EJEKIEL 5 - Bibəl ta Sar̄

Nə́ɓā a rāā Israel yá̰á̰ kə́ tōr̄

¹ Nə́ɓā ədam̄ na: Ḭ̄ ngōn̄ deē, ún kaskar kógə̄ḿ kə́ tan atə, ā ī-rāā nə́ngá tə́ kadə̄ ā ī-dəsāń dɔí ō, mbāyí ō. Gō tə́ anī, ī-mbɔ̄jə́ kɔȳ nənga dɔí kə mbāyí ní, ba ī-kēgə̄də́ naā tə́ gír loo mətá.

² Dan ń ndɔ̄ gə̄ ń ɓē i kə́ gīrəń gidə ní a tə́gān̄ kɔ̄ɔ́ ní, ī-róō gírən kə́ ta kəga dɔ kum hor tə́ dan ɓēé. Ā ɔ́y gírən kə́ nge ko̰ jōó ba ā ə́nda kə kaskaraá ī-gīrəń gidə ɓē. Gírən kə́ ko̰ mətá ní, ā ī-tə̄ndā ā ī-tḭ̄ḭ̄ kum néĺ tə́, banī m-ā m̄-ngɔ̄də̄ gō kə kaskar yāḿ.

³ Banī ā ī-ngɔ̄m̄ núsə bḭḭ̄ kə́ sḛ́ý beē yā ɓōkə́ gə́le ngong kə́ tū kūbə̄ yāí tə́ tə́.

⁴ Ā ɔ́ý ngé kə́rēý gə̄ yā ɓōkə́də́ kum hor tə́ kadə̄ hor o̰o̰. Hor ní a taā loo ō, ā o̰o̰ ngán Israel gə̄ malang ō.

⁵ Najə̄ ń mā Kɔ́ɔ̄ɓē Nə́ɓā m-ə́dá ní n toó: Yá̰á̰ ń a rāā ɓē kə́ Jerusalem ní n noó. M-ə̄ndān adə̄ ni-ndi i dan nápar de kə́ rang gə̄ tə́, ɓē kə́ rang gə̄ gīrə̄n̄ gidən tə́ ō.

⁶ De kə́ kemeé gə̄ mbātə́n̄ rāā yá̰a̰ kə gō ń m-ɔ́jəńdə́ kadə̄ rāān̄ ní ō, mbātə́n̄ ndū najə̄ gə̄ ń m-ādə̄də́ ní ō. Nin̄ rāān̄ yá̰a̰ majaĺ tɔȳ yā nápar de kə́ rang gə̄ ń ndin̄ gīrə̄n̄ gidədə́ ní tə́. Tɔdɔ̄ nin̄ mbātə́n̄ rāā yá̰a̰ gə̄ kə gō ń m-ɔ́jəńdə́ ní ō, mbātə́n̄ ndū najə̄ yāḿ gə̄ ō.

⁷ I tām̄ ń toō tə́ n, Kɔ́ɔ̄ɓē Nə́ɓā ɔr̄ najə̄ tītə̄ ń to beé əda na: Sḭḭ̄ ī-rāāī yá̰á̰ kə́ un gō naā aĺ gə̄ tɔȳ yā gír de kə́ rang gə̄ kə́ kem ɓē gə̄ ń ndin̄ gīrə̄n̄ gidəsí ní tə́. Sḭḭ̄ ə́laí dɔsí gír ndū najə̄ yāḿ gə̄ tə́ alé. Sḭḭ̄ ī-mbātíī rāā yá̰a̰ gə̄ ń m̄-rā dɔ tə́ ní ō, sḭḭ̄ úniī gō yá̰a̰ kāgə̄ ɓē yā nápar de gə̄ ń ndin̄ gīrə̄n̄ gidəsí ní alé ō.

⁸ I tām̄ najə̄ ń noō tə́ n Kɔ́ɔ̄ɓē Nə́ɓā ɔr̄ najə̄ tītə̄ ń toō beé əda na: Sḭḭ̄ de kə́ Jerusalem gə̄, m-ā m-ə́ndásí. M-ā m-ún sarya gāngə̄ḿ yā rāań yá̰a̰ kem ɓēé ta kum nápar de gə̄ tə́.

⁹ Yá̰á̰ kə́ majaĺ ngá̰ý gə̄ ń ī-rāāī ní, m-ā m-ə́ndásí najə̄n tə́ kənda kə́ jóo toó m-ə́ndásí beé aĺ ɓáý, m-ā m-ə́ndásí gogə́ tītə̄ ń noō to̰ aĺ ō.

