ESDRAS 8 - Bibəl ta Sar̄

De gə̄ ń ḭḭn̄ Babilon naā tə́ kə Esdras ní

¹ De kə́ dɔ gír kojə gə̄ tə́ ń j-ḭḭ Babilon mbak ɓāl̄ ko̰o̰ ɓē yā mban̄g Artajerses tə́ jə-reē ní rīdə́ ń toó ō, rī de gə̄ kə́ gír kojə yādə́ gə̄ tə́ n toó ō.

² De kə́ gír kaa yā Pinas tə́ i Gersom. De kə́ gír kaa yā Itamar tə́ i Daniel. De kə́ gír kaa yā Dabid tə́ i Hatus.

³ De kə́ dan ngán Sekania gə̄ tə́ i kógə̄ḿ. Jakari i de kə́ gír kaa yā Paros tə́. De kə́ gōn tə́ gə̄ i deē 150.

⁴ Eliohenai kə́ ngōn̄ Jeraya i de kə́ gír kaa yā Pahat Moab tə́. De kə́ gōn tə́ gə̄ i deē 200.

⁵ Sekania kə́ ngōn̄ Yajiel i de kə́ gír kaa yā Jatu tə́. De kə́ gōn tə́ gə̄ i deē 300.

⁶ Ebed kə́ ngōn̄ Yonatan i de kə́ gír kaa yā Adin tə́. De kə́ gōn tə́ gə̄ i deē 50.

⁷ Yesaya kə́ ngōn̄ Atalia i de kə́ gír kaa yā Elam tə́. De kə́ gōn tə́ gə̄ i deē 70.

⁸ Jebadia kə́ ngōn̄ Mikael i de kə́ gír kaa yā Sepatia tə́. De kə́ gōn tə́ gə̄ i deē 80.

⁹ Obadia kə́ ngōn̄ Yehiel i de kə́ gír kaa yā Yoab tə́. De kə́ gōn tə́ gə̄ i deē 218.

¹⁰ Selomit kə́ ngōn̄ Yosipia i de kə́ gír kaa yā Bani tə́. De kə́ gōn tə́ gə̄ i deē 160.

¹¹ Jakari kə́ ngōn̄ Bebai i de kə́ gír kaa yā Bebai tə́. De kə́ gōn tə́ gə̄ i deē 28.

¹² Yohanan kə́ ngōn̄ Hasatan i de kə́ gír kaa yā Ajəgad tə́. De kə́ gōn tə́ gə̄ i deē 110.

¹³ De kə́ mətá kə́ gō gogə́ gə̄ kə́ gír kaa yā Adonikam tə́ i Elipelet ō, Yeyel ō Semaya ō. De kə́ gōdə́ tə́ gə̄ i deē 60.

¹⁴ De kə́ gír kaa yā Bigwai tə́ gə̄ i Utai nin̄ kə Jakur. De kə́ gōdə́ tə́ gə̄ i deē 70.

Esdras rāā gō rɔ̄n yā kaw̄ Jerusalem

¹⁵ m̄-kán̄ de gə̄ ń noō malang kadə ngōn̄ man̄ ń a nūgə́ kum kə̄ Ahaba tə́ ní, ba jə-ndi loo ń noō tə́ ndɔ̄ mətá. M-ə̄ndā ma̰ȳdə́ anī, m-á̰a̰ i de kə́ karī gə̄ ō, ngé tun̄ yá̰a̰ gə̄ ō, banī m-á̰a̰ ngōn̄ Lebi dandə́ tə́ alé.

¹⁶ Loo ń noō tə́ m-ə́la ngār gə̄ ń i Eliejer ō Ariel ō Semaya ō Elnatan ō Yarib ō Elnatan ō Natan ō Jakari ō Mesulam ō, ngé kɔjə de gə̄ ndū najə̄ gə̄ ń i Yoyarib nin̄ kə Elnatan ní ō,

¹⁷ kadə̄ aw̄n̄ rɔ̄ Ido ngār kə́ Kasipia tə́. M-ə́dádə́ najə̄ ń kadə̄ aw̄ ədanən̄ ō, ədan̄ ngákó̰o̰n gə̄ kə́ ngé kəla gə̄ kə́ Kasipia ní ō, kadə̄ reēn̄ kə ngé rāā kəla gə̄ kə́ tām̄ yā kújə yā Nə́ɓā yājí tə́ adə̄n̄jí.

¹⁸ Dan ń jī Nə́ɓā yājí kə́ majə i dɔjí tə́ ní, nin̄ reēn̄ kə deē kógə̄ḿ kə́ nge kum kedə̄ adə̄n̄jí. Deē ní i de kə́ gír kaa yā Mali kə́ ngōn̄ Lebi kə́ ngōn̄ Jakob tə́. Rīn na i Serebia. Ngánən gə̄ ō, ngákó̰o̰n gə̄ ō ń reēn̄ seneé ní, nin̄ malang i deē 18.

