EJEKIEL 46 - Bibəl ta Sar̄

Ndū najə̄ gə̄ kə́ tām̄ yā ngār tə́ kə́ ton̄ tayā

¹ Najə̄ ń Kɔ́ɔ̄ɓē Nə́ɓā əda ní n toó: Kem ndɔ̄ kə́ mehḛ́ gə̄ ń de gə̄ a rāānəń kəla tə́ ní, ta róbə́ ndágə loo kə́ gīr̄ gidə kújə yā Kɔ́ɔ̄ɓē kə́ kemeé ń ra kə̄ dām̄ kə́ gír ɓē tə́ noō, a ra i kə kutú. Ba a teēn̄ ta i ndɔ̄ sabat tə́ ō, ndɔ̄ teē nāā tə́ ō.

² Ngār a ḭḭ i ndágə loo kə́ gidə tə́ ndágá n a reē ní. Ni a mān̄ i kem ngōn̄ kújə́ kə́ ta róbə́ tə́ ń ra kadə ta róbə́ kə́ yā kudəń kə̄ kemeé tə́ ní. Dan ń ngé tun̄ yá̰a̰ gə̄ a ndējə̄n̄ yá̰a̰ tun̄ yān gə̄ kə́ yā róō kə taá malang gə̄ ō, yá̰a̰ tun̄ yān gə̄ kə́ tām̄ yā kem kógə̄ḿ tə́ ō anī, ni a ra i ngɔr kə̄ kadə kāgə̄ ta róbə́ kújə́ tə́. Ni a ɔsə kejən nang tə́ ta róbə́ kújə́ tə́ ō, a ɔsə non nang tə́ ō. Gō tə́ anī a teē ndágá. Ré loo a tíbə́ pá tá a utə̄n̄ ta róbə́ ɓáý.

³ Tām̄ ndɔ̄ sabat tə́ ō, ndɔ̄ teē nāā tə́ ō ní, ngán Israel gə̄ kə́ dɔ nang kə́ Israel tə́ a reēn̄ rɔȳm̄ mā Kɔ́ɔ̄ɓē tə́ i ta róbə́ ní tə́.

⁴ Ndɔ̄ sabat tə́ anī, ngār a ndējə̄m̄ ngán batə̄ gə̄ mehḛ́ ō, bal batə̄ kógə̄ḿ kə́ loon kə́ nujə gətóo ō, kadə̄ i yá̰a̰ tun̄ kə́ yā róō kə taá malang tə́.

⁵ Tá ɓáý to̰ ní, ni a ndējə̄ kōō gémē kə́ kɔȳn i kəlōo kutə mətá kə dɔ bal batə̄ gēé. Ba yā ngán batə̄ gə̄ ɓáa ni a adə̄ kōō gémē kadə̄ asə kə gō ń kemən ndigə ní. Ré kōō gémē i kəlōo kutə mətá anī, ni a əndā yibə̄ lítər mehḛ́ dɔ tə́.

⁶ Ndɔ̄ rāā nāā kə́ kijə tə́ anī, ni a ndējə̄ man̄g kə́ bəra kógə̄ḿ kə́ rɔ̄n kə taá malang i kə́ majə ō, ngán batə̄ gə̄ mehḛ́ ō, bal batə̄ kógə̄ḿ ō kə́ rɔ̄də́ kə taá malang i kə́ majə ō.

⁷ Ni a adə̄ kōō gémē kə́ kɔȳn asə kəlōo kutə mətá dɔ man̄g kə́ bəra ní tə́ ō, dɔ bal batə̄ ní tə́ ō yā ndējə̄, ba kə́ tām̄ yā ngán batə̄ gə̄ tə́ ɓáa, ni a mbɔ̄jə́ kōō gémē kə gō kem ndigə̄ yānneé. Ni a ɓōkə́ lítər yibə̄ mehḛ́ dɔ kōō gémē ń kəlōon asə kutə mətá ní tə́.

⁸ Dan ń ngār a udə kə̄ kemeé anī, ni a udə i kə ta róbə ngōn̄ kújə́ kə́ ta róbə́ tə́ ń deē a mān̄ tū tə́ tá a udəń kə̄ ndágə loo kə́ kemeé tə́ ní ō, ni a teē ndágá i kə ta róbə́ kə́ kógə̄ḿ beē nəkɔ́ ń noō ō.

