GALATƏ 4 - Bibəl ta Sar̄

¹ Adə̄ dan ń nge kənge yá̰a̰ ndəbā na̰y ngōn̄ ɓáý ní, ni i kɔ́ɔ̄ yá̰a̰ gə̄ ɓá tā, ba ni i tītə̄ ɓəlo beé,

² tɔdɔ̄ ni-ndi i gíŕ tɔ́gə yā de kə́ ngé ngɔ̄mə̄n gə̄ tə́ ō, ngé ngɔ̄m̄ yá̰a̰ yān gə̄ tə́ ō, bátə́ kadə̄ ndɔ̄ ń bɔbə̄n ɔjə ní ugə̄ pá tá.

³ I tītə̄ ń toō tām̄ yājí tə́ ō. Tām̄ dan ń jḭḭ̄ i ngán gə̄ ɓáý ní, tɔ́gə́ kə́ dɔ nang tə́ gə̄ o̰o̰n̄ ɓē dɔjí tə́.

⁴ Ba dan ń ndɔ̄ asə anī, Nə́ɓā əla Ngōnən adə̄ de kə́ dəyá̰ ojən. Ojənən̄ i dan ń ndū najə̄ i kɔ́ɔ̄ yá̰a̰ gə̄ tə́ ní,

⁵ yā kadə̄ ni-gāngəń dɔ ngé gə̄ ń ndin̄ i gíŕ tɔ́gə yā ndū najə̄ tə́ ní ō, rāāńjí kadə̄ jə-téliī ngáń Nə́ɓā gə̄ ō.

⁶ Sḭḭ̄ i ngáń Nə́ɓā gə̄ rɔ̄kum i karī alé, tɔdɔ̄ Nə́ɓā əla Ndíl Ngōnən kemjí tə́, tá Ndíĺ ní əda kə ndū boó na Aba, Bɔbə̄jí!

⁷ Adə̄ ń toō ḭ̄ i ɓəlo to̰ aĺ tā, ba ḭ̄ i ngōn̄ Nə́ɓā. Ré ḭ̄ i ngōnən anī, ḭ̄ i nge kənge yá̰á̰ ndəbā ō.

Pol sōl̄ tām̄ yā Galatə gə̄ tə́

⁸ Jóo dan ń ī-gerī Nə́ɓā aĺ ɓáý ní, ī-rāāī kəla ɓəlo yā ngé gə̄ ń i nə́ɓā kə́ rɔ̄kum aĺ gə̄ ní.

⁹ Ba ngɔlaā ī-gerī Nə́ɓā, ba kə́ rɔ̄kum tə́ tā anī, i Nə́ɓā n ger̄sí ní. Ní, i ba̰ý á ī-tél ā ī-rāāī kəla yā tɔ́gə́ kə́ dɔ nang tə́ gə̄ ń i nə́ɓā kə́ rɔ̄kum aĺ gə̄ ní? I tām̄ rí tá ī-téliī ɓəlo yādə́ gə̄ ɓáý ní?

¹⁰ Sḭḭ̄ ə̄ndāī kumsí majə gír ndɔ̄ gə̄ tə́ ō, nāā gə̄ tə́ ō, ɓar gə̄ kə ɓāl̄ gə̄ tə́ ō, ī-rɔyīneédə́.

¹¹ Kəla ń m̄-rāā tām̄ yāsí tə́ ní, m̄-ɓōĺ najə̄ kadə̄ i kəla kə́ ndāńg karī.

¹² Ngákó̰ó̰ḿ gə̄, m̄-rāāsí ɓɔ́ kadə̄ ī-tél ī-toī tītə̄ḿ mā, tɔdɔ̄ mā m̄-tél m̄-to tītə̄sí ō. Sḭḭ̄ ī-rāāī yá̰á̰ kógə̄ḿ kə́ gō tə́ aĺ seḿ alé.

¹³ Sḭḭ̄ ī-gerī majə kadə̄ i tām̄ yā mo̰y kə́ rāām̄ tə́ n m-ɔ́jəńsí Najə̄ kə́ Majə kété ní.

¹⁴ Mo̰y ń rāām̄ ní nə́ngētə́ gēé, sḭḭ̄ ā ī-kídə̄mī ō, ā ī-mbātə́mī ō, najə̄n tə́. Ba sḭḭ̄ ī-rāāī nge ń noō alé, ba ə́hɔmī kə̄ rɔ̄sí tə́ tītə̄ de kə́ dɔ rā̰ tə́ yā Nə́ɓā ō, tītə̄ Kərist Jeju ō.

¹⁵ Dan ngeé ń noō tə́ ní, rɔ̄sí nel̄sí ngá̰ý. Ba ngɔlaā ní, ta rɔ̄nel̄ yāsí ní tḭ̄ḭ̄ i rá? M-ə́dásí najə̄ kə́ rɔ̄kum, dan ngeé ń noō tə́ ní, ré ásiī i kɔr̄ kumsí kadə̄m̄ anī, ā ɔ̄rī.

