EJEKIEL 41 - Bibəl ta Sar̄

¹ Gō tə́ anī, deē ní aw̄ seḿ kem kújə́ kə́ bo kə́ tū kújə yā Kɔ́ɔ̄ɓē tə́. Ndogə̄ mbal̄ gə̄ kə́ kadə róbə́ ń deē a aw̄ń kə̄ tū tə́ tə́ ní, nder̄də́ i kíl deē mehḛ́.

² Ta róbə́ ní laan i kíl deē kutə ō, ndogə̄ mbal̄ gə̄ kə́ kadən gə̄ tə́ ní, nder̄də́ i kíl deē mí ō. Kem kújə́ kə́ bo ní, ngālən i kíl deē kutə sɔ́ ō, laan i kíl deē kutə jōó ō.

³ Gō tə́ anī, deē ní udə aw̄ kem kújə́ kə́ geleé tə́ tə́. Ni mbɔ̄jə́ ta róbə́ kə́ yā kudəń kə̄ kemeé, anī ta róbə́ ní ɗúun i kíl deē jōó ō, laan i kíl deē mehḛ́ ō, ndogə̄ mbal̄ kə́ tū tə́ gə̄ ní, nder̄də́ i kíl deē sīrí ō.

⁴ Gō tə́ anī ni mbɔ̄jə́ kem kújə nəkɔ́ ō. Laan gē ngālən gē asən̄ naā, adə̄ i kíl deē kutə jōó mbak. Ni ədam̄ na: Loo ń toō i loo kə́ táĺ ngá̰ý.

Kújə́ kə́ rang gə̄ kə́ kadə kújə yā Kɔ́ɔ̄ɓē tə́

⁵ Deē ní mbɔ̄jə́ ndogə̄ mbal̄ kə́ kem kújə yā Kɔ́ɔ̄ɓē tə́. Nderə̄n i kíl deē mehḛ́. Rāān̄ kújə gə̄ kə gō kadaá adə̄ gīr̄ gidə. Laadə́ i kíl deē sɔ́.

⁶ Kújə gə̄ ní ndin̄ dɔ naā tə́ mətá mətá kum kə̄ dɔɔ́ ō, kújə́ kə́ kadə tə́ gə̄ ní, kemdə́ i kutə mətá kə dɔdə́ gēé ō. Kem kújə gə̄ ní kógə̄ḿ kógə̄ḿ ní, rāān̄ núsə́də́ i tū ndogə̄ mbal̄ kə́ ndágá tə́, banī rāān̄də́ i tū ndogə̄ mbal̄ yā kújə yā Kɔ́ɔ̄ɓē nəkɔ́ tə́ alé.

⁷ Kújə gə̄ ń ra gīrə̄n̄ gidə kújə yā Kɔ́ɔ̄ɓē ní, kem ngé kə́ dɔɔ́ gə̄ bo tɔȳ kem ngé kə́ gíŕdə́ gə̄ tə́. Tām̄ kemdə́ gə̄ ní udən̄ tū ndogə̄ mbal̄ tə́. I tām̄ najə̄ ń noō tə́ n kem kújə́ kə́ dɔɔ́ i ngá̰ý tɔȳ kem kújə́ kə́ gírí ní. Ré deē ra kem kújə́ kə́ gírí nang tə́ kə́ ta kəga dɔ tə́ anī, kɔ́ɔ̄ asə kaw̄ kemən kə́ dɔɔ́ kə́ nge ko̰ jōó tə́ ō, kemən kə́ dɔɔ́ kə́ nge ko̰ mətá tə́ ō.

⁸ Loo kə́ gīr̄ gidə Kújə yā Kɔ́ɔ̄ɓē ní, ngālən kum kə̄ dɔɔ́ i kíl deē mehḛ́.

