HEBƏRO 7 - Bibəl ta Sar̄

Melkisedek i mban̄g ō nge tun̄ yá̰a̰ ō

¹ Melkisedek ngeé ń toō ni i mban̄g kə́ Salem tə́ ō, nge tun̄ yá̰a̰ yā Nə́ɓā kə́ dɔɔ́ ō. Dan ń Abəraham tetə mban̄g gə̄ rɔ̄ɔ̄ ba a tél a reē kə̄ ɓēé anī, Melkisedek ɔjə non ba tɔ́r̄ tan dɔn tə́.

² Anī Abəraham ɔr̄ dɔ yá̰á̰ kə́ nge ko̰ kutə dɔ yá̰a̰ gə̄ malang adə̄n. Rī ń na i Melkisedek ní, kumən kə́ ta kəga dɔ na i mban̄g yā yá̰á̰ kə́ gōtə́. Tá ni i mban̄g kə́ Salem ɓáý to̰, kumən na i mban̄g yā kem sɔl̄ lɔm ō.

³ Deē ger̄ bɔbə̄n aĺ ō, kó̰o̰n aĺ ō, kaan aĺ ō. Deē ɔr̄ najə̄ kə́ dɔ kojən tə́ aĺ ō, kə́ dɔ koyn tə́ aĺ ō. Ni to tītə̄ Ngōn̄ Nə́ɓā beé, adə̄ ni-ndi nge tun̄ yá̰á̰ ngándáńg.

⁴ Á̰a̰ī kadə̄ Melkisedek i de kə́ bo. Kaají Abəraham gə̄gē, yá̰a̰ malang ń ni-əhɔ ta rɔ̄ɔ̄ tə́ ní, ɔr̄ kə́ nge ko̰ kutə adə̄n.

⁵ Ngán Lebi gə̄ ń nin̄ i ngé tun̄ yá̰a̰ gə̄ ní, ədan̄də́ kadə̄ táān̄ yá̰a̰ malang kə́ nge ko̰ kutə jī ngán Israel gə̄ tə́ kə gō ndū najá. Kumən na táān̄ yá̰a̰ gə̄ ní i jī ngákó̰ó̰də́ nin̄ kɔ́ gə̄ tə́. Tá ngákó̰ó̰də́ gə̄ ní, i ngán kaa Abəraham gə̄ ō.

⁶ Melkisedek ni i de kə́ gír kaa yā Lebi tə́ alé, banī ni-taā yá̰á̰ kə́ nge ko̰ kutə jī Abəraham tə́. Tá ɓáý tó̰ ní, ni tɔ́r̄ tan dɔ deē ń Nə́ɓā ənī míndən adə̄n tə́ ní.

⁷ Kadə̄ i de kə́ bo n tɔ́r̄ tan dɔ de kə́ ni-bo tɔȳn tə́ ní. Nge ń noō ní, loo nējə̄n gətóo.

⁸ Melkisedek taā yá̰á̰ kə́ nge ko̰ kutə ō, dɔ yá̰a̰ gə̄ tə́ ní, banī ni-ndi kə kumneé ngándáńg tītə̄ ń makətūbə̄ yā Nə́ɓā ədań ní.

⁹ Tá ɓáý to̰ ní, Lebi ń i nge taā yá̰á̰ kə́ nge ko̰ kutə jī de gə̄ tə́ ní, ni-adə̄ yān kə ta kūl̄ Abəraham ō. Deē asə kəda najə̄ ń noō karī,

¹⁰ tɔdɔ̄ ni i kem kaan tə́ ɓáý loo ń Melkisedek ɔjə no Abəraham ní.

¹¹ Kəla tun̄ yá̰a̰ yā gír kaa Lebi gə̄ kə gō ndū najə̄ ń adə̄n̄ ngán Israel gə̄ ní. Ba ré kəla ń toō a teē yá̰á̰ kə́ majə ɔtə̄ kə taá ta kum Nə́ɓā tə́ anī, i tām̄ rí tə́ á Nə́ɓā rāā kadə̄ nge tun̄ yá̰á̰ kə́ rang i kə gō jī loo rāā kəla yā Melkisedek tə́ reē? Nge tun̄ yá̰á̰ kə́ rang reē i gō kəla tun̄ yá̰a̰ yā Aaro̰ tə́ alé ba i kə́ gō kəla tun̄ yá̰a̰ yā Melkisedek tə́ ní?

¹² Tɔdɔ̄ ré tūrə̄n̄ kəla tun̄ yá̰a̰ kɔ̄ɔ́ anī, i gáŕ kadə̄ a tūrə̄n̄ gír ndū najə̄ kɔ̄ɔ́ ō.

¹³ Tá Kɔ́ɔ̄ɓē yājí ń najə̄ gə̄ ń toō ɔjə dɔn ní, i de kə́ gír ɓē kə́ rang tə́. Ba gír ɓē yān ní, de kə́ tū tə́ kə́ rāā kəla tun̄ yá̰a̰ dɔ loo tun̄ yá̰á̰ tə́ nja kógə̄ḿ gətóo.

¹⁴ De gə̄ malang gerə̄n̄ kadə̄ Kɔ́ɔ̄ɓē yājí i de kə́ gír ɓē yā Juda tə́, ojənən̄ i noó. Ba dan ń Moijə ɔr̄ najə̄ yā ngé tun̄ yá̰a̰ gə̄ ní, ni-əda najə̄ kógə̄ḿ dɔ gír ɓē ń noō tə́ alé.

