EJEKIEL 36 - Bibəl ta Sar̄

Israel gə̄ a télən̄ yā taā ɓē yādə́ gogə́

¹ Ngōn̄ deē, najə̄ yā mbal̄ gə̄ kə́ Israel tə́ ń m-ə̄ndā taí tə́ ní, ɔ̄r̄ ngɔlaā. Ī-mēr̄də́ koō najə̄ gə̄ ń mā Kɔ́ɔ̄ɓē Nə́ɓā m-ɔ̄r̄ sedə́ ní.

² Madə̄ ba̰ā̰sí gə̄ lurən̄ loo ədan̄ na: Haw! Mbal̄ bo kə́ jóo gə̄ kə́ Israel tə́ i yājí ngɔlaā!

³ I beé ní, ḭ̄ ngōn̄ deē, najə̄ ń m-ə̄ndā taí tə́ ní, ə́dá Israel gə̄, najə̄ ń mā Kɔ́ɔ̄ɓē Nə́ɓā m-āwń kadə̄ m-ə́dádə́ ní n toó. De gə̄ teēn̄ kə̄ ta loo gə̄ tə́ malang ndigən̄ nujəsí kɔ̄ɔ́ ō, ndigən̄ rāāsí kadə̄ ī-gətóoī kɔ̄ɔ́ ō. Nin̄ ndigən̄ kəhɔsí ō, sḭḭ̄ ə̄sōī kem jī nápar de kə́ rang gə̄ tə́ adə̄ o̰o̰n̄ ɓē dɔsí tə́ ō. Nin̄ mbóon̄ sesí ō, tájə̄n̄sí ō.

⁴ I beé ní, sḭḭ̄ mbal̄ bo gə̄ kə́ Israel tə́, ōōī najə̄ kɔrə̄ḿ! Mā Kɔ́ɔ̄ɓē Nə́ɓā, m-ə́da i mbal̄ bo gə̄ ō, ngán mbal̄ gə̄ ō, man̄ dɔ mbal̄ gə̄ ō, wól loo gə̄ ō. M-ə́da i loo kə́ nujə sák sák kə́ to dɔ naā tə́ bing gə̄ ō, ɓē bo gə̄ kə́ de gə̄ əya̰n̄ kɔ̄ɔ́ gə̄ ō. Nápar de kə́ rang gə̄ ń ndin̄ gīrə̄n̄ gidə ɓē bo gə̄ ngeé ń toō ní, ɔyn̄ yá̰a̰ kənge kə́ kemeé gə̄ kɔ̄ɔ́ dɔ gúú tə́ ō, tájə̄n̄ ɓē bo gə̄ ní ō.

⁵ A̰á̰ā̰, mā Kɔ́ɔ̄ɓē Nə́ɓā, kem hor wōn̄g yāḿ kə́ ngá̰ý tə́ ní, m-ə́da kadə̄ i rɔ̄kum, m-ɔ̄r̄ najə̄ m̄-rɔ̄ɔń kə nápar de kə́ rang gə̄ ō, kə Edom kə taá malang ō. Nin̄ taān̄ ɓē yāḿ kə rɔ̄nel̄ kə́ ngá̰ý ō, kə kídə̄ loo kə́ ngá̰ý ō, yā kɔyń yá̰a̰ gə̄ kə́ kem loo gə̄ ń a aw̄n̄ kə yá̰a̰ kul̄ gēé ko̰ó̰ tū tə́ ní tə́.

⁶ Tām̄ najə̄ ń toō tə́ ní, ḭ̄ ngōn̄ deē, ə́da ɓē kə́ Israel najə̄ ń m-ə̄ndā taí tə́ ní. Ā ə́da mbal̄ bo gə̄ ō, ngán mbal̄ gə̄ ō, man̄ dɔ mbal̄ gə̄ ō, wól loo gə̄ ō, na mā Kɔ́ɔ̄ɓē Nə́ɓā m-ā m-ə́ya̰ wōn̄g yāḿ kə́ ngá̰ý dɔɔ́ kadə̄ a rāā kəla. M-ə́dádə́ na: Nápar de gə̄ əlan̄ rɔ̄sɔl̄ dɔsí tə́.

