ESTER 5 - Bibəl ta Sar̄

Ester aw̄ rɔ̄ mban̄g tə́

¹ Dan ń ndɔ̄ kə́ mətá gə̄ ní təgān̄ anī Ester əla kūbə̄ mban̄g rɔ̄n tə́ ba aw̄ ra ndágə loo kə́ ta kújə yā mban̄g tə́ kumən sɔɔ̄ kújə yā mban̄g sew. Mban̄g ndi kújú dɔ kōr̄ kāgə̄ mbang yān tə́ ba kumən i kə̄ ta róbə́ tə́.

² Dan ń mban̄g a̰a̰ nə̄yá̰n Ester ra kə njan kə́ dɔɔ́ ndágə looó anī rāā kem majə seneé adə̄ əla kāgə̄ ko̰o̰ ɓē kə́ rāā kə lɔ́rɔ́ ń əhɔ jīn tə́ ní kum kə rɔ̄n tə́. Ester reē ngɔr ba ɔdə ta kāgə̄ ko̰o̰ ɓē ní.

³ Loo ń noō tə́ mban̄g dəje Ester na: Ester, nə̄yá̰ mban̄g, i rí n rāā yá̰a̰? Ī-gḛy i rí? Ká i núsə ɓē ko̰o̰ yāḿ gə̄gē anī m-ā m-ādī.

⁴ Ester tél əda na: Ré mban̄g ndigə anī ādə̄ aw̄ loo yá̰a̰ kəsa ń m̄-rāā tām̄ yān tə́ ní ɓōólaā nin̄ kə Haman.

⁵ Loo ń noō tə́ mban̄g əla deē kógə̄ḿ gō Haman tə́ kadə̄ reē láẃ yā rāā yá̰á̰ ń Ester ndigə ní. Mban̄g nin̄ kə Haman reēn̄ loo yá̰a̰ kəsa ń Ester rāā ní tə́.

⁶ Dan ń əsan̄ yá̰a̰ oy anī mban̄g əda Ester na ké gḛy i rí wa. Ká gḛy i núsə ɓē ko̰o̰ gə̄gē anī n-a n-adə̄n.

⁷ Ester tél ədan na: Yá̰á̰ ń m̄-gḛy dəje ní a?

⁸ Ré mban̄g rāā kem majə seḿ ō, ndigə kadə̄m̄ yá̰á̰ ń m̄-gḛy ní ō anī, ādə̄ mban̄g nin̄ kə Haman reēn̄ loo yá̰a̰ kəsa ń m-ā m̄-rāā tə́ tām̄ yādə́ tə́ bírí ní. Ɓá anī m-ā m-ə́dá yá̰á̰ ní.

Haman rāā loo kāgə̄ kə́ yā do̰ō̰ Mardose tū tə́

⁹ Ndɔ̄ ń noō tə́ ní Haman teē ɓē nə̄yá̰ mbangāá i kə rɔ̄nelēé ō, kemən nelə̄n ō. Ba dan ń a̰ā̰ kadə̄ Mardose ń ndi ta róbə ndogə̄ yā mban̄g tə́ ní ḭḭ dɔɔ́ tām̄ yān tə́ aĺ ō, yéȳ rɔ̄n sḛ́ý tām̄ yān tə́ al̄ ō anī, wōn̄g rāān ngá̰ý seneé.

¹⁰ Banī ni-əhɔ rɔ̄n tɔgə aw̄ ɓēé. Gō tə́ anī əla gō madə̄n gə̄ tə́ ō, gō nə̄yá̰n Jeres tə́ ō adə̄ reēn̄.

¹¹ Ni ədadə́ najə̄ yā yá̰a̰ kənge yān kə́ majə ngá̰ý gə̄ ō, ngánən kə́ ngá̰ý gə̄ ō, yá̰a̰ malang ń mban̄g rāā á əndānneé loo kə́ bo tə́ ní ō, loo kəndā ń əndān dɔ de kə́ bo gə̄ tə́ ní ō, dɔ ngé rāā kəla kə ndogó mbangāá gə̄ tə́ ní ō.

¹² Gō tə́ anī əda na: Tá ɓáý to̰ ní yá̰a̰ kəsa ń Ester nə̄yá̰ mban̄g rāā ní i mā ngóy n ni ɓārə́m̄ ta kəsa adə̄ m-āw̄ loon tə́ ɓōólaā kə mbangāá ní. Tá i mā n ni ɓārə́m̄ ta kəsa yá̰á̰ bírí kadə̄ m-āw̄ loon tə́ kə mbangāá ɓáý to̰ ní.

¹³ Banī kə dɔ ka̰a̰ ń m-á̰a̰ Mardose, Jipə ń ndi ta róbə yā mban̄g tə́ noō malang ní, rɔ̄nel̄ yá̰a̰ malang ń noō ɔr̄ kemḿ tə́ kɔ̄ɔ́.

¹⁴ Anī nə̄yá̰n Jeres ō, madə̄n gə̄ malang ō, ədanən̄ na: Ādə̄ udən̄ kāgə̄ tɔ̄l̄ de kə́ ngālən kə́ kə̄ dɔɔ́ i métər kutə jōó gidə i mí. Ba bírí dəloí anī ə́da mban̄g ādə̄ ənīn̄ kəlā míndə Mardose tə́ ba do̰ō̰nən̄ ta tə́ dɔɔ́. Gō tə́ anī ā āw̄ kəsa yá̰á̰ kə mbangāá kə rɔ̄nelēé. Haman ndigə yá̰á̰ ń ɔjən̄ ní adə̄ rāān̄ kāgə̄ tɔ̄l̄ deē ní.