ESDRAS 9 - Bibəl ta Sar̄

Jipə gə̄ ngá̰ý táān̄ dəyá̰ kə́ tə̄rā gə̄

¹ Gō yá̰a̰ gə̄ ń noō tə́ anī ngār gə̄ reē ədamə̄n̄ na ngán Israel gə̄ ō, ngé tun̄ yá̰a̰ gə̄ ō, ngán Lebi gə̄ ō, na ɔrə̄n̄ rɔ̄də́ kɔ̄ɔ́ rɔ̄ de kə́ kem ɓēé gə̄ tə́ alé. Nin̄ na rāān̄ yá̰á̰ kə́ to yḛr kum gə̄ yā Kanaan gə̄ ō Het gə̄ ō Periji gə̄ ō Yebus gə̄ ō Amon gə̄ ō Moab gə̄ ō Ejiptə gə̄ ō Amor gə̄ ō.

² Na táān̄ dəyá̰ gə̄ dan gír de gə̄ ń noō tə́ tām̄ yādə́ nin̄ kɔ́ gə̄ tə́ ō, tām̄ yā ngáńdə́ kə́ dəngam gə̄ tə́ ō. Adə̄ ngán Israel gə̄ ń i de kə́ táĺ gə̄ ní na gurə́n̄ naā kə de kə́ kem ɓēé gēé. Na i ngār gə̄ ō, de kə́ bo gə̄ ō n əlan̄ gír rāā yá̰a̰ gə̄ kə́ majaĺ ń noō ń ɔjə kadə̄ nin̄ ran̄ dɔ ndūdə́ tə́ aĺ ní.

³ Dan ń m-ōō najə̄ ń noō ní, m-ə́hɔ kūbə̄ yāḿ kə́ gír madāá m̄-*rə̄yā̰ ō, m̄-rə̄yā̰ nge kə́ dɔ madə̄ tə́ ō, m̄-ró̰ȳ nənga dɔḿ ō, mbāyə́ḿ ō, m̄-ndi nang tə́ ō, tɔdɔ̄ tɔ́gə́ḿ ur̄ wak kɔ̄ɔ́.

⁴ Banī de gə̄ malang ń a oōn̄ najə̄ yā Nə́ɓā yā Israel anī a ndewn̄ i mbéé ní kánə̄n̄ naā kə̄ dɔḿ tə́ najə̄ yā yá̰á̰ kə́ majaĺ ń ngé tél ɓəloó gə̄ rāān̄ ní tə́. Tɔ́gə́ḿ ur̄ wak adə̄ m̄-ndi nang tə́ bátə́ ugə̄ń kum mbang ndējə̄ yá̰á̰ kə́ loo tíbí tə́.

Esdras ndɔ̄ȳ Nə́ɓā tām̄ yā de gə̄ ń najə̄ i dɔdə́ tə́ ní

⁵ Dan ń mbang ndējə̄ yá̰á̰ kə́ loo tíbí asə anī m-lōō gír rāā rɔ̄ḿ ndoō tə́, ba m-ḭ́ḭ kə kūbə̄ kə́ rə̄yā̰ gēé rɔ̄ḿ tə́ m̄-tétə̄ kejəḿ, nang tə́ ō, m-ɔ́y jīḿ kə̄ dɔɔ́ kum kə̄ rɔ̄ Kɔ́ɔ̄ɓē Nə́ɓā yāḿ tə́ ō,

⁶ ba m-ə́dan na: Nə́ɓā yāḿ, rɔ̄ḿ sɔlə̄m̄ ngá̰ý ō, yá̰a̰ əla jīḿ mbāḿ tə́ ō, adə̄ m-ásə kɔr̄ dɔḿ dɔɔ́ ka̰a̰ń loo kum kə̄ rɔ̄í tə́ alé. Tɔdɔ̄ yá̰á̰ kə́ gōtə́ aĺ gə̄ ń jə-rāā ní i ngá̰ý al̄ naā adə̄ tɔȳ dɔjí ō, majaĺ yājí aw̄ bátə́ ugə̄ dɔ rā̰ tə́ ō.

⁷ Əla gír ɓāl̄ yā kaají gə̄ tə́ bátə́ ɓōólaā ní, gír deē yājí gə̄ rāān̄ yá̰á̰ kə́ gōtə́ aĺ gə̄ ngá̰ý. I tām̄ najə̄ ń noō tə́ n mban̄g kə́ tə̄rā gə̄ ndin̄neé dɔjí tə́ ō, dɔ mban̄g yājí gə̄ tə́ ō, dɔ ngé tun̄ yá̰a̰ yājí gə̄ tə́ ō, rɔ̄ɔ̄n̄neéjí ō, aw̄n̄neé sejí ɓəloó ō, ɔyn̄neé yá̰a̰ kənge yājí gə̄ ō, əlan̄neé rɔ̄sɔl̄ dɔjí tə́ ō tītə̄ ń rāān̄neé ɓōólaā ɓáý ní.

