HEBƏRO 12 - Bibəl ta Sar̄

Nə́ɓā i Bɔbə̄jí

¹ Jḭḭ̄ ń de kə́ kum tə́ kə́ gīrə̄n̄ gidəjí gə̄ nin̄ i kósə ngá̰ý ní, ādə̄ yá̰a̰ malang ń ɔgə̄jí kaw̄ kum kə́ kété ní ō, majaĺ ń ɓír̄jí láẃ ngá̰ý ní ō, jə-mbātíī kɔ̄ɔ́. Ba ngɔ̄də̄ ń mērə̄n̄jí ka̰ȳ ní, ādə̄ jə-tə́gāī tají ba jə-ngɔ̄dī bátə́ ta ngóý tə́.

² Ādə̄ kumjí i dɔ Jeju tə́. I ni n i nge rāā kadə̄ deē taā kem ō, kadə̄ taā kem majə kə́ ɔtə̄ kə taá ō ní. Ni ndigə koy yo kə́ tū kāgə̄ kə́ dēsə́ tə́, usən dɔ rɔ̄sɔl̄ kə́ tām̄ yā yo kə́ tītə̄ ń noō tə́ alé, tām̄ ni-a̰a̰ rɔ̄nel̄ ń to a ngóōn ní. Ba ngɔlaā ń toō ɓáa ni-ndi dɔ jī ko̰ Nə́ɓā kə́ ndi dɔ kōr̄ kāgə̄ mbang yān tə́.

³ Ādə̄ sḭḭ̄ ī-gírī dɔ Jeju tə́. Ni-tə́gā tan tū yá̰a̰ malang ń de kə́ ngé rāā yá̰a̰ majaĺ gə̄ rāān̄ seneé tə́ ní. Adə̄ ī-lōōī kadə̄ tɔ́gə́sí ur̄ wak sɔɔ̄ń kemsí kə́ ɔr.

⁴ Sḭḭ̄ ə́hɔī rɔ̄sí tɔgə loo rɔ̄ɔ̄ tə́ kə majaĺ, bátə́ óyiīneé aĺ ɓáý.

⁵ Kɔjə̄ ń Nə́ɓā adə̄sí ní dɔsí ndígə̄nal a? Ni-ɔjə̄sí tītə̄ ngánən gə̄, əda na: Ngōnə̄ḿ, ī-lōō kidə taí gíŕ ndéy kɔjə̄ yā Kɔ́ɔ̄ɓē tə́. Ré ndángī anī, ī-lōō kadə̄ tɔ́gí ur̄ wak.

⁶ Tɔdɔ̄ i deē ń Kɔ́ɔ̄ɓē tárən ní n a əndan yā kɔjə̄nəń ní. Deē malang ń Kɔ́ɔ̄ɓē ger̄ kadə̄ i ngōnən ní, a əndan.

⁷ Ə́hɔī gíŕ ndéy kɔjə̄ kə́ yā tūrə̄ńsí ní sásáp. Nə́ɓā rāāsí i kə́ ngánən gə̄ tə́. I ngōn̄ kə́ rá n bɔbə̄n a əndan yā tūrə̄nənneé aĺ ní?

⁸ Ba ré ndéy kɔjə ń nin̄ malang, əgan̄ naā dɔ tə́ ní rāāsí aĺ anī, sḭḭ̄ i ngáń kə́ loo kaya tə́ gə̄, ba sḭḭ̄ i ngán bɔbə̄sí gə̄ rɔ̄kum alé.

⁹ Ī-gírī dɔ bɔbə̄jí kə́ dɔ nang tə́ laā gə̄ tə́. Əndan̄jí yā tūrəńjí, anī jə-ɓōlíī ndíĺdə́. Majə kadə̄ j-əlaī dɔjí gíŕ tɔ́gə Bɔbə̄jí kə́ dɔ rā̰ tə́ kadə̄ tɔȳ yādə́, yā kadə̄ jə-ndiīń kə kumjí aĺ a?

