EJEKIEL 42 - Bibəl ta Sar̄

Kújə gə̄ kə́ kadə kújə yā Kɔ́ɔ̄ɓē tə́

¹ Gō tə́ anī deē ní teē aw̄ seḿ ndágə loo kə́ gīr̄ gidə kújə yā Kɔ́ɔ̄ɓē kə́ ndágá tə́, dām̄ mbɔ́r ɓē kə́ ko̰ó̰ tə́. Ni-aw̄ seḿ gidə kújə yā Kɔ́ɔ̄ɓē tə́ kum kə̄ loo ń kem kújə gə̄ i tū tə́ ní tə́. Kem kújə gə̄ ní ra sɔɔ̄n̄ ta naā kə ndágə loo kə́ karīí ō, kə kújə́ kə́ gidə kújə yā Kɔ́ɔ̄ɓē tə́ ō.

² Kújə́ kə́ kemən gə̄ i ngá̰ý ngeé ń toō ní, ngālən i kíl deē ɓú, ba laan i kíl deē mí.

³ Dan kə́rēý tə́ anī kújə́ ní ra sɔɔ̄ i ta ndágə loo kə́ gīr̄ gidə kújə yā Kɔ́ɔ̄ɓē á laan i kíl deē kutə jōó ō. Dām̄ kə́ rang tə́ ɓáa deē teē kemeé anī a ənge i mbal̄ kə́ kɔsə̄ ta naā tə́ kə́ gidə tə́ ndágá ō. Róbə́ kə́ yā mānəń gə̄ ton̄ kem kújə́ ní tə́. To kemən kə́ gírí nang tə́ tə́ ō, kemən kə́ ko̰ jōó kə́ ta kaw̄ dɔɔ́ tə́ ō, kemən kə́ ko̰ mətá kə́ dɔɔ́ tə́ ō.

⁴ Loo kə́ yā njə̄rā tū tə́ kógə̄ḿ kə́ laan i kíl deē kutə ō, ngālən i kíl deē ɓú ō, to ta kújə gə̄ tə́, dām̄ yā ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́. Deē a udə kem kújə́ kə́ bo kə́ kemən gə̄ i ngá̰ý ngeé ń toō tə́ i kə ta róbə́ kə́ dām̄ mbɔ́r ɓē kə́ ko̰ó̰ tə́.

⁵ Kújə́ kə́ nge ko̰ mətá kə́ dɔ madə̄ gə̄ tə́ ní, kemən gə̄ dūún̄ tɔȳ yā gotə kə́ gírí nang tə́. Tām̄ kújə́ kə́ dɔ madə̄ gə̄ tə́ kə́ nge ko̰ mətá ní, róbə́ kə́ kemeé gə̄ taān̄ loo ngá̰ý tɔȳ yā ngé kə́ kem kújə́ kə́ dɔ madə̄ tə́ kə́ nge ko̰ jōó ō, tɔȳ yā ngé kə́ kem kújə́ kə́ ta kəga dɔ tə́ ō.

⁶ Rāān̄ loo kə́ yā ndi tū tə́ ndalə̄ń gə̄ ta róbə́ kújə gə̄ tə́, tə́ndān̄də́ dɔ naā tə́ ta kaw̄ dɔɔ́. Rāān̄ ta kújə́ kə́ ta kəga dɔ tə́ ō, kə́ ko̰ jōó tə́ ō, kə́ ko̰ mətá tə́ ō. Banī gír gisədə́ kə́ yā kəhɔdə́ dɔɔ́ tītə̄ yā gotə kújə́ kə́ rang gə̄ kə́ ndágə loo kə́ gīr̄ gidə kújə yā Kɔ́ɔ̄ɓē tə́ tá gətóo. Ré deē al̄ aw̄ kumən kə̄ dɔɔ́ anī, kem kújə gə̄ ní a dūún̄ i mbée kum kə̄ kété kété ta kaw̄ dɔɔ́.

⁷ Ndogə̄ mbal̄ kə́ dām̄ loo yā ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá tə́ ń ra i kə gō kadə kem kújə gə̄ ní, ngālən i kíl deē kutə mí.

⁸ Kem kújə gə̄ nəkɔ́ ní ngāl̄də́ i kíl deē kutə mí. Banī kem kújə gə̄ ń deē teē tū tə́ anī a ənge i kújə yā Kɔ́ɔ̄ɓē ní, ngāl̄də́ i kíl deē ɓú.

⁹ Ngé gə̄ ń ḭḭn̄ ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá tə́ ní, ta róbə́ kógə̄ḿ kə́ yā kudəń kə̄ kemeé to noó tām̄ yādə́ tə́. Ta róbə́ ní i gír kem kújə gə̄ ní tə́ ō, ré deē ra kújə́ ní tə́ anī, ta róbə́ ní i kə̄ dām̄ kə́ gír ɓē tə́ ō.

¹⁰ Ta róbə́ ní i loo ń ndogə̄ mbal̄ kə́ gidə ndágə loo kə́ gīr̄ gidə kújə yā Kɔ́ɔ̄ɓē tə́ əla gír tū tə́ ní tə́. Dām̄ mbɔ́r ɓē kə́ geleé tə́ ɓáa kem kújə gə̄ i noó ɓáý. Kem kújə gə̄ ní ran̄ sɔɔ̄n̄ ta ndágə loo kə́ to karīí ō, kújə́ kə́ bo kə́ kemən i ngá̰ý ō ń i gidə kújə yā Kɔ́ɔ̄ɓē tə́ ní.

