IJAI 10 - Bibəl ta Sar̄

Ngé rāā Kɔ́ɔ̄ɓē kadə̄ wōn̄g rāān gə̄

¹ I yá̰á̰ kə́ to kum kaȳ aĺ kə́ ba̰ý beē tām̄ yā ngé kəndā ndū najə̄ kə́ gōtə́ aĺ gə̄ tə́, tām̄ yā ngé ndang ndū najə̄ gə̄ kə́ a rāān̄ madə̄də́ gə̄ tə́ adə̄ a̰a̰n̄ tápə̄ tə́!

² I tītə̄ ń noō n ɔgə̄nəń kadə̄ gāngə̄n̄ sarya yā ngé ndoō gə̄ kə gōó ní, de gə̄ kə́ dan deē yāḿ gə̄ tə́ ń nge rɔ̄ɔ̄ dɔdə́ tə́ gətóó ní, nin̄ ɔgə̄n̄də́ yá̰á̰ kə́ sɔɔ̄də́. Nin̄ ɓogən̄ dəyá̰ kə́ ngaa koy gə̄ ō, ɔyn̄ yá̰a̰ yā ngán hal gə̄ dɔ gúú tə́ ō.

³ Dan ń Kɔ́ɔ̄ɓē a rāā yá̰a̰, dan ń yá̰á̰ kə́ to kum kaȳ aĺ a ḭḭ sa̰y yā reē ní, ā ī-rāāī i ba̰ý? I náā n ā ā̰yī yā kaw̄ looneé kadə̄ rāā sesí ní? Ā ə́ya̰ī yá̰a̰ kənge yāsí gə̄ i loo kə́ rá tə́?

⁴ Yá̰á̰ ń sḭḭ̄ ásiī rāā ní, i rugə nang tə́ dan dəngáy gə̄ tə́, aláa i kəsō nang tə́ dan nīń gə̄ tə́ ngóy. Nge ń noō gə̄gē rāā adə̄ wōn̄g yā Kɔ́ɔ̄ɓē tetə alé, jīn kə́ ɓir̄ i kə́ kəla kə̄ dɔɔ́ ɓáý.

Asiri rāā yá̰a̰ adə̄ mān̄ naā wa̰t

⁵ Kɔ́ɔ̄ɓē əda na: I yá̰á̰ kə́ to kum kaȳ aĺ kə́ ba̰ý beē tām̄ yā Asiri tə́, ni ń wōn̄g rāām̄ anī m-únən m-ə́ndań ndéý ní! M-ā m-ɔ́jə wōn̄g ní i kāgə̄ ń ni-əhɔ jīn tə́ ní.

⁶ M-ə́lá áskar yān gə̄ kə̄ dɔ nápar de gə̄ kə́ ngé ran̄ dɔ ndūdə́ tə́ aĺ gə̄ tə́, yā kadə̄ rɔ̄ɔ̄n̄də́. M-ɔ́r nodə́ m-āw̄ sedə́ kə̄ dɔ gír de gə̄ kə́ rāāmə̄n̄ adə̄ wōn̄g rāām̄ tə́. Ādə̄ Asiri ɔy yá̰a̰ kənge yā gír de gə̄ ní dɔ gúú tə́! Ādə̄ ni tə́ɓādə́ tītə̄ loo tə́ɓā bɔr kə́ kum róbə kɔsə gə̄ tə́ beē!

⁷ Banī Asiri a̰a̰ yá̰a̰ gə̄ ní i tītə̄ ń noō alé. Gír̄ yān i tayā. Ni gír̄ i nujə loo ngóy, gír̄ i rāā kadə̄ nápar de gə̄ ngá̰ý udən̄ kɔ̄ɔ́ ngóy.

⁸ Ni-əda na: Go̰ rɔ̄ɔ̄ yāḿ gə̄ malang nin̄ i mban̄g gə̄ aĺ a?

⁹ Yá̰á̰ ń m̄-rāā kə ɓē kə́ Kalne ní, to tītə̄ yá̰á̰ ń m̄-rāā kə ɓē kə́ Karkemis ní waḿ? Yá̰á̰ m̄-rāā kə ɓē kə́ Hamat ní, to tītə̄ yá̰á̰ ń m̄-rāā kə ɓē kə́ Arpad ní ō, yá̰á̰ ń m̄-rāā kə ɓē kə́ Samari ní, to tītə̄ yá̰á̰ ń m̄-rāā kə ɓē kə́ Damas ní ō.

¹⁰ m̄-ger̄ loo taā ɓē ko̰o̰ gə̄ yā nə́ɓā kə́ rɔ̄kum aĺ gə̄, loo gə̄ ń yá̰á̰ kə́ tɔ́sə̄ kum gotədə́ gə̄ i ngá̰ý tū tə́ tɔȳ kə́ Jerusalem ō, tɔȳ kə́ Samari ō ní.

