EJEKIEL 37 - Bibəl ta Sar̄

Ejekiel a̰a̰ kə̄ngā kə́ tutə kɔ̄ɔ́ gə̄

¹ Kɔ́ɔ̄ɓē əhɔm̄ kə tɔ́gəneé. Ndílən aw̄ seḿ, adə̄ m-á̰a̰ rɔ̄ḿ i kem wól loo kógə̄ḿ kə́ kə̄ngā taān̄ loo tū tə́ tə́.

² Kɔ́ɔ̄ɓē rāā adə̄ m̄-njə̄rā m̄-gīr̄ gidə loo ní. Kə̄ngā gə̄ ní i ngá̰ý ō, tutən̄ malang ō.

³ Tā anī Kɔ́ɔ̄ɓē dəjem̄ najə̄, əda na: Ḭ̄ ngōn̄ deē, kə̄ngā gə̄ ń noō asən̄ tél ndi kə kumdə́ gogə́ a, ə́dam̄. Anī m̄-téĺ m-ə́dan na: Kɔ́ɔ̄ɓē Nə́ɓā, i ḭ̄ n ī-ger̄ ní!

⁴ Loo ń noō tə́ ni ədam̄ na: Ɔ̄r̄ najə̄ kə kə̄ngā gə̄ ń noō tītə̄ nge koō ta kógə̄ḿ ə́dádə́ na: Sḭḭ̄ ń i kə́ tutə kɔ̄ɔ́ gə̄ ní, ōōī najə̄ yā Kɔ́ɔ̄ɓē!

⁵ Najə̄ ń Kɔ́ɔ̄ɓē Nə́ɓā ədasí ní n toó: M-ā m̄-rāā kadə̄ koō kógə̄ḿ kə́ a rāā deē kadə̄ ndi kə kumneé reē kemsí tə́, adə̄ ā ī-ndiī kə kumsí.

⁶ M-ā m̄-rāā ngərasí gə̄ kadə̄ ton̄ rɔ̄sí tə́ ō, m-ā m̄-rāā dā̰sí gə̄ kadə̄ ton̄ gidəsí gə̄ tə́ ō, m-ā m-ūtə̄ gidəsí kə ndāŕ ō. M-ā m-ə́la koō kə́ rāā deē kadə̄ ndi kə kumneé kemsí tə́ adə̄ ā ī-ndiī kə kumsí. Loo ń noō tə́ ā ī-gerī kadə̄ Kɔ́ɔ̄ɓē i mā.

⁷ I Kɔ́ɔ̄ɓē n əndā najə̄ gə̄ ń noō taḿ tə́ kadə̄ m-ə́dá ní, kə gō ń ni mēr̄məń kəda ní. Dan ń m-ā m-ɔ̄r̄ najə̄ kə̄ taḿ tə́ ɓáý anī, m-ōō kōō yá̰á̰ kógə̄ḿ ɓār̄ ngá̰ý, i kōō yá̰a̰ gə̄ kə́ a ndɔ́tə̄n̄. Kə̄ngā gə̄ a ndɔ́tə̄n̄ i kə̄ rɔ̄ naā tə́.

⁸ M-á̰a̰ kə̄ngā gə̄ ní anī, ngəra gə̄ i dɔ kə̄ngā gə̄ ní tə́. Gō tə́ anī dā̰ to gidə kə̄ngā gə̄ ní tə́ ō, ndāŕ utə̄ gidədə́ ō. Banī koō kə́ a rāā kadə̄ deē ndi kə kumneé gətóo kemdə́ tə́.

⁹ Anī Kɔ́ɔ̄ɓē ədam̄ na: Ḭ̄ ń i ngōn̄ deē ní, ɔ̄r̄ najə̄ kə koō kə́ nge rāā kadə̄ deē ndi kə kumneé ādə̄m̄, ə́dan na: Koō kə́ nge rāā kadə̄ deē ndi kə kumneé, najə̄ ń Kɔ́ɔ̄ɓē Nə́ɓā əda ní n toó: Ḭ́ḭ dām̄ mbɔ́r ɓē kə́ ko̰ó̰ tə́ ō, geleé tə́ ō, gír ɓē tə́ ō, no ɓē tə́ ō, ī-reē ə́la dɔ de kə́ koy gə̄ ń toō tə́ ādə̄ ndin̄ kə kumdə́.