¹⁰ Kó̰ó̰ ngán gə̄ kə bɔbə̄ ngán gə̄ a əsan̄ ngáńdə́ gə̄ kem ɓēé ō, ngán gə̄ a əsan̄ ngé kojədə́ ō. M-ā m-ún sarya gāngə̄ḿ yā rāań yá̰a̰ sesí ō, gotə de gə̄ ń teēn̄ ta yo tə́ ní m-ā m̄-tə̄ndā yā tḭ̄ḭ̄də́ kə̄ loo gə̄ tə́ ō.

¹¹ I tām̄ ń toō tə́ ní, m̄-ndi kə kumḿ, i najə̄ yā Kɔ́ɔ̄ɓē Nə́ɓā. Tītə̄ ń ī-tákəń loo kə́ táĺ yāḿ kə yá̰á̰ kə́ majaĺ ngá̰ý gə̄ malang yāí ō, kə yá̰á̰ kə́ to nāsə̄ míndə gə̄ malang yāí ō ní, mā m-ā m-ɔ̄r̄ rɔ̄ḿ kɔ̄ɔ́ ō, kumḿ a o̰o̰m̄ aĺ ō, m-ā m-á̰a̰ kum to ndoō yāí aĺ ō.

¹² Núsə de kə́ kem ɓēé gə̄ kə́ ta kəga dɔ a oyn̄ yo mo̰y ngāl̄bɔ̄gīí, aláa yo ɓō kem ɓēé. Núsə de kə́ kem ɓēé kə́ nge ko̰ jōó a oyn̄ yo kaskar kə gō gidə ɓēé. Núsə de kə́ kem ɓēé gə̄ kə́ nge ko̰ mətá ní, m-ā m̄-tə̄ndā yā tḭ̄ḭ̄də́ kə̄ loo gə̄ tə́, ba m-ā m̄-ngɔ̄də̄də́ kə kaskaraá.

¹³ M-ā m̄ bə̄gā wōn̄g yāḿ dɔsí tə́, m-ā m̄-bə̄gā wōn̄g yāḿ dɔsí tə́ bátə́ ta tɔ̄l̄ ta tə́, adə̄ m-ā m̄-dal ba̰ā̰. Loo ń noō tə́ ā ī-gerī kadə̄ deē ń ɔr̄ najə̄ sesí ní, i mā Kɔ́ɔ̄ɓē. Tɔdɔ̄ m-ásə́ tə́gā taḿ dɔ mbātə́ ndi dɔ kənī ndū yāsí tə́ alé.

¹⁴ Nápar de gə̄ ń gīrə̄n̄ gidisí ní ō, de gə̄ malang ń a aw̄n̄ Jerusalem ní ō, a a̰a̰n̄ kadə̄ m̄-nujə ɓē kə́ Jerusalem sák sák ō, m-ə́la rɔ̄sɔl̄ dɔ tə́ ō.

¹⁵ M-ā m-ún sarya gāngə̄ḿ yā rāań yá̰a̰ seneé kə wōn̄g kə́ ngá̰ý ō, m-ā m̄-kɔ̄l̄ seneé kɔ̄l̄ kə́ to ɓōĺ ngá̰ý ō. Nápar de gə̄ ń ndin̄ gīrə̄n̄ gidə ɓē kə́ Jerusalem ní a əgōn̄ ɓē ní ō, a tájə̄nən̄ ō. Banī ɓē kə́ Jerusalem a tél i tāā kə́ tām̄ yādə́ nin̄ tə́ ō, a tél i yá̰á̰ kə́ a rāādə́ kə ɓōló ngá̰ý ō. I mā Kɔ́ɔ̄ɓē n m-ɔ̄r̄ najə̄ noō ní.

¹⁶ M-ā m-ə̄nī ɓō dɔsí tə́ yā tɔ̄ləńsí. Ɓō ní a adə̄sí do tītə̄ ń kum gərā gə̄ a adə̄n̄neésí do ní. Yá̰a̰ kəsa gə̄ ń ī-ngɔ̄mī ní, m-ā m̄-nujəń kɔ̄ɔ́ yā tɔ̄ləńsí ɓōó.

¹⁷ M-ā m-ə̄nī ɓō dɔsí tə́ ō, m-ā m̄-ɓōkə́ dā̰ kə́ do̰ gə̄ dɔsí tə́ ō kadə̄ tɔ̄lə̄n̄ ngánsí gə̄. Mo̰y ngāl̄bɔ̄gīí ō, yá̰á̰ kə́ rāā kə dɔ́nɔ́ ō, rɔ̄ɔ̄ ō, a nujən̄ sesí kɔ̄ɔ́. I mā Kɔ́ɔ̄ɓē n m-ɔ̄r̄ najə̄.