¹¹ Loo kə́ yā njə̄rań to ta kem kújə gə̄ ní tə́. Kem kújə gə̄ ní ngālən ō, laan ō, tītə̄ kem kújə gə̄ kə́ dām̄ mbɔ́r ɓē kə́ ko̰ó̰ tə́ beē. Ta róbə yādə́ gə̄ kə́ yā kudəń ō, kə́ yā teēń ō, loo kəndā ń əndān̄də́ ō ní, tītə̄ naā.

¹² Ta róbə́ kújə gə̄ kə́ dām̄ mbɔ́r ɓē kə́ geleé tə́ ní, ton̄ tītə̄ yā ngé kə́ dām̄ mbɔ́r ɓē kə́ ko̰ó̰ tə́. Loo ń loo kə́ yā njə̄rāń əla gír tū tə́ ní, ta róbə́ kógə̄ḿ kə́ yā kudəń i tū tə́. Ta róbə́ ní ra sɔɔ̄n̄ ta naā kə ndogə̄ mbal̄ ń utə̄ gidə loo kə́ táĺ ní. Deē a ḭḭ i dām̄ kə́ gír ɓē tə́ n a reē tū tə́ ní.

¹³ Deē ní ədam̄ na: Kem kújə gə̄ kə́ dām̄ mbɔ́r ɓē kə́ ko̰ó̰ tə́ ō, kə́ dām̄ mbɔ́r ɓē kə́ geleé tə́ ō, ń deē teē tū tə́ anī a ənge i ndágə loo ní, i kem kújə gə̄ kə́ ngɔ̄mə̄n̄ tām̄ yā Nə́ɓā tə́. Ngé tun̄ yá̰a̰ gə̄ ń asən̄ kudə kem loo kə́ táĺ tə́ ní, a əsan̄ yá̰a̰ ndējə̄ kə́ táĺ ngá̰ý gə̄ i loo ń noō tə́. I gáŕ kadə̄ nin̄ a kánə̄n̄ yá̰a̰ ndējə̄ kə́ táĺ ngá̰ý gə̄ i loo ń noō tə́, adə̄ i kadə̄ karī gə̄ ō, dā̰ gə̄ kə́ ndējə̄n̄ tām̄ yā yá̰a̰ tun̄ kə́ tayā tayā gə̄ tə́ kadə̄ Nə́ɓā mā̰yń rɔ̄n ō. Tɔdɔ̄ loo ní i loo kə́ táĺ.

¹⁴ Tá ɓáý to̰ ní, ngé tun̄ yá̰a̰ gə̄ ń udən̄ kem loo kə́ táĺ tə́ ní, ré a teēn̄ kə̄ ndágá anī, asən̄ kaw̄ súmūú ndágə loo kə́ gīr̄ gidə kújə yā Kɔ́ɔ̄ɓē kə́ gidə tə́ ndágá tə́ alé. I gáŕ kadə̄ əya̰n̄ kūbə̄ kə́ yā ɓōĺ gidə gə̄ ń tə́lan̄ rɔ̄də́ tə́ rāānəń kəla yā Kɔ́ɔ̄ɓē ní kem kújə gə̄ ní tə́, ba tə́lan̄ kūbə̄ kə́ rang gə̄ rɔ̄də́ tə́ pá tá aw̄n̄ loo ń ngán Israel gə̄ kánə̄n̄ naā tū tə́ ní tə́ ɓáý.

Mbɔ̄jə́n̄ ndogə̄ mbal̄ kə́ gidə tə́ ndágá

¹⁵ Dan ń deē ní mbɔ̄jə́ kújə gə̄ kə́ kem kújə́ yā Kɔ́ɔ̄ɓē tə́ oy anī, teē seḿ ndágá kə̄ ta róbə́ kə́ dām̄ kə́ gír ɓē tə́. Gō tə́ anī ni udə kə̄ rɔ̄ mbɔ̄jə́ ndágə loo ń to gīr̄ gidə kújə́ yā Kɔ́ɔ̄ɓē ní tə́.

¹⁶ Ni mbɔ̄jə́ ngāl̄ loo ní kə́ dām̄ kə́ gír ɓē tə́ kə tə̄ɓā mbɔ̄jə́ yá̰á̰ anī, ənge i kíl deē ɓú mí.

^17-19 Ni mbɔ̄jə́ ngāl̄ loo ní kə́ dām̄ mbɔ́r ɓē kə́ ko̰ó̰ tə́ ō, kə́ geleé tə́ ō, kə́ no ɓē tə́ ō, kə tə̄ɓāá anī, ngāl̄də́ asə naā malang. Ngāl̄də́ gə̄ ní i kíl deē ɓú mí.

²⁰ Ni mbɔ̄jə́ ndogə̄ mbal̄ ń gīr̄ gidə kújə́ yā Kɔ́ɔ̄ɓē ní, dāmə̄n kə́ sɔ́ gə̄ tə́ i tītə̄ ń noō. Ndogə̄ mbal̄ ní ngālən ō laan ō asən̄ naā. Dāmə̄n kógə̄ḿ i kíl deē ɓú mí. Ndogə̄ mbal̄ ní i yā kɔrə̄ń kam̄ loo kə́ to ɓōĺ gidə naā tə́ kə loo kə́ karīí.