¹⁰ Najə̄ gə̄ ń toō ń Kɔ́ɔ̄ɓē əndā taḿ tə́ ní, m-ə́da tītə̄ ń ni mēr̄məń kəda ní. Loo ń noō tə́ koō kə́ nge rāā kadə̄ deē ndi kə kumneé udə kem de kə́ koy gə̄ tə́, adə̄ nin̄ tél ndin̄ kə kumuú gogə́. Nin̄ ḭḭ ran̄ dɔɔ́ anī i kósə de kə́ ngá̰ý gə̄.

¹¹ Gō tə́ anī Kɔ́ɔ̄ɓē ədam̄ na: Ḭ̄ ngōn̄ deē, ōō! Kə̄ngā gə̄ ń noō ní ɔsən̄ i kum gotə ngáń Israel gə̄ malang. Israel gə̄ ədan̄ na: Jə-to tītə̄ kə̄ngā kə́ tutə gə̄ beé, kəndā kem dɔ tə́ yājí oy kɔ̄ɔ́, tají tḭ̄ḭ̄ kɔ̄ɔ́!

¹² I beé ní, ə́dádə́ najə̄ ń toō ādə̄m̄: Sḭḭ̄ gír deē yāḿ gə̄, mā Kɔ́ɔ̄ɓē m-ə́dásí najə̄ ń toō: M-ā m̄-teē ta bəlo ɓádə yāsí gə̄ ō, m-ā m̄-rāā kadə̄ ā ī-teēī kɔ̄ɔ́ kemeé ō. M-ā m̄-tél yā kaw̄ sesí gogə́ dɔ nang kə́ Israel tə́.

¹³ Dan ń m-ā m̄-teē ta bəlo ɓádə yāsí gə̄ ō, m-ā m̄-rāāsí kadə̄ ā ī-teēī kɔ̄ɔ́ kemeé ō anī, sḭḭ̄ gír deē yāḿ gə̄, ā ī-gerī kadə̄ Kɔ́ɔ̄ɓē i mā!

¹⁴ M-ā m-ə́lá ndílə́ḿ kemsí tə́, adə̄ ā ī-ndiī kə kumsí. M-ā m-ə̄ndāsí dɔ nang yāsí tə́. Loo ń noō tə́ ā ī-gerī kadə̄ i mā Kɔ́ɔ̄ɓē n m-ɔ̄r̄ najə̄ ní ō, m̄-rāā yá̰á̰ ń m-ə́dá ní ō. Najə̄ ń Kɔ́ɔ̄ɓē əda ní n noó.

Kɔ́ɔ̄ɓē a tél yā ɓoo gír deē yān gə̄ naā tə́ gogə́

¹⁵ Kɔ́ɔ̄ɓē ɔr̄ najə̄ seḿ, ədam̄ na:

¹⁶ Ḭ̄ ngōn̄ deē, ún dugə̄jū kāgə̄ kógə̄ḿ ba ī-ndang najə̄ ń toō dɔ tə́: Juda ō, Israel gə̄ kə́ kem ɓē ko̰o̰ ń toō tə́ ō. Gō tə́ anī, ún dugə̄jū kāgə̄ kə́ rang ba ī-ndang dɔ tə́ na: Jəjep, aláa Epəraim ō, Israel gə̄ kə́ kem ɓē ko̰o̰ ń toō tə́ ō.

¹⁷ Ī-tə́ndā dugə̄jū kāgə̄ gə̄ ní ta naā tə́, ādə̄ tə́lən̄ i dugə̄jū kāgə̄ kə́ kógə̄ḿ beē kem jīí tə́.

¹⁸ De gə̄ kə́ dan gír deē yāí gə̄ tə́ a dəjeīn̄ kadə̄ kə ɔ́jə́də́ kum yá̰á̰ ń noō.

¹⁹ Anī, ī-téĺ ə́dádə́ na mā Kɔ́ɔ̄ɓē Nə́ɓā m-ə́dádə́ yá̰á̰ ń toō: M-ā m-ún kāgə̄ ɔsə kum gotə Jəjep ō, Israel gə̄ kə́ kem ɓē ko̰o̰ ń toō tə́ ní ō, yā kəndādə́ naā tə́ kə dugə̄jū kāgə̄ kə́ ɔsə kum gotə ɓē ko̰o̰ kə́ Juda. Nin̄ jōó mbak a télən̄ i dugə̄jū kāgə̄ kə́ kógə̄ḿ beē jīḿ tə́.

