HEBƏRO 13 - Bibəl ta Sar̄

Loo rāā yá̰a̰ kadə̄ nel̄ Nə́ɓā

¹ Ī-táriī naā kə́ loo ngákó̰o̰ naā gə̄ tə́.

² Ādī dɔsí ndígə̄nal dɔ rāā mbā tə́ alé. Tɔdɔ̄ loo rāā mbā tə́ ní, de kə́rēý gə̄ rāān̄ de kə́ dɔ rā̰ tə́ gə̄ mbā kanjə̄ kadə̄ ger̄ gō.

³ Ādī əga kemsí dɔ ngé gə̄ ń i kújə dəngáyá ní, tītə̄ kə́ sḭḭ̄ i dəngáyá sedə́ beé ō. Ādī əga kemsí dɔ ngé gə̄ ń rāān̄də́ yá̰á̰ kə́ tōr̄ gə̄ tə́ ní ō, tām̄ sḭḭ̄ kɔ́ gə̄, i kə dā̰ rɔ̄sí ō.

⁴ Ādə̄ de gə̄ malang ɓōlə́n̄ gidə taā naā ō, kadə̄ majaĺ tákə̄ tə̄rá taā naā alé ō, tɔdɔ̄ Nə́ɓā a gān̄g sarya dɔ ngé gə̄ ń sāān̄ naā loo kaya tə́ ní ō, dɔ ngé rāȳ gə̄ tə́ ō.

⁵ Kadə̄ háĺsí i háĺ ngé rāā ta nar gə̄ alé, ba kadə̄ yá̰á̰ ń ə́ngeī ngɔlaā ní asəsí. Tɔdɔ̄ Kɔ́ɔ̄ɓē nəkɔ́ əda na: M-ā m-ə́ya̰ī kɔ̄ɔ́ aĺ ō, m-ā m̄-mbātíī aĺ ō.

⁶ Adə̄ j-asiī kənī kemjí mámák kədań najə̄ ń toō: Kɔ́ɔ̄ɓē i nge rāā seḿ, m-ā m̄-ɓōĺ yá̰á̰ kógə̄ḿ alé. Deē a rāā i rí seḿ?

⁷ Ādə̄ əga kemsí dɔ nge kɔr no ngé kán̄ naā gə̄ yāsí á ɔjən̄sí najə̄ yā Nə́ɓā ní. Ə̄ndāī ma̰ȳ loo ndidə́ dɔ nang tə́ laā ō, ta ngóýdə́ ō, ba ī-ndájī taā kem yādə́.

⁸ Jeju Kərist to i kum gotən, tagə́bēé ō, ɓōólaā ō, ni a to i kum gotən ngándáńg ō.

⁹ Ī-lōōī kadə̄ yá̰á̰ ndóō kə́ mbā kə́ gíŕdə́ i dáńg dáńg gə̄, rāān̄sí ādī ndúmī ta róbə. Kadə̄ kem majə kə́ Nə́ɓā rāā sejí n adə̄jí tɔ́gə ní, i yá̰á̰ kə́ majə, tɔȳ kadə̄ i ndū najə̄ gə̄ dɔ yá̰a̰ kəsa tə́. Ngé gə̄ ń unən̄ gō ndū najə̄ kə́ dɔ yá̰a̰ kəsa gə̄ tə́ ní əngen̄ yá̰á̰ kógə̄ḿ gírí alé.

¹⁰ Jḭḭ̄ j-awī kə loo tun̄ yá̰á̰ kə́ ngé gə̄ ń rāān̄ kəla yā Nə́ɓā kem kújə tandā yā Moijə tə́ ní asən̄ kəsa yá̰a̰ ndējə̄ kə́ tun̄ dɔ tə́ alé.

¹¹ Ngol ngé tun̄ yá̰a̰ gə̄ aw̄ kə mósə dā̰ gēé i kem loo kə́ táĺ ngá̰ý tə́ yā kadə̄ i yá̰á̰ kə́ tun̄ tām̄ yā mā̰ȳ rɔ̄ tə́ dɔ majaĺ gə̄ tə́. Banī rɔ̄ dā̰ gə̄ ní a róōn̄ i gidə gérger tə́ ndágá.

¹² I tām̄ najə̄ ń noō tə́ n Jeju oyń gidə ɓē tə́ ndágá ō yā tə́goń de gə̄ kadə̄ unjə̄n̄ njáý njáý kə ta kūl̄ mósən nəkɔ́ ní.

