EJEKIEL 9 - Bibəl ta Sar̄

Ndɔ̄ȳ kə́ tām̄ yā ɓē kə́ Jerusalem tə́

¹ Gō tə́ anī, m-ōō Kɔ́ɔ̄ɓē əda najə̄ kə ndūn kə́ kə tɔ́gɔ́ na: Sḭḭ̄ gə̄ ń əndān̄ dɔsí tə́ kadə̄ ī-rāāī yá̰a̰ kə ɓē kə́ Jerusalem ní, ī-reēī kə̄ ngɔr. Sḭḭ̄ kógə̄ḿ kógə̄ḿ ní, ādə̄ náā nəkɔ́ ɓáa un yá̰a̰ rɔ̄ɔ̄ yān kə́ yā nujəń ɓē.

² Anī de kə́ dəngam gə̄ mehḛ́ teēn̄ ta róbə́ kə́ dɔɔ́ tə́ a reēn̄. Ré deē ra kújə yā Kɔ́ɔ̄ɓē tə́ anī, ta róbə́ ní i kə̄ dām̄ mbɔ́r ɓē kə́ ko̰ó̰ tə́. Nin̄ kógə̄ḿ kógə̄ḿ ní, yá̰a̰ rɔ̄ɔ̄ kə́ yā nujəń loo i kə̄ jīdə́ gə̄ tə́. De kógə̄ḿ kə́ o̰ō̰ kūbə̄ lḛ́ḛ i dandə́ tə́. Ni do̰ō̰ yá̰á̰ kə́ yā ndang yá̰a̰ dɔ tə́ tū ndāŕ ń ni-əhɔń ɓōdə̄n ní tə́. Nin̄ malang ní reēn̄ kə̄ ngɔr, ba dəba ran̄ ta loo tun̄ yá̰á̰ kə́ rāā kə gində̄ nə̄ngá kasaá tə́.

³ Anī kɔsə gɔn yā Nə́ɓā yā Israel ń i dɔɔ́ dɔ Serubḛ gə̄ tə́ ní, ḭḭ aw̄ kum kə̄ ta róbə́ kə́ yā kudəń kə̄ kem kújə yā Kɔ́ɔ̄ɓē tə́ tə́. Loo ń noō tə́ Kɔ́ɔ̄ɓē ɓāŕ deē ń o̰ō̰ kūbə̄ lḛ́ḛ ba do̰ō̰ bar ndang yá̰a̰ tū ndāŕ kə́ ɓōdə̄n tə́ ní,

⁴ ba ədan na: Āw̄ ī-njə̄rā kem ɓē kə́ Jerusalem tə́ kə taá, ba de gə̄ malang ń a nōōn̄ rɔ̄də́ ō, najə̄ tōr̄ kemdə́ ō, tām̄ yā yá̰a̰ rāā kə́ majaĺ ngá̰ý gə̄ kə́ kemeé tə́ ní, ə́já yá̰a̰ nodə́ tə́.

⁵ Gō tə́ anī m-ōō najə̄ ń Kɔ́ɔ̄ɓē əda gotə ɓūtə̄ de gə̄ ń na̰yn̄ ní, ni ədadə́ na: Ī-njə̄rāī gō deē ń noō tə́ kem ɓēé ba ī-tɔ̄lī de kə́ kemeé gə̄. Ī-lōōī kəya̰də́ ō, ādī kumsí o̰o̰sí tām̄ yādə́ tə́ aĺ ō.

⁶ Ī-tɔ̄lī ɓə́ga gə̄ ō, ngásáā gə̄ ō, ngámandə gə̄ ō, ngán gə̄ ō, dəyá̰ gə̄ ō! Ī-rāāī ādī nin̄ gətóon̄ kɔ̄ɔ́ malang! Banī de gə̄ malang ń əjan̄ yá̰a̰ nɔtə nodə́ tə́ ní, ī-lōōī kɔdə rɔ̄də́. Ə́laī gír kem loo kə́ táĺ yāḿ tə́ laā. Loo ń noō tə́ nin̄ əlan̄ gír tɔ̄l̄ kum kɔɔ̄ gə̄ ndin̄ ta kújə yā Kɔ́ɔ̄ɓē tə́ ní.

⁷ Anī Kɔ́ɔ̄ɓē adə̄ ndūn əda na: Ī-rāāī kújə yā Kɔ́ɔ̄ɓē ādī téĺ kə́ yḛr, ādī nīń gə̄ taān̄ loo ndágə loo kə́ gīr̄ gidə kújə yān gə̄ tə́, ba gō tə́ anī ī-teēī ndágá!

⁸ Adə̄ nin̄ aw̄n̄ tɔ̄l̄ de kə́ kem ɓēé gə̄ tə́. Dan ń nin̄ na̰yn̄ kə̄ loo tɔ̄l̄ de gə̄ tə́ ní, m̄-rā i kə kérə́ḿ. M-ɔ́sə kejəḿ nang tə́ ō, m-ɔ́sə noḿ nang tə́ ō, ba m-ə́ga kɔŕ, m-ə́da na: Aa Kɔ́ɔ̄ɓē Nə́ɓā, dan ń ī-bə̄gā wōn̄g yāí kə́ ngá̰ý dɔ ɓē kə́ Jerusalem tə́ beé ní, gotə Israel gə̄ ń a na̰yn̄ ní ā ī-tɔ̄l̄də́ kɔ̄ɔ́ malang a?

⁹ Anī ni-tél ədam̄ na: Majaĺ yā ɓē ko̰o̰ kə́ Israel tə́ ō, kə́ Juda tə́ ō i ngá̰ý al̄ naā. Mósə taā loo kem ɓēé ō, yá̰a̰ rāā kə́ gōtə́ aĺ taā loo kem ɓēé ń toō tə́ ō. De gə̄ ədan̄ na Kɔ́ɔ̄ɓē na əya̰ ɓē kɔ̄ɔ́, Kɔ́ɔ̄ɓē na asə ka̰a̰ yá̰á̰ kógə̄ḿ alé.

¹⁰ Adə̄ m-ā m-ə́yá̰də́ alé, kumḿ a o̰o̰m̄ tām̄ yādə́ tə́ alé. M-ā m̄-rāā kadə̄ yá̰á̰ kə́ majaĺ ń nin̄ rāān̄ ní tél əsō dɔdə́ nin̄ kɔ́ gə̄ tə́.

¹¹ Kum mbang ngeé ń noō tə́ ɓáa deē ń o̰ō̰ kūbə̄ lḛ́ḛ ō, ətō bar ndang najə̄ tū ndāŕ kə́ ɓōdə̄n tə́ ō ní, reē ɔjə Nə́ɓā gotə yá̰á̰ ní, əda na: Yá̰á̰ ń ə́dam̄ na kə m̄-rāā ní m̄-rāā kɔ̄ɔ́.