ESDRAS 6 - Bibəl ta Sar̄

Najə̄ ń mban̄g Darius tūr̄ əda ní

¹ Tā anī mban̄g Darius əda kadə̄ ndəlen̄ gíŕ yá̰a̰ gə̄ kem makətūbə̄ gə̄ ń ɓōkə́n̄ kem kújə ngɔ̄m̄ makətūbə̄ gə̄ tə́ ō, yá̰á̰ kə́ gātə̄də́ i ngá̰ý gə̄ ō tə́, kem ɓē kə́ Babilon tə́ ní.

² Banī əngen̄ ndāŕ ndang najə̄ kógə̄ḿ kə́ ɓír̄ gidə naā tə́ i kem ɓē kə́ ngan̄g ngá̰ý ń rīn na i Ekəbatan ní tə́ gō nang kə́ Medi tə́. Najə̄ ń ndangən̄ kem makətūbə̄ ngeé ń toō tə́ ní n toó:

³ Kem ɓāl̄ ko̰o̰ ɓē yā mban̄g Sirus kə́ ta kəga dɔ tə́ ní, ni-əda kadə̄ de gə̄ tél rāān̄ kújə yā Nə́ɓā Jerusalem gogə́. A rāān̄ kújə́ ní i loo ń de gə̄ ndējə̄n̄ Nə́ɓā yá̰á̰ kə́ tun̄ gə̄ tū tə́ ní ō, loo ń ngəran i tū tə́ kété ní tə́ ō. Ngālən kə́ kə̄ dɔɔ́ a asə kíl deē 60 ō, laan a asə kíl deē 60 ō.

⁴ A ɔsə̄n̄ mbal̄ kə́ tɔ́sə̄ kadə gə̄ kə ta naá nja mətá ō, sáā kāgə̄ kə́ kijə gə̄ kə ta naá nja kógə̄ḿ ō. I nar kə́ kem kújə ngɔ̄m̄ nar yā mban̄g tə́ n a rāān̄neé kəla gə̄ ń noō ní.

⁵ Tá gájə́ yá̰a̰ rāā kəla gə̄ kə́ kem kújə yā Nə́ɓā tə́ kə́ rāā kə lɔ́r ō kə gində̄ arjā̰a̰ ō ń Nabukodonosor ɔy kem kújə yā Kɔ́ɔ̄ɓē tə́ Jerusalem aw̄ń Babilon ní, i yā tél kaw̄ń gogə́ kem kújə yā Kɔ́ɔ̄ɓē tə́ Jerusalem, kadə̄ tél tə́ndān̄də́ kógə̄ḿ kógə̄ḿ loo ndidə́ gə̄ tə́.

⁶ Loo ń noō tə́ Darius ndang makətūbə̄ əlan̄ adə̄ Tatənai nge ko̰o̰ ɓē kə́ gō nang kə́ gidə bā Opəratə kə́ dām̄ kə́ no ɓē tə́ ō, adə̄ Setar Bosənai ō, madə̄də́ gə̄ ń i de gə̄ kə́ Aparsak gō nang kə́ gidə bā Opəratə kə́ dām̄ kə́ no ɓē tə́ ní ō. Najə̄ ń ni ədadə́ kem makətūbūú ní n toó: Asəsí kəndā kumsí gír najə̄ ń noō tə́.

⁷ Əya̰ī Jipə gə̄ ādə̄ tél rāān̄ kújə yā Nə́ɓā gogə́ rang. Nge ko̰o̰ ɓē dɔ Jipə gə̄ tə́ a rāā kújə ngeé ń toō i naā tə́ kə kum kɔɔ̄ gə̄ yā Jipə gēé. Nin̄ a rāān̄ kújə́ ní i gotən kə́ kété tə́.