Nge tun̄ yá̰á̰ kə́ rang kə́ tītə̄ Melkisedek

¹⁵ Ba yá̰á̰ ń rāā tá kadə̄ yá̰a̰ gə̄ ń noō malang unjə̄nəń ngá̰ý tɔȳ kə́ kété ɓáý to̰ ní n toó: Nge tun̄ yá̰á̰ kə́ rang ń teē ní, to i kə́ tītə̄ Melkisedek beé.

¹⁶ Ni i nge tun̄ yá̰á̰ kə́ kə gō ndū najə̄ yā deē alé. I ndi kə kumuú kə́ ta tɔ̄l̄ tan gətóo n adə̄n tɔ́gə́ á ni-téləń nge tun̄ yá̰á̰ ní.

¹⁷ Tɔdɔ̄ makətūbə̄ yā Nə́ɓā əda na: Ā ī-ndi nge tun̄ yá̰a̰ ngándáńg, i kə gō jī loo rāā kəla yā Melkisedek.

¹⁸ Nujən̄ loo rāā yá̰á̰ kə́ jóó kɔ̄ɔ́ i tītə̄ ń noō, tɔdɔ̄ tɔ́gən gətóo ō, to rāań kəla aĺ ō.

¹⁹ Tɔdɔ̄ yá̰á̰ kə́ ndū najə̄ yā Moijə rāā adə̄ reē majə ɔtə̄ kə́ taá beé gətóo. Banī adə̄n̄jí kəndā kem dɔ tə́ kə́ majə tɔȳ kə́ kété. Adə̄ jə-ndɔ́tī ngɔr kə̄ rɔ̄ Nə́ɓā tə́, i kə ta kūl̄ kəndā kem dɔ tə́ ngeé ń toō.

²⁰ Tá ɓáý to̰ ní, Nə́ɓā túbə̄. Ngé tun̄ yá̰á̰ kə́ rang gə̄ télən̄ ngé tun̄ yá̰a̰ gə̄ i kanjə̄ túbə́ kə́ tītə̄ ń noō.

²¹ Banī əndān̄ Jeju nge tun̄ yá̰á̰ tə́ i kə túbūú, tɔdɔ̄ Nə́ɓā əda na: Kɔ́ɔ̄ɓē túbə ō, ni a tūr̄ ndūn aĺ ō: Ā ī-ndi nge tun̄ yá̰a̰ tə́ ngándáńg.

²² I gō najə̄ ń toō tə́ n Jeju rāā kadə̄ madə̄ naā kə́ majə tɔȳ to ngan̄g ní.

²³ Tá ɓáý to̰ ní: Ngé tun̄ yá̰a̰ gə̄ yā madə̄ naā kə́ kété i ngá̰ý, tɔdɔ̄ yo ɔgə̄də́ rāā kəla yādə́ ta kaw̄ jóo.

²⁴ Banī Jeju ń ndi ngándáńg ní, adə̄ kəla nge tun̄ yá̰a̰ yān ní a adə̄n̄ de kə́ rang alé.

²⁵ I tām̄ najə̄ ń toō tə́ n ngé gə̄ ń ndɔ́tə̄n̄ kə̄ rɔ̄ Nə́ɓā tə́ kə ta kūl̄neé ní, ni asə kajədə́ ngándáńg ní. Tɔdɔ̄ ni-ndi kə kumneé ngándáńg yā ndɔ̄ȳ Nə́ɓā tām̄ yādə́ tə́.

²⁶ Adə̄ ngol ngé tun̄ yá̰a̰ gə̄ kə́ majə tām̄ yājí tə́ i Jeju. Ni i de kə́ táĺ ō, najə̄ gətóo dɔn tə́ ō, yá̰á̰ kógə̄ḿ kə́ majaĺ tákə̄n aĺ ō. Ɔr̄nən̄ kɔ̄ɔ́ dan ngé rāā majaĺ gə̄ tə́ ō, un aw̄n̄ seneé dɔɔ́ dɔ rā̰ tə́ ō.

²⁷ Jeju to tītə̄ gotə ngol ngé tun̄ yá̰a̰ gə̄ kə́ rang gə̄ alé. Ni i nge tun̄ yá̰a̰ kə dɔ ndɔ̄ gə̄ ndɔ̄ gə̄ tām̄ majaĺ yān nəkɔ́ tə́ ō, tām̄ majaĺ yā ngán Israel gə̄ tə́ ō alé. Ni-rāā nge ń noō nja kógə̄ḿ beē ngóy dan ń nəkɔ́ adə̄ rɔ̄n yá̰a̰ tun̄ tə́ ní.

²⁸ Ndū najə̄ yā Moijə əndā de kə́ majə ɔtə̄ kə taá aĺ gə̄ ngol ngé tun̄ yá̰a̰ gə̄ tə́. Banī túbə̄ ń Nə́ɓā túbə ənīń ndūn ní, reē i gō ndū najə̄ tə́. Adə̄ Ngōn̄ ń rāānən̄ adə̄ ni-tél de kə́ majə ɔtə kə taá kə́ njɔ́ḿ tə́ ní, túbə́ ngeé ń toō əndān ngol ngé tun̄ yá̰a̰ gə̄ tə́.