EJEKIEL 43 - Bibəl ta Sar̄

Nə́ɓā tél reē gogə́ kem kújə́ yā Kɔ́ɔ̄ɓē tə́

¹ Ta róbə́ ń deē ra kújə yā Kɔ́ɔ̄ɓē tə́ anī i kə̄ dām̄ kə́ gír ɓē tə́ ní, deē ní aw̄ seḿ kum kə̄ tū tə́.

² Loo ń noō tə́ m-á̰a̰ kɔsə gɔn yā Nə́ɓā yā Israel. Kɔsə gɔn ní ḭḭ i dām̄ kə́ gír ɓē tə́ n a reē. Kōō kɔsə gɔn ní ɓār̄ tītə̄ kōō bā bo beé ō, loo yān kə́ unjə̄ kow unjə̄ adə̄ de gə̄ a̰a̰nə̄ń loo dɔ nang tə́ ō.

³ Yá̰á̰ ń m-á̰a̰ā̰ ní, to tītə̄ yá̰á̰ ń m-á̰a̰ā̰ kété dan ń Kɔ́ɔ̄ɓē reēń nujə ɓē kə́ Jerusalem tə́ ō, dan ń m̄-rāń kadə bā Kebar tə́ ní ō. Loo ń noō tə́ m̄-tétə̄ kejəḿ nang tə́ ō, m-ɔ́sə noḿ nang tə́ ō.

⁴ Kɔsə gɔn yā Kɔ́ɔ̄ɓē udə kem kújə yā Kɔ́ɔ̄ɓē tə́, kə ta róbə́ kə́ dām̄ kə́ gír ɓē tə́.

⁵ Ndíĺ Nə́ɓā unəm̄ dɔɔ́ ba aw̄ seḿ ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́. M-á̰a̰ kadə̄ kɔsə gɔn yā Kɔ́ɔ̄ɓē taā loo kem kújə yā Kɔ́ɔ̄ɓē tə́.

⁶ Anī deē kógə̄ḿ ndi kem kújə yā Kɔ́ɔ̄ɓē tə́ ɔrə̄ń najə̄ adə̄ m-ōō ndūn. Dan ngeé ń noō tə́ ɓáa deē ń ɔr noḿ ní ra kadəḿ tə́.

⁷ Ndū deē ní ədam̄ na: Ḭ̄ ngōn̄ deē, ōō! Loo yā kōr̄ kāgə̄ mbang yāḿ i loo ń toō tə́ laā, i dɔ nang ń m-ə̄ndā njaḿ tū tə́ toō. M-ā m̄-ndi i loo ń noō tə́ laā, dan ngán Israel gə̄ tə́, i kə́ njɔ́ḿ gə̄ tə́. Ngán Israel gə̄ ō, mban̄g yādə́ gə̄ ō, a kídə̄n̄ rīḿ kə́ táĺ to̰ alé. Nin̄ a rāān̄ ájə́ba to̰ aĺ ō, a dubə̄n̄ nīń mban̄g yādə́ gə̄ laā to̰ aĺ ō.

⁸ Mban̄g gə̄ tə́ndān̄ ta róbə gə̄ kə́ yā kudəń kə̄ kem kújə ngol yādə́ gə̄ tə́ i kadə ta róbə́ kújə́ kə́ bo yāḿ tə́ ō, tə́ndān̄ kāgə̄ ta róbə́ kújə yādə́ gə̄ i kadə ta róbə́ kújə́ kə́ bo yāḿ tə́ ō, tə́ndān̄ kāgə̄ ta róbə́ kújə yādə́ gə̄ i kadə kāgə̄ ta róbə́ kújə́ kə́ bo yāḿ gə̄ tə́ ō. Ndogə̄ mbal̄ ń kēgə̄ kújə́ kə́ bo yāḿ naā tə́ kə kújə yādə́ ní i kógə̄ḿ beē. Nin̄ kídə̄n̄ rīḿ kə́ táĺ. Tɔdɔ̄ nin̄ rāān̄ yá̰á̰ kə́ majaĺ ngá̰ý gə̄. I tām̄ najə̄ ń toō tə́ n m̄-nujə sedə́ kɔ̄ɔ́ malang dan ń wōn̄g rāām̄ ní.

⁹ Ngɔlaā ní a asə ngán Israel gə̄ rāā ájə́ba. Nin̄ a ɔyn̄ nīń mban̄g yādə́ gə̄ yā kaw̄ń sa̰y kɔ̄ɔ́ rɔ̄ḿ tə́ ō, m-ā m̄-ndi dandə́ tə́ i kə́ njɔ́ḿ gə̄ tə́ ō.

¹⁰ Ba ḭ̄ ngōn̄ deē, kújə́ yā Kɔ́ɔ̄ɓē ní, ɔ́jə́ Israel gə̄ loon ādə̄ gerə̄n̄. Ādə̄ rɔ̄də́ sɔl̄də́ najə̄ yá̰a̰ rāādə́ kə́ gōtə́ aĺ gə̄ tə́ ō, ādə̄ əndān̄ ma̰ȳ loo rāā kújə́ yā Kɔ́ɔ̄ɓē ń toō kə gōó majə ō!

