EJEKIEL 30 - Bibəl ta Sar̄

Kɔ́ɔ̄ɓē a ɔjə wōn̄g kə́ rāān kə ɓē kə́ Ejiptə kə̄ ndágá

¹ Kɔ́ɔ̄ɓē ɔr̄ najə̄ seḿ, ni ədam̄ na:

² Ḭ̄ ngōn̄ deē, ɔ̄r̄ najə̄ ādə̄m̄, ə́da na: Najə̄ ń Kɔ́ɔ̄ɓē Nə́ɓā əda ní n toó: Ī-nōōī rɔ̄sí tām̄ yā ndɔ̄ ń yá̰á̰ kə́ to kum kaȳ aĺ a rāań yá̰á̰ tə́ ní.

³ A̰á̰ā̰, ndɔ̄ yā Kɔ́ɔ̄ɓē a reē noó, dɔ to ngɔr ngá̰ý. I ndɔ̄ kə́ kil̄ man̄ a ndul ndí ndḭ́. I kum mbang ń a gāngə̄nəń sarya dɔ nápar de gə̄ tə́ ní.

⁴ Rɔ̄ɔ̄ a ugə̄ dɔ nang kə́ Ejiptə tə́. Ɓōĺ a rāā de gə̄ kadə̄ a ndewn̄ bátə́ ta kaw̄ kə̄ dɔ nang kə́ Etiopi tə́. A tɔ̄lə̄n̄ de gə̄ kə́ Ejiptə tə́ ō, a ɓogən̄ yá̰a̰ kənge yādə́ gə̄ ō, a nujən̄ ɓē yādə́ kɔ̄ɔ́ ō.

⁵ De kə́ Etiopi tə́ gə̄ ō, kə́ Put tə́ gə̄ ō, kə́ Lud tə́ gə̄ ō, kə́ Arabə tə́ gə̄, kə́ Libi tə́ gə̄ ō, ngán Israel gə̄, a tə́sōn̄ ta rɔ̄ɔ̄ tə́.

⁶ Mā Kɔ́ɔ̄ɓē m-ə́da na: Əla gír Migədol dām̄ mbɔ́r ɓē kə́ ko̰ó̰ tə́, bátə́ Asuwan dām̄ mbɔ́r ɓē kə́ geleé tə́ ní, ngé gə̄ a rɔ̄ɔ̄n̄ dɔ ɓē kə́ Ejiptə tə́ ní, a tɔ̄lə̄n̄də́ ta rɔ̄ɔ̄ tə́ ō, tɔ́gə de kə́ Ejiptə gə̄ ń kɔjə rɔ̄ i ngá̰ý tū tə́ ní a əsō kɔ̄ɔ́ ō. Najə̄ ń mā Kɔ́ɔ̄ɓē Nə́ɓā m-ə́dá ní n noó.

⁷ Ɓē kə́ Ejiptə a tél dəla loo kə́ ndágə doy tɔȳ gotə dəla loo gə̄ malang. Ɓē yān gə̄ a télən̄ i kūbə̄rū mbal̄ gə̄ kə́ kánə̄n̄də́ dɔ naā tə́ bing gə̄.

⁸ Dan ń m-ā m-ə́la hor dɔ ɓē tə́ kə taá ō, a tə́tə̄n̄ kə̄ngā ngé rɔ̄ɔ̄ dɔ tə́ gə̄ rárák kɔ̄ɔ́ ō anī, de gə̄ malang a gerə̄n̄ kadə̄ Kɔ́ɔ̄ɓē i mā.

⁹ Ndɔ̄ ń noō tə́ ní, ngé kaw̄ kəla gə̄ a aw̄n̄ i kə too boó. M-ā m-ə́ládə́ i yā kadə̄ nin̄ aw̄ rāān̄ ɓē kə́ Etiopi kadə̄ ndew, ni ń gír̄ kadə̄ na n-ndi na i kanjə̄ sōl̄ yá̰á̰ kógə̄ḿ ní. Ba ndɔ̄ ń m-ā m̄-nujəń ɓē kə́ Ejiptə ní, ɓōĺ a rāā de kə́ kemeé gə̄ kadə̄ a ndewn̄. Ndɔ̄ ní dɔ to ngɔr!

