EJEKIEL 3 - Bibəl ta Sar̄

¹ Deē ń a ɔr̄ najə̄ seḿ ní əda na: Ḭ̄ ngōn̄ deē, ə́sa ndāŕ ndang najə̄ kə́ ɓír̄ gidə naā tə́ ń adīn̄ toó, ba gō tə́ anī aw̄ ɔr̄ najə̄ kə ngán Israel gēé.

² m̄-tḛḛ̄ taḿ anī, ni-rāā adə̄ m-ə́sa ndāŕ ndang najə̄ kə́ ɓír̄ gidə naā tə́ ní.

³ Gō tə́ anī ni ədam̄ na: Ḭ̄ ngōn̄ deē, ə́sa ndāŕ ndang najə̄ kə́ ɓír̄ gidə naā tə́ ń m-ādī ní ādə̄ ndān̄ kemií ō, ūləń rɔ̄í ō. Adə̄ m-ə́sa ndāŕ ndang najə̄ ní. Anī ndāŕ ní nel̄ kem taḿ tə́ tītə̄ yibə̄ tejə beé.

⁴ Deē ń a ɔr̄ najə̄ ní ədam̄ na: Ḭ̄ ngōn̄ deē, āw̄ rɔ̄ ngán Israel gə̄ tə́, ba ə́dádə́ najə̄ ń m-ā m-ə́daī ní.

⁵ Tɔdɔ̄ gír de gə̄ kə́ ta kɔr̄də́ i ta tə̄rā kə́ loo ger̄ kum ngan̄g ngá̰ý n m-ə́laī kə̄ rɔ̄də́ tə́ ní alé. I ngán Israel gə̄ n m-ə́laī kə̄ rɔ̄də́ tə́ ní.

⁶ Ré i gír de kə́ ngá̰ý gə̄ kə́ ta kɔr̄də́ i ta tə̄rā kə́ loo ger̄ kum ngan̄g ngá̰ý, adə̄ ḭ̄ ī-ger̄ ta yādə́ ní alé n m-ə́laī kə̄ rɔ̄də́ tə́ ní anī, nin̄ a oōn̄ najə̄ yāí.

⁷ Banī ngán Israel gə̄ a ndigən̄ koō najə̄ yāí alé, tɔdɔ̄ nin̄ ndigən̄ koō najə̄ yāḿ alé. Tām̄ nin̄ malang ní dɔdə́ ngan̄g ngá̰ý ō, dumə̄n̄ naā ngá̰ý ō.

⁸ Ba m-ā m̄ rāā kadə̄ dɔí a ngan̄g tītə̄ yādə́ ō, ā ī-dum̄ naā tītə̄ yādə́ ō.

⁹ M-ā m̄-rāā dɔí kadə̄ a ngan̄g tītə̄ mbal̄ diyamā̰a̰ beé ō, kadə̄ a ngan̄g mān̄ kɔkərɔ ō. Ī-lōō ɓōĺdə́ ō, ī-lōō ra ta kumdə́ tə́ a ndew ō. Tām̄ i gír de kə́ ngé mbātə́ najə̄ gə̄.

¹⁰ Ni na̰y kə̄ loo kɔr̄ najə̄ tə́ seḿ ɓáý, əda na: Ḭ̄ ngōn̄ deē, ī-nēl̄ mbīí majə ōoń najə̄ ń m-ā m-ə́daī ní ō, ī-taā najə̄ yāḿ ə̄ndā ngarā̰ kemií tə́ ō.

¹¹ Ba gō tə́ anī āw̄ rɔ̄ ngákó̰ó̰í gə̄ ń i ngán Israel ní tə́, nin̄ ń ɔyn̄də́ dɔ gúú tə́ reēn̄ sedə́ laā ní. Ɔ̄r̄ najə̄ sedə́, ə́dádə́ na: Najə̄ ń Kɔ́ɔ̄ɓē Nə́ɓā əda ní n toó: Ká nin̄ oōn̄ najə̄ yāí aáā, oōn̄ aĺ aáā, ɔ̄r̄ najə̄ sedə́.

¹² Loo ń noō tə́ Ndíĺ Nə́ɓā unəm̄ nang tə́ kum kə̄ dɔɔ́, anī m-ōō najə̄ kə́ kun ndū kə̄ dɔɔ́ ngá̰ý kədań ń toō gidəḿ tə́: J-ənī pā tɔ̄ȳ Kɔ́ɔ̄ɓē loo ń ni-rāā yá̰á̰ kə́ to kɔsə gɔn yān tū tə́ ní.

¹³ M-ōō kōō bɔ̄gə̄ yá̰á̰ kə́ kə kumuú gə̄ ń a ɔdə naā ní ō, kōō nja púsə gə̄ kə́ kadədə́ tə́ ō. Kōō yá̰a̰ gə̄ ní ɓār̄ to ɓōĺ ngá̰ý.

¹⁴ Ndíĺ unəm̄ nang tə́ kum kə̄ dɔɔ́ ní, aw̄ seḿ. Kɔ́ɔ̄ɓē əhɔm̄ kə tɔ́gəneé i kəhɔ kə́ m-ásə dum̄ tan aĺ ō, m-āw̄ i kə kemḿ kə́ nelə̄m̄ aĺ ō, wōn̄g rāām̄ ō.