⁷ I beé ní, mā Kɔ́ɔ̄ɓē Nə́ɓā m̄-túbə m-ə́da na: Ta i dɔ nápar de gə̄ ń ndi gīrə̄n̄ gidəsí ní tə́ yā kadə̄ rɔ̄də́ sɔl̄də́!

⁸ Kum mbang ngeé ń noō tə́ ní, kāgə̄ gə̄ kə́ dɔ mbal̄ bo gə̄ kə́ Israel tə́ a tɔ̄ɔ̄n̄ ta jīdə́ gə̄ ō, a anə̄n̄ tām̄ yāsí sḭḭ̄ Israel gə̄ ń i gír deē yāḿ gə̄ ní tə́ ō. Tɔdɔ̄ sḛ́ý laā anī ā ī-téliī yā kaw̄ gogə́ dɔ nang yāsí tə́.

⁹ A̰á̰ā̰, m̄-reē kə̄ rɔ̄sí tə́, m̄-tūr̄ kumḿ kə̄ rɔ̄sí tə́. A télən̄ yā ndɔr̄ dɔ nang yāsí tə́ gogə́ ō, a dubə̄n̄ kōō tū tə́ gogə́ ō.

¹⁰ Dɔ nang kə́ Israel tə́ malang ní, m-ā m̄-rāāsí kadə̄ kutəsí i ngá̰ý. De gə̄ a télən̄ yā ndi kem ɓē bo gə̄ tə́ gogə́ ō, yá̰á̰ ń i kə́ nujə kɔ̄ɔ́ ní, a télən̄ yā rāā gogə́ ō.

¹¹ Kutə de gə̄ gē dā̰ gē a reē ngá̰ý kə̄ dɔ naā tə́ kə̄ loo gə̄ tə́ malang. Ā ójiī ngán gə̄ ō, kutəsí a reē ngá̰ý ō. De gə̄ a ton̄ ngá̰ý kem ɓēé tītə̄ kə́ kété ō, ā ə́ngeī yá̰a̰ tɔȳ kə́ kété ō. Loo ń noō tə́ ā ī-gerī kadə̄ Kɔ́ɔ̄ɓē i mā.

¹² Sḭḭ̄ Israel gə̄ ń i gír deē yāḿ gə̄ ní, m-ā m̄-rāāsí kadə̄ ā ī-njə̄rāī kə̄ loo gə̄ tə́ kem ɓēé. Ā ə́ngeī ɓē ō, ɓē ní ndɔ̄ń tə́ i yāsí ō, ni a tɔ̄l̄ ngáńsí gə̄ to̰ aĺ ō i kə́ bátə́ gə̄ tə́ ō.

¹³ Najə̄ ń mā Kɔ́ɔ̄ɓē Nə́ɓā m-ə́dá ní n toó: De gə̄ ədan̄ na dɔ nang kə́ Israel i dɔ nang kə́ a əsa de kə́ tū tə́ gə̄ ō, i dɔ nang kə́ a tɔ̄l̄ ngán de kə́ tū tə́ gə̄ ō.

¹⁴ I beé ní, dɔ nang kə́ Israel a əsa de kə́ tū tə́ gə̄ to̰ aĺ ō, ngán de kə́ tū tə́ gə̄ ní, ni a tɔ̄l̄də́ to̰ aĺ ō. Najə̄ ń mā Kɔ́ɔ̄ɓē Nə́ɓā m-ə́dá ní n noó.

