ ngá̰ý ō ní.

⁷ Ngɔlaā ní dɔ nang malang to jəke, ni-ɔr̄ koō. De gə̄ urən̄ kɔĺ rɔ̄nel̄.

⁸ Kāgə̄ gə̄ gə̄gē rāān̄ rɔ̄nel̄ najə̄ yá̰á̰ ń rāāī tə́ ní. Kāgə̄ sipəres gə̄ ō, kāgə̄ sedər gə̄ kə́ Liban tə́ ō, ədan̄ na: Əla gíŕ jóo nəkɔ́ ń ī-toń ɓádá toó ní, de kə́ al̄ reē gōjí tə́ tə́gājí to̰ gətóo.

⁹ De kə́ koy kɔ̄ɔ́ gə̄ ń nin̄ i kem loo kə́ gírí nang tə́ ní, rāān̄ rɔ̄də́ yā reē tə́nī taí dan ń ā ī-reē ní. Ni ndól̄ de kə́ koy gə̄ tām̄ yāí tə́, de kə́ bo gə̄ malang kə́ dɔ nang ń toō tə́. Ni-rāā adə̄ mban̄g gə̄ malang yā nápar de gə̄ ḭḭn̄ kɔ̄ɔ́ dɔ kōr̄ kāgə̄ mbang yādə́ gə̄ tə́.

¹⁰ Nin̄ malang ní unən̄ najə̄ ɔrə̄n̄, ədaīn̄ na: Tɔ́gí gətóo tītə̄ yājí ō. Ngɔlaā ní ī-to tītə̄jí!

¹¹ Bo yāí risə kə gō ndū kənde yāí gēé aw̄ń ɓádá loo yā de kə́ koy gə̄ tə́. Matəlā yāí i yá̰á̰ kə́ ndum ō, bájo yāí i kəde gə̄ ō.

¹² I ba̰ý á ḭ̄ ń i dɔgə́ loo tīī kə́ ā ī-ndə́lē ní, ḭ́ḭ dɔ rā̰ tə́ ə̄sō ní? Ḭ̄ ń kété ī-mbə́rē nápar de gə̄ī-tə́nīdə́ ní, ənīn̄ nang tə́!

¹³ Kété ní ī-gír̄ ə́da na: M-ā m-āw̄ bátə́ yā kugə̄ dɔ rā̰ tə́, m-ā m-ə̄ndā kōr̄ kāgə̄ mbang yāḿ dɔɔ́ dɔ tə́yō̰ gə̄ yā Nə́ɓā tə́. M-ā m̄-ndi dɔ mbal̄ ń nə́ɓā gə̄ a kánə̄n̄ naā dɔ tə́ ní tə́, ta ngóy ɓē tə́ dām̄ mbɔ́r ɓē kə́ geleé tə́.

¹⁴ M-ā m-āw̄ yā ndi ta ngóy kil̄ man̄ gə̄ tə́ dɔɔ́, m-ā m̄-to tītə̄ Nə́ɓā kə́ dɔɔ́ sa̰y ngá̰ý.

¹⁵ Banī ī-risə āw̄ ɓádá, loo ń de kə́ koy gə̄ i tū tə́ ní tə́, āw̄ bátə́ ūgə̄ ngɔ́n bəlo kə́ bo tə́.

¹⁶ Ngé ka̰a̰í gə̄ əndān̄ kumdə́ dɔí tə́ a̰a̰īń ngá̰ý. Nin̄ dəjen̄ rɔ̄də́ najə̄ ədan̄ na ké i nəkɔ́ wa, dəngam ń kété rāā dɔ nang adə̄ ndew ní, ni ń kété yéȳ ko̰o̰ ɓē gə̄ ní nəkɔ́ a?

¹⁷ Ni ń kété rāā dɔ nang adə̄ tél dəla loo ō, nujə ɓē bo gə̄ ō, mbātə́ kəya̰ dəngáy gə̄ dɔɔ́ ō ní.

¹⁸ Mban̄g gə̄ yā nápar de gə̄ malang, a̰á̰ā̰, nin̄ malang to a ɔrə̄n̄ koō ō, rɔyn̄də́ ō, nin̄ kógə̄ḿ kógə̄ḿ ní ton̄ i kə̄ kem bəlo ɓádə yādə́ gə̄ tə́.

¹⁹ Ba ḭ̄, ənīn̄ ndágá kɔ̄ɔ́, sa̰y kə bəlo ɓádə yāí. Ī-to i tītə̄ ngōn̄ kə́ teē nīń, kə́ nel̄ de gə̄ seneé aĺ ngá̰ý. Ī-to tītə̄ nīń kə́ rējə̄n̄ kɔ̄ɔ́, de kə́ tɔ̄lə̄n̄də́ gə̄ taān̄ loo gidií tə́ malang, tɔ́sə̄n̄də́ i kə kaskar ō, tə́nīn̄də́ i dɔ mbal̄ gə̄ tə́ ō, ngɔ́n bəlo kə́ bo tə́.

²⁰ Banī a dubīn̄ naā tə́ sedə́ alé, tām̄ ḭ̄ ī-nujə ɓē yāí kɔ̄ɔ́, ḭ̄ ī-rāā adə̄ gír deē yāí gə̄ gətóon̄ kɔ̄ɔ́. Dɔ de gə̄ a ndígə̄nal gír de kə́ ngé tɔ̄l̄ de gə̄ i kə́ bátə́ gə̄ tə́.