^9-10 Ndogə̄ mbal̄ kə́ ndágá gidə kújə gə̄ kə́ kadə kújə yā Kɔ́ɔ̄ɓē tə́ ní, nderə̄n i kíl deē mí. Dɔ dáń kújə yā Kɔ́ɔ̄ɓē tə́ ō kújə́ kə́ rang gə̄ tə́ ō ń ndə̄nān̄ kújə yā Kɔ́ɔ̄ɓē ní, ndágə loo kə́ karī kə́ ngālən i kíl deē kutə jōó i tū tə́. Ndágə loo ní gīr̄ gidə kújə yā Kɔ́ɔ̄ɓē.

¹¹ Ta róbə gə̄ i jōó n deē a teēń kem kújə gə̄ kə́ kadə kújə yā Kɔ́ɔ̄ɓē tə́ yā kəngeń ndágə loo kə́ karī ngeé ń toō ní: Kógə̄ḿ i dām̄ mbɔ́r ɓē kə́ ko̰ó̰ tə́ ō, kə́rēý i dām̄ mbɔ́r ɓē kə́ geleé tə́ ō. Ndogə̄ mbal̄ ń gīr̄ gidə ndágə loo ngeé ń noō ní, nderə̄n i kíl deē mí.

¹² Ré deē ra kújə yā Kɔ́ɔ̄ɓē tə́ anī, kújə́ kógə̄ḿ ra kə̄ dām̄ kə́ no ɓē tə́. Kújə́ ní ran̄ sɔɔ̄n̄ ta naā kə ndágə loo kə́ karīí. Ngālən i kíl deē kutə sīrí ō, laan i kíl deē kutə ndōhó ō. Ndogə̄ mbal̄ yān gə̄ ní nder̄də́ i kíl deē mí.

¹³ Deē ní mbɔ̄jə́ kújə yā Kɔ́ɔ̄ɓē, anī ngālən i kíl deē ɓú. Ndágə loo kə́ to karī ō, kújə́ kə́ no ɓē tə́ ō, ndogə̄ mbal̄ yān gə̄ ō ní, ngāl̄də́ malang i kíl deē ɓú ō.

¹⁴ Dām̄ kújə yā Kɔ́ɔ̄ɓē kə́ dām̄ gír ɓē tə́ ō, ndágə loo kə́ karī gə̄ ń ran̄ dām̄ kadən gə̄ tə́ ō ní, laadə́ malang i kíl deē ɓú.

¹⁵ Kújə́ ń ra gidə kújə yā Kɔ́ɔ̄ɓē tə́ ní, deē ní mbɔ̄jə́ ngālən ō. Naā tə́ kə róbə gə̄ kə́ yā mānəń gə̄ ń kógə̄ḿ i dām̄ kə́rēý tə́ ō, kə́rēý i dām̄ kə́rēý tə́ ō ní ɓáa, ngālən i kíl deē ɓú. Ngōn̄ kújə́ kə́ ta róbə́ tə́ ō, kem kújə́ kə́ bo ō, kem kújə́ kə́ geleé ō ní, utə̄n̄ gidədə́ i kə kāgāá.

Kem kújə yā Kɔ́ɔ̄ɓē

¹⁶ Kāgə̄ ta ko̰rō̰ kújə gə̄ ō, róbə́ kə́ yā mānəń gə̄ ō ń ton̄ kə gō gidə looó kem kújə́ kə́ mətá gə̄ ń ndin̄ dɔ naā tə́ ta kaw̄ dɔɔ́ tə́ ní, utə̄n̄ gidədə́ kə kāgāá ō. Loo i kāgə̄ malang, əla gír nang tə́ bátə́ ugə̄ń tū ko̰rō̰ kújə gə̄ tə́. Ko̰rō̰ kújə gə̄gē utə̄n̄ gidə kɔ̄ɔ́ kə kāgə̄ kə́ laa mbé mbé.

¹⁷ Súūn̄ kāgə̄ bɔr gə̄ kə́ tū kújə yā Kɔ́ɔ̄ɓē tə́ malang, gidə tə́ ndágá ō, kemeé ō. Əlan̄ gír i ta kújə́ kə́ yā kudəń kə̄ kemeé tə́, bátə́ kem kújə́ kə́ gə́lé tə́ tə́.

