EJEKIEL 7 - Bibəl ta Sar̄

Kɔ́ɔ̄ɓē tāā najə̄ yá̰á̰ kə́ majaĺ ngá̰ý kə́ ta tɔ̄l̄ ta tə́

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ōō yá̰á̰ ń mā Kɔ́ɔ̄ɓē Nə́ɓā m-ə́dá ngán Israel gə̄ ní. M-ə́dádə́ na: Gíŕ yá̰a̰ malang gān̄g kɔ̄ɔ́! Yá̰á̰ kə́ nujə sák sák kə́ ta tɔ̄l̄ ta tə́ taā loo malang kem ɓēé, bátə́ kíl ɓē kə́ sɔ́ gə̄ tə́.

³ Ngɔlaā ní gír yāsí gān̄g kɔ̄ɔ́. M-ā m̄-bə̄gā wōn̄g yāḿ dɔsí tə́ sɔɔ̄ń háĺsí ō, yá̰a̰ rāāsí kə́ majaĺ ngá̰ý gə̄ ní, m-ā m̄-rāāsí kadə̄n ā ə̄gāī kə̄rān ō.

⁴ Kumḿ a o̰o̰m̄ tām̄ yāsí tə́ aĺ ō, m-ā m-ā m-ə́yá̰sí aĺ ō. M-ā m̄-rāāsí kadə̄ ā ə̄gāī kə̄rā háĺsí ō, ā ásiī ɓɔ̄ɔ̄ dɔ yá̰a̰ rāāsí kə́ majaĺ ngá̰ý gə̄ aĺ ō. Loo ń noō tə́ ā ī-gerī kadə̄ Kɔ́ɔ̄ɓē i mā.

⁵ Yá̰á̰ ń mā Kɔ́ɔ̄ɓē Nə́ɓā m-ə́dá ní ń toō: Á̰a̰ī, yá̰á̰ kə́ to kum kaȳ aĺ a reē noó, i yá̰á̰ kə́ to kum kaȳ aĺ kə́ deē a̰a̰ jóo aĺ ɓáý!

⁶ Gíŕ yá̰a̰ malang gān̄g kɔ̄ɔ́, gíŕ yá̰a̰ malang gān̄g kɔ̄ɔ́, yá̰á̰ kə́ to kum kaȳ aĺ əndā dɔ rɔ̄n danaá yā teē dɔsí tə́, ni a reē noó!

⁷ De kə́ kem ɓēé gə̄, ta i dɔsí tə́. Kum mbang asə. Dɔ ndɔ̄ gān̄g sarya i ngɔr. Kɔŕ rɔ̄nel̄ a ɓār̄ dɔ mbal̄ gə̄ tə́ to̰ alé, banī i ɓōĺ n a rāā de gə̄.

⁸ Ngɔlaā ní m-ā m̄-bə̄gā wōn̄g yāḿ kə́ ngá̰ý dɔsí tə́. M-ā m-ə́ya̰n kadə̄ a rāām̄ dɔsí tə́ bátə́ ta tɔ̄l̄ ta tə́. M-ā m̄-gān̄g sarya dɔsí tə́ sɔɔ̄ń háĺsí ō, m-ā m̄-rāāsí kadə̄ ā ə̄gāī kə̄rā yá̰a̰ rāāsí kə́ majaĺ ngá̰ý gə̄ ō.

⁹ Kumḿ a o̰o̰m̄ tām̄ yāsí tə́ alé, adə̄ m-ā m-ə́yá̰sí alé. M-ā m̄-rāāsí kadə̄ ā ə̄gāī kə̄rā háĺsí ō, ā ásiī ɓɔ̄ɔ̄ dɔ yá̰a̰ rāāsí kə́ majaĺ ngá̰ý gə̄ aĺ ō. Loo ń noō tə́ ā ī-gerī kadə̄ i mā Kɔ́ɔ̄ɓē n m-ə́ndásí ní.

¹⁰ Ndɔ̄ gān̄g sarya n toó, loo kə́ nujə sák sák a əndā i dɔ rɔ̄n danaá. Yá̰a̰ rāā kə́ kə dɔ́nɔ́ a aw̄ i kum kə̄ kété kété ō, kɔjə rɔ̄ a tḭ̄ḭ̄ i rɔ̄n ō.