¹¹ Yá̰á̰ ń m̄-rāā kə ɓē kə́ Samari ō, kə nə́ɓā yān gēé ō ní, m-ásə rāā kə ɓē kə́ Jerusalem ō, kə yá̰a̰ yān gə̄ kə́ tɔ́sə̄n̄ kum gotə yá̰a̰ gə̄ ō aĺ á?

¹² Dan ń Kɔ́ɔ̄ɓē a rāā kəla yān kə́ dɔ mbal̄ Siyo̰ tə́ ō, kə́ Jerusalem ō malang gír gān̄g anī, ni a rɔ̄ɔ̄ mban̄g kə́ Asiri, a rɔ̄ɔ̄ ngarā̰ kemən ń a ɔjə rɔ̄n ní ō, ka̰a̰ loo yān kə́ kə kídə̄ looó ō.

¹³ Tām̄ mban̄g ngeé ń toō əda na: Yá̰a̰ malang ń m̄-rāā ní, i kə ta kūl̄ tɔ́gə́ḿ ō, kum kedə̄ yāḿ ō, tɔdɔ̄ mā i de kə́ m̄-ger̄ yá̰a̰. m̄-rāā adə̄ dɔ nin̄ loo gə̄ yā gír de gə̄ gətóo kɔ̄ɔ́ ō, m̄-ɓogə yá̰a̰ kənge yādə́ gə̄ kə́ to loo ɓɔ̄ɔ̄ tə́ ō. m̄-rāā mban̄g gə̄ adə̄ risən̄ kɔ̄ɔ́ dɔ kōr̄ kāgə̄ mbang yādə́ gə̄ tə́ ō.

¹⁴ M-ɔ́ý yá̰a̰ kənge gə̄ yā gír de gə̄ tītə̄ loo kɔr̄ ɓē yel̄ beé. M-ɔ́ý yá̰a̰ malang kə́ dɔ nang tə́ tītə̄ loo kɔy kaw kə́ kəya̰ kɔ̄ɔ́ beē. De kə́ ibə bɔ̄gə̄n, aláa teē tan əgań kɔŕ gətóo.

¹⁵ Kə̄ngā ənda kadən kum gotə nge kunən tə́gań yá̰a̰ a? Gində̄ kəja kāgə̄ ɔjə rɔ̄n kum gotə nge kunən kəjań kāgə̄ a? To tītə̄ kə́ i ndéy n i nge rāā kadə̄ jī kə́ kunən unən dɔɔ́ beé, aláa i tītə̄ kə́ i sálang kāgə̄ n i nge kɔr no jī kə́ nge kəhɔn beé.

¹⁶ I tām̄ najə̄ ń toō tə́ n Kɔ́ɔ̄ɓē kə́ bo kə́ tɔ́gən i ngá̰ý, ni ń i ngol ní, a rāā kadə̄ yá̰a̰ kənge yā gō nang gə̄ kə́ yá̰a̰ kənge i ngá̰ý tū tə́ gə̄ tél kə̄ nang tə́ ní. Hor kógə̄ḿ a taā loo gír majədə́ tə́ gírí nang tə́, tītə̄ hor kə́ o̰o̰ loo beé.

¹⁷ Kɔ́ɔ̄ɓē ń i loo kə́ unjə̄ kow yā Israel ní, a tél hor kógə̄ḿ. Ta ndo̰ hor gə̄ yā Nə́ɓā kə́ táĺ a əla hor tū túpə kōn̄ gə̄ tə́ ō, hor ní a o̰o̰də́ i kem ndɔ̄ kógə̄ḿ beē ō.

¹⁸ Ni a nujə kə kāgə̄ kə́ majə ngá̰ý gə̄ kɔ̄ɔ́ malang ō, kāgə̄ gə̄ malang ń a anə̄n̄ ní, ni a nujədə́ kɔ̄ɔ́ ō. Ɓē a to tītə̄ nge mo̰y kə́ tɔ́gən teē kɔ̄ɔ́ beē.

¹⁹ Kāgə̄ gə̄ kə́ kem ku yā Asiri tə́ a na̰yn̄ i sḛ́ý beē, adə̄ ngōn̄ kə́ dūú a asə tə́da kutədə́.

Israel gə̄ ń teēn̄ ta yo tə́ ní

²⁰ Kem ndɔ̄ɔ́ ń noō tə́ ní, gotə Israel gə̄, ngé teē ta yo tə́ gə̄ kə́ gír kojə yā Jakob tə́ a lōōn̄ gír kəndā tɔ́gə́də́ dɔ nge ń i nge kəndadə́ tə́ ní: Nin̄ a əndān̄ tɔ́gə́də́ rɔ̄kum i dɔ Kɔ́ɔ̄ɓē ń i kə́ táĺ yā Israel ní tə́.