¹⁶ Ba ngɔlaā m̄-tél madə̄ ba̰ā̰sí i tām̄ najə̄ kə́ rɔ̄kum ń m-ə́dásí tə́ ní a?

¹⁷ Ko̰o̰ ń o̰o̰ de kə́rēý gə̄ tɔdɔ̄sí ní, i ko̰o̰ tɔdɔ̄ kə́ gō tə́ alé. Nin̄-gḛyn̄ kɔr̄sí rɔ̄ḿ tə́ kɔ̄ɔ́ i yā kadə̄ o̰o̰sí tɔdɔ̄də́.

¹⁸ Majə kadə̄ o̰o̰sí tɔdɔ̄ yá̰á̰ kə́ majə i kə dɔ ndɔ̄ gə̄, ba kadə̄ i dan ń mā i sesí ní tá ngóy alé.

¹⁹ Ngánə́ḿ kə́ dūú gə̄, tápə̄ ń m-ə́ngé ní, i tītə̄ yā dəyá̰ ń rāā loo kojə ngōn̄ ní, bátə́ kadə̄ Kərist əndāń rɔ̄n kemsí tə́.

²⁰ Kum mbang ń toō tə́ ní, m̄-ndə̄ngā ngá̰ý kadə̄ mā i dansí tə́, kadə̄ m-ɔ̄r̄ najə̄ kə gōó kadə̄ udə dɔsí tə́, tɔdɔ̄ kemḿ rāām̄ najə̄ yāsí tə́.

Agar ō Sara ō

²¹ Sḭḭ̄ ń ī-gḛyiī kəla dɔsí gír ndū najə̄ tə́ ní, najə̄ ń ndū najə̄ əda ní ōōī aĺ a ə́damī.

²² Tɔdɔ̄ i kə́ ndang kem makətūbūú na Abəraham ojə ngáń kə́ dəngam gə̄ jōó, kógə̄ḿ i ngōn̄ dəyá̰ kə́ ɓəlo, ba kógə̄ḿ i ngōn̄ dəyá̰ kə́ kɔ́ɔ̄ rɔ̄n.

²³ Banī ngōn̄ dəyá̰ kə́ ɓəlo ní, ojənən̄ i kə gō dā̰ rɔ̄ɔ́, ba ngōn̄ dəyá̰ kə́ kɔ́ɔ̄ rɔ̄n ní ojənən̄ i kə ta kūl̄ kənī míndə.

²⁴ Yá̰a̰ gə̄ ń toō i kūjə́ najə̄, tɔdɔ̄ dəyá̰ gə̄ ń noō i madə̄ naā kə́ jōó gə̄: Kógə̄ḿ i madə̄ naā kə́ mbal̄ kə́ Sinai tə́, adə̄ i Agar ń i dəyá̰ kə́ ojə deē i tām̄ yā ɓəlo tə́ ní.

²⁵ Tɔdɔ̄ Agar i kum gotə mbal̄ kə́ Sinai gō nang kə́ Arabə tə́. Ni i Jerusalem kə́ ngɔlaā ń toō, tɔdɔ̄ ni i ɓəlo naā tə́ kə ngánən gēé.

²⁶ Banī Jerusalem kə́ dɔɔ́ i kɔ́ɔ̄ rɔ̄n, adə̄ i ni n i kó̰ó̰jí ní.

²⁷ Tɔdɔ̄ ndangən̄ kem makətūbə̄ yā Nə́ɓā tə́ na: Dəyá̰ kə́ kujə, ḭ̄ ń ójə ngōn̄ aĺ ní, ī-rāā rɔ̄nel̄. Ḭ̄ ń ī-ger̄ tápə̄ yā kojə ngōn̄ aĺ ní, ə́la ndīĺ rɔ̄nel̄. Tɔdɔ̄ ngán kem dəyá̰ kə́ kəya̰ kɔ̄ɔ́ i ngá̰ý tɔȳ ngán kem dəyá̰ kə́ ndi jī ngaan tə́.

²⁸ Ba sḭḭ̄ ngákó̰ó̰ḿ gə̄, sḭḭ̄ i ngán kənī míndə gə̄ tītə̄ yā Isaak.

²⁹ Ba tītə̄ ń kété jóo ngōn̄ ń ojənən̄ kə gō yā dā̰ rɔ̄ɔ́ rāā nge ń ojənən̄ kə gō yā Ndílí ndoō tə́ ní, ngɔlaā a to i tītə̄ ń noō ō.

³⁰ Banī makətūbə̄ yā Nə́ɓā əda na i rí? Əda na kə ī-tə̄ɓā dəyá̰ kə́ ɓəlo kɔ̄ɔ́ nin̄ kə ngōn̄neé, na sōgə́ ngōn̄ dəyá̰ kə ɓəlo ənge yá̰a̰ ndəbā naā tə́ kə ngōn̄ dəyá̰ kə́ ni i kɔ́ɔ̄ rɔ̄n.

³¹ I beé ní, ngákó̰ó̰ḿ gə̄, jḭḭ̄ i ngán dəyá̰ kə́ ɓəlo alé, banī i ngán dəyá̰ kə́ ni i kɔ́ɔ̄ rɔ̄n.