EJEKIEL 39 - Bibəl ta Sar̄

Əlan̄ ɓōĺ kem Gog tə́ ɓáý to̰

¹ Kɔ́ɔ̄ɓē ədam̄ na: Ḭ̄ ngōn̄ deē, ɔ̄r̄ najə̄ kə Gog ādə̄m̄, ī-rɔ̄ɔń seneé ə́dan na: Najə̄ ń Kɔ́ɔ̄ɓē Nə́ɓā əda ní n toó: Ḭ̄ Gog, ḭ̄ ń i ngār kə́ bo yā gír de gə̄ kə́ Mesek ō, Tubal ō ní, m-ā m̄-rāā yá̰á̰ kə́ tōr̄ seí.

² Ɓē yāí ń ndi ta ngóy ɓē tə́ dām̄ mbɔ́r ɓē kə́ ko̰ó̰ tə́ ní, m-ā m̄-rāāī kadə̄ ā ī-teē kɔ̄ɔ́ kemeé. M-ā m̄-rā seí gúu kadə̄ ā ī-teē kɔ̄ɔ́ kemeé yā kaw̄ kənī mbal̄ bo gə̄ kə́ Israel tə́ rɔ̄ɔ̄.

³ Gō tə́ anī m-ā m-ə́ndaī: M-ā m̄-tetə ga̰ gərā yāí kə́ jī gelií tə́ kɔ̄ɔ́ ō, m-ā m̄-rāā kum gərā yāí gə̄ kə́ jī ko̰í tə́ kadə̄ teē tə́sōn̄ nang tə́ kɔ̄ɔ́ ō.

⁴ Ḭ̄ ō, ngé rɔ̄ɔ̄ yāí gə̄ malang ō, de kə́ ngá̰ý gə̄ ń ɓoon̄ rɔ̄də́ tū yāí tə́ ní ō, ā óyiī dɔ mbal̄ gə̄ kə́ Israel tə́. M-ā m-ə́ya̰ mbal̄ gə̄ ō, dā̰ kə́ bembeé gə̄ ō, kadə̄ əsan̄ nīńsí.

⁵ Ā óy bembeé tītə̄ ń m-ə́dań ní. I mā Kɔ́ɔ̄ɓē Nə́ɓā m-ə́da najə̄ ń noō ní.

⁶ M-ā m-ə́la hor dɔ ɓē yā Magog tə́ ō, dɔ ɓē yā de gə̄ ń ndin̄ kə̄ dɔ dor̄ loo gə̄ tə́ á gírə̄n̄ kadə̄ yá̰á̰ kógə̄ḿ na a rāādə́ aĺ ní ō. Loo ń noō tə́ nin̄ a gerə̄n̄ kadə̄ Kɔ́ɔ̄ɓē i mā.

⁷ M-ā m̄-rāā Israel gə̄ ń i gír deē yāḿ gə̄ ní kadə̄ a gerə̄n̄ kadə̄ mā i de kə́ táĺ ngá̰ý. M-ā m-ə́ya̰ kadə̄ deē kídə̄ rīḿ kə́ táĺ to̰ alé, adə̄ nápar de gə̄ a gerə̄n̄ kadə̄ Kɔ́ɔ̄ɓē, Nə́ɓā kə́ táĺ kə́ Israel tə́ i mā.

⁸ A̰á̰ā̰, yá̰a̰ gə̄ ń noō a reēn̄, nin̄ əlan̄ gír rāā yá̰a̰ kɔ̄ɔ́ ɓá. I ndɔ̄ sarya ń m-ə́da najə̄n kété ní. I mā Kɔ́ɔ̄ɓē Nə́ɓā n m-ə́da najə̄ ń noō ní.

⁹ Israel gə̄ a teēn̄ kem ɓē yādə́ gə̄ tə́ kɔ̄ɔ́. Nin̄ a rāān̄ hor kógə̄ḿ, a əlan̄ hor dɔ yá̰a̰ rɔ̄ɔ̄ gə̄ yā madə̄ ba̰ā̰də́ gə̄ tə́. Der gə̄ malang, kə́ dūú gē kə́ bo gē, ga̰ gərā gə̄ ō, kum gərā gə̄ ō, kaskar gə̄ ō, nənga gə̄ ō, yá̰a̰ gə̄ malang ń noō ní, a əlan̄ hor dɔ tə́ ɓāl̄ sīrí.

¹⁰ Nin̄ a sāān̄ kīr̄ bembeé to̰ aĺ ō, a tə́gān̄ kīr̄ kem ku gə̄ tə́ to̰ aĺ ō. Tɔdɔ̄ nin̄ a rāān̄ hor i kə yá̰a̰ rɔ̄ɔ̄ gə̄ ń noō. Nin̄ a ɓogən̄ ngé gə̄ ń ɓogən̄də́ nin̄ kété ní ō, ngé gə̄ ń kété ɔyn̄ yá̰a̰ yādə́ nin̄ dɔ gúú tə́ ní, nin̄ a ɔyn̄ yá̰a̰ yādə́ dɔ gúú tə́ ō. I mā Kɔ́ɔ̄ɓē Nə́ɓā n m-ə́da najə̄ ń noō.

