HEBƏRO 11 - Bibəl ta Sar̄

Taā kem

¹ Taā kem i yá̰a̰ kə́ deē ger̄ mámák kadə̄ yá̰a̰ gə̄ ń ə̄ndā kemən dɔ tə́ ní, deē a ənge. Yá̰a̰ gə̄ ń deē a̰a̰də́ kə kumneé aĺ ní, taā kem ɔjə kə̄ ndágá kadə̄ yá̰á̰ gə̄ ní ton̄ rɔ̄kum.

² Nə́ɓā ndigə de kə́ kété jóo gə̄ najə̄ taā kem yādə́ tə́.

³ I kə ta kūl̄ taā kem n jə-gerīiń kadə̄ Nə́ɓā əndā dɔ rā̰ ō dɔ nang ō, yá̰a̰ malang kə́ tū tə́ ō i kə ta kūl̄ najə̄ kə́ tan tə́ ní. Adə̄ yá̰á̰ ń deē a̰ā̰ kə kumneé ní, rāān̄ i kə yá̰a̰ gə̄ kə́ deē a̰a̰də́ kə kumneé alé.

⁴ I kə ta kūl̄ taā kem n Abel ndējə̄ Nə́ɓā yá̰a̰ tun̄ kə́ majə tɔȳ yā Kain ní. I taā kem yān n rāā kadə̄ ni i de kə́ gōtə́ ní, tɔdɔ̄ Nə́ɓā ndigə yá̰a̰ gə̄ ń ni ndējə̄ ní. Tá i kə ta kūl̄ taā kem n ká ni-oy kɔ̄ɔ́ gə̄gē anī, ni-ɔr̄ najə̄ ɓáý ní.

⁵ I kə ta kūl̄ taā kem n kadə̄ ɔrə̄n̄ Henok adə̄ ni-a̰a̰ yo aĺ ní, de gə̄ əngenən̄ to̰ alé, tɔdɔ̄ Nə́ɓā ɔrə̄n kɔ̄ɔ́. Tām̄ kété tá kadə̄ ɔr̄nən̄ ní, makətūbə̄ yā Nə́ɓā əda na, ni na i de kə́ nel̄ Nə́ɓā seneé.

⁶ Tá kanjə̄ taā kem anī, loo kadə̄ nel̄ Nə́ɓā kə deē ní a gətóo. Tɔdɔ̄ i gáŕ kadə̄ nge ń aw̄ rɔ̄ Nə́ɓā tə́ ngɔr ní taā kem kadə̄ Nə́ɓā ndi noó ō, kadə̄ ni i nge kəndā nja ngé sāān gə̄ ō.

⁷ I kə ta kūl̄ taā kem n Noe oōń tā yā Nə́ɓā ní. Nə́ɓā tāān najə̄ yá̰á̰ ń a rāā yā rāā yá̰a̰, banī ni asə ka̰ā̰ kə kumneé aĺ ɓáý ní. Ni oō ta Nə́ɓā adə̄ rāā to bo yā kajəń gír kojə yān ō, dā̰ rɔ̄n nəkɔ́ ō. Dan ń ni-rāā yá̰á̰ ń noō ní, ni-gān̄g i sarya dɔ de kə́ dɔ nang tə́ gə̄ tə́ ō, Nə́ɓā rāān de kə́ gōtə́ tə́ kə ta kūl̄ taā kem yānneé ní ō.

⁸ I kə ta kūl̄ taā kem n Abəraham oō ta Nə́ɓā dan ń ɓārə́n ní. Adə̄ ni-aw̄ dɔ nang ń Nə́ɓā a rāā yā kadə̄n kə́ yān tə́ ní tə́. Ni-ḭḭ aw̄ kanjə̄ ger̄ loo ń a aw̄ kə̄ tū tə́ ní tə́.

⁹ I kə ta kūl̄ taā kem n ni-aw̄ ndi tītə̄ tə̄rā beé, dɔ nang ń Nə́ɓā ənī míndən dɔ tə́ adə̄n ní. Ni-ndi i kem kújə tandā tə́ tītə̄ yā Isaak ō, Jakob ō ń. Nə́ɓā ənī míndən yā kadə̄də́ dɔ nang ń toō tītə̄ yān ō ní.

