EJEKIEL 31 - Bibəl ta Sar̄

Mban̄g kə́ Ejiptə to tītə̄ kāgə̄ sedər

¹ Ɔyn̄ de gə̄ aw̄n̄ sedə́ dɔ ɓē kə́ rang tə́ dɔ gúú tə́ rāā ɓāl̄ kutə gidə i kógə̄ḿ kɔ̄ɔ́. Kem ɓāl̄ kə́ nge ko̰ kutə gidə i kógə̄ḿ tə́, kem nāā kə́ nge ko̰ mətá tə́, kə ndɔ̄ nāā kə́ ta kəga dɔɔ́ anī, Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ə́da Parao̰, mban̄g kə́ Ejiptə tə́ ō, kósə de gə̄ ń ni a o̰o̰ ɓē dɔdə́ tə́ ní ō na: Ḭ̄ ń tɔ́gí i ngá̰ý ní, ī-to i tītə̄ náā ō?

³ Ī-to i tītə̄ kāgə̄ sedər kə́ Liban ń ta jīn kə́ tɔ̄ɔ̄ gə̄ majən̄ ngá̰ý ō, ndílən utə̄ dɔ yá̰a̰ malang ō ní. Ni ngāl̄ ngá̰ý kum kə̄ dɔɔ́ adə̄ dɔn ɔdə kil̄ man̄ gə̄.

⁴ Man̄ ndī rāān adə̄ tɔgə. Man̄ kə́ ngá̰ý kə́ gíŕ nángāá rāān adə̄ tɔgə kum kə̄ dɔɔ́. Man̄ taā loo gír gəran gə̄ tə́, gōtə́ anī, nūgə́ kum kə̄ rɔ̄ kāgə̄ gə̄ malang kə́ bembeé tə́.

⁵ Ni ngāl̄ mān̄ kāgə̄ gə̄ malang kə́ bembeé i kə ta kūl̄ man̄ kə́ ngá̰ý ngeé ń toō. Ta jīn kə́ tɔ̄ɔ̄ gə̄ i ngá̰ý ō, ta jīn kə́ dūú gə̄ ngālə̄n̄ ta kaw̄ sa̰y ō.

⁶ Yel̄ gə̄ malang a rāān̄ ɓēdə́ i ta jīn gə̄ tə́ ō, dā̰ kə́ bembeé gə̄ malang ojən̄ ngáńdə́ gə̄ i gír ta jīn kə́ dūú gə̄ tə́ ō, gír de gə̄ ngá̰ý a ndin̄ i ndílən tə́ ō.

⁷ I kāgə̄ kógə̄ḿ kə́ majə ngá̰ý, ni bo ō, ngāl̄ kum kə̄ dɔɔ́ ō, ta jīn gə̄ laan̄ ngá̰ý ō. Tɔdɔ̄ ni tə́la ngəran gə̄ i gíŕ nán̄g kə́ man̄ i ngá̰ý tū tə́ tə́.

⁸ Kāgə̄ sedər kə́ to tītə̄n gətóo kem ndɔr̄ yā Nə́ɓā tə́, kāgə̄ sipəres kə́ ta jīn kə́ tɔ̄ɔ̄ gə̄ majən̄ tītə̄ yān gətóo, kāgə̄ kə́ ndílən i ngá̰ý tītə̄ yān gətóo.

⁹ M-ādə̄n ta jī kə́ tɔ̄ɔ̄ majə ngá̰ý gə̄ ō, adə̄ kāgə̄ gə̄ malang kə́ Eden tə́ ń i ndɔr̄ yā Nə́ɓā ní, əndānən̄ ni.

A tetən̄ mban̄g kə́ Ejiptə tītə̄ kāgə̄ sedər beé

¹⁰ Ngɔlaā ní mā Kɔ́ɔ̄ɓē Nə́ɓā m-ə́da na: Kāgə̄ sedər tɔgə, dɔn ɔdə kil̄ man̄ gə̄ ō, kɔjə rɔ̄ udə kemən tə́ ō.

¹¹ I tām̄ najə̄ ń noō tə́ n m-ə́ya̰n kɔ̄ɔ́ ō, m-ə́lan kem jī ngār kə́ dɔ nápar de gə̄ tə́ ō ní. Ni a rāā kāgə̄ sedər yá̰á̰ kə́ tōr̄ sɔɔ̄ ń yá̰á̰ kə́ majaĺ ń ni-rāā ní.

