EJEKIEL 29 - Bibəl ta Sar̄

Najə̄ kə́ əlanə̄ń ɓōĺ kem ɓē kə́ Ejiptə tə́

¹ Ɔyn̄ de gə̄ dɔ gúú tə́ aw̄n̄ sedə́ dɔ ɓē kə́ rang tə́ rāā ɓāl̄ kutə kógə̄ḿ kɔ̄ɔ́. Kem nāā kə́ nge ko̰o̰ kutə tə́, kə ndɔ̄ nāā kə́ nge ko̰o̰ kutə gidə i jōó anī, Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ī-tūr̄ kumií kə̄ rɔ̄ Parao̰ mban̄g kə́ Ejiptə tə́ ba ɔ̄r̄ najə̄ seneé ādə̄m̄ ō, ə́lań ɓōĺ kem ɓē kə́ Ejiptə tə́ kə taá malang ō.

³ Najə̄ ń mā Kɔ́ɔ̄ɓē Nə́ɓā m-ə́dan ní n toó: Ḭ̄ Parao̰, mban̄g kə́ Ejiptə, m-ā m̄-rāā yá̰á̰ kə́ tōr̄ seí, ī-to tītə̄ mar kə́ bo kə́ to kum bā Nil tə́. Ə́da na bā na i yāí, na i ḭ̄ n na ī-rāā bā ní.

⁴ I beé ɓá ní m-ā m̄-mbútə̄ taí yā tə́la gində̄ kə́ ta rugə tū tə́. M-ā m̄-tə́ya̰ kānjə̄ gə̄ kə́ kum bā bo yāí tə́ tū kə̄yā̰ gidií gə̄ tə́.

⁵ M-ā m-ə̄nīsí kem dəla loo tə́, ḭ̄ ō kānjə̄ gə̄ ń noō malang ō. Ā óy nang tə́. De kə́ yā kuniī a gətóo, de kə́ yā kənī kem bəlo yo tə́ a gətóo. M-ā m-ādə̄ ā ī-téĺ yá̰a̰ kəsa yā dā̰ kə́ bembeé gə̄ ō, yā yel̄ gə̄ ō.

⁶ Loo ń noō tə́, de kə́ Ejiptə gə̄ malang a gerə̄n̄ kadə̄ Kɔ́ɔ̄ɓē i mā. Dḭḭ̄ ń ī-dḭḭ̄ ngán Israel gə̄ ní hɔɔ́lɔ̄ tītə̄ yā mu tə̄ɓā beé.

⁷ Dan ń nin̄ ndə̄nān̄ rɔ̄də́ rɔ̄í tə́ anī, ḭ̄ ī-tetə kɔ̄ɔ́. Ḭ̄ ādə̄də́ do kār̄ bɔ̄gə̄də́ tə́ ō, ḭ̄ ɔ̄r̄ tɔ́gə́də́ kɔ̄ɔ́ ō.

⁸ I tām̄ najə̄ ń noō tə́ n yá̰á̰ mā Kɔ́ɔ̄ɓē Nə́ɓā m-ə́dá ní n toó ní: M-ā m-ə́la kə ngé rɔ̄ɔ̄ gēé kadə̄ a rɔ̄ɔ̄īn̄ ō, m-ā m̄-rāā kadə̄ de gə̄ gē dā̰ gə̄ gē kə́ dɔ nang yāí tə́ a oyn̄ ō.

⁹ A nujən̄ ɓē kə́ Ejiptə ō, ni a tél dəla loo ō. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā. Ḭ̄ ə́da na bā Nil na i yāí ḭ̄, ə́da na i ḭ̄ n na ī-rāā bā Nil.

¹⁰ Tām̄ najə̄ ń noō tə́ ní m-ā m̄-rɔ̄ɔ̄sí sḭḭ̄ kə bā yāí. M-ā m̄-rāā ɓē kə́ Ejiptə kadə̄ tél kūbə̄rū mbal̄ kə́ ra dɔ naā tə́ bing. Ɓē a tél dəla loo, a əla gír i Migədol bátə́ ɓē kə́ Asuwan tə́ ō, dɔ nin̄ ɓē kə́ Etiopi tə́ ō.

¹¹ Deē aké dā̰ kə́ yā mān̄ loo ń noō tə́ a gətóo ō, ɓē kə́ Ejiptə a rāā ɓāl̄ kutə sɔ́ kanjə̄ kadə̄ deē kógə̄ḿ i kemeé ō.

¹² M-ā m̄-rāā ɓē kə́ Ejiptə kadə̄ tél dəla loo kə́ ndágə doy tɔȳ gotə dəla loo gə̄ malang. Ɓē yān gə̄ a nujən̄ tɔȳ gotə ɓē gə̄ malang. M-ā m̄-rāā de kə́ Ejiptə gə̄ kadə̄ a tḭ̄ḭ̄n̄ naā kə̄ loo gə̄ tə́ kə̄ dan nápar de gə̄ tə́ ō, bátə́ ɓāl̄ kutə sɔ́.

