EJEKIEL 47 - Bibəl ta Sar̄

Ta kəɓa man̄ kə́ kem kújə yā Kɔ́ɔ̄ɓē tə́

¹ Ni-tél reē seḿ kum kə̄ ta róbə́ kə́ yā kudəń kem kújə yā Kɔ́ɔ̄ɓē tə́. Anī m-á̰a̰ man̄ a əɓa nang tə́ ta kújə yā Kɔ́ɔ̄ɓē tə́ dām̄ kə́ gír ɓē tə́, tɔdɔ̄ ta kújə yā Kɔ́ɔ̄ɓē ní ra i dām̄ kə́ gír ɓē tə́. Man̄ ní əɓa nang tə́ dām̄ kújə yā Kɔ́ɔ̄ɓē kə́ dām̄ mbɔ́r ɓē kə́ ko̰ó̰ tə́ ba mān̄ aw̄ dām̄ loo tun̄ yá̰á̰ kə́ dām̄ mbɔ́r ɓē kə́ geleé tə́.

² Ni teē seḿ ndágá kə ta róbə́ kə́ dām̄ kə́ mbɔ́r ɓē kə́ ko̰ó̰ tə́. Gō tə́ anī ni ədam̄ adə̄ m̄-rə̄ngō rɔ̄ḿ gidə tə́ ndágá bátə́ m̄-teē ta róbə́ kə́ gidə tə́ ndágá ń tūr̄ tan kum kə̄ gír ɓē tə́ ní. Loo ń noō tə́ m-á̰a̰ man̄ a əɓa dām̄ kə́ ko̰ó̰ tə́.

³ Dan ń dəngam ní teē ndágá kum kə̄ gír ɓē tə́ ní, ni-əhɔ kəlā mbɔ̄jə́ ngāl̄ loo jīn tə́, adə̄ ni mbɔ̄jə́ ngāl̄ loo asə kíl deē nja dūbú kógə̄ḿ. Ni ədam̄ adə̄ m-údə kum man̄ tə́ yā teē kə̄ gidə kógə̄ḿ tə́ anī, man̄ ní ugə̄ gidə njaḿ gə̄ tə́.

⁴ Gō tə́ anī ni mbɔ̄jə́ ngāl̄ loo asə kíl deē dūbú kógə̄ḿ ō, ədam̄ adə̄ m̄-njə̄rā kum man̄ tə́ yā teē kə̄ gidə kógə̄ḿ tə́ ō, anī man̄ ní ugə̄ ta kəjəḿ gə̄ tə́. Ni-tél mbɔ̄jə́ ngāl̄ loo asə kíl deē nja dūbú kógə̄ḿ ō, ədam̄ adə̄ m̄-njə̄rā kum man̄ tə́ yā teē kə̄ gidə kógə̄ḿ tə́ ō. Anī man̄ ní ugə̄ ɓōdə̄ḿ tə́.

⁵ Ni mbɔ̄jə́ ngāl̄ loo asə kíl deē nja dūbú kógə̄ḿ ɓáý to̰. I man̄ kógə̄ḿ kə́ m-ásə kudə teē kə̄ gidə kógə̄ḿ tə́ alé, tɔdɔ̄ man̄ ní ḭḭ ngá̰ý. I man̄ kə́ sɔɔ̄ kadə̄ deē a al i mbée, i man̄ kə́ dum̄ kadə̄ deē njə̄rā kum tə́ teē kə̄ gidə kógə̄ḿ tə́.

⁶ Ni ədam̄ na: Ḭ̄ ngōn̄ deē, á̰a̰ majə a? Ni-aw̄ seḿ ba tél reē seḿ gogə́ kadə man̄ ní tə́.

⁷ Dan ń ni-tél reē seḿ gogə́ ní anī, m-á̰a̰ kāgə̄ kə́ ngá̰ý gə̄ ran̄ kadə man̄ tə́ dām̄ jōó mbak.

⁸ Ni ədam̄ na: Man̄ ń noō a aw̄ i kum kə̄ dām̄ ɓē kə́ gír ɓē tə́, ni a mān̄ kem wól bā Jurdḛ tə́ ō, a ugə̄ kum bā bo tə́ ō. Dan ń ni teē kum bā bo tə́ anī, ni-rāā adə̄ man̄ nel̄ ō, kumən majə ō.

⁹ Loo malang ń man̄ ń noō a mān̄ tū tə́ ní yá̰á̰ kə́ kumuú gə̄ malang a rāān̄ rɔ̄də́. Kānjə̄ gə̄ a ojən̄ naā ngá̰ý, tɔdɔ̄ man̄ ní a ugə̄ noō ō, kum man̄ bā bo a majə ō, loo malang ń man̄ ń noō a teē tū tə́ ní yá̰a̰ gə̄ a ndin̄ kə kumdə́ ō.

¹⁰ Adə̄ ngé ndo̰ kānjə̄ gə̄ a ran̄ dɔ gɔ́sə bā tə́. Əla gír En Gedi bátə́ En Egəlaim tə́ ní, de gə̄ a tḛ́ḛ̄n̄ kem réng gə̄ yā najə. Gír kānjə̄ kə́ tayā gə̄ a i ngá̰ý tītə̄ ngé kə́ kum bā bo tə́ gə̄.

¹¹ Banī kum dang yān gə̄ ō, kum mbō yān gə̄ ō tá a majən̄ alé, ba de gə̄ a əya̰n̄ i tām̄ kəngeń katə̄ kɔ̄sə kə́ tū tə́.

