EJEKIEL 33 - Bibəl ta Sar̄

Nə́ɓā əndā Ejekiel nge kum̄ loo tə́

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, loo ń ré m̄-rāā adə̄ rɔ̄ɔ̄ reē dɔ ɓē kógə̄ḿ tə́ anī, ī-ter̄ kem ngán Israel gə̄ dɔ yá̰á̰ ń rāā yá̰á̰ tə́ ní. De kə́ kem ɓē ní tə́ gə̄ gə̄rān̄ deē kógə̄ḿ kə́ dandə́ tə́ kadə̄ ni i nge kum̄ loo.

³ Dan ń nge kum̄ loo a̰a̰ ngé rɔ̄ɔ̄ gə̄ yā madə̄ ba̰ā̰ loo reē tə́ anī, ni kɔ̄ŕ bərúnjə yā tāań de gə̄.

⁴ Tītə̄ ń toō: Ré deē kógə̄ḿ oō kōō bərúnjə, ba tāā ń tāānən̄ ní usən dɔ tə́ alé, adə̄ madə̄ ba̰ā̰ reē ugə̄ ba tɔ̄lə̄n anī, najə̄ yo deē ń noō i dɔn nəkɔ́ tə́.

⁵ Ni oō kōō bərúnjə, ba usən dɔ tāā ń tāānən̄ tə́ ní alé. Adə̄ najə̄ yon i dɔn nəkɔ́ tə́. Ré usən i dɔ tə́ anī, loo kə́ beē tə́ ni a ajə rɔ̄n.

⁶ Banī yá̰á̰ ń asə kadə̄ a rāā yá̰á̰ ní n toó: Nge kum̄ loo a̰a̰ ngé rɔ̄ɔ̄ yā madə̄ ba̰ā̰ gə̄ loo reē tə́, ba kɔ̄ŕ bərúnjə alé adə̄ kósə de gə̄ i kə́ tāān̄də́ alé. Adə̄ madə̄ ba̰ā̰ reē tɔ̄l̄ deē kógə̄ḿ. Loo ń noō tə́ ní najə̄ i dɔ nge kum̄ loo tə́, adə̄ m-ā m̄-dəjen gír yo deē ní.

⁷ Ejekiel, ḭ̄ ngōn̄ deē ní, m-ə̄ndāī nge kum̄ loo tə́ tām̄ yā ngán Israel gə̄ tə́. A ōō najə̄ kɔrə̄ḿ ō, ā ī-tāā ngán Israel gə̄ ādə̄m̄ ō.

⁸ Tītə̄ ń toō, i gáŕ kadə̄ m̄-tāā deē kógə̄ḿ kə́ majaĺ m-ə́dan na ni a oy rɔ̄kum. Banī ḭ̄ ī-tāan alé, ī-dəjen kadə̄ tūr̄ hálən alé. Adə̄ deē ní a oy najə̄ yá̰a̰ rāān gə̄ kə́ gōtə́ aĺ tə́, banī mā m-ā m̄-dəjeī ḭ̄ gír yon.

⁹ Ba ré ḭ̄ ī-tāā de kə́ majaĺ ní, ī-dəjen kadə̄ tūr̄ hálən, banī ni-rāā nge ń noō alé. Anī deē ngeé ń noō a oy najə̄ yá̰a̰ rāān gə̄ kə́ gōtə́ aĺ tə́, banī ḭ̄ ā ájə rɔ̄í.

Nge kem ndul ń tél reē rɔ̄ Nə́ɓā tə́ ní a ndi kə kumneé

¹⁰ Ḭ̄ ngōn̄ deē, ə́dá ngán Israel gə̄ na: Sḭḭ̄ ɔ̄rī najə̄ i beé, ə́daī na: Yá̰a̰ rāājí kə́ gōtə́ aĺ gə̄ ō, mān̄ dɔ ndū najə̄ gə̄ yā Nə́ɓā yājí ō, ɔyn̄jí. Nin̄ taān̄ tɔ́gə́jí kɔ̄ɔ́. Ní, j-a jə-rāā i ba̰ý n j-a j-asəń ndi kə kumjí ní?

