EJEKIEL 34 - Bibəl ta Sar̄

A ajən̄ Israel ō, a rāānən̄ kadə̄ a téĺ kə́ kijə ō ( 34—39 ) Kɔ̄lə̄n̄ kə ngār gə̄ kə́ Israel tə́

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ə́da ngār kə́ Israel tə́ gə̄ najə̄ ń m-ə̄ndā taí tə́ ní. Ə́dádə́ na: Najə̄ ń Kɔ́ɔ̄ɓē Nə́ɓā ɔr̄ ní n toó: Sḭḭ̄ ngé kul̄ Israel gə̄, i yá̰á̰ kə́ to kum tō ndoō kə́ ba̰ý beē n i tām̄ yāsí tə́ ní! Sḭḭ̄ ā ə̄ndāī kumsí i gír rɔ̄sí sḭḭ̄ kɔ́ gə̄ tə́ ngóy! Majə kadə̄ ngé ngɔ̄m̄ yá̰a̰ kul̄ gə̄ əndān̄ kumdə́ gír batə̄ gə̄ tə́ alé a?

³ Sḭḭ̄ ā̰yī mba batə̄ gə̄ ō, ə́jaī bḭḭ̄də́ ī-rāāiń kūbə̄ ə́laī rɔ̄sí tə́ ō, sḭḭ̄ ī-tɔ̄lī yá̰a̰ kul̄ kə́ bo tɔȳ madə̄ gə̄ kɔ̄ɔ́ ō. Banī sḭḭ̄ á̰a̰ī gō batə̄ gə̄ alé.

⁴ Batə̄ kə́ tɔ́gə gətóo gə̄ ní sḭḭ̄ ī-rāāīdə́ adə̄ tɔ́gə́də́ to aĺ ō, ngé kə́ mo̰y gə̄ ní, sḭḭ̄ ī-rāāīdə́ ādə̄ rɔ̄də́ ngáā aĺ ō, ngé kə́ nja tétə̄ gə̄ ní, sḭḭ̄ ɔ́riīdə́ nam̄ aĺ ō, ngé gə̄ əya̰n̄ madə̄də́ gə̄ ba aw̄n̄ sa̰y ní, sḭḭ̄ ī-tél ī-reēī sedə́ gogə́ aĺ ō, ngé gə̄ ń tadə́ tḭ̄ḭ̄ ní, sḭḭ̄ ī-ndəleīdə́ aĺ ō. Banī sḭḭ̄ ó̰o̰ḭ̄ ɓē dɔ batə̄ gə̄ tə́ kə dɔ́nɔ́ ō kə kem ngangá ō.

⁵ Batə̄ gə̄ tə̄ndān̄ naā tḭ̄ḭ̄n̄ kə̄ loo gə̄ tə́, tɔdɔ̄ nge kul̄də́ gətóo. Adə̄ dā̰ kə́ bembeé gə̄ malang əhɔ əsan̄də́ kɔ̄ɔ́.

⁶ Ɓūtə̄ yá̰a̰ kul̄ yāḿ gə̄ aw̄ tḭ̄ḭ̄n̄ ta rɔ̄də́ kə̄ dɔ mbal̄ gə̄ tə́ ō, kə̄ dɔ ngán mbal̄ gə̄ tə́ ō. Batə̄ yāḿ gə̄ tə̄ndān̄ naā tḭ̄ḭ̄n̄ kə̄ loo gə̄ tə́ kem ɓēé kə taá malang. Deē aw̄ sāādə́ aĺ ō, deē əndā kumən gíŕdə́ tə́ aĺ ō.

⁷ I beé ní, sḭḭ̄ ngé kul̄ Israel gə̄, ōōī najə̄ ḿ m-ə́dásí ní.