¹⁵ Ndū gə̄ ń nápar de kə́ rang gə̄ a tájə̄n̄sí ní ō, lur ń nin̄ a lurən̄sí ní ō ní, ā ōōī to̰ alé. Tɔdɔ̄ dɔ nang yāsí a tɔ̄l̄ ngáńsí gə̄ to̰ alé. Najə̄ ń Kɔ́ɔ̄ɓē Nə́ɓā əda ní n noó.

Kɔ́ɔ̄ɓē a ɔsə dɔ Israel gə̄ kə̄ naā tə́

¹⁶ Kɔ́ɔ̄ɓē ɔr̄ najə̄ seḿ, ni ədam̄ na:

¹⁷ Ḭ̄ ngōn̄ deē, ōō! Dan ń Israel gə̄ ndinə̄ń dɔ nang yādə́ tə́ ɓáý ní, nin̄ rāān̄ háĺ kə́ majaĺ rɔ̄kum ō, rāān̄ adə̄ dɔ nang yādə́ tél dɔ nang kə́ yḛr ō. Háĺdə́ yḛr tītə̄ mósə́ kə́ teē rɔ̄ dəyá̰ kə́ mósə əhɔn tə́ beē.

¹⁸ Nin̄ rāān̄ adə̄ dɔ nang téĺ kə́ yḛr, kə ta kūl̄ mósə́ ń nin̄ ɓōkə́n̄ nang tə́ núú ní ō, kə ta kūl̄ nə́ɓā yādə́ kə́ rɔ̄kum aĺ gə̄ ō. I tām̄ najə̄ ń toō tə́ n m̄-bə̄gā wōn̄g yāḿ kə́ ngá̰ý dɔdə́ tə́ ní.

¹⁹ Mā m̄-rāā adə̄ nin̄ aw̄n̄ kə̄ dan nápar de gə̄ tə́, dɔ nang yā tə̄rā gə̄ tə́. Adə̄ m̄-gān̄g sarya dɔdə́ tə́ sɔɔ̄ń i háĺdə́ ō, yá̰a̰ rāādə́ gə̄ ō.

²⁰ Dɔ nang malang ń nin̄ aw̄n̄ tū tə́ ní, nápar de gə̄ kídə̄n̄ rīḿ kə́ táĺ tū tə́ najə̄ yādə́ tə́. Tɔdɔ̄ de gə̄ ní ədan̄ na: Kété ní nin̄ i gír de gə̄ yā Kɔ́ɔ̄ɓē, i dɔ nang yān n nin̄ əya̰n̄ kɔ̄ɔ́ ní.

²¹ Dan ń m-á̰á̰ yá̰á̰ ń toō ní tōrə̄m̄ ngá̰ý. De gə̄ kídə̄n̄ rīḿ kə́ táĺ dɔ nang yā nápar de gə̄ tə́ najə̄ yā Israel gə̄ ń reēn̄ ɓēé loodə́ ní tə́.

²² Tām̄ najə̄ ń noō tə́ ní, ə́da na: Najə̄ ń Kɔ́ɔ̄ɓē Nə́ɓā ɔr̄ ní n toó: Israel gə̄, yá̰á̰ ń m-ā m̄-rāā yā rāā ní, m-ā m̄-rāā i najə̄ yāsí sḭḭ̄ tə́ alé. M-ā m̄-rāā i yā kadə̄ de gə̄ ɓōĺnəń gidə rīḿ kə́ táĺ. A̰á̰ā̰, de gə̄ kídə̄n̄ rīḿ ɓē nápar de gə̄ ń sḭḭ̄ āwī tū tə́ ní i najə̄ yāsí sḭḭ̄ tə́.

²³ Nápar de gə̄ kídə̄n̄ rīḿ i najə̄ yāsí sḭḭ̄ tə́. I beé ní, m-ā m-ɔ́jə́də́ kadə̄ mā i Nə́ɓā kə́ bo ō, kə́ táĺ ō. Ba i sḭḭ̄ n m-ā m-úńsí yā rāań yá̰á̰ ń noō ní. Loo ń noō tə́ nápar de gə̄ ngeé ń noō a gerə̄n̄ kadə̄ i mā Kɔ́ɔ̄ɓē Nə́ɓā n m-ə́da najə̄ ń noō ní.

