HEBƏRO 9 - Bibəl ta Sar̄

Loo rāań a rāān̄ kəla adə̄n̄ Nə́ɓā dɔ nang tə́ ō, dɔ rā̰ tə́ ō ní

¹ Madə̄ naā kə́ ta kəga dɔ aw̄ kə ndū najə̄ gə̄ kə́ dɔ rāań a rāān̄ kəla adə̄n̄ Nə́ɓā tə́ ní ō, aw̄ kə kújə yā Kɔ́ɔ̄ɓē dɔ nang tə́ ō.

² Adə̄ udən̄ kújə tandā. Kemən kə́ ta kəga dɔ ń a ɓārə́n̄ na i loo kə́ táĺ ní, əndān̄ ɗəra hor ō, tábəl kə́ ɓōkə́n̄ mápá gə̄ kə́ yā ndējə̄n̄ Nə́ɓā dɔ tə́ ō, tū tə́.

³ Kemən kə́ nge ko̰ jōó i gidə kūbə̄ gān̄g kem kújə́ kə́ ko̰ jōó tə́. A ɓārə́n̄ kemən kə́ ko̰ jōó ní na i loo kə́ táĺ ngá̰ý.

⁴ Loo tun̄ yá̰á̰ kə́ rāā kə lɔ́rɔ́ ń a róōń ndujə̄ yá̰á̰ kə́ kotə majə dɔ tə́ ní, i tū tə́ ō, sandúkə madə̄ naā ń tə́ya̰n̄ lɔ́r gidə tə́ malang ní, i tū tə́ ō. Kem sandúkə́ ní yá̰a̰ gə̄ ń noō i kemeé, jóó lɔ́ŕ ń mána i kemeé ní ō, kāgə̄ yā Aaro̰ ń hútə̄ ní ō, ngán bar mbal̄ gə̄ ń ndangən̄ najə̄ gə̄ kə́ dɔ madə̄ naā tə́ tū tə́ ní ō.

⁵ De kə́ dɔ rā̰ tə́ gə̄ kə́ to kɔsə gɔn gə̄ i dɔ tə́, rāān̄ ndíl dɔ loo kənge mā̰ȳ rɔ̄ tə́ ń i dɔ sandúkə madə̄ naā tə́ ní. Ba ngɔlaā ní, loo kɔr̄ najə̄ gə̄ ń noō kə ta njaá kógə̄ḿ kógə̄ḿ gətóo.

⁶ Dan ń yá̰a̰ gə̄ ń noō malang i kə́ tə́ndādə́ tītə̄ ń noō ní, ngé tun̄ yá̰a̰ gə̄ a udən̄ kem kújə tandā kə́ ta kəga dɔ tə́ i kə dɔ ndɔ̄ gə̄ yā rāań kəla yādə́.

⁷ Ba i ngol ngé tun̄ yá̰a̰ gə̄ ngóy n i nge kudə kem kújə́ tandā kə́ nge ko̰ jōó tə́ ní. Ni a udə kemeé i nja kógə̄ḿ kem ɓāl̄ kógə̄ḿ, kə mósə dā̰á̰ yā ndējə̄ Nə́ɓā tām̄ majaĺ yān nəkɔ́ tə́ ō, yā ngán Israel gə̄ tə́ ō.

⁸ I tītə̄ ń toō n Ndíĺ kə́ Táĺ ɔjəjí kadə̄ dan ń kújə́ kə́ kété to ɓáý ní, róbə́ kə́ loo kə́ táĺ ngá̰ý ta teē aĺ ɓáý.

⁹ Nge ń noō i ndíĺ yá̰á̰ kə́ ɔjə dɔ kum mbang kə́ ngɔlaā ń toō. Ndíĺ yá̰á̰ ní ɔjə kadə̄ karī gə̄ ō, dā̰ kə́ tɔ̄l̄ ba tun̄ kadə̄ Nə́ɓā ō ní, asən̄ rāā kadə̄ kem nge rāā kəla kadə̄ Nə́ɓā tītə̄ ń noō majə ɔtə kə taá alé.

