HEBƏRO 4 - Bibəl ta Sar̄

¹ Dan ń Nə́ɓā ənī míndən yā kadə̄ j-ugīneé tū kɔr̄ koō yān tə́ to̰ ɓáý ní, jə-ɓōlíī najə̄ kadə̄ deē kógə̄ḿ kə́ dansí tə́ nal̄ ta róbə́ kə́ yā kudəń tū kɔr̄ koō ngeé ń toō tə́.

² Tɔdɔ̄ jḭḭ̄ j-oōī Najə̄ kə́ Majə tītə̄ yā ngé kə́ kem dəla loo tə́ gə̄. Nin̄-oōn̄ najə̄, ba najə̄ ń oōn̄ ní rāā yá̰á̰ kógə̄ḿ tām̄ yādə́ tə́ alé. Tɔdɔ̄ dan ń nin̄-oōn̄ ní, taān̄ kem alé.

³ Jḭḭ̄ ń jə-taāī kem ní, j-a j-udiī tū kɔr̄ koō ngeé ń toō ń Nə́ɓā əda najə̄n tə́ ní, ni-əda na: Dan ń wōn̄g rāām̄ ní, m̄-túbə̄ m-ə́da na: Nin̄ a ugə̄n̄ ɓē ń m-ə̄ndā dɔ kɔr̄ koō danaá tū tə́ tām̄ yādə́ tə́ ní alé. Gír kəla yān gān̄g kɔ̄ɔ́ i jóó ngá̰ý dan ń ni rāań dɔ rā̰ ō, dɔ nang ō ní, banī ni-əda najə̄ ń noō.

⁴ Tɔdɔ̄ ɔrə̄n̄ najə̄ kə́ dɔ ndɔ̄ kə́ nge ko̰ sīrí tə́ kem makətūbə̄ yā Nə́ɓā tə́ na: Nə́ɓā ɔr̄ koō tām̄ kəla malang ń ni-rāā tə́ ní kə ndɔ̄ kə́ nge ko̰ sīrí.

⁵ Tá ədan̄ loo ń toō tə́ ɓáý to̰ na: Nin̄ a ugə̄n̄ ɓē ń m-ə̄ndā dɔ kɔr̄ koō danaá tū tə́ tām̄ yādə́ tə́ ní alé.

⁶ Ngé gə̄ ń i nin̄ n oōn̄ Najə̄ kə́ Majə ń toō ta kəga dɔ ní, udən̄ tū kɔr̄ koō ngeé ń toō tə́ alé, i tɔdɔ̄ nin̄-taān̄ kem alé. Adə̄ ta róbə to tām̄ yā de kə́ rang gə̄ tə́ ɓáý kadə̄ nin̄-udən̄ tū tə́.

⁷ I tām̄ najə̄ ń toō tə́ n Nə́ɓā gān̄g ndɔ̄ kə́ rang ɓáý to̰ ní, ni-əndā rī dɔ ndɔ̄ ní tə́ na i ɓōólaā. Ni-ɔr̄ najə̄n i gō gogə́ ngá̰ý kə ta kūl̄ Dabid, tū najə̄ ń jə-tə́daī kété laā tə́ ní, najə̄ ní n toó, ɓōólaā ré ōōī ndū Nə́ɓā anī, ī-lōōī rāā dɔ ngan̄g.

⁸ Tɔdɔ̄ ré Jojue aw̄ kə ngán Israel gēé adə̄ nin̄-udən̄ tū kɔr̄ koō ní tə́ anī, Nə́ɓā a ɔr̄ najə̄ kə́ dɔ ndɔ̄ kə́ rang tə́ gō tə́ ɓáý to̰ alé.

⁹ I beé ní, kɔr̄ koō kógə̄ḿ kə́ to tītə̄ kɔr̄ koō yā Nə́ɓā kə́ kə ndɔ̄ kə́ nge ko̰ sīrí to noó tām̄ yā de gə̄ yā Nə́ɓā tə́.

¹⁰ Tɔdɔ̄ deē ń udə tū kɔr̄ koō ń Nə́ɓā əndā dɔ danaá tə́ ní, kɔ́ɔ̄ ɔr̄ koō kəla yān tītə̄ ń Nə́ɓā ɔrə̄ń koō kəla yān ní ō.

¹¹ I beé ní, adə̄ j-əhɔī rɔ̄jí ba j-udiī tū kɔr̄ koō ngeé ń toō tə́. Jə-rāāī adə̄ deē kógə̄ḿ danjí tə́ mbātə́ najə̄ tītə̄ yā kaají gə̄ alé, na sōgə́ deē ní nal̄ ta róbə́ kə́ yā kudəń tū kɔr̄ koō ní tə́.

¹² Tɔdɔ̄ najə̄ yā Nə́ɓā i najə̄ kə́ ndi kə kumneé ō, tɔ́gən to ō, tan atə tɔȳ kəyā kaskar kə́ atə dām̄ jōó ō. Ni-udə kem deē tə́, aw̄ bátə́ ugə̄ loo ń wur deē ō, ndíl deē ō, əngen̄ naā tə́ tū tə́ ní tə́ ba kēgə̄də́ naā tə́ ō, aw̄ bátə́ ugə̄ loo ń kúkə̄lú kə̄ngā gə̄ ō, yibə̄ kə́ kem kə̄ngāá ō, əngen̄ naā tū tə́ ní ba kēgə̄də́ naā tə́ ō. Najə̄ yā Nə́ɓā gān̄g sarya dɔ ngur gə̄ kə́ kem deē tə́ ō, dɔ gír̄ kə́ kem deē tə́ ō.

¹³ Yá̰a̰ malang ń Nə́ɓā rāā ní, nge kógə̄ḿ kə́ kumən a̰ā̰ aĺ gətóo. Gíŕ yá̰a̰ malang to i kə̄ dɔ ndágá ta kumən tə́. Kumən aw̄ kə tɔ́gə dɔ yá̰a̰ malang tə́ ō. I ni n j-a j-ɔjiī-n gíŕ yá̰a̰ rāājí gə̄ malang ní ō.

Jeju i ngol ngé tun̄ yá̰a̰ gə̄

¹⁴ I beé ní, adə̄ j-əhɔī taā kem ń j-ɔjiī najə̄n ní adə̄ ngan̄g, tɔdɔ̄ j-awī kə ngol ngé tun̄ yá̰a̰ gə̄ kə́ tɔ́gən i ngá̰ý, kə́ aw̄ bátə́ ugə̄ rɔ̄ Nə́ɓā tə́, adə̄ i Jeju, ni i Ngōn̄ Nə́ɓā.

¹⁵ Jḭḭ̄ i kə ngol ngé tun̄ yá̰a̰ gə̄ kə́ asə ka̰a̰ tápə̄ sejí najə̄ yā rɔ̄ ngan̄g aĺ yājí tə́. Yá̰a̰ malang ń nāājí ní nāān ō, banī rāā majaĺ alé.

¹⁶ I beé ní, j-ənī kemjí mámák jə-ndɔ́tīiń kə̄ ta kōr̄ kāgə̄ mbang yā Nə́ɓā tə́, loo ń Nə́ɓā a rajə deē tū tə́ ní tə́. J-a j-əngeī mā̰ȳ rɔ̄ ō, a rajən̄jí ō, i loo ń noō tə́, yā kadə̄ rāān̄neé sejí kum mbang kə́ majə tə́.