EJEKIEL 35 - Bibəl ta Sar̄

Əlan̄ ɓōĺ kem Edom gə̄ tə́

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ī-tūr̄ kumií kum kə̄ gō nang kə́ mbalá yā Edom tə́, ba ɔ̄r̄ najə̄ kə de kə́ tū tə́ gə̄ ādə̄m̄ ī-rɔ̄ɔń sedə́.

³ Ə́dádə́ na najə̄ ń Kɔ́ɔ̄ɓē Nə́ɓā əda ní n toó: M-ā m̄-rāā yá̰á̰ kə́ tōr̄ sesí! Ḭ̄ Edom, m-ā m-ɔ́jə́ tɔ́gə́ḿ dɔí tə́. M-ā m̄-nujiī kɔ̄ɔ́ ō, m-ā m̄-rāāī kadə̄ ā ī-tél dəla loo ō.

⁴ M-ā m̄-rāā ɓē bo yāí gə̄ kadə̄ a télən̄ dɔ dūbə̄ kɔkərɔ kə́ kɔsə dɔ naā tə́ gə̄. A nujən̄ ɓē yāí sák sák kɔ̄ɔ́. Loo ń noō tə́ ā ī-ger̄ kadə̄ Kɔ́ɔ̄ɓē i mā.

⁵ Ngáńdáńg ní, nelī ḭ̄ kə Israel gēé aĺ ngá̰ý. Kum mbang ń yá̰á̰ kə́ to kum kaȳ aĺ teē dɔdə́ tə́ ní, dan ń gíŕ yá̰a̰ rāādə́ kə́ majaĺ ngá̰ý gə̄ gān̄g ní, ḭ̄ ə̄nīdə́ rɔ̄ɔ̄ kə kaskaraá.

⁶ I tām̄ najə̄ ń toō tə́ n, tītə̄ ń m̄-ndiń kə kumḿ rɔ̄kum noó ní, najə̄ ń mā Kɔ́ɔ̄ɓē Nə́ɓā m-ə́dá ní n toó ní: M-ā m̄-ɓōkə́ mósə deē nang tə́ ɓēé looí. A̰á̰ā̰, mósə deē ń ḭ̄ ī-ɓōkə́ nang tə́ ní, gḛy kadə̄ deē əgā kə̄rān. Ḭ̄ ī-ɓōkə́ mósə deē nang tə́ kanjə̄ kɔr bā̰ā̰ ní, a ɓōkə́n̄ mósí nang tə́ ō.

⁷ Edom, m-ā m̄-nujə ɓē yāí ō, m-ā m̄-rāān kadə̄ a tél dəla loo ō, m-ā m̄-tɔ̄l̄ de gə̄ malang ń a mānə̄n̄ noó ní ō.

⁸ M-ā m-ūtə̄ dɔ mbal̄ yāí gə̄ kə nīń de gēé. De gə̄ malang ń a tɔ̄lə̄n̄də́ ta rɔ̄ɔ̄ tə́ ní, a tə́sōn̄ dɔ ngán mbal̄ yāí gə̄ tə́ ō, kum wól loo yāí gə̄ tə́ ō, kum wól man̄ dɔ mbal̄ yāí gə̄ tə́ ō.

⁹ M-ā m̄-rāā ɓē yāí kadə̄ a tél i dəla loo kə́ njɔ́ḿ gə̄ tə́. De gə̄ a ndin̄ kem ɓē bo gə̄ tə́ to̰ alé. Loo ń noō tə́ ā ī-gerī kadə̄ Kɔ́ɔ̄ɓē i mā.

¹⁰ Ḭ̄ ə́da na ɓē ko̰o̰ kə́ jōó gə̄ yā Israel ō, yā Juda ō, na a télən̄ ɓē ko̰o̰ yāí gə̄, ə́da na ā ī-taā ɓē gə̄ ń Kɔ́ɔ̄ɓē na ndi kemeé ní.

¹¹ Ḭ̄ ə̄ndā ɓē ko̰o̰ gə̄ ń noō nii ō, ī-rɔ̄ɔ̄ sedə́ kə ngangá ngá̰ý ō, nelī sedə́ aĺ ngá̰ý ō. I beé ní, tītə̄ ń m̄-ndiń kə kumḿ rɔ̄kum noó ní, najə̄ ń mā Kɔ́ɔ̄ɓē Nə́ɓā m-ə́dá ní n toó: Yá̰á̰ ń m-ā m̄-rāā seí ní, i tītə̄ ń ḭ̄ ī-rāań ní. Dan ń m-ā m-ə́ndaī najə̄ yá̰a̰ rāāí gə̄ tə́ ní, i tītə̄ ń noō n m-ā m-ɔ́jəń Israel gə̄ ké mā i náā wa ní.

¹² Loo ń noō tə́ ā ī-ger̄ kadə̄ mā Kɔ́ɔ̄ɓē m-ōō najə̄ gə̄ ń ī-tájəń ndū ní. Ḭ̄ ə́da na: Mbal̄ gə̄ kə́ Israel i yājí. Nujən̄ mbal̄ gə̄ kə́ Israel kɔ̄ɔ́, adə̄ nin̄ télən̄ i yá̰a̰ yājí.

¹³ Najə̄ ń ɔ̄rī seḿ ní ɔjə kadə̄ sḭḭ̄ ī-kídə̄mī. Najə̄ gə̄ ń ɔ̄rī ī-rɔ̄ɔ̄īneé seḿ ní, kɔjə rɔ̄ i ngá̰ý tū tə́. Mā m-ōō majə.

¹⁴ Najə̄ ń mā Kɔ́ɔ̄ɓē Nə́ɓā m-ə́dá ní n toó: Dan ń rɔ̄ gír de gə̄ malang a nel̄də́ anī, m-ā m̄-nujiī sák sák kɔ̄ɔ́.

¹⁵ Dan ń ḭ̄ á̰a̰ kadə̄ nujən̄ Israel gə̄ ń i gír deē yāḿ gə̄ ní anī, ḭ̄ ī-rāā rɔ̄nel̄. I beé ní, yá̰á̰ ń m-ā m̄-rāā seí ní, i yá̰á̰ kə́ tītə̄ ń noō ō. A nujən̄ mbal̄ bo yāí gə̄ ō, ɓē yāí kə taá malang ō. Loo ń noō tə́ de gə̄ a gerə̄n̄ kadə̄ Kɔ́ɔ̄ɓē i mā.