¹¹ Kum mbang ngeé ń noō tə́ ní, m-ā m-ādə̄ Gog loo, loo ngeé ń noō tə́ kadə̄ dubə̄nən̄ tū tə́ dɔ nang kə́ Israel tə́. I kem wól loo ń rīn na i Ngé mān̄ róbə gə̄ ní tə́. Ré deē ra bā bo tə́ anī, loo ní i kə̄ dām̄ kə́ gír ɓē tə́ ō, bəlo ɓádə́ ní a ɔgə̄ ngé mān̄ róbə gə̄ mān̄ ō. A dubə̄n̄ Gog ō, ngé rɔ̄ɔ̄ yān gə̄ malang ō, i loo ngeé ń noō tə́. A əndān̄ rī loo ní na i Wól loo yā Kósə de gə̄ yā Gog.

¹² Israel gə̄ a dubə̄n̄ áskar gə̄ malang bátə́ nāā sīrí ō, i tītə̄ ń noō n nin̄ a rāānəń kadə̄ ɓē unjə̄ njáý njáý ní ō.

¹³ De gə̄ malang kə́ gō nang ngeé ń noō tə́ a rāān̄ kəla ngeé ń noō ō, rɔ̄də́ a nel̄də́ ngá̰ý najə̄n tə́ ndɔ̄ ń m-ā m-ɔ́jəńdə́ kɔsə gɔn yāḿ tə́ ní ō. Najə̄ ń mā Kɔ́ɔ̄ɓē Nə́ɓā m-ə́dá ní n noó.

¹⁴ Gō nāā kə́ sīrí gə̄ ngeé ń noō tə́ ní, a gə̄rān̄ de kə́ dəngam gə̄ kə́ kadə̄ nin̄ a unən̄ kum mbang yādə́ malang yā njə̄rań kem ɓēé. Nin̄ a ndəlen̄ nīń gə̄ ń ton̄ dɔ nang tə́ ɓáý ní yā dubə̄ kɔ̄ɔ́. I tītə̄ ń noō n nin̄ a rāānəń kadə̄ ɓē unjə̄ njáý njáý ní.

¹⁵ Nin̄ a dáȳn̄ kem ɓēé, a aw̄n̄ ō a télən̄ ō. Dan ń deē kógə̄ḿ a ənge kə̄ngā de gə̄ anī, kɔ́ɔ̄ a ɔsə dɔ kɔkərɔ gə̄ kə̄ naā tə́ kadə tə́ yā kadə̄ deē gerə̄ń. Loo ń noō tə́ ngé ndēr̄ bəlo gə̄ a reēn̄ yā kɔy kə̄ngā gə̄ ní, yā kaw̄ dubə̄ loo ń a ɓārə́n̄ na i wól loo yā kósə de gə̄ yā Gog ní tə́.

¹⁶ Ɓē kógə̄ḿ a to, rī ɓē ní na i Hamona, kumən na i kósə de gə̄. Ta tɔ̄l̄ ta anī ɓē a unjə̄ njáý njáý.

¹⁷ Kɔ́ɔ̄ɓē Nə́ɓā ədam̄ ɓáý to̰ na: Ḭ̄ ngōn̄ deē, najə̄ ń m-ə̄ndā taí tə́ ní, ə́da yel̄ kə́ tayā tayā gə̄ malang ō, dā̰ kə́ bembeé gə̄ ō, ādə̄m̄. Ə́dádə́ na: Ī-teēī kə̄ ta loo gə̄ tə́ ī-reē ɔ́siī dɔsí naā tə́, kadə̄ ə́ngeī kum yāsí tū yá̰á̰ ń m-ā m̄-rāā yā tun̄ tām̄ yāsí tə́ ní. Yá̰a̰ tun̄ kə́ bo a to ndɔ̄ ń noō tə́ dɔ mbal̄ bo kə́ Israel tə́ tə́. Ā ə́saī dā̰ ō, ā ā̰yī mósə ō.

¹⁸ Ā ə́saī nīń go̰ rɔ̄ɔ̄ gə̄ ō, ā ā̰yī mósə ngār gə̄ kə́ dɔ nang tə́ laā ō. Nin̄ i yá̰á̰ kə́ tun̄ kum gotə bal batə̄ gə̄ ō, ngán batə̄ gə̄ ō, bal bə̄yā̰ gə̄ ō, kum gotə ngán man̄g kə́ yḛmbə gə̄ kə́ Basan ō.

¹⁹ Ā ásiī kəsa yibə̄ dā̰ tītə̄ ń kemsí ndigə ní ō, ka̰ȳ mósə batə̄ kadə̄ rāāsí ō. Yá̰á̰ ń m̄-tun̄ tām̄ yāsí tə́ ní n noó.