⁹ Dan ń gír de kə́ kem ɓēé gə̄ a aw̄n̄ ta kum Kɔ́ɔ̄ɓē tə́ kum mbang kán̄ naā kə́ bo gə̄ tə́ ní anī, de gə̄ ń a udən̄ kə ta róbə́ kə́ dām̄ mbɔ́r ɓē kə́ ko̰ó̰ tə́ tām̄ kadə̄ ɔsən̄ nodə́ nang tə́ ní, a teēn̄ i kə ta róbə́ kə́ dām̄ mbɔ́r ɓē kə́ geleé tə́ ō, ngé gə̄ ń a udən̄ kə ta róbə́ kə́ dām̄ mbɔ́r ɓē kə́ geleé tə́ ní, a teēn̄ ndágá kə ta róbə́ ń udənə̄ń kemeé ní alé. Nin̄ a teēn̄ ndágá i kə ta róbə́ kə́ rang.

¹⁰ Ngār a udə naā tə́ sedə́ dan ń nin̄ a udən̄ ní ō, ni a teē ndágá naā tə́ sedə́ dan ń nin̄ a teēn̄ ní ō.

Ndū najə̄ gə̄ kə́ sɔɔ̄ dɔ yá̰a̰ tun̄ kə́ tayā tayā gə̄

¹¹ Ndɔ̄ rāā nāā gə̄ tə́ ō, kum mbang kán̄ naā kə́ bo gə̄ tə́ ō ní, de gə̄ adə̄n̄ kōō gémē kə́ kɔȳn asə kəlōo kutə mətá dɔ man̄g kə́ bəra ní tə́ aláa dɔ bal batə̄ kə́ tun̄ ní tə́. Ba kə́ tām̄ yā ngán batə̄ gə̄ tə́ ɓáa, náā nəkɔ a mbɔ̄jə́ kōō gémē kə gō kem ndigə̄ yānneé. De gə̄ a ɓōkə́n̄ lítər yibə̄ mehḛ́ dɔ kōō gémē ń kəlōon asə kutə mətá ní tə́.

¹² Dan ń ngār a tɔ̄l̄ dā̰ yā tun̄ róō horoó kadə̄ Kɔ́ɔ̄ɓē Nə́ɓā kə gō kem ndigə yānneé aláa i dā̰ kə́ tun̄ tām̄ kem kógə̄ḿ tə́ kə gō kem ndigə̄ yānneé anī, de gə̄ a teēn̄ ta róbə́ ń tūr̄ tan dām̄ kə́ gír ɓē tə́ ní yā kadə̄n ō, ni a tɔ̄l̄ dā̰ yān yā tun̄ róō horoó kadə̄ Nə́ɓā ō, ni a tɔ̄l̄ dā̰ gə̄ kə́ yā tun̄ tām̄ kem kógə̄ḿ tə́ ō, tītə̄ ń ni a rāań ndɔ̄ sabat tə́ ní. Dan nəkɔ́ ń ni teē ndágá kɔ̄ɔ́ anī, de gə̄ a utə̄n̄ ta róbə ní.

¹³ Ā ī-ndējə̄ Kɔ́ɔ̄ɓē ngōn̄ batə̄ kógə̄ḿ kə́ loon kógə̄ḿ nujə aĺ kə dɔ ndɔ̄ gə̄. Nge ń noō i dā̰ kə́ róō horoó kadə̄n. Ā ī-ndə̄jən ngōn̄ batə̄ ní kə dɔ ndɔ̄ gə̄ kə ndɔ̄ý malang.

¹⁴ Kə dɔ ndɔ̄ gə̄ kə ndɔ̄ý anī, de gə̄ a ndējə̄n̄ Kɔ́ɔ̄ɓē ndujə kə́ kəlōon asə mí kə́ a ɓōkə́n̄ lítər yibə̄ jōó dɔ tə́ yā guŕńdə́ naā tə́. Ndū najə̄ gə̄ kə́ sɔɔ̄ dɔ yá̰a̰ ndējə̄ kə́ yā kadə̄ kə dɔ ndɔ̄ gə̄ ń noō a ton̄ i ngándáńg.

¹⁵ Sɔɔ̄ kadə̄ de gə̄ a ndējə̄n̄ Kɔ́ɔ̄ɓē ngōn̄ batə̄ ō, ndujə̄ ō, yibə̄ ō kə dɔ ndɔ̄ gə̄ kə ndɔ̄ý kə gōó ō, ngándáńg ō.

Yá̰a̰ kənge kə́ sɔɔ̄ dɔ ngán ngār gə̄

¹⁶ Najə̄ ń Kɔ́ɔ̄ɓē Nə́ɓā əda ní n toó: Ré ngār adə̄ ngōnən kógə̄ḿ kə́ dan madə̄ gə̄ tə́ yá̰á̰ kógə̄ḿ kadə̄ karī tə́ anī, yá̰á̰ ní a rāā rɔ̄n i yá̰a̰ kənge kə́ tām̄ yā ngán ngār gə̄ ngeé ń toō tə́. Ni ń noō a i yá̰a̰ kənge yādə́ kə́ bɔbə̄də́ adə̄də́.