²¹ Gotə gə̄ ń a na̰yn̄ ní a télən̄ yā reē. A̰á̰ā̰, gotə Israel gə̄ ń a na̰yn̄ ní a tūrə̄n̄ rɔ̄də́ kə̄ rɔ̄ Nə́ɓā kə́ tɔ́gən to tə́

²² Tá Israel, ká ré kutə gír deē yāí gə̄ i ngá̰ý tītə̄ nán̄g ngárə̄ḿnjēý kə́ ta bā bo tə́ gə̄gē, i gotədə́ ń a na̰y ní ngóy n a tél yā reē rɔ̄ Kɔ́ɔ̄ɓē tə́ ní. Unən̄ ndūdə́ kɔ̄ɔ́ yā nujə loo. Yá̰a̰ rāā kə́ gōtə́ a taā loo tītə̄ man̄ beé.

²³ A̰á̰ā̰, nujə loo ngeé ń toō ní, Kɔ́ɔ̄ɓē Nə́ɓā kə́ bo kə́ tɔ́gən i ngá̰ý un ndūn najə̄n tə́ kɔ̄ɔ́, adə̄ ni-rāā kadə̄ yá̰á̰ ní reē udə gírí kem ɓēé malang.

Ī-lōōī ɓōĺ Asiri

²⁴ I tām̄ najə̄ ń toō tə́ n Kɔ́ɔ̄ɓē Nə́ɓā kə́ bo kə́ tɔ́gən i ngá̰ý əda najə̄ ń toō ní: Gír deē yāḿ gə̄, sḭḭ̄ ń ī-ndiī Siyo̰ ní, ī-lōōī ɓōĺ Asiri. Ni əndasí kə məraw, un sálang kāgə̄ yān kə̄ dɔsí tə́, tītə̄ ń de kə́ Ejiptə tə́ gə̄ rāānəń kété jóó ní.

²⁵ Ba na̰y kum mbang i ngá̰ý aĺ yā kadə̄ wōn̄g ń rāām̄ seí ní dəba, gír wōn̄g ní a gān̄g kɔ̄ɔ́.

²⁶ Tām̄ Kɔ́ɔ̄ɓē kə́ bo kə́ tɔ́gən i ngá̰ý a un məraw yān kə̄ dɔ Asiri tə́, tītə̄ ń ni rāań kə Madian gēé mbal̄ kə́ Oreb tə́ ní. Ni a un sálang kāgə̄ yān yā kəla kə̄ dɔ bā bo tə́ tītə̄ ń rāań kə ɓē kə́ Ejiptə ní.

²⁷ Ndɔ̄ ngeé ń noō tə́ ní, yá̰a̰ kətō ń ndi mbajə dɔ bɔ̄gīí tə́ ní, yá̰a̰ kətō ń ɔȳ míndí tītə̄ njúkə beé ní, ni a un kɔ̄ɔ́. Madə̄ ba̰ā̰ gə̄ aw̄n̄ Samari,

Madə̄ ba̰ā̰ gə̄ i ngɔr kə ɓē kə́ Jerusalem

²⁸ Nin̄ ugə̄n̄ ngɔr kə̄ Ayat. Nin̄-mān̄ aw̄n̄ Migəron, ba əya̰n̄ yá̰a̰ kəto yādə́ gə̄ Mikəmas.

²⁹ Nin̄-əndan̄ dūn̄ róbə́ kə́ dūú ngá̰ý gāngə̄n̄ ba ədan̄ na: Jə-ɓīī Geba. Ɓōĺ rāā de kə́ Rama gə̄ adə̄ ndewn̄. Gibea ń i ɓē yā Saul ní, de kə́ kemeé gə̄ a a̰ȳn̄ i naā.

³⁰ Sḭḭ̄ de kə́ Galim gə̄, ə́gaī kɔŕ! Ḭ̄ Layisa, á̰á̰ já̰já̰ dɔ rɔ̄í tə́! Ḭ̄ Anatot, ī-dal najə̄!

³¹ De kə́ Madəmena gə̄ a a̰ȳn̄ naā, ngé kə́ Gebim gə̄ a sāān̄ i loo kə́ yā ɓɔ̄ɔ̄ń rɔ̄də́.

³² Ndɔ̄ ngeé noō tə́ ní madə̄ ba̰ā̰ gə̄ dəban̄ Nob. Nin̄-unən̄ jīdə́ kə́ ɓir̄ əlan̄ kə̄ dɔɔ́, yā kəlań ɓōĺ kem mbal̄ bo kə́ Siyo̰ tə́, kem ngōn̄ mbal̄ kə́ Jerusalem tə́.

³³ Kɔ́ɔ̄ɓē kə́ bo kə́ tɔ́gən i ngá̰ý, ni ń i ngol ní, tétə̄ ta jī kāgə̄ gə̄ kə tɔ́gɔ́. Gángə̄n̄ kāgə̄ kə́ bo tɔȳ madə̄ gə̄ kɔ̄ɔ́, mbə́rēn̄ ngé kə́ ngāl̄ tɔȳ madə̄ gə̄ tə́nīn̄də́ nang tə́.

³⁴ Tə́gān̄ túpə́ kámbə gə̄ kə́ kem ku kāgə̄ tə́ kə kə̄ngāá ɓōkə́n̄də́ nang tə́. Kāgə̄ sédər kə́ majə ngá̰ý gə̄ kə́ Liban tə́sōn̄ nang tə́.