¹⁸ De kə́ dɔ rā̰ tə́ gə̄ ń rīdə́ na i Serubḛ gə̄ ní, tɔ́sə̄n̄ yá̰a̰ kum gotədə́ ō, tɔ́sə̄n̄ yá̰a̰ kum gotə ta jī kāgə̄ túmbur gə̄ ō. Ngáńdáńg ní ré Serubḛ gə̄ i jōó anī, ta jī kāgə̄ túmbur i kógə̄ḿ dandə́ tə́. Serubḛ gə̄ kógə̄ḿ kógə̄ḿ ní, ta kumdə́ i jōó jōó.

¹⁹ Ta kumən kə́ to tītə̄ ta kum deē i kə́ tūr̄ kum kə̄ rɔ̄ ta jī kāgə̄ túmbur kógə̄ḿ tə́ ō, kə́ to tītə̄ ta kum ɓɔl i kə́ tūr̄ kum kə̄ rɔ̄ ta jī kāgə̄ túmbur kə́ noō tə́ ō. Yá̰á̰ kə́ tɔ́sə̄ gə̄ ń noō ton̄ kə gō gidə kújə yā Kɔ́ɔ̄ɓēé.

²⁰ Serubḛ gə̄ ō, ta jī kāgə̄ túmbur gə̄ ō ní, i kə́ rāān̄də́ tū ndogə̄ mbal̄ gə̄ tə́. Əlan̄ gír i nang tə́ bátə́ dɔ ta róbə gə̄ tə́ dɔɔ́.

²¹ Ta róbə́ kə́ yā kudəń kə̄ kem kújə́ kə́ bo tə́ ní, ngāl̄ kāgə̄ tan gə̄ ō, laa kāgə̄ tan gə̄ ō asən̄ naā. Yá̰á̰ kógə̄ḿ kə́ to tītə̄ loo tun̄ yá̰á̰ kə́ rāā kə kāgāá i ta loo kə́ táĺ tə́.

²² Ngālən kə́ kə̄ dɔɔ́ i kíl deē mətá ō, laan i kíl deē jōó ō. Kílən gə̄ ton̄ ō, gír gisən kə́ kadə̄ əhɔn dɔɔ́ to ō, rāān̄ kadən gə̄ i kə kāgāá ō. Deē ní ədam̄ na: I tábəl kə́ əndān̄ no Kɔ́ɔ̄ɓē tə́.

²³ Kújə yā Kɔ́ɔ̄ɓē ō, loo kə́ táĺ ō ní, ta róbə yādə́ i jōó. Ta róbə́ kə́ kógə̄ḿ i yā kaw̄ń kə̄ kem kújə́ kə́ bo tə́ ō, kə́rēý i yā kaw̄ń kə̄ loo kə́ táĺ tə́ ō.

²⁴ Ta róbə gə̄ ní bápə tadə́ i jōó jōó.

²⁵ Rāān̄ Serubḛ gə̄ ō, ta jī kāgə̄ túmbur gə̄ ō tū ta róbə gə̄ kə́ yā kudəń kə̄ kem kújə́ kə́ bo tə́ tə́, tītə̄ ń rāānəń kadə ndogə̄ mbal̄ gə̄ tə́ ní. Gidə tə́ ndágá ɓáa əndān̄ kāgə̄ ta róbə́ kújə́ tə́ ta tə́ dɔɔ́.

²⁶ Ko̰rō̰ kújə gə̄ kə́ tə́lan̄ yḛngəre tū tə́ gə̄ ō, yá̰á̰ súū yá̰a̰ gə̄ kə́ ɔsən̄ i kum gotə ta jī kāgə̄ túmbur gə̄ ō, ton̄ dɔ ndogə̄ mbal̄ gə̄ kə́ ta róbə́ kə́ yā kudəń kə̄ kemeé tə́ tə́.