EJEKIEL 45 - Bibəl ta Sar̄

Dɔ nang kə́ de kə́ rang a ɔdə rɔ̄ alé

¹ Dan ń ā ī-gángī dɔ nang yā kadə̄ gír ɓē gə̄ kə́ Israel tə́ anī, ā ī-gángī núsən tām̄ yā Kɔ́ɔ̄ɓē tə́. Ngālən a asə kíl deē 25 000 ō, laan a asə kíl deē 20 000 ō. De gə̄ a rāān̄ dɔ nang ń noō malang kə taá i dɔ nang kə́ táĺ tə́.

² A ngɔ̄mə̄n̄ dɔ nang kə́ ngālən ō laan ō asə naā, tām̄ yā kújə yā Kɔ́ɔ̄ɓē tə́. Dāmə̄n kógə̄ḿ i kíl deē ɓú mí. Ndágə loo kógə̄ḿ kə́ to karī a gīr̄ gidə. Ndágə loo ní laan i kíl deē kutə mí.

³ A mbɔ̄jə́n̄ loo kə́ ngālən i kíl deē 25 000, ba laan i 10 000. Loo ngeé ń noō i loo kə́ táĺ tām̄ rāān̄ kújə yāḿ kə́ táĺ tū tə́.

⁴ Loo ngeé ń noō i kə́ táĺ, tɔdɔ̄ ɔrə̄n̄ kamən tām̄ yā ngé tun̄ yá̰a̰ gə̄ ń a rāān̄ kəla kem loo kə́ táĺ tə́ ní. A rāān̄ kújə yādə́ gə̄ i dɔ nang ngeé ń toō tə́ ō, a ngɔ̄mə̄n̄ loo ní i tām̄ yā loo kə́ yā ɓōĺ gidə tə́ ō.

⁵ Loo kə́ rang kə́ ngālən i kíl deē 25 000 ba laan i kíl deē 10 000, i tām̄ yā ngán Lebi gə̄ ń a rāān̄ kəla kem kújə yā Kɔ́ɔ̄ɓē tə́ ní. Nin̄ a əngen̄ ɓē gə̄ loo ngeé ń noō tə́ yā ndiń.

⁶ A mbɔ̄jə́n̄ loo kə́ rang ɓáý to̰ kə gō kadə loo kə́ tām̄ yā Kɔ́ɔ̄ɓē ní tə́, kadə̄ ngālən i kíl deē 25 000 ō, laan i kíl deē 5 000 ō, yā rāań ɓē kógə̄ḿ kə́ ngán Israel gə̄ kógə̄ḿ kógə̄ḿ a əngen̄ ta róbə ndi kemeé.

⁷ Loo ń to kə gō gidə loo kə́ ngɔ̄m̄ tām̄ yā Kɔ́ɔ̄ɓē tə́ ō, yā ɓē bo tə́ ō ní, ā ī-ngɔ̄mī tām̄ yā ngār tə́. Loo ní kə́ dām̄ kə́ no ɓē tə́ a aw̄ bátə́ yā kugə̄ bā bo tə́ ō, kə́ dām̄ kə́ gír ɓē tə́ a aw̄ bátə́ yā kugə̄ dɔ nin̄ loo yā Israel kə́ dām̄ kə́ gír ɓē tə́ ō. Ngāl̄ loo ní a asə naā kə ngāl̄ loo yā gír ɓē gə̄ kógə̄ḿ kógə̄ḿ kə́ Israel tə́.

⁸ I tītə̄ ń noō n ngār gə̄ a əngenə̄ń loo yādə́ dɔ nang kə́ Israel tə́ ní. Nin̄ a əsan̄ tətō gír de gə̄ yā Kɔ́ɔ̄ɓē to̰ aĺ ō, a əya̰n̄ gotə dɔ nang yā kadə̄ gír ɓē gə̄ kə́ Israel tə́ ō.

Yá̰á̰ kə́ sɔɔ̄ ngār ō, yá̰á̰ kə́ kadə̄ ni-rāā ō

⁹ Najə̄ ń Kɔ́ɔ̄ɓē Nə́ɓā əda ní n toó: Sḭḭ̄ ngār kə́ Israel tə́, nge ń noō asə beé! Ī-dəbaī ta rāā yá̰a̰ kə dɔ́nɔ́ ō, ī-dəbaī ta kɔy yá̰a̰ yā de gə̄ dɔ gúú tə́ ō! Ī-ɓōlíī gidə ndū najə̄ gə̄ ō, yá̰a̰ rāā kə́ gōtə́ ō, adə̄ asəsí ɓogə yá̰a̰ kənge gə̄ yā gír deē yāḿ gə̄! I mā Kɔ́ɔ̄ɓē Nə́ɓā n m-ə́dásí yá̰á̰ ń noō kadə̄ ī-rāāī ní.