¹⁰ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: M-ā m-ún Nabukodonosor, mban̄g kə́ Babilon yā rāań kadə̄ de kə́ Ejiptə gə̄ gətóon̄ kɔ̄ɔ́ malang.

¹¹ Nin̄ ō, gír deē yān gə̄ ō, ń rāā yá̰á̰ kə́ kə dɔ́nɔ́ yādə́ tɔȳ yā gotə nápar de gə̄ malang ní, a reēn̄ yā nujə ɓē ń toō kɔ̄ɔ́. Nin̄ a rɔ̄ɔ̄n̄ de kə́ Ejiptə gə̄ ō, nin̄ a rāān̄ kadə̄ nīń gə̄ a taān̄ loo kem ɓē ō.

¹² M-ā m̄-rāā kadə̄ ta jī bā Nil kə́ tɔ̄gə̄ iīn̄ kɔ̄ɔ́ ō, m-ā m-ə́la ɓē kem jī de kə́ majaĺ gə̄ tə́ ō. M-ā m̄-nujə ɓē kɔ̄ɔ́ ō, M-ā m̄-nujə yá̰a̰ kənge yān gə̄ malang kɔ̄ɔ́ ō, kə ta kūl̄ tə̄rā gə̄. I mā Kɔ́ɔ̄ɓē n m-ə́da najə̄ ń noō ní.

¹³ Najə̄ ń mā Kɔ́ɔ̄ɓē Nə́ɓā m-ə́dá ɓáý to̰ ní n toó: M-ā m̄-rāā kadə̄ ɓesə̄ gə̄ gətóon̄ kɔ̄ɔ́ ō, m-ā m̄-rāā kadə̄ yá̰á̰ kə́ tɔ́sə̄ kum gotədə́ gə̄ ń ton̄ kem ɓē kə́ Mempis tə́ ní gətóon̄ kɔ̄ɔ́ ō. Ngār gə̄ a ton̄ dɔ nang kə́ Ejiptə tə́ to̰ aĺ ō, m-ā m-ə́la ɓōĺ kem de gə̄ tə́ kem ɓēé malang kə taá ō.

¹⁴ M-ā m̄-nujə ɓē kə́ Ejiptə kə́ dām̄ mbɔ́r ɓē kə́ geleé tə́ kɔ̄ɔ́ ō, m-ā m-ə́la hor dɔ ɓē kə́ Soan tə́ ō, m-ā m-ún sarya gāngə̄ḿ yā rāań yá̰a̰ kə ɓē kə́ Tebə ō.

¹⁵ Sin ń i ɓē kə́ nge ngɔ̄m̄ ɓē kə́ Ejiptə tə́ ní, m-ā m̄-bə̄gā wōn̄g yāḿ kə́ ngá̰ý dɔn tə́ ō, m-ā m̄-rāā kadə̄ de kə́ Tebə gə̄ ń nin̄ i ngá̰ý ní gətóon̄ kɔ̄ɔ́ ō.

¹⁶ M-ā m-ə́la hor dɔ Ejiptə tə́, ɓōĺ a rāā de kə́ Sin gə̄ adə̄ nin̄ a ndewn̄. A mbutən̄ bəlo kógə̄ḿ tū ndogə̄ mbal̄ kə́ Tebə tə́, adə̄ man̄ a taā loo kem ɓēé.

¹⁷ A tɔ̄lə̄n̄ balsáa gə̄ kə́ On ō, kə́ Pi Beset ō, ta rɔ̄ɔ̄ tə́. Ba gotə de kə́ rang kə́ kem ɓēé gə̄ ń a na̰yn̄ ní, a ɔyn̄də́ yā kaw̄ sedə́ dɔ ɓē kə́ rang tə́ dɔ gúú tə́.

