EJEKIEL 44 - Bibəl ta Sar̄

Ta róbə́ kə́ dām̄ kə́ gír ɓē tə́ i tām̄ yā ngār tə́

¹ Deē ní tél reē seḿ ta róbə́ kə́ ndágá tə́ ń deē ra loo kə́ táĺ tə́ anī i kə̄ dām̄ kə́ gír ɓē tə́ ní tə́. Ta róbə́ ní i kə́ kutə̄ kɔ̄ɔ́.

² Kɔ́ɔ̄ɓē ədam̄ na: Ta róbə ń toō a ra i kə kutú beē, deē a teē ta alé. Deē a mān̄ tū tə́ alé, tɔdɔ̄ mā Kɔ́ɔ̄ɓē Nə́ɓā yā Israel m-údə i kə ta róbə́ ń noō. Adə̄ ni a ra i kə tan kə́ kutú.

³ Banī ngār a ndi i loo ń noō tə́ yā kəsań yá̰á̰ kə́ ɓōĺ gidə ta kumḿ tə́, tām̄ ni i ngār. Yā kudəń loo ń noō tə́ ō, yā teēń ō ní, ni a mān̄ i kem ngōn̄ kújə́ kə́ ta róbə́ tə́ ń ra kadə ta róbə́ kə́ yā kudəń kə̄ kemeé ní tə́.

Tə̄rā gə̄ a udən̄ kem kújə yā Kɔ́ɔ̄ɓē tə́ alé

⁴ Gō tə́ anī deē ní teē seḿ kə ta róbə́ kə́ dām̄ kə́ mbɔ́r ɓē kə́ ko̰ó̰ tə́ ba aw̄ seḿ bátə́ ta kújə yā Kɔ́ɔ̄ɓē tə́. M-á̰a̰ loo anī m-á̰a̰ kɔsə gɔn yā Kɔ́ɔ̄ɓē kə́ taā kem kújə yā Kɔ́ɔ̄ɓē malang. Anī m-ɔ́sə kejəḿ nang tə́ ba m-ɔ́sə noḿ nang tə́.

⁵ Anī Kɔ́ɔ̄ɓē ədam̄ na: Ḭ̄ ngōn̄ deē, ī-nēl̄ mbīí majə, ī-teē kumií ō, ī-rāā mbīí ō. Ōō yá̰a̰ malang kə́ ɔjə dɔ ndū najə̄ gə̄ ō, jī bēl̄ loo rāā yá̰a̰ gə̄ ō, kə́ tām̄ yā kújə yāḿ tə́ ń m-ā m̄-rāā yā kədaī ní. Ngé gə̄ ń kadə̄ ə̄ndā kumií gíŕdə́ tə́ ngá̰ý al̄ naā ní, i ndū najə̄ gə̄ ō, jī bēl̄ loo rāā yá̰a̰ gə̄ ō ń a adə̄n̄ deē ta róbə kudə loo kə́ táĺ tə́ ō, a adə̄n̄ deē ta róbə teē kem loo kə́ táĺ tə́ ō ní tə́.

⁶ Ā ə́dá Israel gə̄ adə̄ i ngé kəsō wōn̄g gə̄ ń noō na: Mā Kɔ́ɔ̄ɓē Nə́ɓā m-ə́dásí na yá̰á̰ kə́ majaĺ ngá̰ý gə̄ ń sḭḭ̄ Israel gə̄ ī-rāāī ní, asəm̄.

⁷ Dan ń ā ī-ndējə̄mīiń núsə́ yá̰a̰ kəsa kə́ tām̄ yāḿ tə́ ní, adə̄ i yibə̄ dā̰ kə́ tun̄ gə̄ ō, mósə dā̰ kə́ tun̄ gə̄ ō ní, tə̄rā gə̄ ń əjan̄ mɔtədə́ aĺ ō, oōn̄ taḿ aĺ ō ní, sḭḭ̄ ə́ya̰īdə́ adə̄ nin̄ udən̄ kem loo yāḿ kə́ táĺ tə́. Sḭḭ̄ ī-kídī kújə yāḿ i tītə̄ ń noō. Sḭḭ̄ ī-nujiī madə̄ naā ń do̰ō̰ rɔ̄sí tū yāḿ tə́ ní kɔ̄ɔ́, kə yá̰a̰ rāāsí kə́ majaĺ ngá̰ý gə̄ malang.

