IJAI 13 - Bibəl ta Sar̄

Gāngə̄n̄ sarya dɔ gír de gə̄ tə́ ō, əndan̄də́ tām̄ majaĺ yādə́ tə́ ō ( 13—23 ) Ta tɔ̄l̄ ta Babilon

¹ Najə̄ kə́ dɔ Babilon tə́ ń Ijai kə́ ngōn̄ Amots ənge kem yá̰á̰ ń ni a̰ā̰ tə́ ní.

² Kɔ́ɔ̄ɓē əda na: Údiī dərapóo rɔ̄ɔ̄ dɔ mbal̄ kə́ ndágə doy karī tə́. Úriī kɔĺ ī-tāāīneé ngé rɔ̄ɔ̄ gə̄. Ī-wélī jīsí ādə̄ nin̄ udən̄neé kə ta róbə yā de kə́ bo kə́ kem ɓēé gēé.

³ Ngé gə̄ ń əndān̄də́ kə rī rāā kəla yāḿ ní, i mā n m-ə́dádə́ yá̰a̰ gə̄ ń kadə̄ rāān̄ ní. m̄-ɓāŕ áskar yāḿ kə́ ger̄ rɔ̄ɔ̄ majə gə̄, ngé gə̄ ń rāān̄ rɔ̄nel̄ tetə rɔ̄ɔ̄ yāḿ ní, yā bə̄gań wōn̄g yāḿ.

⁴ Ōōī kōō yá̰á̰ ń a ɓār̄ dɔ mbal̄ gə̄ tə́ noō: I kōō de kə́ ngá̰ý gə̄. Ōōī kōō ɓē ko̰o̰ gə̄ ń a ɓār̄ noó, kōō nápar de gə̄ kə́ ɔsən̄ dɔdə́ naā tə́. I Kɔ́ɔ̄ɓē kə́ bo kə́ tɔ́gən i ngá̰ý n a əndā ma̰ȳ ɓūtə̄ áskar yān gə̄ tām̄ yā rɔ̄ɔ̄ tə́ ní.

⁵ Kɔ́ɔ̄ɓē ō, ngé gə̄ ń a bə̄gān̄ wōn̄g yān ō ní, ḭḭn̄ i sa̰y ngá̰ý n a reēn̄ ní, ḭḭn̄ i ta ngóy dɔ rā̰ kə́ dām̄ kə́rēý tə́. Nin̄ a nujən̄ ɓē malang kɔ̄ɔ́.

⁶ Úriī wúȳ kəhɔ ndoō! Dɔ ndɔ̄ yā Kɔ́ɔ̄ɓē i ngɔr. A reē i tītə̄ yá̰á̰ kə́ to kum kaȳ aĺ kə́ nujə yá̰a̰ malang kɔ̄ɔ́ beē, i Nə́ɓā kə́ bo kə́ tɔ́gən i ngá̰ý n əlan ní.

⁷ I tām̄ najə̄ ń toō tə́ n jī de gə̄ malang ur̄ wak ní, tɔ́gə de gə̄ teē kɔ̄ɔ́.

⁸ Ndíĺdə́ a̰ȳ, gír rɔ̄ tōr̄ kə́ tayā tayā gə̄ malang rāādə́. Rɔ̄də́ tōr̄də́ ngá̰ý tītə̄ dəyá̰ kə́ a rāā kem beé. Ɔr kumdə́ ngá̰ý adə̄ nin̄ a̰a̰n̄ naā. Loo təngādə́.

⁹ Ndɔ̄ yā Kɔ́ɔ̄ɓē n a reē toó. Ka̰a̰ kum tō ndoō yā deē gətóo ndɔ̄ ń noō tə́. I ndɔ̄ wōn̄g kə́ ngá̰ý. A tūr̄ dɔ nang kadə̄ tél dəla loo kə́ wōn̄g i tū tə́ ō, de gə̄ ń najə̄ i dɔdə́ tə́ ní, ni a nujədə́ kɔ̄ɔ́ ō.

¹⁰ Tə́yō̰ kə́ dɔ rā̰ tə́ gə̄ ō, ɓūtə̄ tə́yō̰ gə̄ ō ní, a nujən̄ to̰ alé. Dan ń mbang a əɓa lap anī, a tetə ndul kɔ̄ɔ́ ō, nāā a ndaa to̰ aĺ ō.

¹¹ Kɔ́ɔ̄ɓē əda na: M-ā m-ə́nda de kə́ dɔ nang tə́ gə̄ najə̄ kem ndul yādə́ tə́ ō, m-ā m-ə́ndá ngé kem ndul gə̄ najə̄ tɔ̄l̄ ń nin̄ tɔ̄lə̄n̄ de gə̄ tə́ ní ō. M-ā m̄-rāā kadə̄ kídə̄ loo yā ngé kɔjə rɔ̄ gə̄ gətóo kɔ̄ɔ́. Ngé gə̄ ń ko̰o̰ ɓē i jīdə́ nin̄ kɔ́ gə̄ tə́ ngóý ní, m-ā m̄-rāā kadə̄ kɔjə rɔ̄ yādə́ tél kə̄ nang tə́.