¹⁰ Tɔdɔ̄ Abəraham ndi a ngóō i ɓē kə́ əndān̄ ngəran adə̄ ngan̄g. Ba Nə́ɓā i nge kɔjə loo rāā ɓē ní ō, i ni n i nge rāā ɓē ní ō.

¹¹ I kə ta kūl̄ taā kem n Nə́ɓā rāā adə̄ Sara asə kənge ngōn̄ ní. Ni-tɔgə ɓə́ga kɔ̄ɔ́, banī taā kem kadə̄ Nə́ɓā i nge ra dɔ ndūn tə́.

¹² I beé n de kə́ kal kógə̄ḿ beē kə́ njan i kə̄ ta bāá yo tə́ ngɔr, ojəń gír kaa kə́ kutədə́ i ngá̰ý tītə̄ tə́yō̰ kə́ dɔ rā̰ tə́ gə̄, kə nán̄g ngárə̄ḿnjēý kə́ ta bā bo tə́ gə̄ kə́ deē asə tə́dá kutən alé ní.

¹³ De gə̄ ń noō malang oyn̄ i kə taā kemeé kemdə́ tə́, kanjə̄ kadə̄ əngen̄ yá̰á̰ ń Nə́ɓā ənī míndən yā kadə̄də́ ní. Ba nin̄-ndan̄ sa̰y a̰a̰n̄ dɔ ō, rāānən̄ lápə́ya ō. Adə̄ nin̄-ədan̄ na nin̄ na tə̄rā gə̄ ō, ngé njə̄rā mbā gə̄ ō, dɔ nang tə́ laā.

¹⁴ Najə̄ ń ɔrə̄n̄ beé ní ɔjə kə̄ ndágá kadə̄ a sāān̄ i ɓē.

¹⁵ Ré nin̄-gírə̄n̄ i dɔ ɓē ń nin̄-teēn̄ tū tə́ ní anī, a əngen̄ kum mbang kə́ yā tél kaw̄ń gogə́ kemeé.

¹⁶ Kə́ rɔ̄kum tə́ tā anī nin̄-gḛyn̄ i ɓē kə́ majə tɔȳ nge ń nin̄-teēn̄ kemeé á reēn̄ ní. Kumən na nin̄-gḛyn̄ i ɓē kə́ dɔ rā̰ tə́. I tām̄ najə̄ ń noō tə́ n ré ɓārə́n̄ Nə́ɓā na i Nə́ɓā yādə́ anī, rɔ̄ Nə́ɓā sɔlə̄n aĺ ní. Tɔdɔ̄ Nə́ɓā rāā ɓē kógə̄ḿ tām̄ yādə́ tə́.

¹⁷ Dan ń nāān̄ Abəraham ní, i kə ta kūl̄ taā kem n ni-ndigə tun̄ Isaak kadə̄ Nə́ɓā ní. Tá Nə́ɓā ənī míndən adə̄n kété, banī ni-ndigə tun̄ ngōnən kə́ kal kógə̄ḿ beē kadə̄ Nə́ɓā.

¹⁸ Kété ní Nə́ɓā ədan na: Ngán kaaí gə̄ ń m-ə̄nā ndūḿ yā kadī ní, ā ə́ngédə́ i kə ta kūl̄ Isaak.

¹⁹ Banī Abəraham gír̄ kadə̄ Nə́ɓā asə ndól̄ de kə́ koy gə̄ karī. Adə̄ i tām̄ ń noō tə́ n tél əngeń ngōnən gogə́ ní. Adə̄ najə̄ yā Isaak ń toō i kūjə́ najə̄ kə́ ɔjə dɔ Kərist.

²⁰ I kə ta kūl̄ taā kem n Isaak tɔ́rəń tan dɔ Jakob tə́ ō, Esau tə́ ō, tām̄ yā yá̰a̰ gə̄ ń a reēn̄ ɓáý tə́ ní.