⁸ Tītə̄ ń m̄-ndiń kə kumḿ rɔ̄kum noō, yá̰á̰ ń mā Kɔ́ɔ̄ɓē Nə́ɓā m-ə́dá ní n toó. Ɓūtə̄ yá̰a̰ kul̄ yāḿ gə̄ i kem jī ngé ɓogə gə̄ tə́. Dā̰ kə́ bembeé gə̄ malang əhɔn̄ batə̄ gə̄ əsan̄də́ kɔ̄ɔ́, tɔdɔ̄ nge kul̄də́ gətóo. Ngé ngɔ̄m̄ yá̰a̰ kul̄ yāḿ gə̄ aw̄n̄ ndəledə́ tə́ alé. Ni a a̰a̰n̄ i gō rɔ̄də́ nin̄ kɔ́ gə̄, nin̄ a̰a̰n̄ gō yá̰a̰ kul̄ yāḿ gə̄ alé.

⁹ Adə̄ sḭḭ̄ ngé ngɔ̄m̄ Israel gə̄, ōōī najə̄ ń m-ə́dásí ní.

¹⁰ Mā Kɔ́ɔ̄ɓē Nə́ɓā m̄-tāāsí. M-ā m̄-rāā yá̰á̰ kógə̄ḿ sesí sḭḭ̄ ngé ngɔ̄m̄ yá̰a̰ kul̄ gēé. M-ā m̄-taā yá̰a̰ kul̄ yāḿ gə̄ jīsí tə́ kɔ̄ɔ́ ō, m-ā m-ɔ̄gə̄sí kɔr nodə́ ō. Loo ń noō tə́ sḭḭ̄ ā ásiī kənge yá̰á̰ kógə̄ḿ tū yá̰a̰ kul̄ yāḿ gə̄ tə́ to̰ alé. M-ā m̄-nār̄ batə̄ yāḿ gə̄ yā taādə́ tasí tə́ ō, ā ūlī rɔ̄sí kə batə̄ yāḿ gēé to̰ aĺ ō.

¹¹ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Əla gír ngɔlaā ní, mə̄kɔ́ m-āw̄ yā sāā batə̄ yāḿ gə̄ ō, m-ā m-á̰a̰ gōdə́ ō.

¹² Loo ń ré nge ngɔ̄m̄ yá̰a̰ kul̄ gə̄ ra dan ɓūtə̄ yá̰a̰ kul̄ gə̄ kə́ tə̄ndān̄ naā tḭ̄ḭ̄n̄ kə̄ loo gə̄ tə́ anī, ni a̰a̰ gō batə̄ yān gə̄. M-ā m-á̰a̰ gō yá̰a̰ kul̄ yāḿ gə̄ i tītə̄ ń noō ō. M-ā m-āw̄ gō batə̄ gə̄ tə́, loo malang ń nin̄ aw̄n̄ tū tə́ ní tə́, yā kaw̄ gān̄g dɔdə́. M-ā m̄-njə̄rā kum kə́ tuú tū tə́ ō, kum loo kə́ risə til tə́ ō, yā kaw̄ń gōdə́ tə́.

¹³ M-ā m̄-teē sedə́ kɔ̄ɔ́ kem ɓē kə́ rang gə̄ tə́ ō, m-ā m-ɔ́sə njadə́ naā tə́ ō, ba m-ā m̄-tél yā kaw̄ sedə́ gogə́ kem ɓē yādə́ tə́. M-ā m-āw̄ sedə́ dɔ mbal̄ bo gə̄ kə́ Israel tə́ tə́ ō, kum wól loo gə̄ tə́ ō, kem loo kə́ majə ngá̰ý gə̄ kə́ kem ɓēé tə́ ō.

¹⁴ M-ā m-āw̄ sedə́ dɔ mu kə́ majə tə́ ō, nin̄ a əngen̄ loo kəsa mu yādə́ dɔ mbal̄ bo gə̄ kə́ dɔ nang kə́ Israel tə́ tə́ ō. Batə̄ yāḿ gə̄ a asən̄ kɔr̄ koō loo ngeé ń noō tə́, loo kə́ majə kə́ mu i tū tə́ tə́. Nin̄ a əsan̄ yá̰a̰ dɔ nang kə́ teē yá̰a̰ gə̄ tə́ tə́, dɔ mbal̄ bo gə̄ kə́ Israel tə́ tə́.

¹⁵ Ndɔ̄ ń tə́ i mā n i nge ngɔ̄m̄ ɓūtə̄ yá̰a̰ kul̄ yāḿ gə̄ ní. I mā n m-ā m̄-rāā ɓūtə̄ yá̰a̰ kul̄ yāḿ gə̄ kadə̄ ɔrə̄n̄ koō ní. I mā Kɔ́ɔ̄ɓē Nə́ɓā n m-ə́da najə̄ ń noō ní.

¹⁶ Batə̄ ń tan tḭ̄ḭ̄ ní, m-ā m-āw̄ yā ndəlen ō, nge ń əya̰ madə̄n gə̄ ba aw̄ sa̰y ní, m-ā m̄-tél yā reē seneé gogə́ ō. Nge ń njan kógə̄ḿ tetə ní, m-ā m-ɔ́rən nam̄ ō, nge ń i mo̰y ní, m-ā m̄-rāā kadə̄ ni-tél a ənge tɔ́gə gogə́ ō. Ba nge kə́ bo ō, ngan̄g ō ní, m-ā m̄-rāān kadə̄ ni a gətóo kɔ̄ɔ́. Mā i nge ngɔ̄m̄ yá̰a̰ kul̄ gə̄ ndɔ̄ń tə́ kə́ nge rāā yá̰á̰ kə́ gōtə́.

Nə́ɓā reē rāā kə gír deē yān gēé

¹⁷ Yá̰á̰ ń mā Kɔ́ɔ̄ɓē Nə́ɓā m-ə́da ɓūtə̄ yá̰a̰ kul̄ yāḿ gə̄ ní n toó: M-ā m̄-gān̄g sarya kə́ dɔ dán ɓūtə̄ batə̄ gə̄ tə́ ō, bal batə̄ gə̄ tə́ ō, bal bə̄yā̰ gə̄ tə́ ō.

¹⁸ Ngé kə́rēý gə̄ dɔ dáńsí tə́ nel̄də́ kəsa mu kə́ loo kə́ majə ngá̰ý tə́ aĺ i tām̄ rí tə́? Gotə mu ń na̰y ní, nin̄ aw̄ tə́ɓān̄ njadə́ tə́ ɓáý to̰ i tām̄ rí tə́? Ka̰ȳ man̄ kə́ kumən unjə̄ asəsí aĺ a? Man̄ ń sḭḭ̄ ā̰yī aĺ ní, ə́laī njasí kum tə́ ī-pukə́tūiń adə̄ kumən kusə́rū i tām̄ rí tə́?

¹⁹ I gáŕ kadə̄ gotə batə̄ kə́ rang gə̄ əsan̄ mu ń sḭḭ̄ ī-tə́ɓāī njasí tə́ ní ō, a̰ȳn̄ man̄ ń sḭḭ̄ ī-pukə́tūī adə̄ kumən kusə́rū ní ō.

²⁰ I tām̄ najə̄ ń toō tə́ n mā Kɔ́ɔ̄ɓē Nə́ɓā m-ə́dásí najə̄ ń toō ní: Batə̄ kə́ bo gə̄ ō, kə́ kon̄g gə̄ ō, kə́ dan yá̰a̰ kul̄ yāḿ gə̄ tə́ ní, m-ā m̄-gān̄g sarya kə́ dɔ dáńdə́ tə́.

²¹ Dā̰ kə́ tɔ́gə́də́ gətóo gə̄ ní, sḭḭ̄ ə̄ndāī kār̄ bɔ̄gə̄sí ī-mbə́rēīneédə́ ō, ī-mbə́rēīdə́ kə kadəsí ō, ī-tɔ́sīdə́ kə gajəsí ō. Ta tɔ̄l̄ ta anī, sḭḭ̄ ī-tə̄ɓāīdə́ kə̄ loo gə̄ tə́ adə̄ nin̄-teēn̄ kɔ̄ɔ́ loo kəsa mu tə́.

²² Adə̄ m̄-reē i rāā kə batə̄ yāḿ gēé, tá kadə̄ deē ɓogədə́ to̰ alé. M-ā m̄-gān̄g sarya kə́ dɔ dáńdə́ tə́ ō sḭḭ̄ ō.

²³ I nge ngɔ̄m̄ yá̰a̰ kul̄ gə̄ kə́ kal kógə̄ḿ beē ngóy n m-ā m-ə̄ndān dɔ yá̰a̰ kul̄ yāḿ gə̄ tə́ kadə̄ a̰a̰ gōdə́ ní. Ndɔ̄ ń tə́ ni i mban̄g kə́ tītə̄ nge kəla yāḿ Dabid. Ni a a̰a̰ gō dā̰ gə̄ kə́ dan yá̰a̰ kul̄ gə̄ tə́ ō, ni i nge kul̄də́ ō.

²⁴ Mā Kɔ́ɔ̄ɓē ní, ndɔ̄ń tə́ mā i Nə́ɓā yādə́ ō, nin̄ a əngen̄ ngār kə́ tītə̄ nge kəla yāḿ Dabid ō. I mā Kɔ́ɔ̄ɓē n m-ə́da najə̄ ń noō ní.

²⁵ M-ā m-ə́hɔ madə̄ naā kem sɔl̄ kə ɓūtə̄ yá̰a̰ kul̄ yāḿ gēé ō, m-ā m̄-rāā kadə̄ dā̰ kə́ do̰ gə̄ a gətóon̄ kɔ̄ɔ́ kem ɓēé ō. Loo ń noō tə́ dā̰ yāḿ gə̄ a ran̄ dəla loo tə́ kanjə̄ sōl̄ yá̰á̰ kógə̄ḿ ō, nin̄ a ɓīīn̄ kə̄ kem túpə́ kámbə gə̄ tə́ ō.

²⁶ M-ā m-ə́yá̰də́ yā kadə̄ nin̄ a ndin̄ kə kumdə́ kadə ngōn̄ mbal̄ bo yāḿ kə́ táĺ tə́. M-ā m̄-rāā man̄ kadə̄ a edə kə kum mbang kə́ majə ō, man̄ ní a rāā majə sedə́ ō.

²⁷ Kāgə̄ gə̄ a anə̄n̄ ō, dɔ nang a teē kōō ō, de gə̄ kógə̄ḿ kógə̄ḿ a ndin̄ kem ɓēé kanjə̄ sōl̄ yá̰á̰ kógə̄ḿ ō. Yá̰a̰ malang ń a rējə̄ de gə̄ kə́ dan gír deē yāḿ gə̄ tə́ ní, m-ā m̄-tētən naā tə́ kɔ̄ɔ́. M-ā m̄-taādə́ jī ngé rāādə́ ɓəlo tə́ gə̄ tə́ yā kəya̰də́ dɔɔ́. Kum mbang ngeé ń noō tə́ ní, nin̄ a gerə̄n̄ kadə̄ Kɔ́ɔ̄ɓē i mā.

²⁸ Nápar de gə̄ a ɓogən̄də́ to̰ aĺ ō, dā̰ kə́ do̰ gə̄ a əsan̄də́ to̰ aĺ ō. Nin̄ a ndin̄ kanjə̄ sōl̄ yá̰á̰ kógə̄ḿ ō, de kə́ yā rāādə́ kadə̄ a ndewn̄ to̰ a gətóo ō.

²⁹ M-ā m-ādə̄də́ ndɔr̄ kə́ teē kōō majə adə̄ de gə̄ gerə̄n̄. Ɓō a rāādə́ kem ɓēé to̰ alé. Nápar de gə̄ a əlan̄ rɔ̄sɔl̄ dɔdə́ tə́ to̰ alé.

³⁰ De gə̄ malang a gerə̄n̄ kadə̄ mā Kɔ́ɔ̄ɓē Nə́ɓā yādə́ mā i sedə́ ō, a gerə̄n̄ kadə̄ gír de gə̄ ń i Israel gə̄ ní, i gír deē yāḿ gə̄ rɔ̄kum ō. I mā Kɔ́ɔ̄ɓē Nə́ɓā n m-ə́da najə̄ ń noō ní.

³¹ A̰á̰ā̰, sḭḭ̄ deē ndul gə̄, sḭḭ̄ i ɓūtə̄ yá̰a̰ kul̄ yāḿ gə̄ ō, mā m-á̰a̰ gōsí ō. A̰á̰ā̰, Nə́ɓā yāsí i mā. Najə̄ ń Kɔ́ɔ̄ɓē Nə́ɓā əda ní n noó.