IJAI 11 - Bibəl ta Sar̄

Dabid kə́ kijə

¹ Ngōn̄ kə́ dəngam kógə̄ḿ a teē dan de gə̄ kə́ kem kojə yā Jese tə́, tītə̄ ta jī kāgə̄ kə́ dūú kə́ əɓa kadə ɓōdə̄ kāgə̄ kə́ tɔgə kɔ̄ɔ́ tə́ beē. Ta jī kāgə̄ kə́ əɓa dɔ ngəran gə̄ tə́.

² Ndíl Kɔ́ɔ̄ɓē a ndi dɔn tə́. A adə̄n kum kedə̄ ō, kəndā ma̰ȳ yá̰a̰ ō, a rāā seneé kadə̄ a unəń ndūn dɔ yá̰a̰ gə̄ tə́ ō, a adə̄n wur kil ō, a rāā kadə̄ a ger̄ Kɔ́ɔ̄ɓē ō, a ndóōn loo ɓōĺ ndíĺ Kɔ́ɔ̄ɓē ō.

³ Loo ń noō tə́ ɓōĺ ndíĺ Kɔ́ɔ̄ɓē a nel̄ deē ngeé ń noō ō. Ni a gān̄g sarya i kə gō yá̰á̰ ń kumən a̰a̰ ní alé. Ni a un ndūn dɔ yá̰á̰ tə́ i sɔɔ̄ ń yá̰á̰ ni oō kə mbīneé ní alé.

⁴ Ni a gān̄g sarya yā ngé ndoō gə̄ i kə gō róbə́ yá̰á̰ kə́ gōtə́. De kə́ kem ɓēé gə̄ ń de kə́ nge rɔ̄ɔ̄ dɔdə́ tə́ gətóó ní, ni a gān̄g sarya kə́ gōtə́ tām̄ yādə́ tə́. Ni a ənda de kə́ kem ɓē yān tə́ gə̄ kə najə̄ kə́ tan tə́ tītə̄ kə́ i kə sálang kāgāá beē. Najə̄ kə́ tan tə́ a tɔ̄l̄ de kə́ majaĺ gə̄.

⁵ Tām̄ yān tə́ ɓáa yá̰a̰ rāā kə́ gōtə́ ō, ra dɔ ndū tə́ ō, a ton̄ i tītə̄ ndāŕ ń deē a do̰ō̰ ɓōdə̄n tə́ ngándáńg ní beē.

⁶ Loo ń noō tə́ soó a ndi naā tə́ kə ngōn̄ batāá ō, kagə a to kadə ngōn̄ bə̄yā̰ tə́ ō. Ngōn̄ man̄g nin̄ kə balsáa ɓɔl a əsan̄ yá̰a̰ naā tə́ ō, ngōn̄ kə́ dūú a njə̄rā nodə́ tə́ yā kɔr nodə́ ō.

⁷ Man̄g nin̄ kə dā̰ úrsə a əsan̄ yá̰a̰ loo kə́ kógə̄ḿ beē tə́ ō, ngáńdə́ gə̄ a ndin̄ naā tə́ loo kə́ yá̰á̰ kógə̄ḿ a ɔdə rɔ̄də́ tū tə́ aĺ tə́ ō. Ɓɔl a əsa mu tū tə́ tītə̄ man̄g beé.

⁸ Ngōn̄ kə́ ta mba tə́ a kógə̄ naā loo kə́ lī rāā ɓē tū tə́ tə́ ō, ngōn̄ kə́ dəngam kə́ dūú a asə kəla jīn loo kə́ lī kakə́m ɓɔ̄ɔ̄ rɔ̄n tū tə́ tə́ ō.

⁹ Yá̰á̰ kə́ majaĺ, aké yá̰a̰ rāā kə́ kə dɔ́nɔ́ a to dɔ mbal̄ kə́ táĺ yā Kɔ́ɔ̄ɓē tə́ to̰ alé. Tām̄ ger̄ Kɔ́ɔ̄ɓē a taā loo kem ɓēé, tītə̄ ń man̄ taāń loo kum bā bo gə̄ tə́ ní beē.