²¹ Dan ń Jakob a rāā yā koy ngɔr ní, i kə ta kūl̄ taā kem n ni-tɔ́rəń tan dɔ ngán Jəjep gə̄ tə́ kógə̄ḿ kógə̄ḿ ō, rugə dɔ kāgə̄ tɔ́sə̄ yān tə́ əga dɔn nang tə́ rɔȳń Nə́ɓā ō ní.

²² Dan ń Jəjep a rāā yā koy ngɔr ní, i kə ta kūl̄ taā kem n ni-ədań najə̄ teē ngán Israel gə̄ kɔ̄ɔ́ kem ɓē kə́ Ejiptə tə́ ní. Adə̄ ni-ɔjə yá̰á̰ kə́ yā kadə̄ rāān̄ kə kə̄ngān gēé.

²³ Dan ń ojən̄ Moijə ní, i kə ta kūl̄ taā kem n ngé kojən gə̄ ɓɔ̄ɔ̄nən̄ nāā mətá ní. Tɔdɔ̄ a̰ā̰n̄ kadə̄ ngōn̄ ní majə ngá̰ý, adə̄ ɓōlə́n̄ mān̄ dɔ ndū yá̰á̰ ń mban̄g ndang kadə̄ yā rāā ní alé.

²⁴ Dan ń Moijə tɔgə ní, i kə ta kūl̄ taā kem n ni-mbātə́ kadə̄ de gə̄ ɓāŕnən̄ na i ngōn̄ yā ngōn̄ Parao̰ kə́ dəyá̰ ní.

²⁵ Ni-a̰a̰ kadə̄ i só tə́ ngá̰ý kadə̄ rāānən̄ yá̰á̰ kə́ tōr̄ gə̄ naā tə́ kə de gə̄ yā Nə́ɓā gēé, tɔȳ kadə̄ ənge rɔ̄nel̄ kə́ dan i ngá̰ý aĺ loo rāā majaĺ tə́.

²⁶ Ni gír̄ kadə̄ yá̰á̰ kə́ to rɔ̄sɔl̄ gə̄ ń Kərist ənge ní, i yá̰a̰ kal̄ loo kə́ ngá̰ý tɔȳ dūbə̄ yá̰a̰ kənge gə̄ kə́ Ejiptə tə́. Tɔdɔ̄ kumən i dɔ yá̰a̰ kəndā nja kə́ ndɔ̄ń tə́.

²⁷ I kə ta kūl̄ taā kem n ni əya̰ ɓē kə́ Ejiptə kɔ̄ɔ́, kanjə̄ ɓōĺ wōn̄g yā mban̄g ní. Ni əre wurən njam tītə̄ kə́ ni-a̰a̰ Nə́ɓā ń deē asə ka̰a̰n kə kumneé aĺ ní beē.

²⁸ I kə ta kūl̄ taā kem n ni-rāā nāā Pákə ō, adə̄ ndūn kadə̄ sə̄kān̄ mósə batə̄ tū ta róbə́ kújə gə̄ tə́ ō, yā kadə̄ nge nujə de gə̄ ɔdəń rɔ̄ ngáń hágə Israel gə̄ aĺ ní.

²⁹ I kə ta kūl̄ taā kem n ngán Israel gə̄ gāngə̄n̄ bā ń a ɓār̄nən̄ kə́ kərē tītə̄ dɔ nang kə́ man̄ gətóo tū tə́ ní. Ba dan ń de kə́ Ejiptə gə̄ nāān̄ rāā tītə̄ yādə́ anī man̄ ɔr tan dɔdə́ tə́.

³⁰ I kə ta kūl̄ taā kem n ndogə̄ mbal̄ ń gīr̄ gidə ɓē kə́ Jeriko tə́sōn̄ nang tə́, dan ń ngán Israel gə̄ gīrə̄n̄ gidə ɓē ndɔ̄ sīrí ní.

³¹ I kə ta kūl̄ taā kem n Rahab ń dəyá̰ ájə́ba ní tɔ̄l̄nən̄ naā tə́ kə madə̄ ba̰ā̰ Nə́ɓā gə̄ aĺ ní. Tɔdɔ̄ ni-əhɔ ngé kum̄ loo gə̄ kə̄ kújə yān tə́ kə kem kə́ majaá.