¹¹ Ré rɔ̄də́ sɔl̄də́ najə̄ yá̰á̰ ń nin̄ rāān̄ tə́ ní rɔ̄kum anī, ɔ́jə́də́ loo rāā kújə́ yā Kɔ́ɔ̄ɓē ō, loo ń rāān̄ kújə́ kə́ bo gə̄ tū tə́ ní ō, ta róbə gə̄ kə́ yā kudəń ō, kə́ yā teēń gə̄ ō, ɔ́jə́də́ loo rāān gə̄ malang ō. Yá̰á̰ kə́ yā rāā gə̄ ō, jī bēl̄ loo rāā yá̰a̰ gə̄ ō ń kadə̄ nin̄ ɓōlə́n̄ gidə loo ń toō tə́ ní, a oōn̄ tadə́ ō.

¹² Najə̄ kə́ dɔ kújə́ yā Kɔ́ɔ̄ɓē tə́ ní, ndū tām̄ kə́ bo kə́ dɔ tə́ ń toó: Loo malang ń gīr̄ gidə kújə́ yā Kɔ́ɔ̄ɓē dɔ mbalá dɔɔ́ ní, majə kadə̄ de gə̄ rāān̄ loo kə́ táĺ ngá̰ý tə́.

Loo tun̄ yá̰a̰ ō, yá̰á̰ kə́ tun̄ gə̄ ō

¹³ Mbɔ̄jə́n̄ loo tun̄ yá̰a̰. Yá̰á̰ mbɔ̄jə́nəń ní, ngālən i kíl deē kógə̄ḿ kə núsə. Bəlo kógə̄ḿ kə́ rúun i kíl deē kógə̄ḿ ō, laan i kíl deē kógə̄ḿ ō, gīr̄ gidə loo tun̄ yá̰á̰ ní. Dām̄ kə́ gidə tə́ ndágá ɓáa ta bəlo ní ḭḭ kə̄ dɔɔ́ asə núsə́ kíl deē kógə̄ḿ. Loo tun̄ yá̰á̰ ní ngālən kə́ kə̄ dɔɔ́ n toó:

¹⁴ Əla gír ngəran tə́ nang tə́ bátə́ tan kə́ dɔɔ́ kə́ ta kəga dɔ tə́ ní, ngālən kə́ kum kə̄ dɔɔ́ i kíl deē jōó. Laa tan ní, kḭḭ gír gisən tə́ kum kə̄ kemeé i kíl deē kógə̄ḿ. Kḭḭ tan ní tə́ bátə́ tan kə́ rang kə́ dɔɔ́ tə́ i kíl deē sɔ́. Tan kə́ dɔɔ́ ní, kḭḭ bɔ̄gə̄ tan kə́ ndágá tə́ kum kə̄ kemeé i kíl deē kógə̄ḿ kə núsə.

¹⁵ Núsə loo tun̄ yá̰á̰ ní kə́ dɔɔ́ ń mbā sīl̄ i tū tə́ ní, ngālən kə́ kə̄ dɔɔ́ i kíl deē sɔ́ ō, rāān̄ gajə gə̄ ta kílən kə́ sɔ́ gə̄ tə́ ō.

¹⁶ Mbā sīl̄ ní ngālən gē, laan gē asən̄ naā. Ngālən kə́ dām̄ kógə̄ḿ tə́ i kíl deē kutə gidə i jōó.

¹⁷ Tan kə́ dɔɔ́ kə́ jōó ní, ngālən gē laan gē asən̄ naā ō. Dāmə̄n kógə̄ḿ ɓáa ngālən i kíl deē kutə gidə i sɔ́. Dāmə̄n kə́ ndágá tə́ ɓáa, ngāl̄ bɔ̄gə̄ tan kə́ kum kə̄ dɔɔ́ i núsə́ kíl deē kógə̄ḿ, ba ngōn̄ bəlo kógə̄ḿ kə́ rúun i kíl deē kógə̄ḿ, gīr̄ gidə əla ta naā tə́. Yā kugə̄ń tā tan kə́ nge ko̰ jōó ní tə́ ɓáa, deē a tə́ndā njan i tū loo tə́ndā nja gə̄ kə́ dām̄ kə́ gír ɓē tə́ n a alə̄ń kə̄ dɔɔ́ yā kugə̄ń tū tə́ ní.

