EJEKIEL 8 - Bibəl ta Sar̄

De gə̄ rāān̄ ɓesə̄ kem kújə yā Nə́ɓā tə́

¹ Dan ń ɔyn̄ de gə̄ dɔ gúú tə́ aw̄n̄ sedə́ dɔ ɓē kə́ rang tə́ ní, rāā ɓāl̄ mehḛ́. Ba kem ɓāl̄ kə́ nge ko̰ mehḛ́ tə́, kə nāā kə́ nge ko̰ mehḛ́ kə́ kem ɓāl̄ ní tə́, kə ndɔ̄ kə́ nge ko̰ mí yā nāā kə́ nge ko̰ mehḛ́ ní anī, dan ń m̄-ndi kem kújə yāḿ tə́ ō, kum kɔɔ̄ kə́ Juda tə́ gə̄ ndin̄ nang tə́ noḿ tə́ ō anī, tɔ́gə yā Kɔ́ɔ̄ɓē Nə́ɓā əhɔm̄ gidə kógə̄ḿ.

² M-á̰á̰ yá̰á̰ kógə̄ḿ kə́ to tītə̄ deē beé. Rɔ̄n kə́ gír loon kə́ to tītə̄ ɓōdə̄n tə́ ní to tītə̄ hor beé. Ba ḭḭ loon kə́ to tītə̄ ɓōdə̄n tə́ kum kə̄ dɔɔ́ ní, loo kə́ unjə̄ kow kógə̄ḿ i tū tə́, ndə́lē tītə̄ lɔ́ŕ kə́ kəla horoó adə̄ kərē beé.

³ Ni-əla yá̰á̰ kógə̄ḿ kə́ to tītə̄ jīn beé əhɔń nənga. Anī loo ka̰a̰ yá̰á̰ kə́ ḭḭ rɔ̄ Nə́ɓā tə́ ngeé ń noō ní, Ndíl unəm̄ aw̄ seḿ ɓōdə̄ loo tə́, dɔ dán dɔ rā̰ nin̄ kə dɔ nangaá tə́, ba aw̄ seḿ Jerusalem. Ta róbə́ kə́ dām̄ mbɔ́r ɓē kə́ ko̰ó̰ tə́ kə́ yā kudəń kə̄ kem ɓēé ní, m-á̰a̰ rɔ̄ḿ i kemeé, loo ń udən̄ ɓesə̄ tū tə́ ní tə́. Ɓesə̄ ní i ndū kə́ tájə̄n̄neé Nə́ɓā.

⁴ Kɔsə gɔn yā Nə́ɓā yā Israel teē hɔy kə̄ rɔ̄ḿ tə́ loo ní tə́, tītə̄ ń teēń hɔy kə̄ rɔ̄ḿ tə́ kété kem wól loo tə́ ní.

⁵ Nə́ɓā ədam̄ na: Ḭ̄ ngōn̄ deē, á̰a̰ loo kum kə̄ dām̄ kə́ mbɔ́r ɓē kə́ ko̰ó̰ tə́. M-á̰a̰ loo kum kə̄ dām̄ loo ní tə́. Loo tun̄ yá̰á̰ kógə̄ḿ i ta róbə́ kə́ dām̄ mbór ɓē kə́ ko̰ó̰ tə́. Ɓesə̄ ń i ndū kə́ tájə̄n̄neé Nə́ɓā ní, i ngɔr kə̄ ta róbə́ kə́ yā kudə tū tə́ kaw̄ń kə̄ ta loo tun̄ yá̰á̰ tə́.

⁶ Ni-əda ɓáý to̰ na: Ḭ̄ ngōn̄ deē, á̰a̰ yá̰á̰ ń a rāān̄ noó a? Ngán Israel gə̄ rāān̄ yá̰á̰ kə́ majaĺ ngá̰ý loo ń toō tə́ laā yā kadə̄ m-ɔ̄rəń rɔ̄ḿ kɔ̄ɔ́ loo kə́ táĺ yāḿ tə́ ba m-āw̄ sa̰y ní a? Tá ā á̰á̰ yá̰á̰ kə́ rang kə́ majaĺ ngá̰ý gə̄ ɓáý to̰.

⁷ Ni un aw̄ seḿ ta róbə́ kə́ yā kudə tū tə́ kaw̄ń kə̄ ndágə loo kə́ gīr̄ gidə kújə yā Kɔ́ɔ̄ɓē tə́. Anī m-á̰a̰ bəlo kógə̄ḿ tū ndogə̄ mbal̄ tə́.

⁸ Nə́ɓā ədam̄ na: Ḭ̄ ngōn̄ deē, ī-mbutə kum loo tū ndogə̄ mbal̄ tə́. Dan ń m̄-mbutə kum loo anī, loo kə́ yā mānəń to.

⁹ Ni ədam̄ ɓáý to̰ na: Údə kemeé ba á̰a̰ loo. De gə̄ rāān̄ yá̰á̰ kə́ majaĺ ngá̰ý ō, kə́ to yḛr kum ō, loo ń toō tə́ laā.