¹² Loo ń noō tə́ tə̄rā gə̄ kə́ ngé rāā yá̰á̰ kə́ tɔ́gə́də́ tɔȳ yā nápar de gə̄ a gān̄gnən̄ naā tə́ ō, a əya̰nən̄ kɔ̄ɔ́ kə̄ loo ń noō tə́ ō. Ta jīn gə̄ malang tə́sōn̄ ō, taān̄ loo dɔ mbal̄ gə̄ tə́ ō, taān̄ loo kum wól loo gə̄ kə́ kem ɓēé tə́ ō. Ba de gə̄ kə́ dan gír de gə̄ tə́ malang ń kété ndin̄ ndíl kāgə̄ sedər tə́ ní, əya̰n̄ kāgə̄ sedər ba aw̄n̄ ō, nin̄ əya̰n̄ ɓē kɔ̄ɔ́ ō.

¹³ Yel̄ gə̄ malang əhɔn̄ loo dɔ ɓōdə̄ kāgə̄ ń gōr̄yōn̄ tə́ ní ō, dā̰ kə́ bembeé gə̄ malang njə̄rān̄ dɔ ta jīn gə̄ tə́ ō.

¹⁴ I tītə̄ ń noō tá kāgə̄ kə́ rāān̄ man̄ dɔ tə́ majə ō, man̄ asən ō, a asəń tɔgə to̰ alé. Dɔ kāgə̄ sedər a ɔdə kil̄ man̄ gə̄ to̰ alé, ni a asə kɔjə rɔ̄n kə bo yānneé to̰ alé. Tɔdɔ̄ kāgə̄ gə̄ ō, de gə̄ ō ní, i gáŕ kadə̄ nin̄ a oyn̄ ndɔ̄ kógə̄ḿ. Nin̄ a aw̄n̄ gíŕ nángāá naā tə́ kə ngé gə̄ ń risə aw̄ ton̄ ɓádá ní.

¹⁵ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Ndɔ̄ ń kāgə̄ sedər a aw̄ń ɓádá ní, m-ā m̄-rāā kadə̄ yá̰a̰ malang ń jī deē rāā aĺ ní əhɔ ndoō. M-ā m-ɔ̄gə̄ man̄ kə́ bo kə́ gíŕ nángāá nūgə́ najə̄ yān tə́ ō, m-ā m̄-dəba bā yān gə̄ ō, m-ā m-ə́hɔ man̄ kə́ ngá̰ý gotə kógə̄ḿ ō. Mbal̄ gə̄ kə́ Liban tə́ a ndulən̄ najə̄ yān ni tə́ ō, kāgə̄ malang kə́ bembeé a tutən̄ ō.

¹⁶ Dan ń m-ā m̄-rāā kadə̄ kāgə̄ ngeé ń toō aw̄ ɓádá gō ngé gə̄ ń ton̄ ɓádá tə́ ní anī, nápar de gə̄ ń a oōn̄ kōōn loo kəsō tə́ ní, ɓōĺ a rāādə́ adə̄ nin̄ a ndewn̄. Yá̰a̰ malang kə́ gírí nang tə́ ń i kāgə̄ gə̄ malang kə́ Eden tə́ ō, kāgə̄ gə̄ kə́ dɔ mbal̄ kə́ Liban tə́ i kāgə̄ gə̄ kə́ majən̄ tɔȳ madə̄ gə̄ ō, rāān̄ man̄ dɔ tə́ tɔȳ yā gotə gə̄ ō ní, a rāān̄ rɔ̄nel̄.

¹⁷ Nin̄ a risən̄ yā kaw̄ ɓádá naā tə́ kə kāgə̄ sedər ō, naā tə́ kə de gə̄ ń oyn̄ yo rɔ̄ɔ̄ ní ō. Nin̄ rāān̄ seneé ō, ndin̄ ndíĺ tɔ́gə yān tə́ ō dan nápar de gə̄ tə́.

¹⁸ Kem ndɔr̄ kə́ Eden tə́ ní, kāgə̄ kə́ majə tītīí gətóo ō, kə́ bo tītīí gətóo ō. Ɓá tā ba m-ā m̄-rāāī kadə̄ āw̄ gíŕ nángāá naā tə́ kə kāgə̄ gə̄ ń noō. Ā ī-to loo ń noō tə́ kə de gə̄ kə́ əjan̄ mɔtədə́ aĺ ō, kə de gə̄ kə́ oyn̄ yo rɔ̄ɔ̄ ō. Yá̰á̰ ń a rāā mban̄g kə́ Ejiptə ō, a rāā gír deē yān gə̄ malang ō ni n noó. I Kɔ́ɔ̄ɓē Nə́ɓā n əda najə̄ ń noō ní.