¹³ I beé ní, ādə̄ jə-tə́gāī tají gíŕ yá̰á̰ kə́ to rɔ̄sɔl̄ gə̄ tə́ tītə̄ yān, ba jə-teē j-awī gōn tə́ gidə ɓē tə́ ndágá.

¹⁴ Tɔdɔ̄ dɔ nang tə́ laā ní j-əngeī ɓē kə́ to ngándáńg alé, ba j-a jə-sāāī i ɓē kə́ ndɔ̄ń tə́ a to ɓáý.

¹⁵ I beé ní, jə-ndējī Nə́ɓā tɔȳ yājí tītə̄ yá̰a̰ tun̄ beé kə ndɔ̄ gə̄ ndɔ̄ gə̄, kə ta kūl̄ Jeju. Kumən na ādə̄ jə-tɔ̄yī rīn kə tam tají kə ndɔ̄ gə̄ ndɔ̄ gə̄.

¹⁶ Ādə̄ dɔsí ndígə̄nal rāā majə kə deé aĺ ō, rāā kə naá aĺ ō. Tām̄ i yá̰a̰ tun̄ kə́ tītə̄ ń noō gə̄ n nelə̄n̄ Nə́ɓā ní.

¹⁷ Ōōī najə̄ ta nge kɔr no ngé kán̄ naā gə̄ ō, ə́laī dɔsí gír tɔ́gə yādə́ tə́ ō. Tɔdɔ̄ nin̄-əndān̄ kumdə́ gíŕsí tə́ tām̄ a ɔjən̄ Nə́ɓā gotə. Ré ōōī tadə́ anī, a rāān̄ kəla kə rɔ̄nelēé. Ré i beé aĺ anī a nōōn̄ i rɔ̄də́ n a rāān̄neé, ba ngé ń noō a teēsí yá̰á̰ tə́ alé.

¹⁸ Ī ndɔ̄yī tām̄ yājí tə́, tɔdɔ̄ jə-ger̄ majə kadə̄ kemjí ɔjəjí yá̰á̰ kə́ majaĺ alé. Tām̄ jə-gḛy ngɔ̄m̄ háĺjí yā rāāń majə tū yá̰a̰ gə̄ tə́ malang ō.

¹⁹ m̄-rāāsí ɓɔ́ nəkɔ́, ī-ndɔ̄yī ngá̰ý kadə̄ m̄-tél kə̄ rɔ̄sí tə́ gogə́ láẃ.

Ndɔ̄ȳ

²⁰ I kə ta kūl̄ mósə yā madə̄ naā kə́ a to ngándáńg n Kɔ́ɔ̄ɓē yājí Jeju Kərist i nge kul̄ kə́ bo yā batə̄ gə̄ ní. Nə́ɓā kə́ nge kadə̄ kem sɔl̄ lɔm ndólə̄n dan de kə́ koy gə̄ tə́ kɔ̄ɔ́.

²¹ Kadə̄ əndān̄sí kə gōó tām̄ yá̰á̰ kə́ majə gə̄ tə́ malang, yā kadə̄ ī-rāāī gō kem ndigə yān. Kadə̄ ni-rāā yá̰á̰ kə́ əsō kumən kemjí tə́ kə ta kūl̄ Jeju Kərist ń kɔsə gɔn i tām̄ yān tə́ ngándáńg ngándáńg ní. Adə̄ i tītə̄ ń noō!

Káān̄ ta najə̄ ō, lápə́ya ō

²² Ngákó̰ó̰ḿ gə̄, m̄-rāāsí ɓɔ́ kadə̄ ī-tə́gāī tasí, ī-ndigiī yá̰á̰ ndóō kə́ yā mbūsə̄n̄ńsí ń toō. Tɔdɔ̄ yá̰á̰ ń m̄-ndang m-ādə̄sí kem makətūbə̄ ń toō tə́ ní, ngāl̄ ngá̰ý alé.

²³ Majə kadə̄ ī-gerī kadə̄ ɔrə̄n̄ ngōkó̰ó̰jí Timote dəngáyá, adə̄ ré ní ugə̄ láẃ anī, j-a j-aw̄ seneé mbak yā go̰ō̰sí.

²⁴ Ī-rāāī nge kɔr no ngé kán̄ naā gə̄ malang lápə́ya ō, de gə̄ yā Nə́ɓā malang lápə́ya ō. Ngé kə́ Itali tə́ gə̄ rāān̄sí lápə́ya ō.

²⁵ Ādə̄ Nə́ɓā rāā kem majə sesí malang.