¹⁰ Ndɔ̄ ngeé ń noō tə́ ní, ngōn̄ kaa Jese a to tītə̄ dərapóo rɔ̄ɔ̄ yā gír de gə̄ kə́ dɔ nang tə́, kə́ a ɔjə kadə̄ yá̰á̰ kógə̄ḿ a rāā yá̰a̰. Nápar de gə̄ a reēn̄ yā dəjen kadə̄ adə̄də́ kɔjə ō, loo ń ni a ndi tū tə́ ní, kɔsə gɔn yā Nə́ɓā a ndə́lē tū tə́ ō.

De gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, tél reēn̄

¹¹ Ndɔ̄ ngeé ń noō tə́ ní, Kɔ́ɔ̄ɓē a əla jīn kə́ kə tɔ́gɔ́ ɓáý to̰ yā kɔrə̄ń gotə gír deē yān gə̄ ń na̰yn̄ ní ɓəloó, adə̄ i ngé gə̄ ń a ndin̄ dɔ nang kə́ Asiri tə́ ō, Ejiptə tə́ ō, Patəros tə́ ō, Kus tə́ ō, Elam tə́ ō, Sinear tə́ ō, Hamat tə́ ō, dor̄ loo gə̄ kə́ kum bā bo gə̄ tə́ ō ní.

¹² Ni a udə dərapóo rɔ̄ɔ̄ yā tāań nápar de gə̄ ngeé ń toō najə̄ yá̰á̰ ń ni sāā rāā tə́ ní. Israel gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, ni a ɔsə dɔdə́ naā tə́ ō, Juda gə̄ ń aw̄n̄ kə̄ kíl dɔ nang kə́ sɔ́ gə̄ tə́ ní, ni a kán̄də́ kə̄ naā tə́ ō.

¹³ Loo ń noō tə́ Epəraim a ənda Juda to̰ alé. A nujən̄ ngé rɔ̄ɔ̄ Juda gə̄ kɔ̄ɔ́ ō, madə̄ ba̰ā̰ Epəraim i Juda to̰ aĺ ō.

¹⁴ Nin̄ a aw̄n̄ naā tə́ mbak dɔ ngán mbal̄ gə̄ yā Pilistin gə̄ tə́, dām̄ kə́ no ɓē tə́. Nin̄ a ɔyn̄ yá̰a̰ kənge gə̄ yā gír ɓē gə̄ ń ndin̄ dəla loo tə́ ní dɔ gúú tə́, dām̄ kə́ gír ɓē tə́. Edom nin̄ kə Moab a əlan̄ dɔdə́ gíŕ tɔ́gə yādə́ tə́ ō, Amon gə̄ a oōn̄ tadə́ ō.

¹⁵ Bā bo kə́ Ejiptə ní, Kɔ́ɔ̄ɓē a rāā kadə̄ man̄ kə́ tū tə́ gətóo kɔ̄ɔ́. Ni a wél̄ jīn yā kəlań ɓōĺ kem bā Opəratə tə́. Ni a gān̄g bā ngeé ń toō kə koō kə́ tan tə́ kə́ tɔ́gən i ngá̰ý kadə̄ a téĺ ngán man̄ gə̄ gír loo sīrí. Deē a asə teē man̄ gə̄ ní kə sākə̄rāá njan tə́.

¹⁶ De gə̄ yān gə̄ ń a teēn̄ ta yo tə́ dɔ nang kə́ Asiri tə́ ní, róbə́ kógə̄ḿ a to tām̄ yādə́ tə́. A to i tītə̄ ń kaadə́ gə̄ teēnəń kɔ̄ɔ́ kem ɓē kə́ Ejiptə tə́ kété jóó ní.