¹⁰ Bɔbə̄jí kə́ dɔ nang tə́ laā gə̄ əndan̄jí i tām̄ yā kum mbang kə́ ngá̰ý aĺ tə́ kə gō gír̄ ń nin̄-gírə̄n̄ ní. Banī Nə́ɓā əndají i yā kadə̄ rāā majə sejí. Ni gḛy rāājí kadə̄ jə-téliī de kə́ táĺ gə̄, tītə̄ ń ni i de kə́ táĺ ní.

¹¹ I rɔ̄kum kadə̄ ndéy malang ń deē a əndaī yā kɔjīneé ní a adī rɔ̄nel̄ kum mbang nəkɔ́ ń noō tə́ alé, ba i wōn̄g. Banī ta kə́ kété tə́ ɓáa de gə̄ ń tūr̄də́ ní a adə̄də́ yá̰á̰ kə́ to kem sɔl̄ ō, kə́ gōtə́ ō.

Yá̰á̰ kə́ kadə̄ yā rāā gə̄ ō, tāā gə̄ ō

¹² I beé ní, jīsí gə̄ ń ɔrən̄ kɔ̄ɔ́ ní, ī-téĺ ɔ́yiīdə́ dɔɔ́ ō, kejəsí gə̄ ń sɔlə̄n̄ yélélé ní, ī-rāāīdə́ ādə̄ tél ngangə̄n̄ gogə́ ō!

¹³ Ī-njə̄rāī dɔ róbə́ kə́ súmūú tə́, yā kadə̄ njasí kə́ motə ḭḭ ta naā alé, ba kadə̄ aw̄ ta naā tə́ majə.

¹⁴ Ī-sāāī loo ndi lɔm kə de gēé malang ō, ī-sāāī loo tél de kə́ táĺ gə̄ ādə̄ i de kə́ kɔr̄ kam̄ tayā gə̄. Kanjə̄ nge ń noō anī, de kə́ yā ka̰a̰ Kɔ́ɔ̄ɓē a gətóo.

¹⁵ Ə̄ndāī kum kedə̄ dɔ rɔ̄sí tə́, kadə̄ deē kógə̄ḿ mbātə́ rajə kə́ Nə́ɓā rajən alé. Ādə̄ deē kógə̄ḿ tél to tītə̄ ngəra yá̰á̰ kə́ atə̄ kárárá, kə́ əɓa, ba rāā adə̄ kem de gə̄ ngá̰ý nujə sák sák kɔ̄ɔ́ alé.

¹⁶ Á̰a̰ī jajá̰ kadə̄ de gə̄ ń a sāān̄ naā loo kaya tə́, aláa ngé mbātə́ rāā yá̰a̰ kə gō yā Nə́ɓāá, tītə̄ yā Esau ń un ta róbə kənge yá̰a̰ yān kə́ loo ngōn̄ hágə́ tə́ taāń kār yá̰a̰ kəsa kə́ kógə̄ḿ beē ní alé.

¹⁷ Ī-gerī kadə̄ gō tə́ ɓáa, ni-gḛy kadə̄ bɔbə̄n tɔ́r̄ tan dɔn tə́ tām̄ ni i ngōn̄ hágən ní, mbātə́nən̄ kɔ̄ɔ́, adə̄ ká ní sāā tūr̄ kem ndigə yā bɔbə̄n kə man̄ noó kumən tə́ gə̄gē anī, ənge loon alé.

¹⁸ Dan ń sḭḭ̄ ī-ndɔ́tī ngɔr kə̄ kadə mbal̄ bo kə́ deē asə kɔdə kə jīneé tə́ alé, hor kə́ ajə ying gətóo ō, loo kə́ risə til nding gətóo ō, loo kə́ ndɔ̄ɔ́ gətóo ō, nél balway gətóo ō,

¹⁹ yá̰á̰ kə́ ɓār̄ tītə̄ bərúnjə beé ō, ndū de kə́ ɔr̄ najə̄ aĺ ō. Ngán Israel gə̄ ń oōn̄ ndū deē ní, mbātə́n̄ koō najə̄ kə́ rang gō tə́.