⁸ Adə̄ m̄-mēr̄sí rāā kə kum kɔɔ̄ gə̄ yā Jipə gēé kadə̄ tél rāān̄neé kújə yā Nə́ɓā gogə́ rang. Ā ādīdə́ yá̰a̰ i ngándáńg tām̄ yā kəla tə́ kanjə̄ kadə̄ dan gān̄g. I yá̰a̰ kənge yā mban̄g, adə̄ i lambóó kə́ táā jī de gə̄ tə́ gidə b ā Opəratə kə́ dām̄ kə́ no ɓē tə́ n ā ɔ̄rī yá̰a̰ tū tə́ yā kadə̄də́ ní.

⁹ Yá̰a̰ gə̄ ń ngé tun̄ yá̰á̰ kə́ Jerusalem gə̄ a gḛyn̄ á nin̄ a dəjen̄sí ní, ādīdə́ kə dɔ ndɔ̄ gə̄. Yá̰a̰ gə̄ ní n toó: Man̄g kə́ bəra gə̄ ō, bal batə̄ gə̄ ō, ngán batə̄ gə̄ ō, kə́ yā róō horoó kadə̄ Nə́ɓā kə́ dɔ rā̰ tə́ ō, kōō gémē ō, katə̄ ō, kasə nduú ō yibə̄ ō.

¹⁰ I beé tá nin̄ a asən̄neé ndējə̄ Nə́ɓā kə́ dɔ rā̰ tə́ yá̰a̰ tun̄ kə́ kotə majə ō, ndɔ̄ȳ tām̄ yā kadə̄ mban̄g ō, ngánən gə̄ ō ndin̄neé kə dɔdə́ dɔɔ́ ní.

¹¹ Yá̰a̰ gə̄ ń m-ə́da kadə̄ rāān̄ kə deē ń a mān̄ dɔ ndūḿ ń toō ní n toó: A ɔrə̄n̄ kāgə̄ kújə yān yā kudə nang tə́ ba ɓērən ta tə́ ō, a rāān̄ kújə yān dɔ bū loo ɓōkə́ yá̰á̰ kə́ yḛr gə̄ tə́ ō.

¹² Mban̄g, aláa gír de gə̄ ń a mānə̄n̄ dɔ ndūḿ ba a əlan̄ jīdə́ yā nujəń kújə yā Nə́ɓā ń toō kɔ̄ɔ́ kem ɓē kə́ Jerusalem tə́ ní, ādə̄ Nə́ɓā ń rāā adə̄ rīn to kem ɓē kə́ Jerusalem tə́ ní mbə́rē tə́nīdə́ kɔ̄ɔ́. I mā Darius n m-ə́da kadə̄ rāān̄ yá̰a̰ gə̄ ń toō ní. Ādə̄ de gə̄ əndān̄ kumdə́ gírí majə rāān̄.

¹³ Loo ń noō tə́ Tatənai nge ko̰o̰ ɓē gidə bā Opəratə kə́ dām̄ kə́ no ɓē tə́ ō, Setar Bosənai ō, madə̄də́ gə̄ ō, rāān̄ tītə̄ ń mban̄g Darius ədań ní.

Rāān̄ nāā kújə yā Kɔ́ɔ̄ɓē ń tél rāān̄ gogə́ rang ní

¹⁴ Najə̄ gə̄ ń Aje nin̄ kə Jakari kə́ ngōn̄ Ido ədan̄ kə́ loo ngé koō ta gə̄ tə́ ní, adə̄ kum kɔɔ̄ gə̄ yā Jipə gə̄ tɔ́gə adə̄ nin̄ rāān̄neé kəla kújə yā Kɔ́ɔ̄ɓē. Kəla ní njə̄rā majə. Nin̄ tɔ̄lə̄n̄ ta kəla kújə́ ní tītə̄ ń Nə́ɓā yā Israel ədań ní ō, tītə̄ ń mban̄g gə̄ kə́ Persə tə́ ədan̄neé ní ō. Mban̄g gə̄ ní i mban̄g Sirus ō Darius ō Artajerses ō.