¹¹ Yá̰a̰ rāā kə́ kə dɔ́nɔ́ to i tītə̄ sálang kāgə̄ kə́ kun kə̄ dɔɔ́ yā kəndań deē beé. Yá̰á̰sí kə́ a teē a gətóo, yá̰a̰ kənge yāsí a teē aĺ ō, kutəsí a teē aĺ ō, deē a ɔsə gɔnsí to̰ aĺ ō.

¹² Kum mbang ugə̄, dɔ ndɔ̄ gān̄g sarya i ngɔr. Ādə̄ nge mang yá̰a̰ rāā rɔ̄nel̄ aĺ ō, ādə̄ nge kigə yá̰a̰ əhɔ ndoō aĺ ō. Tɔdɔ̄ wōn̄g rāām̄ i kə ngán Israel gēé malang.

¹³ Ká nge kigə yá̰a̰ ndiń kə kumneé gə̄gē, yá̰a̰ gātə̄ yān gə̄ ní, ni asə tél kənge to̰ alé. Tām̄ yá̰á̰ kə́ ka̰a̰ kə́ ɔjə dɔ nujə sák sák yā ngán Israel gə̄ malang ní, a reē yā kudə gíŕ kə́ rɔ̄ tə́. De gə̄ kógə̄ḿ kógə̄ḿ ndin̄ i kum majaĺ tə́. I tām̄ najə̄ ń toō tə́ n deē kógə̄ḿ kə́ yā tél kənge tɔ́gə gogə́ rang a gətóó ní.

¹⁴ De gə̄ a kɔ̄rə́n̄ bərúnjə ngá̰ý ō, a əndān̄ dɔ yá̰a̰ malang danaá kɔ̄ɔ́ ō ɓá tā, ba deē kógə̄ḿ kə́ yā kaw̄ ta rɔ̄ɔ̄ tə́ a gətóo. Tɔdɔ̄ wōn̄g rāām̄ i kə ngán Israel gēé malang.

De kə́ a teē karī ta ndéý tə́ a gətóo

¹⁵ Rɔ̄ɔ̄ i ndágá ba mo̰y ngāl̄bɔ̄gīí ō, ɓō ō i kemeé. Dəngam gə̄ a oyn̄ ta rɔ̄ɔ̄ tə́ kem bembeé ō, nin̄ a oyn̄ yo ɓō ō, yo mo̰y ngāl̄bɔ̄gīí ō kem ɓēé.

¹⁶ Ngé gə̄ ń a ndin̄ kə kumdə́ ní, a a̰ȳn̄ naā kə̄ dɔ mbal̄ gə̄ tə́. Nin̄ a nōōn̄ tītə̄ dér gutə gə̄ sɔɔ̄ń majaĺ yādə́ gə̄.

¹⁷ Jīdə́ a asə kətō yá̰á̰ kógə̄ḿ aĺ ō, tɔ́gə kejədə́ a gətóo ō.

¹⁸ Nin̄ a o̰o̰n̄ kūbə̄ kəhɔ ndoō ō, ɓōĺ a ndewdə́ ō. Ta kumdə́ i kə rɔ̄sɔlɔ̄ɔ́ ō, nin̄ malang a dəsān̄ dɔdə́ kɔ̄ɔ́ ō.

¹⁹ Nin̄ a ɓōkə́n̄ gində̄ arjā̰a̰ yādə́ kum róbə kɔsə gə̄ tə́. Lɔ́r yādə́ a to i tītə̄ dɔ bū loo beé tām̄ yādə́ tə́. Gində̄ arjā̰a̰ yādə́ ō, lɔ́r yādə́ ō, a asən̄ kajədə́ ndɔ̄ wōn̄g yā Kɔ́ɔ̄ɓē tə́ alé. Nin̄ a əsan̄ yá̰a̰ to̰ aĺ ō, yá̰a̰ kəsa a gətóo kem tiīdə́ tə́ ō. Tɔdɔ̄ kété ní, gində̄ arjā̰a̰ yādə́ ō, lɔ́r yādə́ ō, rāān̄ rɔ̄də́ i gūmbə̄ tə́ tām̄ yādə́ tə́.

