ESDRAS 5 - Bibəl ta Sar̄

¹ Banī ndɔ̄ kə́rēý tə́ anī ngé koō ta gə̄ ń i Aje ō Jakari kə́ ngōn̄ Ido ō ní ɔrə̄n̄ najə̄ kə Jipə kə́ Jerusalem gə̄ ō, kə́ Juda gə̄ ō. I Nə́ɓā yādə́ ń i Nə́ɓā yā Israel ní n əndā najə̄ tadə́ tə́ ní.

² Tā anī Jorobabel kə́ ngōn̄ Sealtiel ō, Yesua kə́ ngōn̄ Yosadak ō, ḭḭn̄ dɔɔ́ ba əlan̄ gír rāā kújə yā Nə́ɓā kem ɓē kə́ Jerusalem tə́. Ngé koō ta gə̄ yā Nə́ɓā i naā tə́ sedə́ adə̄ ɔsən̄ kíĺdə́ kem kəlaá.

³ Loo ń noō tə́ Tatənai nge ko̰o̰ ɓē kə́ gidə bā Opəratə kə́ dām̄ kə́ no ɓē tə́ tə́ ō, Setar Bosənai ō, madə̄də́ gə̄ ō, reē əngen̄də́ ba ədan̄də́ na: I náā n ədasí na kə ī-tél kə ī-rāāī kújə ń toō gogə́ rang ō, kə ī-tél kə ə̄ndā i bɔr ń toō gogə́ rang ō ní?

⁴ Ādījí rī de gə̄ ń tél a əndān̄ kújə́ ń toō gogə́ ní.

⁵ Banī Nə́ɓā əndā kumən gō kum kɔɔ̄ gə̄ yā Jipə gə̄ tə́, adə̄ deē ɔgə̄də́ rāā kəla aĺ bátə́, adə̄ najə̄ kə́ dɔ kəla ní tə́ aw̄ ugə̄ń rɔ̄ Darius tə́ ō, najə̄ ń ni-əda dɔ tə́ ní tél reē ugə̄ń ō.

Sekə́n̄ Jipə gə̄ rɔ̄ mban̄g Darius tə́

⁶ Najə̄ ń Tatənai nge ko̰o̰ ɓē kə́ gidə bā Opəratə kə́ dām̄ kə́ no ɓē tə́ ō, Setar Bosənai ō, madə̄n gə̄ ń i de gə̄ kə́ Aparsak, gō nang kə́ gidə bā Opəratə kə́ dām̄ kə́ no ɓē tə́ ní ō, əlan̄neé adə̄n̄ mban̄g Darius ní,

⁷ ń toó: Mban̄g Darius, lápə́ya ngá̰ý!

⁸ Kɔ́ɔ̄ ɓē gə̄, j-aw̄ gō nang kə́ Juda tə́ kújə yā Nə́ɓā kə́ bo tə́. Adə̄ majə kadə̄ j-ədaī ādə̄ ī-ger̄ gō. Tél n da a rāān̄ kújə yā Nə́ɓā ní gogə́ rang noó kə mbal̄ kə́ tɔ́sə̄ kadə gə̄ ō, kə sáa kāgə̄ gə̄ kə́ kəndā bɔr gidə tə́ gə̄ ō. Əndān̄ kumdə́ gír kəla ní tə́ rāān̄neé adə̄ majə ngá̰ý ō, kəla ní a̰ȳ láẃ ngá̰ý ta jīdə́ tə́ ō.

⁹ Jə-dəje kum kɔɔ̄ gə̄ najə̄ j-əda na ké i náā n ədadə́ na kə tél kə rāān̄ kújə́ ń toō gogə́ ō, kə tél kə əndān̄ b ɔr ń toō gogə́ ō ní wa.

¹⁰ Jə-dəjedə́ rīdə́ gə̄ kadə̄ ī-gerə̄ńdə́ ō, jə-ndang rī ngoldə́ gə̄ makətūbūú ō.

¹¹ Nin̄ tél ədan̄jí na nin̄ na i ngé rāā kəla gə̄ yā Nə́ɓā kə́ kɔ́ɔ̄ dɔ rā̰ ō dɔ nang ō. Na i kújə́ kə́ mban̄g kógə̄ḿ kə́ bo kə́ Israel tə́ rāā jóó ngá̰ý n ra na n-a n-rāān̄ gogə́ rang ní.

¹² Banī kaadə́ gə̄ na rāān̄ adə̄ wōn̄g na rāā Nə́ɓā kə́ dɔ rā̰ tə́ adə̄ na əladə́ kem jī Kalde deē ń i Nabukodonosor mban̄g kə́ Babilon tə́ ní. Nabukodonosor na nujə kújə ngeé ń toō kɔ̄ɔ́ ō, na ɔy ngán Israel gə̄ aw̄ sedə́ Babilon ō.

¹³ Ɓá tā ba na kem ɓāl̄ kə́ ta kəga dɔ ń Sirus o̰o̰ ń ɓē gō nang kə́ Babilon tə́ ní, na ni na adə̄ ndūn kadə̄ rāān̄ kújə yā Nə́ɓā ngeé ń toō gogə́ rang.

¹⁴ Gájə́ yá̰a̰ rāā kəla gə̄ kə́ kem kújə yā Kɔ́ɔ̄ɓē tə́ Jerusalem ń rāān̄ kə lɔ́r ō, kə arjā̰a̰ ō, á mban̄g Nabukodonosor ɔy aw̄ tə́ndā kem kújə ɓesə̄ tə́ Babilon ní, mban̄g Sirus na ɔy kem kújə ɓesə̄ kə́ Babilon tə́ ba na adə̄ deē ń rī n na i Sesəbasar ní. Sesəbasar ngé ń toō na i Sirus n na əndān dɔ ɓē tə́ kadə̄ o̰o̰ ní.

¹⁵ Sirus ədan na kə ɔy gájə́ yá̰a̰ gə̄ ngeé ń toō kə aw̄ kə tə́ndā kem kújə yā Kɔ́ɔ̄ɓē tə́ Jerusalem, ba kadə̄ rāā kújə́ ní gotə loo ń rāān̄ tū tə́ kété ní.

¹⁶ Adə̄ Sesəbasar ngeé ń toō na reē əndā ngəra kújə yā Nə́ɓā Jerusalem. Na əla gír kum mbang ngeé ń noō tə́ bátə́ ngɔlaā ní, na a rāān̄ kújə ní noō, banī na tɔ̄lə̄n ta aĺ ɓáý.

¹⁷ Adə̄ ngɔlaā ní, ré mban̄g gḛy ɓáa, ādə̄ ndəlen̄ gír yá̰a̰ gə̄ kem makətūbə̄ gə̄ yā mban̄g tə́ Babilon yā gerə̄ ń ké mban̄g Sirus əda kadə̄ tél rāān̄ kújə yā Nə́ɓā gogə́ rang kem ɓē kə́ Jerusalem tə́ rɔ̄kum aĺ wa. Ba gō tə́ anī ə́dájí yá̰á̰ ń ḭ̄ ə́da dɔ tə́ ní.