²¹ Majə kadə̄ i yā kəndā dɔ rɔ̄ danaá yā tɔ̄l̄ ngáń kə́ dəngam gə̄ kɔ̄ɔ́ najə̄ tɔ̄l̄ ń bɔbə̄də́ gə̄ tɔ̄lə̄n̄ de gə̄ tə́ ní. Majə kadə̄ nin̄ ḭḭn̄ dɔɔ́ yā taā loo dɔ nang tə́ to̰ aĺ ō, yā rāā ɓē bo gə̄ kadə̄ taān̄ loo dɔ nang tə́ malang to̰ aĺ ō.

²² Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: M-ā m-ḭ́ḭ yā rɔ̄ɔ̄ Babilon gə̄. Rī ń na i Babilon ní ō, de kə́ kemeé gə̄ ń teēn̄ ta yo tə́ ní ō, ngáńdə́ gə̄ ō, ngán kaadə́ gə̄ ō ní, m-ā m̄-rāādə́ kadə̄ a gətóon̄ kɔ̄ɔ́.

²³ M-ā m̄-rāā ɓē bo ngeé ń toō kadə̄ a tél loo kə́ man̄ i tū tə́ ō, bɔr kə́ tū tə́ i kə́ ndul ō, kɔȳ gə̄ a ndin̄ tū tə́ ō. M-ā m-ɔ́y loo kə́ tū tə́ i kə ndəsā kə́ a nujə loo. I mā Kɔ́ɔ̄ɓē kə́ bo kə́ tɔ́gən i ngá̰ý n m-ə́da najə̄ ń noō ní.

Ta tɔ̄l̄ ta rāā kum de gə̄ ndoō tə́

²⁴ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: m̄-túbə, yá̰á̰ m-ɔ́jə rāā ní, a reē yā kudə gírí.

²⁵ M-ā m̄-nujə ko̰o̰ ɓē yā Asiri kɔ̄ɔ́ kem ɓē yān tə́, m-ā m̄-rējə̄də́ dɔ mbal̄ bo yāḿ gə̄ tə́. Nin̄ rāān̄ adə̄ ko̰o̰ ɓē yādə́ ɔȳ gír deē yāḿ gə̄ tītə̄ njúkə beé, m-ā m-ún kɔ̄ɔ́. Nin̄ əndān̄ yá̰á̰ kə́ ɔȳ dɔ bɔ̄gə̄ gír deē yāḿ gə̄ tə́. M-ā m-ūsə̄ yá̰á̰ kə́ ɔȳ ní nang tə́ kɔ̄ɔ́.

²⁶ Yá̰á̰ ń Kɔ́ɔ̄ɓē gḛy rāā kə de gə̄ malang kə́ dɔ nang tə́ ní n noó, yá̰á̰ ń ni əlań ɓōĺ kem nápar de gə̄ malang tə́ ní noó.

²⁷ Dan ń Kɔ́ɔ̄ɓē kə́ bo kə́ tɔ́gən i ngá̰ý gḛy rāā yá̰á̰ kógə̄ḿ ní, i náā n asə kəhɔn dɔ tə́ ní? Dan ń ni un jīn kə́ ɓir̄ əla kə̄ dɔɔ́ ní, i náā n asə tūr̄ jīn ní kum kə̄ loo kə́ rang tə́ ní?

Tāān̄ Pilistin gə̄

²⁸ Ɔjən̄ najə̄ ń toō i ɓāl̄ ń mban̄g Akaj oyń tə́ ní.

²⁹ Kāgə̄ ń kété əndasí sḭḭ̄ Pilistin gə̄ ní, tetən̄ kāgə̄ ní kɔ̄ɔ́, banī ī-lōōī rāā rɔ̄nel̄ najə̄n tə́. Tām̄ lī kakə́m a teē kem lī ń oy kɔ̄ɔ́ tə́ ní ō, lī kakə́ḿ ní a ojə dā̰ kə́ majaĺ ngá̰ý kə́ a ḭḭ bɔ̄gə̄ ō.

³⁰ A ulə̄n̄ ngé ndoō gə̄ majə kə yá̰a̰ kəsaá, ngé rɔ̄ tō ndoō gə̄ a ɔrə̄n̄ koō loo kə́ yá̰a̰ a ɔdə rɔ̄də́ tū tə́ aĺ tə́. Banī sḭḭ̄ Pilistin gə̄, madə̄ ba̰ā̰sí a rāān̄sí kadə̄ sḭḭ̄ malang ā óyiī yo ɓō ō, ngé gə̄ ń a teēn̄ ta yo tə́ ní, nin̄ a tɔ̄lə̄n̄də́ kɔ̄ɔ́ ō.

³¹ Sḭḭ̄ ta róbə gə̄ kə́ yā kudəń kə̄ kem ɓē bo gə̄ tə́, ī-nōōī! Sḭḭ̄ ɓē bo gə̄, ī-gángī kɔŕ! Tɔ́gə dɔ nang kə́ Pilistin kə taá malang ur̄ wak kɔ̄ɔ́, tām̄ sa hor kógə̄ḿ kə́ to tītə̄ kil̄ man̄ beé, ḭḭ dām̄ mbɔ́r ɓē kə́ ko̰ó̰ tə́ a reē noó. Ɓē madə̄ ba̰ā̰ gēé ɓáa, de kə́ əya̰ ɓūtə̄ ngé rɔ̄ɔ̄ gə̄ ba aw̄ sa̰y ní gətóo.

³² De gə̄ ń Pilistin gə̄ əlan̄də́ ní, i yā tūr̄ kədadə́ na i rí? I najə̄ ń toō: I Kɔ́ɔ̄ɓē nəkɔ́ n əndā ɓē kə́ Siyo̰ ní. Yá̰á̰ kógə̄ḿ a ɔdə rɔ̄ ngé ndoō gə̄ kə́ dan gír deē yān gə̄ tə́ alé i loo ń noō tə́.