¹⁰ Najə̄ kə́ tū tə́ i najə̄ kə́ dɔ yá̰a̰ kəsa gə̄ tə́ ō, yá̰a̰ ka̰ȳ tə́ ō, tə́go rɔ̄ kə́ tayā tayā gə̄ tə́ ō ngóy. Adə̄ i gō jī loo rāā yá̰a̰ de gə̄, kə́ rāān̄neé kəla bátə́ ugə̄ kum mbang ń Nə́ɓā tūrəń gír yá̰a̰ gə̄ tə́ ní.

¹¹ Banī Kərist i tītə̄ ngol ngé tun̄ yá̰a̰ gə̄, yā kadə̄jí yá̰á̰ kə́ majə gə̄ ń a reēn̄ ní. Kújə tandā ń ni-mān̄ kemeé ní, i kújə tandā kə́ bo ngá̰ý tɔȳ ō, kə́ majə ngá̰ý tɔȳ ō, i de gə̄ n rāān̄ kújə ní kə jīdə́ alé. Kumən na kújə́ ní i kújə́ kə́ dɔ nang tə́ laā alé.

¹² Kərist udə kem loo kə́ táĺ ngá̰ý tə́ nja i kógə̄ḿ beē yā kadə̄ gír gāngəń. Mósə́ ń ni-ndējə̄ ní, i mósə bal bə̄yā̰ gə̄ aĺ ō, duĺ man̄g aĺ ō, banī i mósən nəkɔ́. I tītə̄ noō n ni-gāngəń dɔjí kə́ njɔ́ḿ gə̄ tə́ tām̄ majaĺ yājí gə̄ tə́ ní.

¹³ Ré mósə bal bə̄yā̰ gə̄ ō, mósə man̄g kə́ bəra gə̄ ō, man̄ ń bū mandə man̄g i tū tə́ á sə̄kān̄ dɔ ngé gə̄ ń adə̄ majaĺ tákə̄ dā̰ rɔ̄də́ to̰ alé ba télən̄ de kə́ kɔr̄ kam̄ tām̄ yā Nə́ɓā tə́ gə̄ anī,

¹⁴ mósə Kərist ń adə̄ Nə́ɓā rɔ̄n nəkɔ́ kə́ kanjə̄ yá̰á̰ kə́ majaĺ tákə̄ kə ta kūl̄ Ndíĺ kə́ Táĺ kə́ ndi ngándáńg ní a rāā yá̰á̰ kə́ majə ngá̰ý tɔȳ aĺ a? Ni a ɔr̄ kəla rāājī ń aw̄ yā tɔ̄l̄jí ní kemjí tə́ kɔ̄ɔ́ yā kadə̄ kemjí unjə̄ ō, kadə̄ jə-rāāī kəla yā Nə́ɓā kə́ ndi kə kumneé.

¹⁵ I tām̄ najə̄ ń toō tə́ n Kərist i nge ra mbənā tə́ tām̄ yā madə̄ naā kə́ kíjə tə́ ní. Adə̄ i tām̄ yā madə̄ naā kə́ kijə tə́. Ni-oy i yā gāngə̄ń dɔ ngé gə̄ ń mānə̄n̄ dɔ ndū najə̄ gə̄ yā madə̄ naā kə́ kété tə́ ní, adə̄ ngé gə̄ ń ɓārə́n̄də́ ní a əngen̄ yá̰á̰ kə́ to ngándáńg ń Nə́ɓā ənī míndən dɔ tə́ yā kadə̄ ngánən gə̄ ní.

¹⁶ Dan ń kənī ndū i dɔ yá̰a̰ gotə yo tə́ ní, i gáŕ kadə̄ gerə̄n̄ majə na nge kənī ndū ní oy pá tá.

¹⁷ Tɔdɔ̄ ndū kə́ kənī tām̄ yā yá̰a̰ gotə yo tə́ ní, tɔ́gən a to i dan ń deē oy kɔ̄ɔ́ ní. Ba ré deē ń ənī ndūn ní ndi kə kumneé ɓáý anī, ndūn ń ənī ní a rāā kəla alé.

¹⁸ I tām̄ ń toō tə́ n madə̄ naā kə́ ta kəga dɔ gə̄gē rāān̄ i kə mósə ní.