¹² Gír kāgə̄ kə́ tayā tayā gə̄ kə́ a anə̄n̄ a əɓan̄ kadə man̄ ní tə́ dɔ gɔ́sə bāá dām̄ jōó mbak. Mbīdə́ a ndəlē aĺ ō, kan̄də́ a təgā aĺ ō. Nin̄ a anə̄n̄ kə dɔ nāā gə̄, tɔdɔ̄ man̄ ní teē i kem loo kə́ táĺ tə́. De gə̄ a əsan̄ kan̄də́ gə̄ ō, mbīdə́ a adə̄ de kə́ mo̰y rɔ̄ ngan̄g ō.

Kɔ́ɔ̄ɓē tə́ndā dɔ nin̄ ɓē gə̄ kə́ Israel tə́

¹³ Najə̄ ń Kɔ́ɔ̄ɓē Nə́ɓā əda ní n toó: Dɔ nin̄ ɓē gə̄ ń gír ɓē kə́ Israel kə́ kutə gidə i jōó gə̄ a nə̄ɓōn̄ naā ní n toó. Gír ɓē Jəjep a ənge yān i gír jōó.

¹⁴ Sḭḭ̄ ā ī-nə̄ɓōī naā dɔ nang kadə̄ asə naā. Tɔdɔ̄ m-ə́la jīḿ kə̄ dɔɔ́ m̄-túbəń tām̄ kadə̄ m-ādə̄ kaasí gə̄ dɔ nang ní, adə̄ a tél i yá̰a̰ kənge yāsí.

¹⁵ Dɔ nin̄ ɓē gə̄ ní n toó. Nge kə́ dām̄ mbɔ́r ɓē kə́ ko̰o̰ tə́ əla gír i bā bo ń un gō róbə́ kə́ Hetəlon bátə́ ugə̄ ta róbə́ kə́ yā kudəń kə̄ Lebo Hamat ō, Sedad tə́ ō,

¹⁶ Berota tə́ ō, Sibəraim tə́ ō ń i dɔ dán gō nang kə́ Damas kə gō nang kə́ Hamat ní ō, kə́ yā kudəń kə̄ Haser tə́ ō, Tikon tə́ ō ń i kum kə̄ gō nang kə́ Hauran tə́ ní.

¹⁷ Beé ní, dɔ nin̄ ɓē ń noō a əla gír i bā bo tə́ bátə́ Hasar Enan ń i gō nang kə́ Damas tə́ ń i dām̄ mbɔ́r ɓē kə́ ko̰ó̰ tə́ ní ō, bátə́ gō nang kə́ Hamat tə́ ō. Dām̄ dɔ nin̄ ɓē kə́ mbɔ́r ɓē kə́ ko̰ó̰ tə́ n noó.

¹⁸ Dɔ nin̄ ɓē kə́ dām̄ kə́ gír ɓē tə́ a əla gír i loo ń ra dɔ dán Damas kə Hauran tə́ ní ō, dɔ nin̄ ɓē ní a un gō wól bā Jurdḛ dɔ dán gō nang kə́ Galaad kə ɓē kə́ Israel tə́ ō. Dɔ nin̄ ɓē ní aw̄ bátə́ ugə̄ Tamar kadə bā katə̄ tə́. Dām̄ dɔ nin̄ ɓē kə́ dām̄ kə́ gír ɓē tə́ n noó.

¹⁹ Dɔ nin̄ ɓē kə́ dām̄ mbɔ́r ɓē kə́ geleé tə́ a əla gír Tamar tə́ bátə́ ugə̄ man̄ gə̄ kə́ Meriba kə́ Kades tə́ ō, a un gō man̄ kə́ Ejiptə tə́ kum kə̄ bā bo tə́ ō. Dām̄ dɔ nin̄ ɓē kə́ dām̄ mbɔ́r ɓē kə́ geleé tə́ n noó.

²⁰ Bā bo a rāā rɔ̄n i dɔ nin̄ ɓē kə́ dām̄ kə́ no ɓē tə́, adə̄ a əla gír mbɔ́r ɓē kə́ geleé tə́ bátə́ ugə̄ ta Lebo Hamat tə́. Dām̄ dɔ nin̄ ɓē kə́ dām̄ kə́ no ɓē tə́ n noó.

²¹ Gír ɓē kə́ kutə gidə i jōó kə́ Israel tə́ gə̄, sḭḭ̄ ā ī-nə̄ɓōī naā ɓē dɔ dáńsí tə́.

²² Ā ī-túgī i wə̄lā n ā ī-kēgīiń naā dɔ nang ní, tām̄ yāsí tə́ ō, tām̄ yā tə̄rā gə̄ ń ndin̄ dansí tə́ ō, ojən̄ ngán gə̄ dansí tə́ ō ní. Nin̄ a rāān̄ rɔ̄də́ i ngán kem ɓē gə̄ tə́ tām̄ yāsí tə́ dan ngán Israel gə̄ tə́. Nin̄ a túgə̄n̄ wə̄lā naā tə́ sesí yā kəngeń dām̄ dɔ nang kógə̄ḿ tām̄ yādə́ tə́, dan gír ɓē kə́ Israel gə̄ tə́ ō.

²³ Sḭḭ̄ ā ādī tə̄rā gə̄ dɔ nang yādə́ i dan gír ɓē ń nin̄ ndin̄ tū tə́ ní. Najə̄ ń Kɔ́ɔ̄ɓē Nə́ɓā əda ní n noó.