¹⁵ M-ūgə̄ Telabib, rɔ̄ de gə̄ ń əhɔn̄də́ aw̄n̄ sedə́ dɔ gúú tə́ adə̄ ndin̄ kadə bā Kebar tə́ ní. m̄-ndi sedə́ ndɔ̄ sīrí kə ángaləḿ kə́ nujə sák sák kɔ̄ɔ́.

Ejekiel a tél nge kum̄ loo tām̄ yā ngán Israel gə̄ tə́

¹⁶ Gō ndɔ̄ kə́ sīrí gə̄ tə́ anī, Kɔ́ɔ̄ɓē ɔr̄ najə̄ seḿ, əda na:

¹⁷ Ḭ̄ ngōn̄ deē, m-ə̄ndāī i nge kum̄ loo tə́ tām̄ yā ngán Israel gə̄ tə́. Ā ōō najə̄ kɔrə̄ḿ ō, ā ī-tāā ngán Israel gə̄ yā kadə̄m̄ ō.

¹⁸ Dan ń m-ā m-ə́da nge rāā majaĺ na: Ā óy rɔ̄kum, ba ré ī-tāān adə̄ tūr̄ hálən ba ndiń kə kumneé alé anī, nge rāā majaĺ ní a oy sɔɔ̄ń yá̰a̰ rāān kə́ gōtə́ aĺ gə̄, banī m-ā m-ə̄ndā najə̄ yon i dɔí ḭ̄ tə́.

¹⁹ Ba ré ḭ̄ ī-tāān banī ni-lōō gíŕ yá̰a̰ rāān kə́ gōtə́ aĺ gə̄ tə́ aĺ ō, lōō gíŕ hálən kə́ majaĺ tə́ aĺ ō anī, ni a oy sɔɔ̄ń yá̰a̰ rāān kə́ gōtə́ aĺ gə̄, banī ḭ̄ ā ájə rɔ̄í

²⁰ Yá̰á̰ kə́ rang ń a rāā yá̰a̰ to̰ ní n toó: Ré de kə́ gōtə́ tūr̄ gidən kɔ̄ɔ́ ta yá̰á̰ kə́ majə tə́, ba rāā yá̰á̰ kə́ majanī, m-ā m̄-rāā kadə̄ ni a əsō kum gūmbə̄ tə́ ō, ni a oy ō. Ré ḭ̄ ī-tāān najə̄ yá̰á̰ kə́ to yo ń to kété non tə́ ní aĺ anī, ni a oy sɔɔ̄ń yá̰a̰ rāān kə́ majaĺ gə̄. M-ā m-āw̄ gíŕ yá̰a̰ rāān kə́ majə kə́ kété gə̄ tə́ to̰ alé, banī m-ā m-ə̄ndā najə̄ yon i dɔí ḭ̄ tə́.

²¹ Ba ré ī-tāā de kə́ gōtə́ ní kadə̄ rāā yá̰á̰ kə́ majaĺ alé ō, ni-lōō gírí ō anī, ni a ndi kə kumneé sɔɔ̄ń tāā ń ī-tāān ní ō, ḭ̄ ā ájə rɔ̄í ō.

Nə́ɓā əndā gúu dɔ Ejekiel tə́ kadə̄ ndi tan mbóo

²² Kɔ́ɔ̄ɓē əhɔm̄ kə tɔ́gəneé ɓáý to̰ ba ədam̄ na: Ḭ́ḭ dɔɔ́ āw̄ kem wól loo tə́, na m-ā m-ɔ̄r̄ najə̄ seí loo ń noō tə́.

²³ M-ḭ́ḭ dɔɔ́ m-āw̄ kem wól loo tə́ ō, anī kɔsə gɔn yā Kɔ́ɔ̄ɓē ɔjə rɔ̄n kə̄ ndágá loo ngeé ń noō tə́. Kɔsə gɔn ní to tītə̄ nge ń m-á̰a̰ kadə bā Kebar tə́ ní. Loo ń noō tə́ m-ə̄sō m̄-sébə kumḿ nang tə́.

²⁴ Anī Ndíĺ Nə́ɓā udə kemḿ tə́ ba un udəm̄ dɔɔ́ gogə́. Kɔ́ɔ̄ɓē ədam̄ na: Āw̄ údə́ kújú looí ba ūtə̄ ta kújə dɔí tə́.

²⁵ Ḭ̄ ngōn̄ deē ōō! De gə̄ a tṵ́ṵ̄īn̄ kə kəlaá. Loo ń noō tə́ ā ásə teē ndágá yā ndi sedə́ to̰ alé.

²⁶ M-ā m̄-rāā kadə̄ ndo̰í a tə́ya̰ kem taí tə́, kadə̄ gír kəla ndo̰í do̰ō̰ naā yā kadə̄ ā ɔ̄r̄ najə̄ alé, adə̄ ā ásə́ ndán̄g gír de kə́ ngé dum̄ naā gə̄ ń noō to̰ alé.

²⁷ Ba ré m-ā m-āw̄ kə yá̰á̰ kógə̄ḿ yā kədadə́ kə ta kūlīí anī, m-ā m̄-rāāī ásə kɔr̄ najə̄ gogə́. Loo ń noō tə́ ā ə́dádə́ na: Najə̄ ń Kɔ́ɔ̄ɓē Nə́ɓā əda ní n toó. Ngé kə́rēý gə̄ a oōn̄ ō, ngé kə́rēý gə̄ a mbātə́n̄ koō ō. Tām̄ nin̄ i gír de kə́ ngé dum̄ naā gə̄.