¹¹ I beé ní, tītə̄ ń m̄-ndiń kə kumḿ rɔ̄kum nōō, najə̄ ń mā Kɔ́ɔ̄ɓē Nə́ɓā m-ə́dásí ní n toó: Koy de kə́ majaĺ gə̄ adə̄m̄ mā rɔ̄nel̄ alé. Yá̰á̰ ń mā m̄-ndigə ní, i kadə̄ nin̄ tūrə̄n̄ jī bēl̄ loo rāā yá̰a̰ yādə́ ba ndin̄ kə kumdə́. Ɓɔ́, ə́ya̰ī jī bēl̄ loo rāā yá̰a̰ yāsí kə́ majaĺ gə̄ kɔ̄ɔ́. Israel gə̄, kadə̄ óyiī i tām̄ rí tə́?

¹² Ba ḭ̄ ngōn̄ deē, de gə̄ kə́ dan gír deē yāí gə̄ tə́ ní, ə́dádə́ yá̰á̰ ń toō ɓáý to̰: Ré de kə́ nge rāā yá̰á̰ kə́ gōtə́ ḭḭ rāā yá̰á̰ kə́ majaĺ ndɔ̄ kə́rēý tə́ anī, yá̰á̰ kə́ majə ń ni-rāā kété ní, a ajən alé. Ré deē kógə̄ḿ kə́ majaĺ əya̰ róbə yān kə́ majaĺ ndɔ̄ kə́rēý tə́ anī, yá̰á̰ kə́ majaĺ ń ni-rāā kété ní, a rāā kadə̄ tan a tḭ̄ḭ̄ alé. Adə̄ háĺ kə́ majə yā de kə́ gōtə́ a rāā kadə̄ ni a ndi kə kumneé, ndɔ̄ ń ni a rāań yá̰á̰ kə́ majaĺ tə́ ní alé.

¹³ Tītə̄ ń toō: M-ə̄nī ndūḿ m-ādə̄ de kə́ gōtə́ kadə̄ ni a ndi kə kumneé. Banī ni gír̄ kadə̄ hálən kə́ majə kə́ kété ń ni-rāā ní asə adə̄ ni udə kə̄ rɔ̄ rāā yá̰á̰ kə́ majaĺ tə́. I beé ɓá ní, yá̰a̰ rāān kə́ majə kə́ kété gə̄ ní i kə́ yā tə́da to̰ alé. Adə̄ ni a oy tām̄ yā yá̰á̰ kə́ majaĺ ń ni rāā tə́ ní.

¹⁴ Ba ré m̄-tāā de kə́ majaĺ m-ə́dan na ni a oy rɔ̄kum, ba ni əya̰ róbə yān kə́ majaĺ kɔ̄ɔ́ ō, udə kə̄ rɔ̄ ɓōĺ gidə ndū najə̄ tə́ ō, kə̄ rɔ̄ rāā yá̰á̰ kə́ gōtə́ tə́ ō anī, deē ní a oy alé.

¹⁵ Yá̰á̰ ń asə rāā ní n toó: Ni tél kə yá̰a̰ tə̄nā yá̰á̰ adə̄ kɔ́ɔ̄ gogə́, aláa yá̰á̰ ń ni ɓogə ní, ni téləń adə̄ kɔ́ɔ̄ gogə́. Aláa ni-rāā yá̰á̰ ń ndū najə̄ gə̄ ədan̄ ní, ndū najə̄ gə̄ ń i ngé rāā kadə̄ deē ndi kə kumneé ní, adə̄ ni rāā yá̰á̰ kə́ majaĺ gə̄ to̰ alé. I beé ní, deē ngeé ń toō a ndi kə kumneé rɔ̄kum, ni a oy alé.

¹⁶ Yá̰á̰ kə́ gōtə́ aĺ gə̄ ń ni-rāā kété ní, deē a tə́da aĺ ō, ni a ndi kə kumneé tɔdɔ̄ ni ɓōĺ gidə ndū najə̄ gə̄ ō, ni ɓōĺ gidə rāā yá̰á̰ kə́ gōtə́ ō.

¹⁷ Ngán Israel gə̄ ədan̄ na: Loo rāā yá̰a̰ yā Kɔ́ɔ̄ɓē na majə alé. Banī i loo rāā yá̰a̰ yādə́ nin̄ n i kə́ majaĺ ní!

¹⁸ Dan ń de kə́ gōtə́ əya̰ gō hálən kə́ gōtə́ ba rāā yá̰á̰ kə́ gōtə́ aĺ anī, ni a oy tāmən tə́.

¹⁹ Ré deē kógə̄ḿ kə́ majaĺ əya̰ róbə yān kə́ majaĺ ndɔ̄ kógə̄ḿ tə́ ba ɓōĺ gidə ndū najə̄ gə̄ ō, ɓōĺ gidə yá̰a̰ rāā kə́ gōtə́ ō anī, ni a ndi kə kumneé tāmən tə́.

²⁰ Loo ń noō tə́ sḭḭ̄ Israel gə̄ ə́daī na: Loo rāā yá̰a̰ yā Kɔ́ɔ̄ɓē na majə alé. I beé ní, majə kadə̄ ī-gerī kadə̄ m-ā m̄-rāā sarya sesí kógə̄ḿ kógə̄ḿ i kə gō háĺsí gēé.

A nujən̄ kə ɓē kə́ Israel sák sák kɔ̄ɔ́

²¹ Ɔyn̄ de gə̄ aw̄n̄ sedə́ dɔ ɓē kə́ rang tə́ dɔ gúú tə́ rāā ɓāl̄ kutə gidə i jōó. Kem ɓāl̄ kə́ nge ko̰ kutə gidə i jōó tə́, kem nāā kə́ nge ko̰ kutə tə́, kə ndɔ̄ nāā kə́ nge ko̰ mí, anī deē kógə̄ḿ kə́ teē ta yo tə́ dan ń taān̄ ɓē kə́ Jerusalem ní reē ədam̄ na: Ɓē əsō kɔ̄ɔ́!

²² Kété pá tá kadə̄ deē ní reē ugə̄ ní, Kɔ́ɔ̄ɓē rāā adə̄ m̄-ger̄ gō tɔ́gən, tām̄ ni-rāā adə̄ m̄-tél m-ɔ̄r̄ najə̄ gogə́. Dan ń teē kə ndɔ̄ kə́ noō dəloí á deē ní reē ugə̄ ní, gír kəlā ndo̰ḿ do̰ō̰ naā to̰ alé, adə̄ m-ɔ̄r̄ najə̄.

²³ Loo ń noō tə́ Kɔ́ɔ̄ɓē ɔr̄ najə̄ seḿ, ni ədam̄ na:

²⁴ Ḭ̄ ngōn̄ deē, ōō! Gotə de gə̄ ń na̰yn̄ á ndin̄ Israel tə́ kə̄ kem ɓē bo gə̄ kə́ nujə kɔ̄ɔ́ gə̄ tə́ ní, ə́dan na: Kété ní Abəraham i kə kérneé banī ɓē malang i yān. Ba jḭḭ̄ ń i ngá̰ý ní, majə kadə̄ i jḭḭ̄ n ɓē i yājí ngɔlaā ní.

²⁵ I beé ní, ə́dádə́ na: Najə̄ kɔr̄ Kɔ́ɔ̄ɓē Nə́ɓā n toó: Sḭḭ̄ ə́saī dā̰ kə mósó ō, ī-rɔyī ɓesə̄ gə̄ ō, sḭḭ̄ ī-tɔ̄lī de gə̄ ō. Ní, loo kadə̄ ɓē i yāsí i ba̰ý?

