IJAI 12 - Bibəl ta Sar̄

De gə̄ tɔ̄ȳn̄ Nə́ɓā kə́ nge kajə deē

¹ Gír de gə̄ kə́ ɔrə̄n̄də́ ɓəloó, ndɔ̄ ngeé ń noō tə́ ní ā ə́da na: Kɔ́ɔ̄ɓē, m̄-rāāī kə́ra. Kété ní wōn̄g rāāī seḿ, banī wōn̄g yāí ní tetə kɔ̄ɔ́ ō, ḭ̄ ī-rāā ādə̄ kemḿ tetə kə̄ nang tə́ ō.

² Nə́ɓā ń ajəm̄ ní n toó. M-ə̄nī kemḿ ō, ɓōĺ rāām̄ to̰ aĺ ō. A̰á̰ā̰, tɔ́gə́ḿ ō, pā yāḿ ō, i Kɔ́ɔ̄ɓē. Ni i nge kajəḿ.

³ Ā ɔ́diī man̄, ta kəɓa man̄ gə̄ yā kajə tə́, i kə rɔ̄nelēé.

⁴ Ndɔ̄ ngeé ń noō tə́ ní ā ə́daī na: Ī-tɔ̄yī Kɔ́ɔ̄ɓē kə pāá, i náā n i Nə́ɓā yāsí anī, ə́daī ngá̰ý kə̄ dɔɔ́. Yá̰á̰ ń ni-rāā ní, ɔ́jiī gír de gə̄ malang ādə̄ gerə̄n̄.

⁵ Ə̄nī pā tām̄ yā Kɔ́ɔ̄ɓē tə́, tɔdɔ̄ ni-rāā yá̰á̰ kə́ bo gə̄. Yá̰á̰ kə́ bo gə̄ ń ni-rāā ní, ə́daī de kə́ dɔ nang tə́ gə̄ malang ādə̄ gerə̄n̄ gō!

⁶ Ḭ̄ ń ī-ndi Siyo̰ ní, ɔ́jə rɔ̄nel̄ yāí kə̄ ndágá, úr kɔĺ rɔ̄nel̄! A̰á̰ā̰, Nə́ɓā kə́ táĺ yā Israel ń ndi dansí tə́ ní, i de kə́ bo!