⁸ Sḭḭ̄ kɔ́ gə̄ ī-rāāī kəla kə́ kem loo kə́ táĺ yāḿ tə́ alé, banī sḭḭ̄ ə̄ndāī kəla ní i dɔ tə̄rā gə̄ ń noō tə́ kadə̄ rāān̄ kum gotəsí.

⁹ Mā Kɔ́ɔ̄ɓē Nə́ɓā m-ə́da najə̄ ń toō: Tə̄rā ń əja mɔtə kə́ dan wur tə́ aĺ ō, oō taḿ aĺ ō ní, a udə kem loo yāḿ kə́ táĺ tə́ to̰ alé, ká ni ndiń i dan Israel gə̄ tə́ gə̄gē ní.

Jī bēl̄ loo rāā yá̰a̰ gə̄ kə́ tām̄ yā ngán Lebi gə̄ tə́

¹⁰ Kum mbang ń ngán Israel gə̄ unən̄ róbə́ kə́ majaĺ ba əya̰mə̄n̄ kɔ̄ɔ́ yā kunəń gō ɓesə̄ yādə́ gə̄ ní, ngán Lebi gə̄ rāān̄ majaĺ tītə̄ gotə ngán Israel gə̄. I beé ɓá ní, nin̄ a tə́gān̄ tadə́ dan yá̰a̰ gə̄ ń yá̰a̰ rāādə́ kə́ gōtə́ aĺ gə̄ a reēń dɔdə́ tə́ ní.

¹¹ Kem loo yāḿ kə́ táĺ tə́ ɓáa, kəla ń nin̄ a rāān̄ tām̄ yāḿ tə́ ní, i ngɔ̄m̄ ta róbə gə̄ kə́ tū kújə yā Kɔ́ɔ̄ɓē tə́ ō, i rāā kəla kə́ tayā tayā gə̄ ō. Dā̰ gə̄ ń ndējə̄n̄ tām̄ yā yá̰a̰ tun̄ kə́ kə taá malang tə́ ō, tām̄ yā gotə yá̰a̰ tun̄ kə́ rang gə̄ tə́ ō ní, nin̄ asən̄ tɔ̄l̄. Nin̄ a rāān̄ kəla yā kadə̄ ngán Israel gə̄.

¹² Dan ń ngán Israel gə̄ a unnə̄ń gō nə́ɓā kə́ rɔ̄kum aĺ gə̄ ní, nin̄ rāān̄ kəla adə̄n̄də́ ō, nin̄ rāān̄ adə̄ ngán Israel gə̄ mānə̄n̄ dɔ ndū Nə́ɓā ō. I tām̄ najə̄ ń toō tə́ n mā Kɔ́ɔ̄ɓē Nə́ɓā m-ə́da najə̄ ń toō ní: M-ā m̄-rāā yá̰á̰ kə́ tōr̄ sedə́ ō, nin̄ a tə́gān̄ tadə́ dan yá̰a̰ gə̄ ń yá̰a̰ rāādə́ kə́ gōtə́ aĺ gə̄ a reēń dɔdə́ tə́ ní ō.

¹³ Nin̄ a reēn̄ rɔ̄ḿ tə́ yā téĺ ngé tun̄ yá̰a̰ yāḿ gə̄ alé. Yá̰á̰ kə́ kəndā tām̄ yāḿ tə́ gə̄ ní, nin̄ a aw̄n̄ kadə tə́ aĺ ō, nin̄ a aw̄n̄ kadə loo kə́ táĺ ngá̰ý tə́ aĺ ō. I beé ní, nin̄ a tə́gān̄ tadə́ dan yá̰a̰ gə̄ ń yá̰a̰ rāādə́ kə́ to rɔ̄sɔl̄ gə̄ ō, kə́ majaĺ ngá̰ý gə̄ ō, a reēń dɔdə́ tə́ ní.

¹⁴ I kəla kə́ tayā tayā gə̄ malang kə́ kem kújə yā Kɔ́ɔ̄ɓē tə́ n m-ā m-ə̄ndā dɔdə́ tə́ ní. Nin̄ a rāān̄ i kəla yāḿ mā ngóy.