¹⁰ Āwī kə yá̰a̰ mbɔ̄jə́ kɔȳ yá̰a̰ gə̄ kə́ gōtə́ ō, kə yá̰a̰ mbɔ̄jə́ ngāl̄ loo gə̄ kə́ gōtə́ ō.

¹¹ Kār̄ mbɔ̄jə́ kōō gə̄ ń a ɓārə́n̄ na i epa ō, kār̄ mbɔ̄jə́ yá̰á̰ kə́ to man̄ gə̄ ń a ɓārə́n̄ na i batə̄ ō ní, majə kadə̄ kɔȳdə́ i kógə̄ḿ beē. Kem homer kógə̄ḿ deē a ənge epa kutə aláa a ənge batə̄ kutə.

¹² Tām̄ yā kɔȳ yá̰a̰ gə̄ tə́ ɓáa, ā ī-tə́daī gera kutə jōó yā kəngeń njáŕ sə́lē arjā̰a̰ kógə̄ḿ ō, ā ī-tə́daī sə́lē gində̄ arjā̰a̰ kutə mehḛ́ yā kəngeń minə kógə̄ḿ ō.

¹³ Dɔ kōō yāsí gə̄ ń ā ɔ̄rī ní n toó: Kōō gémē yāsí gə̄, aláa kōō ɔ́rjə yāsí gə̄ ń ā ī-sāāī ní, ré ī-kēgī naā tə́ gír loo kutə mehḛ́ anī, gírən kə́ kógə̄ḿ i yá̰á̰ kə́ yā ndējə̄ ō,

¹⁴ yibə̄ yāsí ré ī-kēgī naā tə́ naā tə́ gír loo ɓú anī, gírən kə́ kógə̄ḿ i yā ndējə̄ ō. Ā ī-mbɔ̄jíī yibə̄ i kə yá̰a̰ mbɔ̄jə́ yá̰á̰ kə́ to man̄ gēé, adə̄ i kə batə̄. Kem homer kógə̄ḿ deē a ənge epa kutə aláa a ənge batə̄ kutə.

¹⁵ Loo ń yá̰a̰ kul̄ gə̄ a aw̄n̄ ko̰ó̰ tū tə́ dɔ nang kə́ Israel tə́ ní, ré batə̄ aláa bə̄yā̰ gə̄ i ɓú jōó tū tə́ anī, ā ə́hɔī dā̰ kógə̄ḿ danaá, yā kadə̄ yá̰a̰ ndējə̄ tə́, adə̄ i yá̰á̰ kə́ yā tun̄ kə taá malang tə́, aláa i tām̄ yā yá̰a̰ tun̄ kə́ tām̄ yā kem kógə̄ḿ tə́. Loo ń noō tə́ ā ə́ngeī mā̰ȳ rɔ̄ kə́ tām̄ yā mān̄ kə́ ī-mānī dɔ ndū Nə́ɓā tə́. I mā Kɔ́ɔ̄ɓē Nə́ɓā n m-ə́da najə̄ ń noō ní.

¹⁶ I gáŕ kadə̄ de kə́ kem ɓēé gə̄ malang reēn̄ kə yādə́ adə̄n̄ ngār kə́ Israel tə́.

¹⁷ Tām̄ dan yā rāā nāā gə̄ tə́ ō, ndɔ̄ teē nāā gə̄ tə́ ō, ndɔ̄ sabat gə̄ tə́ ō, ndɔ̄ rāā pétə́ gə̄ malang yā ngán Israel gə̄ tə́ ō ní, i ngār n i nge kadə̄ yá̰á̰ kə́ tām̄ yā yá̰a̰ tun̄ kə́ kə taá malang tə́ ō, ndujə̄ kə́ yā ndējə̄ ō, kasə nduú kə́ yā ndējə̄ ō ní. Ngār a adə̄ yá̰á̰ kə́ yā tun̄ tām̄ yā yá̰a̰ rāā kə́ gōtə́ aĺ gə̄ tə́ ō, yá̰á̰ kə́ yā ndējə̄ gə̄ ō, yá̰á̰ kə́ yā tun̄ kə taá malang gə̄ ō, yá̰á̰ kə́ yā tun̄ tām̄ yā kem kógə̄ḿ tə́ ō. Loo ń noō tə́ ni a ənge mā̰ȳ rɔ̄ kə́ tām̄ yā mān̄ dɔ ndū najə̄ gə̄ yā ngán Israel gə̄ tə́.