²⁰ Tɔdɔ̄ nin̄-asən̄ tə́gā tadə́ dɔ najə̄ ń toō tə́ alé: Deē ń a ɔdə kadə mbal̄ bo ní, ká i dā̰ gə̄gē anī, na a tə́nīnən̄ kə mbalá yā tɔ̄lən.

²¹ Yá̰á̰ ń a̰ā̰n̄ ní to ɓōĺ ngá̰ý, asə kadə̄ Moijə əda na: Ɓōĺ rāām̄ ngá̰ý ō, m̄-ndew yakə yakə ō.

²² Banī sḭḭ̄ ī-ndɔ́tī i kə̄ kadə mbal̄ kə́ Siyo̰ tə́ ō, i kə̄ kadə̄ ɓē yā Nə́ɓā kə́ ndi kə kumneé tə́ ō. Adə̄ i kə̄ kadə Jerusalem kə́ dɔ rā̰ tə́ ń de kə́ dɔ rā̰ tə́ gə̄ kə́ dūbú ngá̰ý i kemeé ní tə́.

²³ Sḭḭ̄ ī-ndɔ́tī i kə̄ rɔ̄ ngé kán̄ naā gə̄ ń i ngáń hágə gə̄ yā Nə́ɓā, kə́ ndangən̄ rīdə́ dɔ rā̰ tə́. Sḭḭ̄ ī-ndɔ́tī i kə̄ rɔ̄ Nə́ɓā nge ngān̄g sarya yā de gə̄ malang tə́ ō, kə̄ rɔ̄ ndíl de kə́ súmūú gə̄ n télən̄ kə́ majə ɔtə̄ kə taá gə̄ tə́ ō.

²⁴ Sḭḭ̄ ī-ndɔ́tī i kə̄ rɔ̄ Jeju tə́, ni i nge ra mbənā de gə̄ tə́ kə Nə́ɓāá tām̄ yā madə̄ naā kə́ kijə tə́ ō, kə̄ ta mósə́ Jeju kə́ a̰ȳ nang tə́ tə́, mósən ní ɔr̄ najə̄ majə tɔȳ yā Abel.

²⁵ I beé ní, ī-ndāī kumsí gíŕ yá̰á̰ ń toō tə́ majə. Ī-lōōī mbātə́ koō najə̄ yā nge ń a ɔr̄ najə̄ sesí ní. Tɔdɔ̄ Moijə tāā ngán Israel gə̄ dɔ nang tə́ laā, ba nin̄-mbātə́n̄ koō najə̄ yān ní, ndéy ɔdədə́. Yājí jḭḭ̄ ɓáa, Nə́ɓā ndi i dɔ rā̰ tə́ n ɔrə̄ń najə̄ sejí ní. Ré jə-tūrī gidəjí tan tə́ anī, j-a j-əngeī ndéy kadə̄ tɔȳ loo ń noō aĺ a?

²⁶ Dan ngeé ń noō tə́ ní ndūn yéȳ dɔ nang. Ba ngɔlaā ni-ənī míndən əda beé na: M-ā m̄-yéȳ dɔ nang nja kógə̄ḿ ɓáý to̰, ba i dɔ nang ngóy alé, m-ā m̄-yéȳ dɔ rā̰ ō.

²⁷ Najə̄ ń na i nja kógə̄ḿ ɓáý to̰ ní, ɔjə kadə̄ yá̰á̰ kə́ to yéȳ gə̄ ń Nə́ɓā rāā ní, a gətóon̄ kɔ̄ɔ́, banī kə́ to yéȳ aĺ gə̄ a ton̄ ta kaw̄ jóo.

²⁸ Tām̄ najə̄ ń toō tə́, jḭḭ̄ ń j-əngeī i ɓē ko̰o̰ kə́ a yéȳ aĺ ní, ādə̄ jə-ndadə̄ j-adī Nə́ɓā ō, jə-rāāī kəla j-adə̄niī kə gō nelə̄n ō. J-ənī kemjí j-adə̄niī ō, jə-ɓōlíī ndílən ō.

²⁹ Tɔdɔ̄ Nə́ɓā yājí i hor kə́ a o̰o̰ yá̰a̰.