EJEKIEL 4 - Bibəl ta Sar̄

Nə́ɓā gān̄g sarya dɔ ɓē kə́ Jerusalem tə́ ( 4—24 ) Ejekiel ō, ɓē kə́ Jerusalem kə́ a ənīnən̄ rɔ̄ɔ̄ ō

¹ Kɔ́ɔ̄ɓē ədam̄ ɓáý to̰ na: Ḭ̄ ngōn̄ deē, ún bəríkə kógə̄ḿ ə̄ndā nang tə́ noí tə́, ī-rāā yá̰á̰ kə́ to tītə̄ ɓē beé dɔ tə́. Ɓē ní i kum gotə ɓē kə́ Jerusalem.

² Gō tə́ anī ɔ́jə kadə̄ madə̄ ba̰ā̰ gə̄ gīrə̄n̄ gidən. Ī-ndēr̄ bəlo gə̄ kə́ yā rɔ̄ɔ̄nəń ō, ɔ́ý nán̄g kə̄ nja ndogə̄ mbal̄ tə́ ādə̄ ra dɔ naā tə́ bing yā kənīnəń rɔ̄ɔ̄ ō, ī-tə́ndā gérger gə̄ kə yá̰a̰ rɔ̄ɔ̄ gə̄ ādə̄ gīrə̄n̄ gidən ō.

³ Gō tə́ anī ún gində̄ kə́ laa kógə̄ḿ ə̄ndā tītə̄ ndogə̄ gində̄ beé, dɔ dáńsí tə́ kə ɓē ní. Ə̄ndā kumií dɔ ɓē tə́ á̰a̰n sew: Ni i kə́ ənīnən̄ rɔ̄ɔ̄. I ḭ̄ n ə̄nīn rɔ̄ɔ̄ ní. Yá̰á̰ ń ī-rāā noó i yá̰á̰ kə́ yā tāań ngán Israel gə̄.

⁴ Ī-to dɔ jīí kə́ geleé tə́. Kum mbang malang ń ā ī-toń dɔ jīí kə́ geleé tə́ ní, ún i yá̰a̰ rāā kə́ gōtə́ aĺ gə̄ yā ɓē ko̰o̰ kə́ Israel tə́ dɔí tə́ ō, ī-tə́gā taí i gír kɔȳn tə́ ō.

⁵ m̄-mērī rāā yá̰á̰ ń noō kadə̄ asə ndɔ̄ kóndóńg wań. Ndɔ̄ gə̄ ní a asən̄ naā kə kutə ɓāl̄ gə̄ ń ɓē ko̰o̰ kə́ Israel tə́ rāań majaĺ ní. Adə̄ ā ī-tə́gā taí gír kɔȳ yá̰a̰ rāān kə́ gōtə́ aĺ gə̄ tə́ bátə́ ndɔ̄ ɓú mətá kə kutə ndōhó.

⁶ Dan ń ndɔ̄ gə̄ ní a təgān̄ anī, ā ī-to dɔ jīí kə́ ko̰ó̰ tə́ ba ā ə̄tō yá̰a̰ rāā kə́ gōtə́ aĺ gə̄ yā ɓē ko̰o̰ kə́ Juda ń i yá̰á̰ kə́ ɔy ní ndɔ̄ kutə sɔ́, ɓāl̄ gə̄ malang ń Juda rāań majaĺ ní, m̄-gān̄g kógə̄ḿ dɔí tə́ kə dɔ ɓāl̄ kógə̄ḿ gə̄.

⁷ Gō tə́ anī ə̄ndā kumií dɔ ɓē kə́ Jerusalem ń ənīnən̄ rɔ̄ɔ̄ ní tə́ ō, ī-sə́ra jīí kə́ to karī kanjə̄ kūbə̄ kum kə̄ dɔ tə́ ō, ɔ̄r̄ najə̄ kə ɓē ní ādə̄m̄.

⁸ Kum mbang malang ń ā ɔ̄rəń najə̄ kə́ yā rɔ̄ɔń kə ɓē kə́ Jerusalem ní, mā m-ā m̄-tó̰ō̰ī kə kəlaá yā kadə̄ ásə tūr̄ rɔ̄í dām̄ kə́ rang tə́ alé.

⁹ Ɔ́ý gémē ō, kōō ɔ́rjə ō, mənjo ō, kum la̰tíi ō, tḛ̄ȳ ō, gémē kə́ ngan̄g ō, ī-ɓōkə́də́ gō naā tə́ kem səmbē kə́ kógə̄ḿ beē tə́ ō, ba ī-rāā mápá tə́. Nge ń noō i yá̰a̰ kəsa yāí kə́ kem ndɔ̄ 390 ń ā ī-toń dɔ jīí kógə̄ḿ ní tə́.

¹⁰ Yá̰á̰ ń ā ə́sá ní a asə kem lāngá kə́ dūú kógə̄ḿ kə dɔ ndɔ̄ gə̄. Yá̰á̰ ń kadə̄ ā ə́sa yā ndiń bátə́ ndɔ̄ kə́ rang tə́ ní n noó.

¹¹ Ā ā̰ȳ man̄, ba ā ī-mbɔ̄jə́ man̄ ní i kem lítər kógə̄ḿ tá ā ā̰ȳ kə dɔ ndɔ̄ gə̄.

¹² Yá̰á̰ ń ā ə́sá ní a to tītə̄ makəla kōō ɔ́rjə beé. Ā ɔ̄r̄ makəla ní i ta kum de gə̄ tə́ malang, dɔ hor kə́ rāā kə yedə̄ de gēé tə́.

¹³ Kɔ́ɔ̄ɓē əda ɓáý to̰ na: Israel gə̄ a əsan̄ yá̰á̰ kə́ yḛr dan nápar de gə̄ ń m-ā m̄-tə̄ndā m̄-tḭ̄ḭ̄də́ dandə́ tə́ ní i tītə̄ ń noō.

¹⁴ Loo ń noō tə́ m̄-tél m-ə́da na: Kɔ́ɔ̄ɓē Nə́ɓā, m̄-tél de kə́ yḛr nja kógə̄ḿ alé. Əla gíŕ dūúḿ bátə́ ngɔlaā ní, dā̰ kə́ oy, aláa kə́ yá̰a̰ əhɔ rə́yā̰n naā tə́ ní, m-ə́sa aĺ ɓáý. M-ə́la dā̰ kə́ yḛr taḿ tə́ aĺ ɓáý.

¹⁵ Ni-tél ədam̄ na: Beé ɓá, m-ādī ta róbə kadə̄ ī-mbál gír yedə̄ deē kə yedə̄ man̄gá yā rāań hor ndīrəń yá̰a̰ kəsa yāí.

¹⁶ Ni-əda ɓáý to̰ na: Ḭ̄ ngōn̄ deē, ōō! M-ā m̄-rāā kadə̄ yá̰a̰ kəsa ō, man̄ ō i ngá̰ý aĺ kem ɓē kə́ Jerusalem tə́. De gə̄ a mbɔ̄jə́n̄ i yá̰a̰ kəsa ō, man̄ ō adə̄ de gə̄ a ndin̄ i kə sōlōó kə dɔ ndɔ̄ gə̄.

¹⁷ Yá̰a̰ kəsa ō, man̄ ō a gətóon̄. Adə̄ jī de gə̄ a ur̄ wak kɔ̄ɔ́ ō, tɔ́gə́də́ a gətóo sɔɔ̄ń yá̰a̰ rāādə́ kə́ gōtə́ aĺ gə̄ ō.