²⁶ Sḭḭ̄ ə̄ndāī tɔ́gə́sí i dɔ yá̰a̰ rɔ̄ɔ̄ yāsí gə̄ tə́ ngóy. Sḭḭ̄ ī-rāāī yá̰á̰ kə́ majaĺ ngá̰ý gə̄. Sḭḭ̄ dəngam gə̄, ī-taāī nə̄yá̰ madə̄sí gə̄. Ní, loo kadə̄ ɓē i yāsí i ba̰ý?

²⁷ Ə́dádə́ najə̄ ń toō ādə̄m̄: Tītə̄ ń mā Kɔ́ɔ̄ɓē m̄-ndiń kə kumḿ rɔ̄kum noó, m̄-tāāsí. Ngé gə̄ ń ndin̄ kem ɓē bo kə́ nujə kɔ̄ɔ́ gə̄ tə́ ní, a oyn̄ yo mósə ō, ngé gə̄ ń ndin̄ kem ɓē ndɔr̄ gə̄ tə́ ní, dā̰ kə́ bembeé gə̄ a əsan̄də́ ō. Ngé gə̄ ń ɓɔ̄ɔ̄n̄ rɔ̄də́ dan mbal̄ gə̄ tə́ ō, kə̄ bəlo mbal̄ gə̄ tə́ ō ní, a oyn̄ yo mo̰y ngāl̄bɔ̄gīí.

²⁸ M-ā nujə ɓē kɔ̄ɔ́, m̄-rāā kadə̄ ɓē tél dəla loo. Tɔ́gə́ ń rāā adə̄ de kə́ kemeé gə̄ ɔjən̄ rɔ̄də́ ngá̰ý ní a gətóo kɔ̄ɔ́. De gə̄ a əya̰n̄ mbal̄ bo gə̄ kə́ Israel tə́ kɔ̄ɔ́, deē a mān̄ noó to̰ alé.

²⁹ M-ā m̄-rāā ɓē ń toō kadə̄ tél dəla loo, najə̄ yá̰á̰ kə́ majaĺ ngá̰ý gə̄ ń Israel gə̄ rāān̄ ní tə́. Loo ń noō tə́ nin̄ a gerə̄n̄ kadə̄ Kɔ́ɔ̄ɓē i mā.

³⁰ Ḭ̄ ngōn̄ deē, ōō! Israel gə̄ ɔrə̄n̄ najə̄ yāí kə gō kadə ndogə̄ mbal̄ gə̄ kem ɓēé, aláa ta róbə́ kújə yādə́ gə̄ tə́. Nin̄ ədan̄ naā dɔ dáńdə́ tə́ na: I beé ní, ādə̄ j-aw̄ j-oōī yá̰á̰ Kɔ́ɔ̄ɓē əda ní.

³¹ Adə̄ nin̄ reēn̄ ngá̰ý ndin̄ nang tə́ noí tə́. Nin̄ oōn̄ najə̄ kɔrīí gə̄, banī rāān̄ yá̰a̰ gə̄ ń ə́dá ní alé. Nin̄ a rāān̄ i yá̰á̰ kə́ nel̄də́ gə̄ ō, a sāān̄ i yá̰á̰ kə́ majə tām̄ yādə́ tə́ gə̄ ō ngóy.

³² Tām̄ yādə́ nin̄ tə́ ɓáa, ḭ̄ ī-to i tītə̄ nge kənī pā kə́ míndən nel̄ ngá̰ý, kə́ yá̰a̰ gōsə̄ kə́ ɓār̄ majə ngá̰ý a dān̄ gō pā yān beé. Nin̄ oōn̄ najə̄ kɔrīí gə̄, banī rāān̄ yá̰a̰ gə̄ ń ə́dá ní alé.

³³ I tām̄ najə̄ ń toō tə́ n ré yá̰a̰ gə̄ ń noō a rāān̄ yá̰a̰ anī, ta dɔ yá̰a̰ gə̄ ní i ngɔr, nin̄ a gerə̄n̄ kadə̄ nge koō ta kógə̄ḿ ndi dandə́ tə́ kété ní.