¹⁰ M-údə kemeé anī, yá̰á̰ ń m-á̰a̰ā̰ ní ń toó: Rāān̄ lī gə̄ kə dā̰ gə̄ kə́ majə ka̰a̰də́ aĺ gə̄ kadə bɔr tə́ adə̄ gīr̄ gidəḿ. Rāān̄ nə́ɓā kə́ rɔ̄kum aĺ gə̄ malang yā ngán Israel gə̄ kadə bɔr tə́.

¹¹ Kum kɔɔ̄ gə̄ kutə sīrí yā ngán Israel gə̄ ran̄ kə njadə́ dɔɔ́ no nə́ɓā kə́ rɔ̄kum aĺ gə̄ ní tə́. Yajania kə́ ngōn̄ Sapan i dandə́ tə́. Nin̄ kógə̄ḿ kógə̄ḿ ní, ganáń róō ndujə̄ yá̰á̰ kə́ kotə majə i jīdə́ gə̄ tə́ kógə̄ḿ kógə̄ḿ ō, sa ndujə̄ yá̰á̰ kə́ kotə majə ḭḭ kum kə̄ dɔɔ́ dɔɔ́ ō.

¹² Nə́ɓā ədam̄ na: Ḭ̄ ngōn̄ deē, yá̰á̰ ń kum kɔɔ̄ gə̄ yā ngán Israel gə̄ ndi a rāān̄ loo ɓɔ̄ɔ̄ rɔ̄ tə́, nin̄ kógə̄ḿ kógə̄ḿ kə̄ loo yādə́ gə̄ tə́ kə̄ no ɓesə̄ yādə́ gə̄ tə́ ní á̰a̰ā̰ a? Nin̄ ədan̄ na Kɔ́ɔ̄ɓē na asə ka̰a̰də́ alé, Kɔ́ɔ̄ɓē na mbātə́ ɓē kɔ̄ɔ́.

¹³ Nə́ɓā əda ɓáý to̰ na: Ā á̰a̰ kadə̄ nin̄ a rāān̄ yá̰á̰ kə́ rang gə̄ kə́ majaĺ ngá̰ý tītə̄ ń noō ɓáý to̰.

¹⁴ Ni unəm̄, aw̄ seḿ kum kə̄ ta róbə́ kújə yā Kɔ́ɔ̄ɓē kə́ dām̄ mbɔ́r ɓē kə́ ko̰ó̰ tə́. Dəyá̰ gə̄ ndin̄ loo ní tə́, ba ndi a nōōn̄ i Tamujə.

¹⁵ Anī ni dəjem̄ najə̄ əda na: Ḭ̄ ngōn̄ deē, á̰á̰ yá̰á̰ ń noō majə a? Ā á̰á̰ yá̰a̰ gə̄ kə́ majən̄ tɔȳ ngé gə̄ ń toō ɓáý.

¹⁶ Loo ń noō tə́ ni unəm̄ aw̄ seḿ kum kə̄ ndágə loo kə́ gīr̄ gidə kújə yā Kɔ́ɔ̄ɓē kə́ kem kújə yā Kɔ́ɔ̄ɓē tə́. De kə́ dəngam gə̄ kə́ asən̄ kutə jōó gidə i mí ń noō ndin̄ ta róbə́ kə́ yā kudəń kə̄ kem loo kə́ táĺ tə́, dɔ dáń ngōn̄ kújə́ kə́ ta róbə́ tə́ kə loo tun̄ yá̰á̰ tə́. Nin̄ tūrə̄n̄ gidədə́ adə̄n̄ loo kə́ táĺ ba ɔsən̄ kejədə́ nang tə́ ō, ɔsən̄ nodə́ nang tə́ ō, kumdə́ sɔɔ̄ gír ɓē, yā rɔȳń mbang.

¹⁷ loo ń noō tə́ Nə́ɓā dəjem̄ najə̄, əda na: Ḭ̄ ngōn̄ deē, á̰á̰ yá̰á̰ ń noō a? Yá̰á̰ kə́ majaĺ ngá̰ý gə̄ ń de kə́ Juda tə́ gə̄ ń toō a rāān̄ laā ní asədə́ aĺ ɓáý. Nin̄ ran̄ dɔ tə́ noō rāān̄ adə̄ yá̰a̰ rāā kə́ kə dɔ́nɔ́ taā loo kem ɓēé ō, rāān̄ yá̰a̰ malang yā kadə̄məń wōn̄g ō. Ngɔlaā nin̄ a ndɔ́tə̄n̄ i kə ta jī kāgāá kə̄ ta kóńdə́ tə́ ngɔr.

¹⁸ Adə̄ ta i yāḿ kadə̄ m̄-rāā yá̰a̰ sedə́ kə wōn̄g kə́ to ɓōĺ ngá̰ý. M-ā m-ə́yá̰də́ aĺ ō, kumḿ a o̰o̰m̄ sedə́ aĺ ō. Nin̄ a əgan̄ kɔŕ ngá̰ý yā ɓāŕməń kadə̄ m̄-dḭḭ̄də́, banī m-ā m-ōō ɓār̄ yādə́ alé.