¹⁹ Reēn̄ kə Hasabia nin̄ kə Yesaya ń i de kə́ gír kaa yā Merari tə́ ní. Ngákó̰o̰n gə̄ ō, ngán ngákó̰o̰n gə̄ ō i seneé. Nin̄ malang i deē 20.

²⁰ Reēn̄ kə de gə̄ 220 ō. I de gə̄ kə́ gə̄rān̄də́ i dan ngé kəla gə̄ tə́. De gə̄ ní i ngé gə̄ ń Dabid nin̄ kə ngār gēé əndān̄də́ kə rī rāā kəla yā ngán Lebi gēé ní. I de gə̄ kə́ ndangən̄ rīdə́ kem makətūbūú malang.

²¹ m̄-ra kə̄ kadə man̄ kə́ Ahaba tə́ noō m-ə́dań de gə̄ malang kadə̄ jə-*ndi ɓō tām̄ yā Nə́ɓā tə́ j-ɔjəń sɔl̄ kə́ jə-sɔl̄ dɔjí kə̄ no Nə́ɓā yājí tə́ i kanjə̄ kɔjə rɔ̄, yā kadə̄ ni-rāā tá yá̰á̰ kə́ majaĺ rāānjí dɔ róbə mbā yājí tə́ alé. Kadə̄ yá̰a̰ rāānjí jḭḭ kɔ gə̄ aĺ ō, ngánjí gə̄ aĺ ō, yá̰a̰ kənge yājí gə̄ aĺ ō.

²² Rɔ̄sɔl̄ ɔgə̄m̄ dəje mban̄g kadə̄ adə̄jí ɓūtə̄ áskar gə̄ kə́ ngé kal̄ sə́nda gə̄ kadə̄ dānə̄n̄jí, kadə̄ ngɔ̄mə̄n̄jí róbó najə̄ yā madə̄ ba̰ā̰ gə̄ tə́. Tɔdɔ̄ j-əda mban̄g na: De gə̄ malang ń a sāān̄ Nə́ɓā yājí ní, jīn kə́ majə i dɔdə́ tə́. Banī de gə̄ malang ń əya̰nən̄ kɔ̄ɔ́ ní, wōn̄g rāān sedə́ ngá̰ý.

²³ Adə̄ jə-*ndi ɓō tām̄ yā Nə́ɓā tə́, jə-dəjeń Nə́ɓā yājí kadə̄ rāā kem majə sejí ba kə ngɔ̄m̄jí. Anī ni-rāā yá̰á̰ ń jə-dəjen ní.

²⁴ Gō tə́ anī m-ɔ̄r̄ ngé tun̄ yá̰á̰ kə́ bo bo gə̄ kutə gidə i jōó kə kéŕdə́. Serebia ō Hasabia ō ngákó̰ó̰də́ kə́ kutə gə̄ i sedə́ ō.

²⁵ Ba m̄-mbɔ̄jə́ gində̄ arjā̰a̰ ō lɔ́r ō, yá̰á̰ kə́ gātə̄də́ i ngá̰ý gə̄ ō ń mban̄g ō, ngé kadə̄ kɔjə yān gə̄ ō, de kə́ bo yān gə̄ ō, ngán Israel gə̄ ń ndin̄ noó ní ō, adə̄n̄ tām̄ yā kújə yā Nə́ɓā yājí tə́ ní ta kumdə́ tə́.

²⁶ I beé n m̄-ɓɔ̄ɔńdə́ gində̄ arjā̰a̰ kə́ kɔȳn i kəlōo 20 000 ní ō, yá̰á̰ kə́ gātə̄də́ i ngá̰ý gə̄ kə́ rāān̄də́ kə gində̄ arjā̰a̰á̰ kə́ kɔȳdə́ malang i kəlōo 3 000 ní ō, lɔ́r kə́ kɔȳn i kəlōo 3 000 ní ō,

²⁷ səmbē kə́ rúu gə̄ kutə jōó kə́ rāān̄də́ kə lɔ́ŕ kə́ gātə̄də́ i sə́lē lɔ́r gə̄ dūbú ní ō, jóo gində̄ nə̄ngá kasə kə́ majə ngá̰ý gə̄ jōó, kə́ ndə́lē pipir gə̄, kə́ gātə̄də́ i ngá̰ý tītə̄ yā jóó lɔ́r gə̄ ní ō.

