HEBƏRO 5 - Bibəl ta Sar̄

¹ Ngol ngé tun̄ yá̰a̰ gə̄ ń gə̄rān̄də́ dan deē ndul gə̄ tə́ ní, əndān̄də́ i tām̄ yā de gə̄ tə́, kadə̄ rāān̄ kəla yā Nə́ɓā tām̄ yādə́ tə́. Ni a ndējə̄ Nə́ɓā yá̰a̰ ndējə̄ gə̄ ō, a yá̰a̰ tun̄ gə̄ kə́ tām̄ yā majaĺ gə̄ tə́ ō.

² Ngé gə̄ ń gerə̄n̄ yá̰a̰ aĺ ō, ndúmə̄n̄ ō ní, ni a asə ger̄ kum sedə́, tām̄ tɔ́gə gətóo yān nəkɔ́ ngá̰ý ō.

³ Ba dan ń tɔ́gən nəkɔ́ gətóo ní, i gáŕ kadə̄ ni-ndējə̄ Nə́ɓā yá̰a̰ tun̄ gə̄ kə́ tām̄ yā majaĺ yān gə̄ tə́ ō, tītə̄ ń ni-ndējə̄ń tām̄ yā de gə̄ ní tə́.

⁴ De kə́ asə kəndā rɔ̄n ngol ngé tun̄ yá̰a̰ gə̄ tə́ yā rɔȳń rɔ̄n nəkɔ́ gətóo. I Nə́ɓā n i nge ɓāŕ deē kə̄ tū tə́, tītə̄ ń ni-ɓārə́nń Aaro̰ ní.

⁵ Yā Kərist i tītə̄ ń noō ō. I nəkɔ́ n tél ngol ngé tun̄ yá̰a̰ gə̄ ɔsəń gɔn rɔ̄n ní alé. Ba nge ń ɔsə gɔnən ní, i Nə́ɓā ń ədan na: I ḭ̄ n i Ngōnə̄ḿ ní, əla gír ɓōólaā ní, mā i Bɔbí.

⁶ Tá əda loo kə́ rang tə́ ɓáý to̰ na: Ā ī-ndi nge tun̄ yá̰á̰ ngándáńg, i kə gō jī loo rāā kəla yā Melkisedek.

⁷ Dan ń Jeju ndi dɔ nang tə́ laā ní, Nə́ɓā ń asə kajən ta yo tə́ ní, ni-ndɔ̄ȳn ō, rāān ɓɔ́ ō, əga kɔŕ ngá̰ý ō, kə nōó kumən tə́ ō. Ba Nə́ɓā oōn i sɔɔ̄ń koō kə́ ni-oō tan.

⁸ Ni i Ngōn̄ Nə́ɓā ɓá tā, banī ndóō koō ta Bɔbə̄n i kə ta kūl̄ yá̰á̰ kə́ tōr̄ gə̄ malang ń rāān ní.

⁹ Dan ń Nə́ɓā rāān adə̄ tél de kə́ majə ɔtə̄ kə taá oy anī, ngé gə̄ malang ń oōn̄ tan ní əngen̄ kajə kə́ ngándáńg kə ta kūl̄neé.

¹⁰ Nə́ɓā əndān ngol ngé tun̄ yá̰a̰ gə̄ tə́ i kə gō jī loo rāā kəla yā Melkisedek ō.

Tāān̄ ngé taā kem gə̄ kadə̄ túyn̄ taā kem alé

¹¹ J-aw̄ kə najə̄ ngá̰ý yā kəda dɔ yá̰á̰ ń toō tə́, ba loo kɔr̄sí gír ngan̄g ngá̰ý, tɔdɔ̄ ī-téliī de gə̄ kə́ gerə̄n̄ kum najə̄ láẃ aĺ gə̄.

¹² Dan i ngá̰ý kɔ̄ɔ́ adə̄ majə kadə̄ sḭḭ̄ i ngé ndóō de gə̄ yá̰a̰ tā, banī ī-sāāī kadə̄ téĺ ndóōn̄sí yá̰á̰ ndóō kə́ ta kəga dɔ gə̄ kə́ tū najə̄ yā Nə́ɓā ɓáý to̰. Āwī bátə́ ī-sāāī mba yā ka̰ȳ, ba i yá̰á̰ kəsa kə́ ngan̄g yā kəsa alé.

¹³ Deē ń a a̰ȳ i mba ɓáý ní, ni i ngōn̄ ɓáý. Adə̄ yá̰á̰ ń i yá̰á̰ kə́ gōtə́, aláa i yá̰á̰ kə́ gōtə́ aĺ ní, ni-asə ger̄ loon alé.

¹⁴ Ba yá̰a̰ kəsa kə́ ngan̄g i tām̄ yā de kə́ tɔ́gə gə̄ tə́. Kemdə́ nin̄-ger̄ kɔr̄ kam̄ yá̰á̰ kə́ majə naā tə́ kə yá̰á̰ kə́ majaĺ, tɔdɔ̄ nin̄-rāān̄ yá̰á̰ ń noō adə̄ gerə̄n̄.