²⁴ M-ā m-ɔ̄r̄sí kɔ̄ɔ́ dan nápar de gə̄ tə́ ō, m-ā m-ɔ́ýsí kem ɓē gə̄ ń ī-ndiī tū tə́ ní tə́ yā kɔsə njasí naā tə́ ba reē sesí gogə́ dɔ nang yāsí tə́.

²⁵ M-ā m̄-ɓōkə́ man̄ kə́ unjə̄ njáý njáý dɔsí tə́, adə̄ sḭḭ̄ ā ūnjī njáý njáý. M-ā m̄-tə́gó yá̰á̰ kə́ yḛr gə̄ ń sḭḭ̄ ī-rāāī tām̄ yā nə́ɓā kə́ rɔ̄kum aĺ gə̄ tə́ ní kɔ̄ɔ́ rɔ̄sí tə́ kadə̄ ā ūnjī njáý njáý. M-ā m-ādə̄sí ngarā̰ kem kə́ kijə. M-ā m-ə̄ndā ndíĺ kə́ kijə kemsí tə́. M-ā m-ɔ̄r̄ kemsí kə́ ngan̄g tītə̄ mbal̄ kɔ̄ɔ́, ba m-ā m-ādə̄sí kem kə́ to dā̰

²⁶ M-ā m-ādə̄sí ngarā̰ kem kə́ kijə ō, m-ā m-ə́la ndíĺ kə́ kijə kemsí tə́ ō. M-ā m-ɔ̄r̄ ngarā̰ kem kə́ ngan̄g tītə̄ mbal̄ kemsí tə́ kɔ̄ɔ́ ba m-ā m-ādə̄sí kem kə́ ndigə yá̰á̰ ń Nə́ɓā gḛy ní.

²⁷ M-ā m-ə̄ndā ndílə́ḿ kemsí tə́. I tītə̄ ń noō n m-ā m̄-rāań kadə̄ sḭḭ̄ ásiī koō taḿ ba rāā yá̰a̰ gə̄ ń ndū najə̄ yāḿ gə̄ ədan̄ ní ō, ɓōĺ gidə yá̰á̰ m-ə́dásí kadə̄ ī-rāāī ní ō, rāā yá̰á̰ m-ə́dásí kadə̄ ī-rāāī ní ō.

²⁸ Loo ń noō tə́ ā ī-ndiī kem ɓē ń m-ādə̄ kaasí gə̄ ní tə́ ō, sḭḭ̄ i gír deē yāḿ gə̄ ō, mā i Nə́ɓā yāsí ō.

²⁹ M-ā m-ɔ̄r̄ yá̰a̰ rāāsí kə́ yḛr gə̄ kɔ̄ɔ́ malang. M-ā m-ādə̄ ɓō a rāāsí, banī m-ā m̄-rāā kadə̄ gémē əɓa ō, ā ə́ngeī gémē ngá̰ý ndɔ̄ sāān tə́ ō.

³⁰ Kāgə̄ yāsí gə̄ a anə̄n̄ ngá̰ý ō, ndɔr̄ yāsí gə̄ a teēn̄ kōō ngá̰ý ō, kə ta kūlə̄ḿ. Loo ń noō tə́ rɔ̄sí a sɔl̄sí najə̄ yā ɓō kə́ rāāsí tə́ ta kum nápar de gə̄ tə́ to̰ alé.

³¹ Kum mbang ngeé ń noō tə́ ɓáa a əga kemsí dɔ háĺsí kə́ majaĺ tə́ ō, dɔ yá̰a̰ rāāsí gə̄ kə́ majaĺ tə́ ō.