¹⁸ Dan ń m-ā m̄-tetə tɔ́gə ɓē kə́ Ejiptə kɔ̄ɔ́, adə̄ tɔ́gən ń a ɔjəń rɔ̄n ní gətóo kɔ̄ɔ́ anī, mbang a əɓa dɔ ɓē kə́ Tapanes tə́ alé. Kil̄ man̄ kə́ ndul ndí ndḭ́ a utə̄ dɔ ɓē kɔ̄ɔ́ ō, a ɔyn̄ de gə̄ ń ndin̄ gō nang kə́ kadə tə́ gə̄ ní yā kaw̄ sedə́ dɔ ɓē kə́ rang tə́ dɔ gúú tə́.

¹⁹ M-ā m-ún sarya gāngə̄ḿ yā rāań yá̰a̰ kə ɓē kə́ Ejiptə ō, de gə̄ malang a gerə̄n̄ kadə̄ Kɔ́ɔ̄ɓē i mā ō.

Mban̄g kə́ Babilon i yá̰a̰ rāā kəla yā Nə́ɓā

²⁰ Ɔyn̄ de gə̄ aw̄n̄ sedə́ dɔ ɓē kə́ rang tə́ dɔ gúú tə́ rāā ɓāl̄ kutə gidə i kógə̄ḿ kɔ̄ɔ́. Kem ɓāl̄ kə́ nge ko̰ kutə gidə i kógə̄ḿ tə́, kem nāā kə́ ta kəga dɔ tə́, kə ndɔ̄ nāā kə́ nge ko̰ sīrí anī, Kɔ́ɔ̄ɓē ɔr̄ najə̄ seḿ, ədam̄ na:

²¹ Ḭ̄ ngōn̄ deē, ōō! m̄-tētə̄ jī Parao̰, mban̄g kə́ Ejiptə tə́ kɔ̄ɔ́. De kə́ do̰ō̰ ta do kə́ jīn tə́ gətóo ō, de kə́ adə̄n kḭ̄ḭ̄ gətóo ō. De kə́ do̰ō̰ jīn kə ta kūbūú kadə̄ əngeń tɔ́gə yā kəhɔń kaskar gətóo.

²² Ba ngɔlaā ní, yá̰á̰ ń mā Kɔ́ɔ̄ɓē Nə́ɓā m-ə́dá ní n toó: M-ā m̄-rāā yá̰á̰ kə́ tōr̄ kə Parao̰, mban̄g kə́ Ejiptə. M-ā m̄-tētə̄ jīn jōó mbak kɔ̄ɔ́. Jīn kə́ to karī a to tītə̄ jīn kə́ tétə̄ kɔ̄ɔ́ beē. Loo ń noō tə́, m-ā m̄-rāā kadə̄ kaskar kə́ jīn tə́ teē əsō.

²³ M-ā m̄-rāā kadə̄ de kə́ Ejiptə tə́ gə̄ tḭ̄ḭ̄n̄ naā kə̄ loo gə̄ tə́, dan nápar de gə̄ tə́. M-ā m-ə́la sedə́ kə̄ loo gə̄ tə́ kem ɓē kə́ rang gə̄ tə́.

²⁴ M-ā m̄-rāā mban̄g kə́ Babilon kadə̄ tɔ́gə jīn to tɔȳ kə́ kété ō, m-ā m-ə́la kaskar yāḿ jīn tə́ ō. M-ā m̄-tétə̄ jī mban̄g kə́ Ejiptə kɔ̄ɔ́ ō, ni a sōḿ tītə̄ de kə́ ənge do kə́ asə yon beé ō.

²⁵ A̰á̰ā̰, m-ā m̄-rāā mban̄g kə́ Babilon kadə̄ tɔ́gə jīn tɔȳ kə́ kété ɓáý ō, tɔ́gə jī mban̄g kə́ Ejiptə a gətóo adə̄ jīn gə̄ a urə̄n̄ wak kɔ̄ɔ́ ō. M-ā m-ə́la kaskar yāḿ jī mban̄g kə́ Babilon tə́, adə̄ ni a rɔ̄ɔń ɓē kə́ Ejiptə. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā.

²⁶ M-ā m̄-rāā de kə́ Ejiptə tə́ gə̄ kadə̄ a tḭ̄ḭ̄n̄ naā kə̄ loo gə̄ tə́, dan nápar de gə̄ tə́. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā.