GALATƏ 6 - Bibəl ta Sar̄

Ə̄tōī yá̰á̰ kə́ kɔȳ gə̄ kə naá

¹ Ngákó̰ó̰ḿ gə̄, ré ə́hɔī deē kógə̄ḿ loo rāā yá̰á̰ kə́ gō tə́ aĺ tə́ anī, sḭḭ̄ ń Ndíĺ Nə́ɓā i kemsí tə́ ní, ī-rāāī seneé kə kem kə́ sɔl̄ lɔmɔɔ́ ādə̄ tél reē dɔ róbə́ kə́ súmūú tə́. Ī-ngɔ̄m̄ rɔ̄í majə na sōgə́ īkɔ́ ə̄sō kum yá̰a̰ nāā tə́ ō.

² Ə̄tōī yá̰á̰ kə́ kɔȳ gə̄ kə naá, na i tītə̄ ń noō n ā ī-rāāīneé yá̰á̰ ń ndū najə̄ yā Kərist əda ní.

³ Ré deē kógə̄ḿ ɔjəń na ni na i yá̰á̰ kə́rēý, tá ni i yá̰á̰ kógə̄ḿ aĺ anī, ni-gól̄ i rɔ̄n nəkɔ́.

⁴ Majə kadə̄ náā nəkɔ́ əndā ma̰ȳ kəla rāān nəkɔ́. Ré kəla ní majanī, a ɔr ta rɔ̄n tām̄ kəla ní tə́, banī i tām̄ kəla yā de kə́ rang tə́ alé.

⁵ Tɔdɔ̄ náā nəkɔ́ a ətō yá̰á̰ kə́ kɔȳ yān nəkɔ́.

⁶ Ādə̄ deē ń ndóōnən̄ yá̰á̰ ní, kēgə̄ yá̰a̰ yān gə̄ malang adə̄ nge ndóōn yá̰a̰.

⁷ Ī-lōōī gól̄ rɔ̄sí na deē a lur Nə́ɓā alé. I yá̰á̰ ń deē dubə̄ ní n a əja ní.

⁸ Ré yá̰á̰ ń ī-dubə̄ ní, i yá̰á̰ kə́ tām̄ yā dā̰ rɔ̄ tə́ anī, yá̰á̰ ń ā ə́já ní, i yá̰á̰ ń dā̰ rɔ̄ adə̄ ní, adə̄ i yá̰á̰ kə́ ndum. Ré yá̰á̰ ń ī-dubə̄ ní, i yá̰á̰ kə́ kə gō kem ndigə yā Ndíl anī, yá̰á̰ ń ā ə́ja kə ta kūl̄ Ndílí ní, i ndi kə kumuú kə́ ngándáńg.

⁹ Jə-rāāī yá̰á̰ kə́ majə kanjə̄ kɔr loon tə́. Ré j-ɔriī ta kəla yājí tə́ aĺ anī, j-a j-əjaī kanə̄n loo ń ndɔ̄ a asə ní.

¹⁰ I tām̄ ń toō tə́ n, dan ń j-əngeī loon ɓáý ní, ādə̄ jə-rāāī yá̰á̰ kə́ majə kə de gēé malang. Ba mandang ɓáa ādə̄ i kə ngákó̰ó̰jí kə́ ngé taā kem madə̄jí gēé.

Tāā gə̄ kə́ ta tɔ̄l̄ ta tə́ ō, lápə́ya kə́ Pol rāā Galatə gə̄ ō

¹¹ Á̰a̰ī kum najə̄ kə́ bo doy doy gə̄ ń m̄-ndang m-ādə̄sí kə jīḿ mə̄kɔ́ toō.

¹² Ngé gə̄ ń ɔsən̄ sesí ta kəja mɔtəsí ní, i de gə̄ kə́ gḛyn̄ kadə̄ a̰a̰n̄də́ i de kə́ majə gə̄ tə́, kə gō yā deē ndul gēé. Nin̄-rāān̄ tītə̄ ń noō i yā kadə̄ rāān̄neédə́ ndoō tə́ najə̄ kāgə̄ kə́ dēsə́ yā Kərist tə́ aĺ ngóy.

¹³ Tɔdɔ̄ ngé gə̄ ń əjan̄ mɔtədə́ ní nin̄ kɔ́ gə̄ ngɔ̄mə̄n̄ ndū najə̄ alé, ba gḛyn̄ kadə̄ əjan̄ mɔtəsí, i yā kadə̄ nin̄-ɔrnə̄ń ta rɔ̄də́.

¹⁴ Mā tā anī, yá̰á̰ sḛ́ý kə́ yā kadə̄ m-ɔ́rəń ta rɔ̄ḿ gətóo. Ré m-ɔ́r ta rɔ̄ḿ anī, i kə ta kūl̄ kāgə̄ kə́ dēsə́ yā Kɔ́ɔ̄ɓē Jeju tá ngóy. Kāgə̄ kə́ dēsə́ ní, rāā adə̄ yá̰á̰ kə́ dɔ nang tə́ gə̄ i kə́ kənda kə máyá̰ tū kāgə̄ kə́ dēsə́ tə́ kɔ̄ɔ́ ta kumḿ mā tə́ ō, rāā adə̄ mā i de kə́ kənda kə máyá̰ tū kāgə̄ kə́ dēsə́ tə́ kɔ̄ɔ́ ta kumdə́ nin̄ tə́ ō.

¹⁵ Tɔdɔ̄ kəja mɔtə aké, kəja mɔtə aĺ ní, i yá̰á̰ kógə̄ḿ alé. Ba yá̰á̰ ń i yá̰á̰ kə́ bo ní, i kadə̄ jḭḭ̄ i de kə́ kijə gə̄.

¹⁶ De gə̄ malang ń unən̄ gō róbə́ ń toō, kə deē yā Nə́ɓā gēé ní, ādə̄ Nə́ɓā adə̄də́ kem sɔl̄ lɔm ō, a̰a̰ kum tō ndoō yādə́ ō.

¹⁷ Ngɔlaā ní, ādə̄ deē njə́ɓām̄ to̰ alé. Tɔdɔ̄ tə́ré yá̰á̰ kə́ tōr̄ gə̄ kə́ m-ə́nge tām̄ yā Jeju tə́ i rɔ̄ḿ tə́ ɓáý.

¹⁸ Ngákó̰ó̰ḿ gə̄, ādə̄ Kɔ́ɔ̄ɓē yājí Jeju Kərist rāā kem majə sesí. Adə̄ i tītə̄ ń noō.