ESTER 3 - Bibəl ta Sar̄

Haman nin̄ kə Mardose télən̄ madə̄ ba̰ā̰ naā gə̄

¹ Gō yá̰a̰ gə̄ ń noō tə́ ní mban̄g Jerses əndā Haman kə́ ngōn̄ Hamedata ń i de kə́ gír yā Agag tə́ ní loo kə́ bo tə́. Ni-ɔsə gɔnən ō, əndān dɔ de kə́ bo yān gə̄ tə́ malang ō.

² Ngé kəla gə̄ malang yā mban̄g ń ndin̄ ta róbə yā mban̄g tə́ ní ɔsən̄ kejədə́ nang tə́ no Haman tə́ ō, ɔsən̄ nodə́ nang tə́ non tə́ ō, tītə̄ ń mban̄g ədań ní. Banī Mardose ɔsə kejən nang tə́ non tə́ aĺ ō, ɔsə non nang tə́ non tə́ aĺ ō.

³ Tā anī ngé kəla gə̄ yā mban̄g ń ndin̄ ta róbə tə́ ní dəjen̄ Mardose na ké mbātə́ rāā gō míndə mban̄g ké i tām̄ rí tə́ wa.

⁴ Nin̄ a dəjenən̄ najə̄ ní i kə dɔ ndɔ̄ gə̄, banī ni un mbīn dɔ tə́ kɔ̄ɔ́. Loo ń noō tə́ nin̄ ədan̄ Haman najə̄ ní yā ka̰a̰ń ké Mardose a to i dan rāā hál ní tə́ ɓáý wa. Tɔdɔ̄ ni ədadə́ na ni na i Jipə.

⁵ Dan ń Haman a̰ā̰ kadə̄ Mardose ɔsə kejən nang tə́ non tə́ aĺ ō, ɔsə non nang tə́ non tə́ aĺ ō anī, wōn̄g rāān ngá̰ý.

⁶ Ba ni a̰ā̰ kadə̄ dal ba̰ā̰ dɔ Mardose tə́ kə kérneé ngóý ní asə alé. Adə̄ ni sāā ta róbə tɔ̄l̄ gír de gə̄ yā Mardose kɔ̄ɔ́, adə̄ i Jipə gə̄ malang ń ndin̄ kem ɓē ko̰o̰ yā mban̄g Jerses tə́ ní, tɔdɔ̄ ədanən̄ na Mardose na i Jipə.

⁷ Kem ɓāl̄ ko̰o̰ ɓē yā mban̄g Jerses kə́ nge ko̰ kutə gidə i jōó tə́ ní, kem nāā kə́ ta kəga dɔ tə́ ń i nāā Nisan ní, túgə̄n̄ wə̄lā gə̄ ń a ɓārə́n̄də́ nāā i Purim gə̄ ní ta kum Haman tə́ yā gerə̄ń ndɔ̄ gə̄ ō, nāā gə̄ ō ń majən̄ tām̄ yān tə́ ní anī wə̄lā əhɔ i dɔ nāā kə́ nge ko̰ kutə gidə i jōó tə́, adə̄ i nāā Adar.

Haman sāā ta róbə tɔ̄l̄ Jipə gə̄ malang

⁸ Haman əda mban̄g Jerses na: Kɔ́ɔ̄ ɓē gə̄, gír deē kógə̄ḿ kə́ dáńg gə̄ kə́ tə̄ndā tḭ̄ḭ̄n̄də́ kə̄ loo gə̄ tə́ dan gír de gə̄ tə́ gō nang gə̄ kə́ kem ɓē ko̰o̰ yāí tə́ ndin̄ noó. Nin̄ ndin̄ i tayā ō, yá̰a̰ kāgə̄ ɓē yādə́ tō tītə̄ yā gír de kə́ rang gə̄ aĺ ō, yá̰a̰ gə̄ ń ndū najə̄ yā mban̄g əda kadə̄ yā rāā ní nin̄ rāān̄ aĺ ō. Ré mban̄g əya̰də́ adə̄ ndin̄ jəke anī yá̰á̰ kə́ mban̄g a ənge gírí gətóo.