¹⁷ Banī ré ngār adə̄ nge kəla yān kógə̄ḿ kə́ dan madə̄ gə̄ tə́ yá̰á̰ kógə̄ḿ kə́ tū yá̰a̰ kənge yān gə̄ tə́ kadə̄ karī tə́ anī, kadə̄ karī ní a i tām̄ yā nge kəla yān ní tə́ bátə́ ugə̄ń ɓāl̄ teē ɓəloó tə́, ba gō tə́ anī ni a tél kə kadə̄ karī ní yā kadə̄ ngār gogə́. Tɔdɔ̄ yá̰a̰ kənge yā ngār a i tām̄ yā ngánən gə̄ tə́ ngóy.

¹⁸ Ngār a taā yá̰á̰ kógə̄ḿ gə̄gē kə́ tū yá̰a̰ kənge yā gír de gə̄ tə́ aĺ ō, ni a taā yá̰a̰ kənge yādə́ gə̄ dɔ gúú tə́ aĺ ō. Yá̰a̰ kənge ń ni a adə̄ ngánən gə̄ ní a un i nge kə́ dan yá̰a̰ kənge yān nəkɔ́ tə́, tām̄ kadə̄ tə̄ɓān̄ deē kógə̄ḿ kə́ dan gír deē yāḿ tə́ kɔ̄ɔ́ dɔ nang yān tə́ alé.

Loo ndīr̄ yá̰a̰ gə̄ kə́ kem kújə yā Kɔ́ɔ̄ɓē tə́

¹⁹ Dəngam ní aw̄ seḿ kem kújə kə́ táĺ gə̄ ń i tām̄ yā ngé tun̄ yá̰a̰ gə̄ tə́ ō, ran̄ dām̄ kə́ mbɔ́r ɓē kə́ ko̰ó̰ tə́ ō ní, kə ta róbə́ kə́ yā kudəń kə̄ kemeé tə́ ń ra dām̄ kə́ ta róbə́ kújə́ tə́ ní. Gō tə́ anī, ni ɔjəm̄ loo kógə̄ḿ gə́lé tə́ dām̄ kə́ no ɓē tə́.

²⁰ Ni ədam̄ na: I loo ń ngé tun̄ yá̰a̰ gə̄ a ndīrə̄n̄ dā̰ kə́ tɔ̄l̄ tun̄ kəgāń kə̄rā yá̰á̰ kə́ gōtə́ aĺ ō, tām̄ yā majaĺ tə́ ō ní n noó. Nin̄ a ndīrə̄n̄ dā̰ kə́ tɔ̄l̄ ndējə̄ i loo ń noō tə́ ō, yā kadə̄ aw̄n̄ kə dā̰ gə̄ ní kem loo kə́ táĺ kə́ gidə tə́ ndágá aĺ ō, yā kadə̄ ɔr̄nəń kam̄ gír de gə̄ aĺ ō.

²¹ Ni teē seḿ kum kə̄ ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá tə́ ō, mān̄ seḿ ngɔr kadə kíl ndágə loo kə́ gīr̄ gidə kújə yā Kɔ́ɔ̄ɓē kə́ sɔ́ gə̄ tə́ ō. Tū kíl loo gə̄ tə́ kógə̄ḿ kógə̄ḿ kə dɔdə́ ní, ndágə loo kə́ to karī i tū tə́.

²² Ndágə loo kə́ to karī kə́ sɔ́ gə̄ ń i tū ndágə loo kə́ táĺ tə́ ní dūún̄ hɔyɔyɔ ō, ngāl̄də́ ō laadə́ ō asən̄ naā malang adə̄ ngāl̄də́ asə kíl deē nja kutə sɔ́ ō, laadə́ asə kíl deē kutə mətá ō.

²³ Əndān̄ ndogə̄ mbal̄ gīr̄nəń gidədə́ sɔ́ malang ō, rāān̄ loo ndīr̄ yá̰a̰ gə̄ kə́ ndə̄nān̄ kadə kəngā ní gīr̄ gidə ō.

²⁴ Dəngam ní ədam̄ na: I loo ndīr̄ yá̰a̰ gə̄ ń de kə́ ngé rāā kəla kem kújə yā Kɔ́ɔ̄ɓē tə́ gə̄ a ndīrə̄n̄ dā̰ kə́ tun̄ yā gír de gə̄ tū tə́ ní n noó.