Jī bēl̄ loo rāā yá̰a̰ gə̄ kə́ tām̄ yā ngé tun̄ yá̰a̰ gə̄ tə́

¹⁵ Dan ń Israel gə̄ əya̰mə̄n̄ mā ń i Kɔ́ɔ̄ɓē ní kɔ̄ɔ́ ní, ngé tun̄ yá̰a̰ gə̄ kə́ gír yā Lebi tə́ ń Sadok ojədə́ ní, rāān̄ kəla kə́ kem loo yāḿ kə́ táĺ tə́, i tām̄ najə̄ ń noō tə́ n i nin̄ ngó̰y n a asən̄ reē rāā kəla kadə̄m̄ ní. Nin̄ a asən̄ ndējə̄m̄ yibə̄ dā̰ kə́ tun̄ gə̄ ō, mósə dā̰ kə́ tun̄ gə̄ ō. I mā Kɔ́ɔ̄ɓē Nə́ɓā n m-ə́da najə̄ ń noō kə̄ ndágá ní.

¹⁶ I nin̄ ngóy n a udən̄ kem loo yāḿ kə́ táĺ tə́ ō, a ndɔ́tə̄n̄ kə̄ ta tábəl kə́ kə rī rāań kəla yāḿ tə́ tə́ ō ní. Nin̄ a ɓōlə́n̄ gidə jī bēl̄ loo rāā yá̰a̰ gə̄ kə́ yā rāań kəla ngeé ń toō.

¹⁷ Kété pá tá kadə̄ mānə̄n̄ kə ta róbə gə̄ kə́ ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́ ní, nin̄ a əlan̄ kūbə̄ lḛ́ḛ gə̄ rɔ̄də́ tə́. Dan ń nin̄ a rāān̄ kəla yādə́ ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́ ō, kem kújə yā Kɔ́ɔ̄ɓē tə́ ō anī, a o̰o̰n̄ kūbə̄ kə́ rāā kə bḭḭ̄ batāá alé.

¹⁸ Nin̄ a əndan̄ dɔdə́ kə kūbə̄ lḛ́ḛ ō, a əlan̄ kūbə̄ lḛ́ḛ rɔ̄də́ tə́ ō. Nin̄ a əlan̄ kūbə̄ kə́ rang kə́ a rāādə́ kadə̄ a tətōn̄ rɔ̄də́ tə́ alé.

¹⁹ Dan ń nin̄ a télən̄ yā reē gogə́ ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́, loo ń ngán Israel gə̄ i tū tə́ ní tə́ anī, kūbə̄ ń əlan̄ rɔ̄də́ tə́ á rāānəń kəla ní, nin̄ a ɔrə̄n̄ kɔ̄ɔ́. Nin̄ a əya̰n̄ kūbə̄ gə̄ ní kem kújə gə̄ kə́ kem loo kə́ táĺ tə́, ba a tə́lan̄ kūbə̄ kə́ rang gə̄ rɔ̄də́ tə́. Kūbə̄ yādə́ kə́ yā ɓōĺ gidə gə̄ ní, i beé tá ngán Israel gə̄ a ɔdən̄ rɔ̄ alé.

²⁰ Ngé tun̄ yá̰a̰ gə̄ a dəsān̄ dɔdə́ alé. Nin̄ a əya̰n̄ nənga dɔdə́ kadə̄ tɔgə kə̄ nuú aĺ ō, banī nin̄ a tə́jān̄ nənga dɔdə́ kə gōó kadə̄ majə.

²¹ Nge tun̄ yá̰a̰ a a̰ȳ kasə nduú tá a udəń ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́ alé.

²² Nge tun̄ yá̰a̰ a taā dəyá̰ kə́ ngaa koy aĺ ō, kə́ ngaan mbātə́n aĺ ō. Ni a taā i ngōn̄ kə́ mandə kə́ Israel tə́, aláa a taā i nə̄yá̰ nge tun̄ yá̰á̰ kə́ rang kə́ oy.

²³ Ngé tun̄ yá̰a̰ gə̄ a ndóōn̄ gír deē yāḿ gə̄ kadə̄ gerə̄n̄ kɔr̄ kam̄ yá̰á̰ kə́ yā ɓōĺ gidə naā tə́ kə yá̰á̰ kə́ karī ō, kadə̄ gerə̄n̄ kɔr̄ kam̄ yá̰á̰ kə́ unjə̄ njáý njáý naā tə́ kə yá̰á̰ kə́ yḛr ō.