³² Majə kadə̄ ī-gerī na m-ā m̄-rāā yá̰á̰ ní i najə̄ yāsí sḭḭ̄ tə́ alé. Mā Kɔ́ɔ̄ɓē Nə́ɓā m-ə́da najə̄ ń noō. Israel gə̄, majə kadə̄ rɔ̄sí sɔl̄sí ō, ī-ndə̄ngāī rɔ̄sí najə̄ háĺsí tə́ ō!

³³ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Dan ń m-ā m̄-tə́gó yá̰a̰ rāāsí kə́ gōtə́ aĺ gə̄ kɔ̄ɔ́ malang rɔ̄sí tə́ adə̄ ūnjī njáý njáý anī, de gə̄ a télən̄ yā ndi kem ɓē bo gə̄ tə́ gogə́ kə ta kūlə̄ḿ, adə̄ yá̰á̰ ń i kə́ nujə kɔ̄ɔ́ ní, a télən̄ yā rāā yá̰á̰ ní gogə́.

³⁴ Ndɔr̄ gə̄ ń i kə́ kəya̰ kɔ̄ɔ́ ní, de gə̄ a télən̄ yā ndɔr̄ gogə́ ō, ngé mān̄ róbə gə̄ a a̰a̰n̄ dɔ nang kə́ kanjə̄ ndɔr̄ to̰ aĺ ō.

³⁵ Adə̄ de gə̄ a ədan̄ na: Ɓē ń toō ń i kə́ nujə kɔ̄ɔ́ ní, tél to tītə̄ ndɔr̄ kə́ Eden beé. Ɓē gə̄ ń télən̄ i kɔkərɔ kə́ kán̄ dɔ naā tə́ bing gə̄ ní, ɓē gə̄ ń i kə́ nujə kɔ̄ɔ́ gə̄ ō, de gə̄ əya̰n̄ kɔ̄ɔ́ ō ní, tél rāān̄ gogə́ rang ō, de gə̄ tél ndin̄ kemeé gogə́ ō.

³⁶ Loo ń noō tə́ nápar de gə̄ ń a ndin̄ kə gō gidəsí ɓáý ní, a gerə̄n̄ kadə̄ mā Kɔ́ɔ̄ɓē m̄-tél m̄-rāā ɓē kə́ nujə gə̄ gogə́ ō, yá̰á̰ ń i kə́ kɔr̄ kɔ̄ɔ́ ní, m̄-tél m-ə̄ndā gogə́ ō. I mā Kɔ́ɔ̄ɓē n m-ə́da najə̄ ń noō ní ō, yá̰á̰ ń m-ə́dá ní m̄-rāā ō.

³⁷ Yá̰á̰ ń mā Kɔ́ɔ̄ɓē Nə́ɓā m-ə́da kadə̄ i rɔ̄kum ní n toó: M-ā m-ə́yá̰ Israel gə̄ kadə̄ tél ndɔ̄ȳmə̄n̄ gogə́ ō, m-ā m̄-daldə́ i kə ta kūl̄ rāā kadə̄ nin̄ i ngá̰ý tītə̄ batə̄ gə̄ kə́ dan ɓūtə̄ yá̰a̰ kul̄ kógə̄ḿ tə́ beē.

³⁸ Kété ní, dan yā rāā nāā kə́ bo gə̄ tə́ ní, dā̰ gə̄ kə́ yā tɔ̄l̄ ba tun̄ kadə̄ Nə́ɓā taān̄ loo kem ɓē kə́ Jerusalem tə́. A reēn̄ sedə́ i kə ɓūtə̄də́ gēé kə taá malang. I beé ní, de gə̄ ń a télən̄ yā reē ndi kem ɓē bo yāsí kə́ nujə kɔ̄ɔ́ gə̄ tə́ ní, nin̄ i ngá̰ý tītə̄ ń noō ō. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā.