EJEKIEL 32 - Bibəl ta Sar̄

Pā nōō yo kə́ dɔ ɓē kə́ Ejiptə tə́ ō, kə́ dɔ mban̄g yān tə́ ō

¹ Ɔyn̄ de gə̄ aw̄n̄ sedə́ dɔ ɓē kə́ rang tə́ dɔ gúú tə́ rāā ɓāl̄ kutə gidə i jōó kɔ̄ɔ́. Kem ɓāl̄ kə́ nge ko̰ kutə gidə i jōó tə́, kem nāā kə́ nge ko̰ kutə gidə i jōó tə́, kə ndɔ̄ nāā kə́ ta kəga dɔɔ́ anī, Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ə̄nī pā yo ń toō kə Parao̰, mban̄g kə́ Ejiptə tə́: Ī-to dan nápar de gə̄ tə́ tītə̄ balsáa ɓɔl beé. Banī ī-to tītə̄ mar kə́ to kum bā bo tə́ beé ō, ḭ̄ ī-yéȳ rɔ̄í kum bā yāí kə́ bo tə́, ḭ̄ ə́la njaí kum tə́ ī-rāań adə̄ kum man̄ majə alé. Ḭ̄ ī-rāā kum man̄ adə̄ kusə́rū.

³ Najə̄ ń Kɔ́ɔ̄ɓē Nə́ɓā ɔr̄ ní n toó: Gír de gə̄ ngá̰ý a ɔsən̄ dɔdə́ naā tə́. Kum mbang ngeé ń noō tə́ ɓáa m-ā m-ə̄nī réng yāḿ dɔí tə́ kadə̄ kumən gə̄ əhɔīn̄, adə̄ a ndɔ́rīn̄ kə̄ ndágá ta gógə́ tə́.

⁴ M-ā m-ə̄nī nang tə́ dan bembeé. M-ā m̄-rāā kadə̄ loo ń noō tə́ yel̄ gə̄ malang a reēn̄ dɔí tə́ ō, dā̰ kə́ bembeé gə̄ malang a əsan̄ dā̰í ō.

⁵ M-ā m̄-tə́nī gotií ń na̰y ní kə̄ dɔ mbal̄ bo gə̄ tə́ ō, m-ā m̄-kán̄ wól loo gə̄ tə́ kadə̄ rosə kum wól loo gə̄ ō.

⁶ M-ā m̄-ɓōkə́ mósí nang tə́ kadə̄ yḭ̄l̄ dɔ nang. Ni a taā loo dɔ mbal̄ bo gə̄ tə́ ō, a taā kum man̄ dɔ mbal̄ gə̄ tə́ ō.

⁷ Dan ń ā ī-ndi kə kumií to̰ aĺ ní, m-ā m-ūtə̄ gidə dɔ rā̰ kə kūbə̄ kógə̄ḿ ō, tə́yō̰ gə̄ a ndulən̄ ō. M-ā m-ūtə̄ gidə mbang kə kil̄ maná ō, nāā a ndaa aĺ ō.

⁸ Yá̰á̰ kə́ unjə̄ kow gə̄ malang kə́ dɔ rā̰ tə́ ní, m-ā m̄-rāādə́ yā kadə̄ nin̄ a télən̄ yā tetə ndul najə̄ yāí ḭ̄ tə́ ō, m-ā m̄-rāā kadə̄ ɓē yāí a ndi tilií ō. I mā Kɔ́ɔ̄ɓē Nə́ɓā n m-ə́da najə̄ ń noō ní.

⁹ Gír de gə̄ ngá̰ý ní, kemdə́ a nujə, dan ń m-ā m-ə́da kōō nujə kə́ nujiīn̄ kɔ̄ɔ́ bátə́ kə̄ dan nápar de gə̄ tə́, kem ɓē gə̄ kə́ ī-ger̄də́ aĺ gə̄ tə́ ní.

¹⁰ Rɔ̄ gír de gə̄ ngá̰ý a nel̄də́ alé najə̄ yāí tə́. Dan ń m-ā m-ə̄nī kaskar yāḿ no mban̄g yādə́ gə̄ tə́ anī, ndíl mban̄g yādə́ gə̄ a a̰ȳ. Ndɔ̄ ń ḭ̄ ā ə̄sōń tə́ ní, a asədə́ nin̄ ndew alé, tām̄ nin̄ kógə̄ḿ kógə̄ḿ ní a ɓōlə́n̄ tām̄ yā rɔ̄də́ nin̄ kɔ́ gə̄ tə́.

¹¹ Najə̄ ń Kɔ́ɔ̄ɓē Nə́ɓā əda ní n toó: Ngé rɔ̄ɔ̄ gə̄ yā mban̄g kə́ Babilon a reēn̄ dɔí tə́.

¹² M-ā m-ə́la kə ngé rɔ̄ɔ̄ gə̄ kə́ nin̄ ton̄ ɓōĺ tɔȳn̄ nápar de gə̄ malang kadə̄ a tɔ̄lə̄n̄ de kə́ kem ɓē yāí tə́ gə̄ malang kɔ̄ɔ́. Nin̄ a nujən̄ ɓē kə́ Ejiptə ń i ɓē kə́ ɔjə rɔ̄n ngá̰ý ní kɔ̄ɔ́ ō, de kə́ kemeé gə̄ a gətóon̄ kɔ̄ɔ́ malang ō.

¹³ De gə̄ ń ḭ̄ āwń kadə bā Nil tə́ ní, m-ā m̄-rāā kadə̄ a a̰ȳn̄ malang. Nja de gə̄, aláa nja dā̰ gə̄ a rāān̄ kum man̄ bā Nil kadə̄ a kusə́rū to̰ alé.

¹⁴ M-ā m-ə́ya̰n kadə̄ a to jəke ō, m-ā m̄-rāā kadə̄ ngán man̄ gə̄ a nūgə́n̄ jəke tītə̄ yibə̄ beé ō. I mā Kɔ́ɔ̄ɓē n m-ə́da najə̄ ń noō ní.

¹⁵ M-ā m̄-r̄āā ɓē kə́ Ejiptə kadə̄ téĺ dəla loo. M-ā m̄-rāā kadə̄ yá̰a̰ malang kə́ kem ɓēé gətóo kɔ̄ɔ́, kadə̄ kem ɓē a to i karī ō, m-ā m̄-rāā kadə̄ de kə́ kem ɓēé gə̄ oyn̄ malang kɔ̄ɔ́ ō. Kum mbang ngeé ń noō tə́ ɓáa de gə̄ malang a gerə̄n̄ kadə̄ Kɔ́ɔ̄ɓē i mā.

¹⁶ Pā yo kə́ kadə̄ dəyá̰ gə̄ kə́ dan nápar de gə̄ tə́ malang ənīn̄ dɔ ɓē kə́ Ejiptə tə́ ō, dɔ de gə̄ yān gə̄ kə́ nin̄ i ngá̰ý tə́ ō, ní n noó. I Kɔ́ɔ̄ɓē Nə́ɓā n əda najə̄ ń noó ní.

Nō rɔ̄ kə́ dɔ gír de gə̄ kə́ tetən̄də́ rɔ̄ɔ̄ kɔ̄ɔ́ tə́

¹⁷ Ɔyn̄ de gə̄ aw̄n̄ sedə́ dɔ ɓē kə́ rang tə́ dɔ gúú tə́ rāā ɓāl̄ kutə gidə i jōó kɔ̄ɔ́. Kem ɓāl̄ kə́ nge ko̰ kutə gidə i jōó tə́, kem nāā kə́ nge ko̰ kutə gidə i jōó tə́, kə ndɔ̄ nāā kə́ nge ko̰ kutə gidə i mí anī, Kɔ́ɔ̄ɓē ɔr̄ najə̄ seḿ, ədam̄ na:

¹⁸ Ḭ̄ ngōn̄ deē, ī-nōō tām̄ yā de gə̄ malang kə́ Ejiptə tə́. Ādə̄ pā yo yāí rāā adə̄ nin̄ gə̄gē, gotə nápar de gə̄ kə́ tɔ́gə́də́ i ngá̰ý gə̄gē, risə aw̄ ndin̄ gíŕ nángāá, loo ń de kə́ koy gə̄ risə aw̄n̄ tū tə́ ní tə́.

¹⁹ Ə́dádə́ na: Sḭḭ̄ ī-majə ī-tɔyī gotə de gə̄ a? Ī-risə āwī ɓádá, naā tə́ kə gotə de kə́ rang gə̄ ń əjan̄ mɔtədə́ aĺ á tɔ̄lə̄n̄də́ ta rɔ̄ɔ̄ tə́ ní!

²⁰ A̰á̰ā̰, de kə́ Ejiptə gə̄ a oyn̄ ta rɔ̄ɔ̄ tə́. Ngɔlaā ní kaskar gə̄ ran̄ dɔ rɔ̄də́ tə́ kɔ̄ɔ́ yā tə́gā de gə̄. Ādə̄ nin̄ əlan̄ ɓē kə́ Ejiptə ō, de kə́ kemeé gə̄ malang ō, ta yo tə́!

²¹ Ɓádá ní, ngé rɔ̄ɔ̄ gə̄ kə́ nin̄ əhɔn̄ rɔ̄də́ tɔgə tɔȳ madə̄də́ gə̄ ō, de gə̄ kə́ kété jóo nin̄ ɓoon̄ rɔ̄də́ tū yā de kə́ Ejiptə tə́ ō, a ədan̄ na: Ngé kəja mɔtə aĺ gə̄ ń noō ń tɔ̄lə̄n̄də́ ta rɔ̄ɔ̄ tə́ ní, nin̄ reē ton̄ danjí tə́.

²² Mban̄g kə́ Asiri i noó kə ngé rɔ̄ɔ̄ yān gēé. Dɔ ɓádə́ ngé rɔ̄ɔ̄ yān gə̄ gīr̄ gidən.

²³ Dɔ ɓádə gə̄ ní ton̄ i gə́le loo kə́ ɓádá tə́, kə gō gidə dɔ ɓádə mban̄g. Nin̄ malang ní tɔ̄lə̄n̄də́ i ta rɔ̄ɔ̄ tə́, nin̄ ń kété rāān̄ de kə́ ndi kə kumdə́ gə̄ adə̄ ɓōĺ rāādə́ adə̄ ndewn̄ ní.

²⁴ Mban̄g kə́ Elam i noó kə ngé rɔ̄ɔ̄ yān gēé. Dɔ ɓádə́ ngé rɔ̄ɔ̄ yān gə̄ gīr̄ gidən. Nin̄ malang ní tɔ̄lə̄n̄də́ i ta rɔ̄ɔ̄ tə́. De kə́ dəngam gə̄ ń noō ń əjan̄ mɔtədə́ aĺ ní, kété ní nin̄ rāān̄ de gə̄ ń ndin̄ kə kumdə́ ní adə̄ ɓōĺ rāādə́ adə̄ ndewn̄, ba ngɔlaā nin̄ aw̄n̄ gíŕ nángāá kɔ̄ɔ́. Ngɔlaā ní rɔ̄də́ sɔl̄də́, nin̄ gəgē de gə̄ malang ń ton̄ ɓádá ní gə̄gē.

²⁵ A̰á̰ā̰, mban̄g kə́ Elam to nang tə́ kə ngé rɔ̄ɔ̄ yān gēé dan de kə́ koy ta rɔ̄ɔ̄ tə́ gə̄ tə́. Dɔ ɓádə́ ngé rɔ̄ɔ̄ yān gə̄ gīrə̄n̄ gidən. De kə́ dəngam gə̄ malang ń noō ń əjan̄ mɔtədə́ aĺ ní, tɔ̄lə̄n̄də́ i ta rɔ̄ɔ̄ tə́. Kété ní ɓōĺ rāā de gə̄ ń ndin̄ kə kumdə́ ní adə̄ nin̄ ndewn̄ najə̄ yādə́ tə́. Ba ngɔlaā ɓáa rɔ̄də́ sɔl̄də́ naā tə́ kə de gə̄ malang ń oyn̄ ní, de gə̄ ń tɔ̄lə̄n̄də́ ta rɔ̄ɔ̄ tə́ ní.