²⁴ Ré najə̄ to anī, nin̄ a gāngə̄n̄ sarya kə́ gōtə́ ō, a ran̄ i dɔ ndū najə̄ yāḿ gə̄ tə́ n a rāānəń sarya ní ō. Nin̄ a ɓōlə́n̄ gidə jī bēl̄ loo rāā yá̰a̰ gə̄ kə́ ndɔ̄ rāā nāā yāḿ gə̄ tə́ ō, a ɓōlə́n̄ gidə yá̰a̰ gə̄ ń m̄-ndang kadə̄ yā rāādə́ ní ndɔ̄ rāā nāā yāḿ gə̄ tə́ ní ō. I gáŕ kadə̄ nin̄ a ɔrə̄n̄ ndɔ̄ sabat tām̄ yāḿ tə́.

²⁵ Nge tun̄ yá̰a̰ a aw̄ ngɔr rɔ̄ nīń tə́ alé, ré i beé aĺ anī ni a tél de kə́ yḛr. Banī ni asə kaw̄ rɔ̄ nīń bɔbə̄n tə́ ō, nīń kó̰o̰n tə́ ō, nīń ngōnən tə́ ō, nīń ngōkó̰o̰n kə́ dəngam tə́ ō, aláa nīń ngōkó̰o̰n kə́ dəyá̰ kə́ taā dəngam aĺ ɓáý tə́.

²⁶ Kutə̄ gō anī, i gáŕ kadə̄ ni tə́go rɔ̄n kadə̄ unjə̄ njáý njáý. Ba gō tə́ anī ni a ngóō ndɔ̄ sīrí pá tá a rāā kəla kem kújə yā Kɔ́ɔ̄ɓē tə́ ɓáý.

²⁷ Ndɔ̄ ń ni a téləń yā kudə kaw̄ gogə́ ndágə loo kə́ gīr̄ gidə kújə yā Kɔ́ɔ̄ɓē kə́ kemeé yā loo kə́ táĺ tə́ ní, ni a ndējə̄ yá̰a̰ tun̄ kógə̄ḿ kadə̄ m̄-mā̰yń rɔ̄ḿ dɔ majaĺ tə́. I mā Kɔ́ɔ̄ɓē Nə́ɓā n m-ə́da najə̄ ń noō kə̄ ndágá ní.

²⁸ Ngé tun̄ yá̰a̰ gə̄ a rāān̄ kəla yā kadə̄m̄. Nin̄ a əngen̄ loo dɔ nang kə́ Israel tə́ alé. Tɔdɔ̄ mā i yá̰a̰ kənge yādə́.

²⁹ Yá̰a̰ kəsa yādə́ i yá̰á̰ kə́ ndējə̄ gə̄ ō, i dā̰ kə́ tun̄ tām̄ kadə̄ Nə́ɓā mā̰yń rɔ̄n dɔ majaĺ tə́ ō, tām̄ ndū Nə́ɓā kə́ mān̄ dɔ tə́ gə̄ tə́ ō. Yá̰a̰ malang kə́ kɔr̄ kəndā tayā tām̄ yāḿ tə́ dɔ nang kə́ Israel tə́ ní, a tél i yá̰a̰ yādə́.

³⁰ Núsə kōō kə́ ta kəga dɔ ní, i ngé tun̄ yá̰a̰ gə̄ n a taān̄ ō, yá̰a̰ malang kə́ kɔr̄ kam̄ tām̄ yāḿ tə́ dan yá̰a̰ kənge gə̄ yā ngán Israel gə̄ tə́ ní, nin̄ a taān̄ ō. De gə̄ a adə̄n̄də́ ndujə̄ yādə́ kə́ majə ngá̰ý gə̄ yā kadə̄ m̄-tɔ́rəń taḿ dɔ kem kújə yādə́ gə̄ tə́.

³¹ Banī yel̄ kə́ koy, aláa dā̰ kə́ koy, aláa kə́ dā̰ kə́ bembeé əhɔ rə́yā̰n naā tə́ ní, ngé tun̄ yá̰a̰ gə̄ a əsan̄ alé.