²⁰ Loo yá̰a̰ kəsa kə́ ngá̰ý ngeé ń noō tə́ ní, ā ə́saī yá̰a̰ tītə̄ ń kemsí ndigə ní. Ā ə́saī sə́nda gə̄ ō, ngé kal̄ sə́nda gə̄ ō, áskar gə̄ ō, ngé rɔ̄ɔ̄ kə́ tayā tayā gə̄ ō. Najə̄ ń mā Kɔ́ɔ̄ɓē Nə́ɓā m-ə́dá ní n noó.

²¹ M-ā m-ɔ́jə́ nápar de gə̄ kɔsə gɔn yāḿ. Nin̄ malang a a̰a̰n̄ loo kun ń m-ā m-úń tɔ́gə́ḿ yā rāań yá̰á̰ ń m-ə́da m̄-gāngəń sarya ní.

²² Əla gír kum mbang ngeé ń noō tə́ ní, Israel gə̄ a gerə̄n̄ kadə̄ Kɔ́ɔ̄ɓē, Nə́ɓā yādə́, i mā.

Najə̄ kə́ bo bo gə̄ kə́ tū najə̄ kɔr̄ Ejekiel tə́

²³ Nápar de gə̄ a gerə̄n̄ kum yá̰á̰ ń toō: Ɔyn̄ Israel gə̄ aw̄n̄ sedə́ dɔ ɓē kə́ rang tə́ dɔ gúú tə́ i najə̄ yá̰a̰ rāādə́ kə́ gōtə́ aĺ tə́, tɔdɔ̄ nin̄ ran̄ dɔ ndūdə́ tə́ seḿ mā Kɔ́ɔ̄ɓēé alé. I tām̄ najə̄ ń toō tə́ n m̄-tūr̄ gidəḿ tadə́ tə́ kɔ̄ɔ́ ní. M-ə́yá̰də́ kem jī madə̄ ba̰ā̰də́ gə̄ tə́, adə̄ nin̄ tɔ̄lə̄n̄də́ kɔ̄ɔ́ malang ta rɔ̄ɔ̄ tə́.

²⁴ m̄-tūr̄ gidəḿ kɔ̄ɔ́ tadə́ tə́ ō, yá̰á̰ ń m̄-rāā sedə́ ní sɔɔ̄ń i dɔ yá̰a̰ rāādə́ kə́ yḛr gə̄ ō, yá̰a̰ rāādə́ kə́ gōtə́ aĺ gə̄ ō.

²⁵ I beé ní, yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Əla gír ngɔlaā ní, kumḿ a o̰o̰m̄ tām̄ yā Israel gə̄ tə́, kumḿ a o̰o̰m̄ tām̄ yā ngé gə̄ ń Jakob ojədə́ ní tə́. M-ā m̄-tél kə dəngáy yādə́ gēé yā reē sedə́ gogə́ ō, m-ā m̄-rā kə de gə̄ malang ta ɓōĺ gidə rīḿ kə́ táĺ ō.

²⁶ Loo ń noō tə́ dɔdə́ a ndígə̄nal rɔ̄də́ ń sɔl̄də́ ní ō, ra ń nin̄ ran̄ dɔ ndūdə́ tə́ seḿ māá aĺ ní, dɔdə́ a ndígə̄nal malang kɔ̄ɔ́ ō. Nin̄ a ndin̄ dɔ nang yādə́ tə́ kanjə̄ sōl̄ yá̰á̰ kógə̄ḿ ō, de kə́ yā rāādə́ kadə̄ nin̄ ndewn̄ ndew ɓōĺ to̰ ní a gətóo ō.

²⁷ M-ā m̄-rāādə́ kadə̄ a teēn̄ kɔ̄ɔ́ kem ɓē yā madə̄ ba̰ā̰də́ gə̄ tə́ ō, m-ā m-ɔ́sə dɔdə́ naā tə́ yā tél kaw̄ sedə́ gogə́ ɓēé loodə́ ō. M-ā m-úńdə́ yā kɔjəń nápar de gə̄ ngá̰ý kadə̄ mā i Nə́ɓā kə́ táĺ.

²⁸ Dan ń mā m-ɔ́sə dɔ Israel gə̄ kə̄ naā tə́ dɔ nang yādə́ tə́ anī, m-ā m-ə́ya̰ deē kógə̄ḿ kadə̄ na̰y kem ɓē gə̄ ń m̄-tə̄ndā m̄-tḭ̄ḭ̄də́ tū tə́ ní tə́ alé. Kum mbang ngeé ń noō tə́ ní, Israel gə̄ a gerə̄n̄ kadə̄ Kɔ́ɔ̄ɓē, Nə́ɓā yādə́, i mā.

²⁹ Israel gə̄ ń i gír deē yāḿ gə̄ ní, m-ā m-ādə̄də́ ndílə́ḿ ō, m-ā m̄-tūr̄ gidəḿ kɔ̄ɔ́ tadə́ tə́ to̰ aĺ ō. Najə̄ ń Kɔ́ɔ̄ɓē Nə́ɓā əda ní n noó.