²⁰ Ḭ̄ ngōn̄ deē, dugə̄jū kāgə̄ ń ī-ndang yá̰a̰ dɔ tə́ ní, ə́hɔ́də́ jīí tə́ ādə̄ de gə̄ malang a̰a̰n̄.

²¹ Gō tə́ anī ə́dádə́ na: Najə̄ kɔr̄ Kɔ́ɔ̄ɓē Nə́ɓā n toó: Israel gə̄, nápar de gə̄ ń sḭḭ̄ āwī dandə́ tə́ ní, m-ā m̄-teē sesí kɔ̄ɔ́ dandə́ tə́. M-ā m-ɔ́sə dɔsí naā tə́ ō, m-ā m̄-tél yā reē sesí dɔ nang yāsí tə́ ō.

²² M-ā m̄-rāāsí kadə̄ ā ī-téliī nápar de gə̄ kə́ kógə̄ḿ beē gə̄ dɔ mbal̄ gə̄ kə́ Israel tə́ tə́. Sḭḭ̄ malang ní, mban̄g yāsí i kógə̄ḿ beē. Ā ī-rāāī ɓē gír jōó to̰ aĺ ō, ā ī-kēgī naā kem ɓē ko̰o̰ gə̄ kə́ gír jōó tə́ to̰ aĺ ō.

²³ Ā ī-yḛriī rɔ̄sí kə rɔȳ nə́ɓā yāsí kə́ rɔ̄kum aĺ gə̄ to̰ aĺ ō, kə rāā yá̰á̰ kə́ majaĺ ngá̰ý gə̄ to̰ aĺ ō, kə rāā yá̰á̰ kə́ gōtə́ aĺ kə́ tayā tayā gə̄ malang to̰ aĺ ō. Yá̰a̰ gə̄ kə́ ɔjən̄ kadə̄ ī-raī dɔ ndūsí tə́ aĺ gə̄ malang ń ī-rāāī seḿ ní, m-ā m-ɔ̄r̄sí kum tə́ kɔ̄ɔ́. M-ā m̄-rāāsí kadə̄ ā ūnjī njáý njáý. Loo ń noō tə́ sḭḭ̄ i gír deē yāḿ gə̄ ō, mā i Nə́ɓā yāsí ō.

²⁴ Ā ə́ngeī mban̄g kə́ tītə̄ nge kəla yāḿ Dabid beē. I ni kógə̄ḿ beē n i nge kul̄sí malang ní. Ā ī-ɓōlíī gidə ndū najə̄ yāḿ gə̄ ō, ā ī-ngɔ̄mī jī bēl̄ loo rāā yá̰a̰ yāḿ gə̄ ō, ā ī-rāāī yá̰a̰ i kə jī bēl̄ loo rāān yāḿ gə̄ ō.

²⁵ Ā ī-ndiī kem ɓē ń m-ādə̄ nge kəla yāḿ Jakob tə́ ní, loo ń kaasí gə̄ ndin̄ tū tə́ kété tə́ ní. Ā ī-ndiī noó i kə́ njɔ́ḿ gə̄ tə́, sḭḭ̄ gə̄gē, ngáńsí gə̄ gə̄gē, ngán kaasí gə̄ gə̄gē, kaa gugə̄sí gə̄ gə̄gē. Ā ə́ngeī ngār kə́ tītə̄ nge kəla yāḿ Dabid i kə́ njɔ́ḿ gə̄ tə́.

²⁶ M-ā m-ə́hɔ madə̄ naā kə́ tām̄ yā lɔm tə́ sesí, ba madə̄ naā ní a to ngándáńg. M-ā m-ə̄ndāsí kem ɓē ń toō tə́ ō, m-ā m̄-rāāsí kadə̄ kutəsí i ngá̰ý ō, m-ā m-ə̄ndā kújə yāḿ dansí tə́ kadə̄ a to ngándáńg ō.

²⁷ M-ā m̄-ndi dansí tə́. Adə̄ mā i Nə́ɓā yāsí ō, sḭḭ̄ i gír deē yāḿ gə̄ ō.

²⁸ Dan ń kújə yāḿ a ra dansí tə́ kə́ njɔ́ḿ gə̄ tə́ anī, nápar de gə̄ a gerə̄n̄ yá̰á̰ ń toō: A gerə̄n̄ kadə̄ Kɔ́ɔ̄ɓē i mā ō, m-ə̄ndā Israel kə rī rāā kəla yāḿ ngándáńg ō.