¹⁵ Tɔ̄lə̄n̄ ta kújə ní i kem ɓāl̄ ko̰o̰ ɓē yā Darius kə́ nge ko̰ mehḛ́ tə́, kem nāā Adar tə́, kə ndɔ̄ nāā kə́ nge ko̰ mətá.

¹⁶ Ngán Israel gə̄ ō, ngé tun̄ yá̰a̰ gə̄ ō, ngán Lebi gə̄ ō, gotə de kə́ rang gə̄ ń télən̄ ɓəloó ní ō, tunə̄n̄ yá̰a̰ ɔrə̄n̄neé kam̄ kújə yā Nə́ɓā ngeé ń toō i kə rɔ̄nelēé.

¹⁷ Yá̰a̰ gə̄ ń nin̄ tunə̄n̄ ní i man̄g kə́ bəra gə̄ ɓú ō, bal batə̄ gə̄ ɓú jōó ō, ngán batə̄ gə̄ ɓú sɔ́ ō, bal bə̄yā̰ gə̄ kutə gidə i jōó ō. Bal bə̄yā̰ kə́ kutə gidə i jōó gə̄ ní i kógə̄ḿ kógə̄ḿ kə dɔ gír ɓē gə̄ yā ngán Israel gēé, kadə̄ Nə́ɓā mā̰yń rɔ̄n dɔ majaĺ yā ngán Israel gə̄ tə́ malang.

¹⁸ Nin̄ rāān̄ ɓūtə̄ gə̄ yā ngé tun̄ yá̰a̰ gə̄ ō, ngán Lebi gə̄ ō, kə gō kəla yādə́ gə̄ ń a rāān̄ tām̄ yā Nə́ɓā tə́ Jerusalem ní i tītə̄ ń ndangən̄neé kem makətūbə̄ yā Moijə tə́ ní.

Jipə gə̄ rāān̄ nāā Pákə

¹⁹ Ngán Israel gə̄ ń télən̄ ɓəloó ní rāān̄ nāā Pákə kə ndɔ̄ kə́ nge ko̰ kutə gidə i sɔ́ yā nāā kə́ ta kəga dɔɔ́.

²⁰ Ngé tun̄ yá̰a̰ gə̄ ō, ngán Lebi gə̄ ō, tə́gon̄ rɔ̄də́ i naā tə́ adə̄ nin̄ malang unjə̄n̄ njáý njáý. Loo ń noō tə́ ngán Lebi gə̄ tə́jan̄ míndə ngán batə̄ Pákə gə̄ tām̄ yā ngán Israel gə̄ tə́ ō, ngákó̰ó̰də́ gə̄ ń i ngé tun̄ yá̰a̰ gə̄ ní tə́ ō, tām̄ yādə́ nin̄ kɔ́ gə̄ tə́ ō.

²¹ Ngán Israel gə̄ ń télən̄ ɓəloó ní əsan̄ yá̰a̰ Pákə kə de gə̄ malang ń ndin̄ sedə́ á ɔrə̄n̄ rɔ̄də́ kɔ̄ɔ́ tū yá̰á̰ kə́ yḛr gə̄ yā nápar de kə́ kem ɓēé gə̄ tə́ yā ndɔ̄yń Kɔ́ɔ̄ɓē Nə́ɓā yā Israel ní.

²² Gō tə́ anī rāān̄ nāā mápá kə́ kanjə̄ kaa kə rɔ̄nelēé bátə́ ndɔ̄ sīrí. Kɔ́ɔ̄ɓē rāā adə̄ rɔ̄də́ nel̄də́ ngá̰ý tɔdɔ̄ ni tūr̄ kem mban̄g kə́ Asiri adə̄də́. Nge ń noō rāā adə̄ jīdə́ ngan̄g loo rāā kəla kújə yā Nə́ɓā yā Israel tə́.