⁹ Banī ré mban̄g ndigə anī adə̄ ndangən̄ makətūbə̄ kadə̄ tɔ̄lə̄n̄də́ kɔ̄ɔ́ malang. Loo ń noō tə́ m-ā m-ādə̄ ngé rāā kəla seí gə̄ njáŕ sə́lē arjā̰a̰ dūbú kutə kadə̄ ɓōkə́n̄ loo ngɔ̄m̄ yá̰a̰ kənge gə̄ tə́.

¹⁰ Loo ń noō tə́ mban̄g ɔr̄ kulūm̄ kə́ jīn tə́ adə̄ Haman kə́ ngōn̄ Hamedata ń i de kə́ gír yā Agag tə́ ō, i madə̄ ba̰ā̰ Jipə gə̄ ō ní.

¹¹ Gō tə́ anī mban̄g əda Haman na: Nar i kə́ kəya̰ kadī ō, gír de gə̄ ní i kə́ kadī sedə́ kadə̄ ī-rāā yá̰á̰ ń kemií ndigə ní sedə́ ō.

¹² Tā anī ɓārə́n̄ ngé ndang makətūbə̄ gə̄ yā mban̄g kem nāā kə́ ta kəga dɔ tə́, kə ndɔ̄ nāā kə́ nge ko̰ kutə gidə i mətá, adə̄ ndangən̄ makətūbə̄ gə̄ yā kəlań kadə̄ ngé kɔsə kum gotə mban̄g dɔ ɓē tə́ gə̄ ō, ngé ko̰o̰ ɓē gə̄ kə́ gō nang gə̄ tə́ ō, ngār gə̄ yā gír de kə́ tayā tayā gə̄ ō, tītə̄ ń Haman ədań ní. Ndangən̄ makətūbə̄ gə̄ ní yā kəlań gō nang gə̄ tə́ i kə gō jī loo ndangən yā de kə́ gō nang gə̄ ní tə́ ō, adə̄n̄ gír de gə̄ kógə̄ḿ kógə̄ḿ i kə ta ɓē yādə́ gēé ō. Ndangən̄ makətūbə̄ gə̄ ní i kə rī mban̄g Jerses ō, tə́ndān̄ tambō̰o̰ gə̄ dɔ tə́ i kə kulūm̄ yā mbangāá ō.

¹³ Gō tə́ anī adə̄n̄ ngámbang kəla gə̄ makətūbə̄ gə̄ ní kadə̄ aw̄n̄neé gō nang gə̄ yā mban̄g tə́ yā nujəń Jipə gə̄ malang kɔ̄ɔ́: Kadə̄ tɔ̄lə̄n̄də́ ō, rāān̄ kadə̄ gətóon̄ kɔ̄ɔ́ malang ō. Kadə̄ tɔ̄lən̄ balsáa gə̄ ō de kə́ tɔgə gə̄ ō ngán gə̄ ō dəyá̰ gə̄ ō kadə̄ ɔyn̄ yá̰a̰ kənge yādə́ gə̄ ō. Kadə̄ tɔ̄lə̄n̄də́ i kem ndɔ̄ kə́ kógə̄ḿ beē tə́, kə ndɔ̄ kə́ nge ko̰ kutə gidə i mətá yā nāā kə́ nge ko̰ kutə gidə i jōó, adə̄ i kem nāā Adar tə́.

¹⁴ Makətūbə̄ ngeé ń toō rāā rɔ̄n i yá̰á̰ kə́ ndang kadə̄ yā rāā tə́ tām̄ yā gō nang gə̄ tə́ kógə̄ḿ kógə̄ḿ, kadə̄ ədan̄ gír de gə̄ malang, na kə ndin̄ dɔ rɔ̄də́ tə́ tām̄ yā ndɔ̄ ń ədan̄ ní tə́.

¹⁵ Ngámbang kəla gə̄ aw̄n̄ láẃ tītə̄ ń mban̄g ədań ní ō, ənīn̄ mbēr dɔ tə́ kem ɓē bo kə́ Sujə tə́ ō. Mban̄g nin̄ kə Haman ndi a a̰ȳn̄ yá̰a̰, banī de kə́ kem ɓē bo kə́ Sujə tə́ gə̄ tá a̰a̰n̄ oy oy.