¹³ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Gō ɓāl̄ kə́ kutə sɔ́ tə́ anī, m-ā m-ɔ́y de kə́ Ejiptə tə́ gə̄ dan gír de gə̄ tə́, loo gə̄ ń nin̄ aw̄n̄ tū tə́ dɔ gúú tə́ ní, yā kɔsə njadə́ naā tə́.

¹⁴ M-ā m̄-tél kə dəngáy gēé yā reē sedə́, m-ā m̄-tél yā reē sedə́ dɔ nang kə́ Ejiptə tə́, dām̄ mbɔ́r ɓē kə́ geleé tə́, kem ɓē ń ojən̄də́ tū tə́ ní tə́. Nin̄ a əndān̄ ɓē ko̰o̰ kógə̄ḿ kə́ dūú loo ń noō tə́,

¹⁵ I ɓē ko̰o̰ kə́ dūú tɔȳ gotə ɓē ko̰o̰ gə̄ malang ō, nin̄ a ɔsən̄ rɔ̄də́ kə̄ dɔɔ́ dɔ gotə nápar de gə̄ tə́ to̰ aĺ ō. M-ā m̄-rāā kadə̄ kutədə́ tél kə̄ gogə́ ō, nin̄ a asən̄ ndi dɔ madə̄də́ gə̄ tə́ to̰ aĺ bátə́ ō.

¹⁶ Yá̰á̰ kə́ kadə̄ ngán Israel gə̄ əndānəń kemdə́ dɔdə́ tə́ to̰ a gətóo. Nin̄ a rāān̄ majaĺ ń i tūr̄ rɔ̄də́ kə̄ rɔ̄ de gə̄ kə́ Ejiptə tə́ ní to̰ alé. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā.

Mban̄g Nabukodonosor a taā ɓē kə́ Ejiptə

¹⁷ Ɔyn̄ de gə̄ dɔ gúú tə́ aw̄n̄ sedə́ dɔ ɓē kə́ rang tə́ rāā ɓāl̄ kutə jōó gidə i sīrí kɔ̄ɔ́. Banī kem ɓāl̄ kə́ nge ko̰ kutə jōó gidə i sīrí tə́, kem nāā kə́ ta kəga dɔ tə́, kə ndɔ̄ nāā kə́ ta kəga dɔɔ́ anī, Kɔ́ɔ̄ɓē ɔr̄ najə̄ seḿ, ni ədam̄ na: Dɔ tə́, kem ɓāl̄ kə́ nge ko̰ kutə joō gidə i sīrí tə́ ní, Kɔ́ɔ̄ɓē ɔr̄ najə̄ seḿ, ədam̄ na:

¹⁸ Ḭ̄ ngōn̄ deē, ōō! Nabukodonosor, mban̄g kə́ Babilon ra kə ngé rɔ̄ɔ̄ yān gēé adə̄ rāān̄ kəla ngan̄g ngá̰ý gə̄ yā rɔ̄ɔń Tir. Nənga dɔ áskar yān gə̄ ɔr̄ kɔ̄ɔ́ malang ō, əngen̄ do dɔ bɔ̄gə̄də́ gə̄ tə́ ō. Ɓá tā ba yá̰á̰ ń mban̄g nin̄ kə ngé rɔ̄ɔ̄ yān gēé loo rɔ̄ɔ̄ ɓē kə́ Tir tə́ ní, nin̄ əngen̄ yá̰á̰ kógə̄ḿ gírí jī ɓē kə́ Tir tə́ alé.

¹⁹ Tām̄ najə̄ ń noō tə́ ní, yá̰á̰ ń mā Kɔ́ɔ̄ɓē Nə́ɓā m-ə́dá ní n toó: M-ā m-ə́la ɓē kə́ Ejiptə kem jī Nabukodonosor, mban̄g kə́ Babilon tə́ tə́. Ni a ɔy yá̰a̰ kənge kə́ kem ɓēé malang kɔ̄ɔ́ ō, ni a nujə ɓē ō. Loo ń noō tə́ ni a ɔy yá̰a̰ kənge yān gə̄ kə́ kəhɔ ta rɔ̄ɔ̄ tə́ yā nə̄ɓō áskar yān gə̄ kadə̄ i kəgā yādə́.

²⁰ M-ādə̄n ɓē kə́ Ejiptə yā kəgānəń tām̄ kəla gə̄ ń ni-rāā tə́ ní. Tɔdɔ̄ ngé rɔ̄ɔ̄ yān gə̄ rāān̄ kəla tām̄ yāḿ tə́. Najə̄ ń mā Kɔ́ɔ̄ɓē Nə́ɓā m-ə́dá ní n noó.

²¹ Dan ngeé ń noō tə́ ní, m-ā m̄-rāā kadə̄ ngán Israel gə̄ əngen̄ tɔ́gə́ ngá̰ý. Ba ḭ̄ Ejekiel, m-ā m-ādī tɔ́gə kadə̄ ā ɔ̄rəń najə̄ sedə́. Loo ń noō tə́ nin̄ a gerə̄n̄ kadə̄ Kɔ́ɔ̄ɓē i mā.