HEBƏRO 1 - Bibəl ta Sar̄

Nə́ɓā ɔr̄ najə̄ sejí kə ta kūl̄ Ngōnən

¹ Kété ní Nə́ɓā ɔr̄ najə̄ kə kaají gēé kə̄ nja naā tə́ ō, kə ta róbə́ kə́ tayā gēé ō, i kə ta kūl̄ ngé koō ta gēé.

² Banī kem ndɔ̄ gə̄ ń toō tə́ ń i ta tɔ̄l̄ ta ndɔ̄ gə̄ ní, ni-ɔr̄ najə̄ sejí i kə ta kūl̄ Ngōnən. Ni-rāā yá̰a̰ malang i kə ta kūl̄ Ngōnən ní ō, i Ngōnən ní n ni gə̄rān kadə̄ ənge yá̰a̰ malang ní ō.

³ Ngōn̄ Nə́ɓā ní i kɔsə gɔn yā Bɔbə̄n kə́ ndə́lē i ndə́lē yā Nə́ɓā ō, i ngarān̄g kum Nə́ɓā Bɔbə̄n nəkɔ́ kə́ ɔjə rɔ̄n kə̄ ndágá ō. Ni-rāā adə̄ yá̰a̰ gə̄ malang ndin̄ ngan̄g kə ta kūl̄ tɔ́gə najə̄ yānneé. Dan ń ni-ɔr̄ majaĺ kə́ kem de gə̄ tə́ kɔ̄ɔ́ ní, ni-ndi dɔ jī ko̰ Nə́ɓā tə́ dɔ rā̰ tə́. Nə́ɓā i tɔ́gə́ kə́ dɔ tɔ́gə gə̄ tə́ malang.

Ngōn̄ Nə́ɓā bo tɔȳ de kə́ dɔ rā̰ tə́ gə̄

⁴ Ngōn̄ Nə́ɓā tél de kə́ bo ngá̰ý tɔȳ de kə́ dɔ rā̰ tə́ gə̄, tɔdɔ̄ ənge rī kə́ majə ngá̰ý tɔȳ yādə́.

⁵ I náā kə́ dan de kə́ dɔ rā̰ tə́ gə̄ tə́ n Nə́ɓā ədan na: I ḭ̄ n i Ngōnə̄ḿ ní, əla gír ɓōólaā ní, mā i Bɔbí. Tá ni-əda najə̄ ń toō dɔ deē kógə̄ḿ kə́ dɔ rā̰ tə́ alé: Ndɔ̄ń tə́ anī ni a rāām̄ i Bɔbə̄n tə́ ō, mā m-ā m̄-rāān i Ngōnə̄ḿ tə́ ō.

⁶ Banī loo ń əla Ngōn̄ hágə̄n dɔ nang tə́ ní, ni-əda na: Ādə̄ de kə́ dɔ rā̰ tə́ gə̄ malang yā Nə́ɓā ɔsən̄ nodə́ nang tə́ non tə́.

⁷ Najə̄ ń Nə́ɓā əda dɔ de kə́ dɔ rā̰ tə́ gə̄ tə́ ní n toó: Nə́ɓā rāā deē yān gə̄ kə́ dɔ rā̰ tə́ i néĺ tə́ ō, rāā ngé kəla yān gə̄ i ta ndo̰ hor tə́ ō.

⁸ Banī tām̄ yā ngōn̄ Nə́ɓā tə́ ɓáa Nə́ɓā əda na: Kōr̄ kāgə̄ mbang yāí ḭ̄ Nə́ɓā i kə́ kəndān kadə̄ ndi ngándáńg. Ḭ̄ ā ó̰o̰ ɓē yāí i kə yá̰a̰ rāā kə́ gōtə́.

⁹ Ī-ndigə yá̰á̰ kə́ gōtə́ ba ī-mbātə́ yá̰á̰ kə́ majaĺ, i tām̄ najə̄ ń noō tə́ n ḭ̄ Nə́ɓā, Nə́ɓā yāí ur yibə̄ rɔ̄nel̄ dɔí tə́ ɔrə̄ń kamí tayā ō, gə̄rāī dan madí gə̄ tə́ ō ní.

¹⁰ Ni-əda ɓáý to̰ na: Kɔ́ɔ̄ɓē, i ḭ̄ n ə̄ndā dɔ nang ta kəla gíŕ yá̰a̰ gə̄ tə́ ní ō, dɔ rā̰ i kəla kə́ ī-rāā kə jīí ō.

¹¹ Yá̰a̰ gə̄ ní a udən̄ kɔ̄ɔ́, ba ḭ̄ ā ī-ndi kə ndɔ̄ gə̄. Dɔ nang ō, dɔ rā̰ ō, a əsōn̄ ngísə tītə̄ yā kūbə̄ beé.

¹² Ā ī-ɓír̄də́ tītə̄ loo ɓír̄ kūbə̄ kūl̄ beé ō, a tūrə̄n̄də́ kɔ̄ɔ́ tītə̄ kūbə̄ ō, ba ḭ̄ ī-ndi tītə̄ kə́ kété ngándáńg ō, ɓālīí gə̄ a təgān̄ aĺ bátə́ ō.

¹³ Nə́ɓā əda deē yān kə́ dɔ rā̰ tə́ kógə̄ḿ najə̄ ń toō alé: Ī-reē ī-ndi dɔ jī ko̰ḿ tə́, bátə́ kadə̄ m-ə́lań madə̄ ba̰ā̰í gə̄ tītə̄ kōr̄ kāgə̄ beé gír njaí tə́.

¹⁴ De kə́ dɔ rā̰ tə́ gə̄ malang i ndíl gə̄ kə́ ngé rāā kəla yā Nə́ɓā ō, Nə́ɓā əladə́ kadə̄ rāān̄ kə ngé gə̄ ń majə kadə̄ ajən̄də́ ní ō.