HEBƏRO 3 - Bibəl ta Sar̄

Jeju i kə́ bo ngá̰ý tɔȳ Moijə

¹ I beé ní, sḭḭ̄ ngákó̰ó̰ḿ gə̄ ń sḭḭ̄ i de gə̄ yā Nə́ɓā á ə́gaī naā dɔ ɓāŕ ń ɓārə́n̄sí kadə̄ āwī dɔ rā̰ tə́ ní, á̰a̰ī Jeju ń Nə́ɓā əlan kadə̄ ni i ngol ngé tun̄ yá̰a̰ gə̄ kə́ dɔ taā kem ń j-ɔjiī najə̄n tə́ ní.

² Tɔdɔ̄ ni-ra dɔ ndūn tə́ kə Nə́ɓā ń ɔjə dɔn tām̄ yā kəla ń toō tə́ ní, tītə̄ yā Moijə ń ədan̄ najə̄ yān na: Ni i de kə́ ra dɔ ndūn tə́ kem kújə yā Nə́ɓā tə́ kə́ taá malang ní.

³ Tītə̄ ń rɔȳn̄neé nge rāā kújə tɔȳ kújə́ ní, Jeju asə kənge kɔsə gɔn kə́ bo tɔȳ yā Moijə.

⁴ Tɔdɔ̄ kújə gə̄ malang aw̄n̄ kə nge rāādə́ gēé, ba nge rāā yá̰a̰ malang i Nə́ɓā.

⁵ Kə́ tām̄ yā Moijə tə́ ɓáa, ni-ra dɔ ndūn tə́ kem kújə yā Nə́ɓā tə́ kə taá malang. Ni i nge rāā kəla ō, ni i de kə́ kum tə́ yā najə̄ ń Nə́ɓā a rāā yā kəda ní ō.

⁶ Banī Kərist ra dɔ ndūn tə́ i kə́ loo Ngōn̄ Nə́ɓā kə́ əndānən̄ dɔ kújə yā Nə́ɓā tə́ tə́. Jḭḭ̄ i kújə yān, ré jə-na̰yiī kə̄ loo kənī kemjí mámák tə́ ō, j-ɔriī ta rɔ̄jí tām̄ yā yá̰á̰ ń j-əndāī kemjí dɔ tə́ ō ní tá.

Kɔr̄ koō kə́ tām̄ yā de gə̄ yā Nə́ɓā tə́

⁷ I tām̄ najə̄ ń toō tə́ n, tītə̄ ń Ndíĺ kə́ Táĺ ədań ní: Ɓōólaā ré ōōī ndū Nə́ɓā anī,

⁸ ī-lōōī rāā dɔ ngan̄g tītə̄ kə́ ndɔ̄ kəsō wōn̄g tə́, ndɔ̄ ń sḭḭ̄ ī-nāāniīneé kem dəla loo tə́ ní.

⁹ Nə́ɓā əda na: Kaasí gə̄ a̰a̰n̄ yá̰a̰ malang ń m̄-rāā ní kə kumdə́ ɓāl̄ kutə sɔ́, banī tɔ́sə̄n̄ gātə̄ḿ loo ń noō tə́ ō, nāāmə̄n̄ ō.

¹⁰ I tām̄ najə̄ ń noō tə́ n wōn̄g rāām̄ kə de gə̄ ń noō ní, adə̄ m-ə́da na gír̄ yādə́ ndúm̄ i mbéé ngándáńg. Yá̰á̰ ń mā m̄-ndi m̄-ngóō ta kadə̄ rāān̄ ní, nin̄-gerə̄n̄ kum alé.

¹¹ Wōn̄g rāām̄ adə̄ m̄-túbə̄ m-ə́da na: Nin̄ a ugə̄n̄ ɓē ń m-ə̄ndā dɔ kɔr̄ koō danaá tū tə́ tām̄ yādə́ tə́ ní alé.

¹² Ngákó̰ó̰ḿ gə̄, ə̄ndāī kum kedə̄ dɔ rɔ̄sí tə́, tɔdɔ̄ majanī deē kógə̄ḿ dɔ dáńsí tə́ i nge kem majaĺ, adə̄ taā kem aĺ yān ɔrə̄n kɔ̄ɔ́ rɔ̄ Nə́ɓā kə́ ndi kə kumneé tə́.

¹³ Banī ə́laī go̰ kem naā tə́ kə dɔ ndɔ̄ gə̄, dan ń ndɔ̄ kə́ ɓōólaā kə́ kem makətūbə̄ yā Nə́ɓā tə́ ɔjə dɔjí ɓáý ní, na sōgə́ deē kógə̄ḿ kə́ dansí tə́ əya̰ rɔ̄n adə̄ yá̰á̰ kə́ majaĺ gólə̄n adə̄ rāā dɔ ngan̄g.

¹⁴ Tɔdɔ̄ jḭḭ̄ i madə̄ Kərist gə̄, ba i loo ń ré jə-ngɔ̄mī yá̰á̰ ń j-əndāī kemjí dɔ tə́ ní kə ngangāá ta kəla gíŕ tə́ bátə́ ta ngóý tə́ tá.

¹⁵ Tɔdɔ̄ ədan̄ na: Ɓōólaā ré ōōī ndū Nə́ɓā anī, ī-lōōī rāā dɔ ngan̄g tītə̄ kə́ ndɔ̄ kəsō wōn̄g tə́.

¹⁶ De gə̄ ń oōn̄ ndū Nə́ɓā ba əsōn̄ wōn̄g tan tə́ ní i náā gə̄. I de gə̄ malang ń Moijə teē sedə́ kɔ̄ɔ́ kem ɓē kə́ Ejiptə tə́ ní.

¹⁷ De gə̄ ń Nə́ɓā rāā wōn̄g sedə́ ɓāl̄ kutə sɔ́ ní i náā gə̄? Ni-rāā wōn̄g i kə de gə̄ ń rāān̄ majaĺ ō, əsō oyn̄ kem dəla loo tə́ ní ō.

¹⁸ Dan ń Nə́ɓā túbə əda na: Nin̄ a ugə̄n̄ ɓē ń m-ə̄ndā dɔ kɔr̄ koō danaá tū tə́ tām̄ yādə́ tə́ ní alé ní, ni-ɔr̄ i najə̄ yā náā gə̄? I ngé gə̄ ń əsōn̄ wōn̄g ní n ni-ɔr̄ najə̄ yādə́ ní.

¹⁹ Ba j-a̰ā̰ī kadə̄ nin̄-asən̄ kugə̄ tū kɔr̄ koō ní tə́ alé, tɔdɔ̄ nin̄-taān̄ kem alé.