²⁰ Nin̄ ɔjən̄ rɔ̄də́ kə yá̰a̰ yādə́ kə́ majə ngá̰ý gə̄ kə́ to loo ɓɔ̄ɔ̄ tə́. Nin̄ ɔyn̄ yá̰a̰ gə̄ ní rāānəń ɓesə̄ kə́ to yḛr kum gə̄ ō, kə́ majə ka̰ā̰ aĺ gə̄ ō, kum gotə nə́ɓā gə̄ tə́. Kɔ́ɔ̄ɓē əda na: I tām̄ najə̄ ń noō tə́ n nə́ɓā gə̄ ní a télən̄ yā to tītə̄ dɔ bū loo beé tām̄ yādə́ tə́ ní.

²¹ M-ā m-ə́ya̰ kadə̄ tə̄rā gə̄ a ɔyn̄ yá̰a̰ kənge yādə́ gə̄ kɔ̄ɔ́. M-ā m-ə́ya̰ kadə̄ de gə̄ kə́ nin̄ i yá̰a̰ aĺ gə̄ ɔy aw̄nəń tītə̄ yá̰a̰ kənge kə́ kɔy ta rɔ̄ɔ̄ tə́ beē. Nin̄ a ɓōlə́n̄ gidə yá̰á̰ kógə̄ḿ alé.

²² Dan ń nin̄ a rāān̄ yá̰a̰ kənge yāḿ kə́ ngá̰ý yá̰á̰ kə́ karī tə́ ní, mā m-ā m̄-rāā yá̰á̰ kógə̄ḿ alé. De kə́ kur̄ dɔdə́ gətóo gə̄ a reēn̄, ba a rāānən̄ kadə̄ a téĺ kə́ yḛr.

²³ Ī-rāā súĺ kógə̄ḿ, tɔdɔ̄ ngé tɔ̄l̄ de gə̄ taān̄ loo kem ɓēé ō, yá̰á̰ kə́ rāā kə dɔ́nɔ́ taā loo kem ɓēé ō.

²⁴ M-ā m̄-reē kə nápar de gə̄ kə́ kemdə́ ndul ngá̰ý yā kadə̄ a taān̄ kújə yādə́ gə̄ kɔ̄ɔ́. M-ā m̄-nujə kɔjə rɔ̄ yā de kə́ ngan̄g ngá̰ý gə̄ kɔ̄ɔ́ ō, de gə̄ a rāān̄ loo yādə́ kə́ to ɓōĺ gidə i loo kə́ karī tə́ ō.

²⁵ Ɓōĺ a reē noó. Nin̄ a sāān̄ lɔm ba a əngen̄ alé.

²⁶ Yá̰á̰ kə́ to kum kaȳ aĺ gə̄ a reēn̄ i kə gō naá. Najə̄ kə́ majaĺ gə̄ kə́ kənī mbī naā tə́ dan a gān̄g alé. De gə̄ a dəjen̄ nge koō ta kadə̄ a̰a̰ yá̰á̰ kógə̄ḿ kə ədadə́ ō, nge tun̄ yá̰a̰ a ndóō de gə̄ yá̰a̰ to̰ aĺ ō, kum kɔɔ̄ gə̄ a adə̄n̄ de gə̄ kɔjə̄ to̰ aĺ ō.

²⁷ Mban̄g a əhɔ ndoō ō, ngōn̄ ngār a əndā kemən dɔ yá̰á̰ kógə̄ḿ tə́ to̰ aĺ ō, ɓōĺ a rāā de kə́ kem ɓēé gə̄ malang kadə̄ a ndewn̄ ō, yá̰á̰ ń m-ā m̄-rāā sedə́ ní, a sɔɔ̄ń i dɔ háĺdə́ ō, m-ā m̄-gān̄g sarya dɔdə́ tə́ tɔdɔ̄ asə kadə̄ əngen̄ sarya. Loo ń noō tə́ nin̄ a gerə̄n̄ kadə̄ Kɔ́ɔ̄ɓē i mā.