¹⁸ Deē ní ədam̄ na: Ḭ̄ ngōn̄ deē, ōō yá̰á̰ Kɔ́ɔ̄ɓē Nə́ɓā ədaī kadə̄ ī-rāā ní: Ndɔ̄ ń a rāānəń loo tun̄ yá̰á̰ tə́ yā ndējəń yá̰a̰ tun̄ kə́ kə taá malang ō, yā ɓōkə́nń mósə dā̰ gə̄ tə́ ō ní, jī bēl̄ loo rāā yá̰a̰ gə̄ n toó:

¹⁹ Ngé tun̄ yá̰a̰ gə̄ kə́ gír yā Lebi tə́, kə́ kem kojə yā Sadok tə́ ní, ā ādə̄də́ man̄g kə́ bəra kógə̄ḿ. I nin̄ ngóy n ta róbə i yādə́ kadə̄ ndɔ́tə̄n̄ kə̄ rɔ̄ḿ tə́ ba rāān̄ kəla adə̄mə̄n̄ ní. I mā Kɔ́ɔ̄ɓē Nə́ɓā n m-ə́da najə̄ ń noō ní. A ndējə̄n̄ man̄g kə́ bəra ngeé ń noō kadə̄ i yá̰a̰ tun̄ kə́ kadə̄ m̄-mā̰yń rɔ̄ḿ dɔ majaĺ yādə́ tə́.

²⁰ Ā ī-taā mósən. Gō tə́ anī ā ī-rāā mósən ní kíl loo tun̄ yá̰á̰ kə́ sɔ́ gə̄ tə́, tū gajən gə̄ tə́ ō, ā ī-rāā tū kílən kə́ sɔ́ gə̄ yā tan kə́ dɔɔ́ kə́ ko̰ jōó tə́ ō, tū bɔ̄gə̄ tan ń gīr̄ gidən əla ta naā tə́ ní tə́ ō. Ā ī-tə́go loo tun̄ yá̰a̰ kadə̄ unjə̄ njáý njáý i tītə̄ ń noō ō, ā ə̄ndān kə rī kəla yā Nə́ɓāá i tītə̄ ń noō ō.

²¹ Gō tə́ anī man̄g kə́ bəra ń ndējə̄n̄ kadə̄ tunə̄n̄ ní, ā ə́da kadə̄ un aw̄ róōn̄ loo kógə̄ḿ kə́ to i kə rī kadə̄ róōnəń tū tə́ tə́, gidə loo kə́ táĺ kə́ ndágá tə́.

²² Kə ndɔ̄ kə́ nge ko̰ jōó anī, ā ə́hɔ bal bə̄yā̰ kógə̄ḿ kə́ loon kógə̄ḿ nujə alé yā ndējə̄ kadə̄ tunə̄n̄ ō, tām̄ kadə̄ m̄-mā̰yń rɔ̄ḿ dɔ majaĺ tə́. Ā ī-tə́go loo tun̄ yá̰a̰ kadə̄ unjə̄ njáý njáý, tītə̄ ń ī-rāań kə man̄g kə́ bəraá ní.

²³ Dan ń ī-tun̄ yá̰á̰ ń noō oy anī, ā ə́hɔ man̄g kə́ bəra kógə̄ḿ dan yá̰a̰ kul̄ gə̄ tə́ ō, ā ə́hɔ bal batə̄ kógə̄ḿ kə́ loon kógə̄ḿ nujə aĺ ō.

²⁴ Ā ī-reē sedə́ rɔ̄ḿ mā Kɔ́ɔ̄ɓē tə́ kadə̄ m-á̰á̰də́. Ngé tun̄ yá̰a̰ gə̄ a selə́n̄ katə̄ dɔdə́ tə́ ō, nin̄ a tɔ̄lə̄n̄də́ ba a tunə̄n̄də́ kə taá malang yā kadə̄m̄ ō.

²⁵ Kə dɔ ndɔ̄ gə̄ bátə́ ndɔ̄ sīrí ní, ā ī-tɔ̄l̄ bal bə̄yā̰ kógə̄ḿ yā tun̄ tām̄ kadə̄ m̄-mā̰yń rɔ̄ḿ dɔ majaĺ tə́ ō, naā tə́ kə man̄g kə́ bəra kógə̄ḿ ō, bal batə̄ kógə̄ḿ kə́ loon kógə̄ḿ kə́ nujə gətóo ō, kə́ ə́hɔ dan ɓūtə̄ yá̰a̰ kul̄ gə̄ tə́.

²⁶ Adə̄ kem ndɔ̄ sīrí ní, a tə́gon̄ loo tun̄ yá̰a̰ kadə̄ unjə̄ njáý njáý ō, a əndān̄ loo tun̄ yá̰a̰ tayā kə rī rāā kəla yā Nə́ɓāá ō.

²⁷ Dan ń gír ndɔ̄ kə́ sīrí gə̄ ní gān̄g anī, ndɔ̄ kə́ nge ko̰ sɔ́sɔ́ ō, gotə ndɔ̄ gə̄ ń a utə̄n̄ gō ō ní, ngé tun̄ yá̰a̰ gə̄ a ndējə̄n̄ yá̰a̰ tun̄ kə́ kə taá gə̄ ō, yá̰a̰ tun̄ gə̄ kə́ tām̄ yā kem kógə̄ḿ tə́ ō, dɔ loo tun̄ yá̰á̰ tə́ tām̄ yā ngán Israel gə̄ tə́. Loo ń noō tə́ m-ā m-ɔ́jə kem majə yāḿ kə́ tām̄ yāsí tə́ kə̄ ndágá. Najə̄ ń Kɔ́ɔ̄ɓē Nə́ɓā əda kə̄ ndágá wáńg ní n noó.