⁸ Ngɔlaā ní Kɔ́ɔ̄ɓē Nə́ɓā yājí ī-rajəjí i ngɔr ɓáý. Tɔdɔ̄ ḭ̄ ī-teē ta róbə adə̄ gír deē yājí gə̄ ń teēn̄ ta yo tə́ ní tél reē ndin̄ dɔ nang yāí kə́ táĺ tə́ gogə́. I beé n Nə́ɓā yājí, ī-rāań ādə̄ kumjí teēń yḛr sḛ́y ō, dɔjí ḭḭń dɔɔ́ já̰já̰ ō, dan ń jḭḭ i ɓəlo gə̄ ɓáý ní.

⁹ Tɔdɔ̄ jḭḭ i ɓəlo gə̄. Ba dan ń jḭḭ i ɓəloó ní ḭ̄ ə́yá̰jí kɔ̄ɔ́ alé. Ḭ̄ ī-rāā ādə̄ mban̄g kə́ Persə tə́ gə̄ rāān̄ kem majə sejí. Nin̄ əya̰n̄jí adə̄ jə-ndi kə kumjí ō, adə̄n̄jí ta róbə adə̄ jə-tél jə-rāā kújə yāí gogə́ ō, tɔdɔ̄ j-unən dɔɔ́ gogə́ loo ń ni nujə tū tə́ sák sák kɔ̄ɔ́ tə́ ní ō, nin̄ rāān̄ adə̄ j-ənge loo ɓɔ̄ɔ̄ rɔ̄ yājí kə́ ngan̄g Jerusalem ō, dɔ nang kə́ Juda tə́ ō.

^10-11 Ba ngɔlaā ní Nə́ɓā yājí, kə j-əda na i rí gō yá̰á̰ ń rāā yá̰á̰ tə́ ní? Tɔdɔ̄ ḭ̄ ī-tāājí kété ə́da na: Ɓē ń ā āwī kə̄ tū tə́ yā taā ní i ɓē kə́ yḛr, tɔdɔ̄ gír de gə̄ ń ndin̄ kemeé ní i gír de kə́ yḛr gə̄, adə̄ yá̰a̰ rāādə́ kə́ yḛr gə̄ taā kem ɓē ní əla gír bɔ̄gə̄ ɓē kə́rēý tə́ bátə́ bɔ̄gə̄n kə́ rang tə́.

¹² Ní ī-lōōī kəya̰ ngáńsí kə́ dəyá̰ gə̄ kadə̄ ngáńdə́ kə́ dəngam gə̄ ō, ī-lōōī táā ngáńdə́ kə́ dəyá̰ gə̄ kadə̄ ngáńsí kə́ dəngam gə̄ ō. Ā ī-sāāī ta róbə lápə́ya aké ndi majə tām̄ yādə́ tə́ aĺ i kə́ bátə́ gə̄ tə́. I beé n ā ī-téliīneé gír de kə́ tɔ́gə́də́ to gə̄ ō, ā ə́saīneé yá̰á̰ kə́ majə gə̄ kə́ kem ɓēé ba ā ə́ya̰īneé gotə yā kadə̄ ngáńsí gə̄ kadə̄ i yá̰a̰ yādə́ kə́ njɔ́ḿ gə̄ tə́ ní ō.

¹³ Nə́ɓā yājí, yá̰á̰ kə́ tōr̄ gə̄ malang ń rāān̄jí ní, sɔɔ̄ń i kəla rāājí kə́ gōtə́ aĺ gə̄ ō, majaĺ yājí kə́ bo ngá̰ý ō, ɓá tā, ba ḭ̄ ə̄ndā njaí dɔ yá̰á̰ kə́ gōtə́ aĺ yājí kə́rēý gə̄ tə́. Adə̄ ndéý ń ə́ndájí ní asə g ō ndéý ń kadə̄ j-ənge tām̄ majaĺ yājí tə́ ní aĺ ō, ḭ̄ ī-ngɔ̄m̄jí jḭḭ núsə de kə́rēý gə̄ ń jə-teē ta yo tə́ ní adə̄ jḭḭ n toó ō.

¹⁴ Ní loo kadə̄ jə-tél jə-mbātə́ najə̄ taí tə́ gogə́ ɓáý kadə̄ taā naā ton̄ dɔ dáńjí tə́ ɓáý kə de kə́ ngé rāā yá̰á̰ kə́ yḛr gə̄ ń noō i ba̰ý? Wōn̄g a rāāī sejí ngá̰ý adə̄ ā ī-nujə sejí kɔ̄ɔ́ malang kanjə̄ kəya̰ deē kógə̄ḿ aĺ a?

¹⁵ Kɔ́ɔ̄ɓē, Nə́ɓā yā Israel, ḭ̄ i de kə́ sew, tɔdɔ̄ ɓōólaā jḭḭ i gotə de gə̄ kə́ teēn̄ ta yo tə́ gə̄. Jḭḭ ní n jə-ra ta kumií tə́ kə majaĺ yājí gēé toō. Tá ré i kə gō gēé ɓáa deē asə ra ta kumií tə́ kə majaĺ gēé dɔn tə́ alé.