²⁶ Mban̄g kə́ Mesek ō, kə́ Tubal ō nin̄ i noó kə ngé rɔ̄ɔ̄ yādə́ gēé. Dɔ ɓádə́ ngé rɔ̄ɔ̄ yādə́ gə̄ gīr̄ gidədə́. De kə́ dəngam gə̄ malang ń noō ń əjan̄ mɔtədə́ aĺ ní, tɔ̄lə̄n̄də́ i ta rɔ̄ɔ̄ tə́. Kété ní, de gə̄ ń ndin̄ kə kumdə́ ní, ɓōĺ rāādə́ adə̄ ndewn̄ i najə̄ yādə́ nin̄ tə́.

²⁷ Dubə̄n̄də́ naā tə́ kə go̰ rɔ̄ɔ̄ kə́ kété jóo gə̄ gə̄ ń rāān̄ de gə̄ kə́ ndin̄ kə kumdə́ adə̄ ɓōĺ rāādə́ adə̄ ndewn̄ ní. Ngé rɔ̄ɔ̄ gə̄ ngeé ń toō ní aw̄n̄ ɓádá i kə yá̰a̰ rɔ̄ɔ̄ yādə́ gēé. Taān̄ dɔdə́ i kə kaskar yādə́ ō, ənīn̄ der yādə́ i dɔ nīńdə́ tə́ ō.

²⁸ Ta i dɔsí sḭḭ̄ de gə̄ kə́ Ejiptə tə́, adə̄ a tétə̄n̄sí rárák ō, de kə́ dəngam gə̄ kə́ kəja mɔtədə́ aĺ gə̄ ń tɔ̄lə̄n̄də́ ta rɔ̄ɔ̄ tə́ ní, a dubə̄n̄sí dandə́ tə́.

²⁹ Edom ō, mban̄g yādə́ gə̄ ō, ngār yādə́ gə̄ ō ní, nin̄ i noó ō. Nin̄ əhɔn̄ rɔ̄də́ tɔ́gə́ ɓá tā, banī ɓoon̄də́ naā tə́ kə de gə̄ ń oyn̄ ta rɔ̄ɔ̄ tə́ ní. Dubə̄n̄də́ naā tə́ kə de kə́ dəngam kə́ kəja mɔtədə́ aĺ gə̄ ń aw̄n̄ ɓádá ní.

³⁰ Ngār gə̄ malang yā gír de gə̄ kə́ dām̄ mbɔ́r ɓē kə́ ko̰ó̰ tə́ nin̄ i noó ō, naā tə́ kə de kə́ Sidon gə̄ ń oy aw̄n̄ ɓádá ní. Kété ní nin̄ əhɔn̄ rɔ̄də́ tɔgə ngá̰ý, adə̄ nin̄ rāān̄ adə̄ ɓōĺ rāā de gə̄ adə̄ ndewn̄. Ba ngɔlaā ní, de kə́ dəngam gə̄ kə́ kəja mɔtədə́ aĺ gə̄ ń noō ton̄ naā tə́ kə ngé gə̄ ń oyn̄ ta rɔ̄ɔ̄ tə́ ní. Rɔ̄də́ sɔl̄də́ naā tə́ kə de gə̄ ń ton̄ ɓádá ní.

³¹ Dan ń mban̄g kə́ Ejiptə a a̰a̰ ngé rɔ̄ɔ̄ gə̄ malang ń noō anī, tɔ́gən a ur̄ wak ngá̰ý alé, sɔɔ̄ń ngé rɔ̄ɔ̄ yān ni gə̄. Tɔdɔ̄ ni ō, ngé rɔ̄ɔ̄ yān gə̄ ō, a oyn̄ ta rɔ̄ɔ̄ tə́. I mā Kɔ́ɔ̄ɓē Nə́ɓā n m-ə́da najə̄ ń noó ní.

³² A̰á̰ā̰, de gə̄ ń ndin̄ kə kumdə́ ní, mā m-ə́ya̰ mban̄g kə́ Ejiptə adə̄ əla ɓōĺ kemdə́ tə́. Ba ngɔlaā ɓáa nəkɔ́ gə̄gē, ngé rɔ̄ɔ̄ yān gə̄gē, a dubə̄n̄də́ dan ngé kəja mɔtədə́ aĺ gə̄ ń tɔ̄lə̄n̄də́ ta rɔ̄ɔ̄ tə́ ní tə́. Najə̄ ń Kɔ́ɔ̄ɓē Nə́ɓā əda ní n noó.