¹⁸ Najə̄ ń Kɔ́ɔ̄ɓē Nə́ɓā əda ɓáý to̰ ní n toó: Kem nāā kə́ ta kəga dɔ tə́, kə ndɔ̄ nāā kə́ ta kəga dɔɔ́ ní, ā ī-ndējī man̄g kə́ bəra kə́ loon kógə̄ḿ nujə alé, yā tə́goń loo kə́ táĺ kadə̄ unjə̄ njáý njáý.

¹⁹ Nge tun̄ yá̰a̰ a taā mósə dā̰ ní yā rāā ta róbə́ kújə yā Kɔ́ɔ̄ɓē tə́, adə̄ i tū kāgə̄ tan gə̄ kə́ dɔɔ́ tə́ ō, ta loo tun̄ yá̰á̰ tə́ tū kílən kə́ sɔ́ gə̄ tə́ ō, tū kāgə̄ ta róbə gə̄ yā ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́ ō.

²⁰ Kə ndɔ̄ nāā kə́ nge ko̰ sīrí anī, ā ī-téliī yā rāā gogə́ ɓáý to̰, tām̄ yā deē ń rāā yá̰á̰ kə́ gōtə́ aĺ gə̄ kə gō kem ndigə yān nəkɔ́ alé, aláa kanjə̄ ger̄ gō ní tə́. I tītə̄ ń noō n ā ī-tə́goīń kújə yā Kɔ́ɔ̄ɓē kadə̄ unjə̄ njáý njáý ní.

²¹ Kə ndɔ̄ kə́ nge ko̰ kutə gidə i sɔ́ yā nāā kə́ ta kəga dɔ ngeé ń noō ɓáa, ā ə́laī gír rāā nāā Pákə. ā ī-rāāī nāā ní bátə́ ndɔ̄ sīrí. Ā ə́saī i mápá kə́ kanjə̄ kənī kaa mápa kum tə́ gə̄ n ā ī-rāāiń nāā ngeé ń noō ní.

²² Kə ndɔ̄ kə́ ta kəga dɔ yā nāā Pákə́ ní, ngār a tɔ̄l̄ man̄g kə́ bəra kógə̄ḿ yā tun̄, kadə̄ Nə́ɓā mā̰yń rɔ̄n dɔ majaĺ yān nəkɔ́ tə́ ō, tām̄ yā ngán Israel gə̄ tə́ malang ō.

²³ Kem ndɔ̄ kə́ sīrí gə̄ ń de gə̄ a rāānəń nāā tə́ ní, kə dɔ ndɔ̄ gə̄ ni a ndējə̄m̄ man̄g kə́ bəra gə̄ sīrí, kə́ loodə́ kógə̄ḿ kə́ nujə gətóo ō, bal batə̄ gə̄ sīrí, kə́ loodə́ kógə̄ḿ kə́ nujə gətóo ō, tām̄ yā yá̰a̰ tun̄ kə́ kə taá malang tə́. Kə dɔ ndɔ̄ gə̄ ni a ndējə̄ bal bə̄yā̰ kógə̄ḿ kadə̄ Nə́ɓā mā̰yń rɔ̄n dɔ majaĺ tə́ ō.

²⁴ Ta tɔ̄l̄ ta anī, ni a adə̄ kōō gémē kə́ kɔȳn i kəlōo kutə mətá ō, yibə̄ lítər mehḛ́ ō, kə dɔ man̄g kə́ bəra gə̄ ń ni ndējə̄ ní ō, kə dɔ bal bə̄yā̰ gə̄ ń ni ndējə̄ ní ō.

²⁵ Kə́ tām̄ yā nāā kújə́ kámbə gə̄ ń a əla gír i kem nāā kə́ nge ko̰ sīrí tə́, kə ndɔ̄ nāā kə́ nge ko̰ kutə gidə i mí ní, ngār a rāā yá̰á̰ kə́ kógə̄ḿ beē nəkɔ́ ń ni rāā tām̄ yā Pákə́ tə́ ní ɓáý: Kə dɔ ndɔ̄ gə̄, bátə́ ndɔ̄ sīrí ní, ni a ndējə̄ yá̰a̰ tun̄ gə̄ kə́ kógə̄ḿ beē nəkɔ́ ń noō kadə̄ Nə́ɓā mā̰yń rɔ̄n dɔ majaĺ tə́ ō, yá̰a̰ tun̄ gə̄ kə́ kə taá malang kə́ kógə̄ḿ beē nəkɔ́ ń noō ō, kōō gémē kə́ ndējə̄ kə́ kógə̄ḿ beē nəkɔ́ noō ō, yibə̄ kə́ ndējə̄ kə́ kógə̄ḿ beē nəkɔ́ ń noō ō.