¹⁹ Tɔdɔ̄ gō ń Moijə tə́da gō míndə gə̄ kógə̄ḿ kógə̄ḿ malang kə́ kem makətūbə̄ ndū najə̄ tə́, adə̄ ngán Israel gə̄ malang ní, ni-un mósə duĺ man̄g gə̄ ō, bal bə̄yā̰ gə̄ ō, naā tə́ kə maná ō, bḭḭ̄ batə̄ kə́ kərē ō, kámbə isopə ō, sə̄kāń dɔ makətūbə̄ nəkɔ́ tə́ ō, dɔ ngán Israel gə̄ tə́ malang ō,

²⁰ ba əda na: Nge ń tō i mósə́ kə́ ɔjə kadə̄ madə̄ naā ń Nə́ɓā əhɔ sesí ní i madə̄ naā kə́ rɔ̄kum.

²¹ Gō tə́ anī ni-sə̄kā mósə dɔ kújə tandā tə́ ō, dɔ ngáń gájə́ yá̰a̰ rāā kəla gə̄ yā Nə́ɓā tə́ malang ō.

²² Kə gō ndū najá ní, na̰y i sḛ́ý beē kadə̄ i mósə n rāā kadə̄ yá̰a̰ gə̄ malang unjə̄n̄ njáý njáý ní, ba ré mósə a̰ȳ nang tə́ aĺ anī, mā̰ȳ rɔ̄ a gətóo.

Yá̰a̰ tun̄ yā Kərist un majaĺ gə̄ kɔ̄ɔ́

²³ Ré ndíĺ yá̰a̰ gə̄ kə́ dɔ rā̰ tə́ ní a tə́gon̄də́ kadə̄ unjə̄ njáý njáý anī, i gáŕ kadə̄ kɔ̄r̄ kum yá̰a̰ gə̄ kə́ dɔ rā̰ tə́ ní, a tə́gon̄də́ kadə̄ unjə̄n̄ njáý njáý i kə yá̰a̰ tun̄ kə́ majə tɔȳ ngé gə̄ ń noō.

²⁴ Tɔdɔ̄ i loo kə́ táĺ kə́ jī deē rāā, adə̄ i ndíl loo kə́ táĺ kə́ rɔ̄kum n Kərist udə kemeé ní alé. Banī i dɔ rā̰ nəkɔ́ n ni udə kemeé ní. Ngɔlaā ni-ra ta kum Nə́ɓā tə́ tām̄ yājí tə́ i loo ń noō tə́.

²⁵ Ngol ngé tun̄ yá̰a̰ gə̄ ní udə kem loo kə́ táĺ tə́ kə dɔ ɓāl̄ gə̄ i kə mósə dā̰á̰. Banī Kərist udə kemeé i yā kadə̄ rɔ̄n nəkɔ́ yá̰a̰ tun̄ tə́ kə̄ nja naā tə́ alé.

²⁶ Ré i beé aĺ anī, əla gír ndɔ̄ ń Nə́ɓā əndāń dɔ rā̰ ō dɔ nang ō tə́ bátə́ ngɔlaā ní, Kərist a̰a̰ tápə̄ nja i ngá̰ý kɔ̄ɔ́. Banī ngɔlaā ń i ta ngóy ndɔ̄ gə̄ ní, ni-teē nja kógə̄ḿ yā kadə̄ gír gāngəń. I tītə̄ noō n ni-nujəń majaĺ kɔ̄kə́, kə ta kūl̄ kadə̄ rɔ̄n nəkɔ́ yá̰a̰ tun̄ tə́ ní.

²⁷ Ba tītə̄ ń əndān̄ dɔ deē ndul gə̄ tə́ kadə̄ oyn̄ nja kógə̄ḿ beē, ba gō tə́ anī Nə́ɓā gān̄g sarya dɔdə́ tə́ ní,

²⁸ i tītə̄ ń noō n Kərist adə̄ rɔ̄n yá̰a̰ tun̄ tə́ nja kógə̄ḿ yā kunəń majaĺ yā de gə̄ ngá̰ý gə̄ kɔ̄ɔ́ ní. Ni a teē nja kə́ nge ko̰ jōó, i yā kun majaĺ kɔ̄ɔ́ to̰ alé, banī i yā kajə ngé gə̄ ń ndi ngóōnən̄ ní.