³² I najə̄ rí n kə m-ə́dá ɓáý? Kum mbang kə́ yā kadə̄ m-ɔ̄rəń gír najə̄ yā Jedeo̰ ō, Barak ō, Samso̰ ō, Jepte ō, Dabid ō, Samuel ō, ngé koō ta gə̄ ō, kə ta njaá gətóo.

³³ I kə ta kūl̄ taā kem n nin̄-tetən̄ ɓē ko̰o̰ gə̄ rɔ̄ɔ̄ ō, rāān̄ adə̄ de gə̄ rāān̄ háĺ kə́ gōtə́ ō, əngen̄ yá̰a̰ gə̄ ń Nə́ɓā ənī míndən dɔ tə́ yā kadə̄də́ ní ō. Nin̄-utə̄n̄ ta ɓɔl gə̄ ō,

³⁴ tɔ̄lə̄n̄ kəngā hor gə̄ ō, teēn̄ ta yo kaskar tə́ ō, loo ń mo̰y rāādə́ ní əngen̄ rɔ̄ ngan̄g ō, rāān̄ go̰ loo rɔ̄ɔ̄ tə́ ō, tə̄ɓān̄ ɓūtə̄ áskar kə́ tə̄rā gə̄ ō.

³⁵ I kə ta kūl̄ taā kem n dəyá̰ gə̄ tél əngen̄ de gə̄ yādə́ kə́ koy gə̄ kə́ ndólə̄n̄ ní. Rāān̄ de kə́ rang gə̄ yá̰á̰ kə́ tōr̄ ń adə̄ oyn̄. Nin̄-mbātə́n̄ kadə̄ gāngə̄n̄ dɔdə́, yā kadə̄ ré n-oyn̄ anī, n-ndólə̄n̄ dan de kə́ koy gə̄ tə́ ba n-ndin̄ kə kumdə́ ndin̄ kə́ majə tɔȳ kə́ kété.

³⁶ Mbóon̄ kə ngé kə́rēý gə̄ ō, əndan̄də́ kə mərawaá ō, tṵ́ṵ̄n̄ ngé kə́rēý gə̄ kə súĺ ba ɓōkə́n̄də́ kújə dəngáyá ō.

³⁷ Tə́nīn̄də́ kə mbalá tənī tɔ̄lə̄n̄də́ ō, tə́jān̄də́ gángə̄n̄də́ naā tə́ kə gində̄ kəja yá̰a̰ ō, tɔ̄lə̄n̄də́ kə kaskaraá ō. A dáȳn̄ kə̄ yóō kə̄ laā ō, o̰ō̰n̄ i ngə̄rā batə̄ gə̄ ō, ngə̄rā bə̄yā̰ gə̄ ō rɔ̄də́ tə́. Ndoō rāādə́ ō, wur kɔl əngedə́ ō, de gə̄ rāān̄də́ yá̰á̰ kə́ tōr̄ gə̄ ō.

³⁸ Dɔ nang ń toō majə tām̄ yādə́ alé. Nin̄-dáȳn̄ kə̄ kem dəla loo gə̄ tə́ ō, kə̄ dɔ mbal̄ gə̄ tə́ ō, kə̄ kem bəlo mbal̄ gə̄ tə́ ō, kə̄ bəlo gə̄ kə́ dɔ nang tə́ ō.

³⁹ Nə́ɓā əda Najə̄ kə́ Majə dɔdə́ tə́ malang tām̄ taā kem yādə́ tə́, ba əngen̄ yá̰á̰ ń Nə́ɓā ənī míndən dɔ tə́ ní alé.

⁴⁰ Tɔdɔ̄ Nə́ɓā a̰a̰ kété kadə̄ a rāā yá̰á̰ kə́ majə ngá̰ý tɔȳ tām̄ yājí tə́, adə̄ ni-gḛy kadə̄ ngé gə̄ ń noō télən̄ majə ɔtə̄ ta ta kumən tə́ kanjə̄jí jḭḭ̄ alé.