²⁸ Gō tə́ anī m-ə́dádə́ na: Tītə̄ ń sḭḭ̄ i de gə̄ kə́ ɔrə̄n̄ kam̄sí tām̄ yā kəla yā Kɔ́ɔ̄ɓē tə́ ní, ɔrə̄n̄ kam̄ yá̰a̰ gə̄ ń toō tām̄ yā Kɔ́ɔ̄ɓē tə́ ō. Ba gində̄ arjā̰a̰ ō lɔ́r ō ní, i yá̰á̰ kə́ ndējə̄ Kɔ́ɔ̄ɓē Nə́ɓā yā kaasí gə̄ kə gō kem ndigií.

²⁹ Ī-ngɔ̄mī majə bátə́ kadə̄ ūgīneé Jerusalem. Ré ūgī nú anī, ā ī-mbɔ̄jíīdə́ ta kum ngé tun̄ yá̰á̰ kə́ bo gə̄ tə́ ō, ngán Lebi gə̄ tə́ ō, ta kum de gə̄ kə́ dɔ gír kojə yā ngán Israel gə̄ tə́ ō, kem kújə gə̄ kə́ ndə̄nān̄ naā kə kújə yā Kɔ́ɔ̄ɓēé ń gāngə̄n̄ gíŕ tə́ ní.

³⁰ Loo ń noō tə́ ngé tun̄ yá̰a̰ gə̄ ō, ngán Lebi gə̄ ō, ɔyn̄ yá̰a̰ malang ń i kə́ mbɔ̄jə́ kɔȳdə́ ní, adə̄ i gində̄ arjā̰a̰ ō, lɔ́r ō, yá̰á̰ kə́ gātə̄də́ i ngá̰ý gə̄ ō, yā ka̰a̰ gō kaw̄ń Jerusalem kem kújə yā Nə́ɓā yājí tə́.

Esdras nin̄ kə madə̄n gēé ugə̄n̄ Jerusalem

³¹ Kə ndɔ̄ kə́ nge ko̰ kutə gidə i jōó yā nāā kə́ ta kəga dɔɔ́ anī, j-ḭḭ kadə man̄ kə́ Ahaba tə́ yā kaw̄ ta kaw̄ kə̄ Jerusalem. Dan ń jḭḭ i róbó ní, Nə́ɓā yājí əndā jīn dɔjí tə́ ngɔ̄m̄jí ta madə̄ ba̰ā̰jí gə̄ tə́ ō, ta ngé kum̄ róbə gə̄ tə́ ō.

³² Dan ń j-ugə̄ Jerusalem anī, jə-taā koō ndɔ̄ mətá.

³³ Teē kə ndɔ̄ kə́ nge ko̰ sɔ́ anī jə-mbɔ̄jə́ kɔȳ gində̄ arjā̰a̰ ō, lɔ́r ō, yá̰á̰ kə́ gātə̄də́ i ngá̰ý gə̄ ō, kem kújə yā Nə́ɓā yājí tə́ pá tá j-adə̄ Meremot nge tun̄ yá̰á̰ kə́ ngōn̄ Uria ɓáý. De gə̄ ń seneé ní i Eleajar kə́ ngōn̄ Pinas ō, ngán Lebi gə̄ i Yojabad kə́ ngōn̄ Yesua ō, Noadia kə́ ngōn̄ Binui ō.

³⁴ Jə-tə́da kutə yá̰a̰ malang ō, jə-mbɔ̄jə́ kɔȳ yá̰a̰ malang ō, j-a̰a̰ anī to i kum gotən. Jə-ndang kɔȳdə́ malang kem makətūbūú.

³⁵ De gə̄ malang ń aw̄n̄ sedə́ ɓē ɓəloó tá télən̄ ní, ndējə̄n̄ Nə́ɓā yā Israel yá̰á̰ kə́ tun̄ gə̄. Nin̄ ndējə̄nən̄ man̄g kə́ bəra gə̄ kutə gidə i jōó tām̄ yā Israel gə̄ tə́ malang ō, bal batə̄ gə̄ 96 ō, ngán batə̄ gə̄ 77 ō, bal bə̄yā̰ gə̄ 12 tām̄ yā majaĺ tə́ ō. Róōn̄ dā̰ gə̄ ń noō horoó malang tām̄ yā Kɔ́ɔ̄ɓē tə́.

³⁶ Gō tə́ anī tə́dan̄ ndū najə̄ gə̄ yā mban̄g adə̄n̄ ngé kɔsə kum gotə mban̄g dɔ ɓē tə́ gə̄ ō, ngé ko̰o̰ ɓē kə́ gō nang kə́ gidə bā Opəratə kə́ dām̄ kə́ no ɓē tə́ ō. Loo ń noō tə́ nin̄ rāān̄ kə ngán Israel gēé tām̄ yā kújə yā Nə́ɓā tə́.