¹² M-ā m̄-rāā kadə̄ loo kənge deē ndul i yá̰á̰ kə́ tōr̄ tɔȳ loo kənge lɔ́ŕ kə́ unjə̄ njáý njáý, tɔȳ loo kənge lɔ́ŕ kə́ Opir.

¹³ I tām̄ najə̄ ń noō tə́ n dɔ rā̰ a ndew ō, a yéȳn̄ dɔ nang dɔ ngəran gə̄ tə́ ō ní. Yá̰á̰ ń noō a rāā yá̰a̰ sɔɔ̄ń wōn̄g yā Kɔ́ɔ̄ɓē kə́ bo kə́ tɔ́gən i ngá̰ý, ndɔ̄ ń wōn̄g yān a o̰o̰ń loo tītə̄ hor beé ní.

¹⁴ Loo ń noō tə́ mbā gə̄ kógə̄ḿ kógə̄ḿ a télən̄ yā kaw̄ gogə́ dan gír deē yādə́ gə̄ tə́, nin̄ kógə̄ḿ kógə̄ḿ a a̰ȳn̄ yā tél kaw̄ gogə́ dɔ nang yādə́ gə̄ tə́, tītə̄ kāl̄ kə́ deē ngɔ̄dən beé, tītə̄ batə̄ gə̄ kə́ de kə́ yā kɔsə njadə́ kə̄ naā tə́ gətóo beé.

¹⁵ Ngé gə̄ ń a əngen̄də́ ní a urən̄də́ kə gərāá, ngé gə̄ ń a əhɔn̄də́ ní a oyn̄ yo kaskar.

¹⁶ A rējə̄n̄ ngáń kásə̄ yādə́ gə̄ ta kumdə́ tə́, a ɔyn̄ yá̰a̰ kənge kə́ kem kújə yādə́ gə̄ tə́ dɔ gúú tə́. A sāān̄ nə̄yá̰də́ gə̄ dɔ gúú tə́.

¹⁷ Kɔ́ɔ̄ɓē əda na: M-ā m-ə́la kə Medə gēé kadə̄ rɔ̄ɔ̄n̄də́. De gə̄ ń noō usədə́ kə naraá aĺ ō, nin̄ kídə̄n̄ lɔ́r ō.

¹⁸ Ga̰ gərā yādə́ mbə́rē balsáa gə̄ tə́nīdə́, kumdə́ o̰o̰də́ kə ngáń kásə̄ gēé alé, nel̄də́ rāā ngán gə̄ yá̰á̰ kə́ tōr̄.

¹⁹ Babilon ń i ɓē kə́ majə tɔȳ ɓē gə̄ kə́ kem ɓē ko̰o̰ tə́ ō, i yá̰á̰ súū rɔ̄ kə́ majə ngá̰ý yā de gə̄ kə́ Babilon ō ní, tām̄ yān tə́ ɓáa nujə sák sák ń a teē dɔn tə́ rétə́ gēé ní, i tītə̄ nge ń teē dɔ ɓē kə́ Sodom tə́ ō, Gomor tə́ ō ní, ɓē gə̄ ń noō ń Nə́ɓā nujəń kɔ̄ɔ́ ní.

²⁰ Deē a ndi kemeé to̰ aĺ i kə́ bátə́ gə̄ tə́, kemən a ra karī i kə́ njɔ́ḿ gə̄ tə́. Ngé njə̄rā dɔɔ́ gə̄gē a əhɔn̄ loo kemeé yā ndi tū tə́ to̰ alé. Ngé ngɔ̄m̄ yá̰a̰ kul̄ gə̄ gə̄gē a aw̄n̄ kə ɓūtə̄ yá̰a̰ kul̄ yādə́ gēé tū tə́ to̰ alé.

²¹ Banī məla kə́ bembeé gə̄ a ndin̄ kem ɓē ngeé ń toō tə́, kɔȳ gə̄ a rosən̄ kem kújə gə̄ tū tə́. Burum gə̄ a rāān̄ ɓē kemeé ō, bal bə̄yā̰ gə̄ a ndāmə̄n̄ naā kemeé ō.

²² Ɓon̄g gə̄ a nōōn̄ kem kújə́ kə́ ngāl̄ ɓururu kə́ tū tə́ gə̄ tə́ ō, tal̄ gə̄ a nōōn̄ kem kújə ngol kə́ tū tə́ gə̄ ń yá̰a̰ i ngá̰ý kemeé ní tə́ ō. Kum mbang ń gír yā Babilon a gāgəń ní, dɔ i ngɔr, a reē noó. Ndɔ̄n gə̄ i kə́ tə́da kɔ̄ɔ́.