EJEKIEL 28 - Bibəl ta Sar̄

Najə̄ kə́ əlanə̄ń ɓōĺ kem ngār kə́ Tir tə́

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ə́da ngār kə́ Tir najə̄ ń toō ń mā Kɔ́ɔ̄ɓē Nə́ɓā m-ə́dá ní: Ḭ̄ ɔ̄r̄ najə̄ kə kɔjə rɔ̄ kə́ ngá̰ý kemií tə́ ə́da na ḭ̄ na i nə́ɓā kógə̄ḿ. m̄-ndi dɔ kōr̄ kāgə̄ mbang tə́ i tītə̄ nə́ɓā kógə̄ḿ dan bā bo tə́. Ḭ̄ ɔ́jəń na ásiī naā kə nə́ɓā kógə̄ḿ. Tá ḭ̄ i deē karī, ḭ̄ i nə́ɓā kógə̄ḿ alé.

³ Ḭ̄ ɔ́jəń na kum kedə̄ yāí na mān̄ yā Danel. Ḭ̄ ī-gír̄ ə́da na ásə ger̄ yá̰á̰ kə́ to loo mundə̄ tə́ gə̄.

⁴ Ḭ̄ ə́ngé yá̰a̰ kə ta kūl̄ ger̄ rāā yá̰a̰ ō, kə ta kūl̄ kur̄ dɔí ō. Ī-kán̄ lɔ́r ō, gində̄ arjā̰a̰ ō kə̄ dɔ naā tə́ tām̄ yāí tə́.

⁵ Ḭ̄ ī-rāā adə̄ yá̰a̰ kənge yāí ḭḭ dɔ madə̄ tə́ kə ta kūl̄ ger̄ kə́ ī-ger̄ rāā gātə̄ ngá̰ý, ba yá̰a̰ kənge ní rāā adə̄ kɔjə rɔ̄ i ngá̰ý kemií tə́.

⁶ I tām̄ najə̄ ń noō tə́ n yá̰á̰ ń mā Kɔ́ɔ̄ɓē Nə́ɓā m-ə́dá ní n toó ní: Ḭ̄ ɔ́jəń na ásiī naā kə nə́ɓā kógə̄ḿ.

⁷ Tām̄ najə̄ ń noō tə́ ní, m-ā m-ə́la kə nápar de gə̄ ń nin̄ i ngé rāā yá̰a̰ kə dɔ́nɔ́ tɔȳ de gə̄ malang ní kadə̄ rɔ̄ɔ̄īn̄. Nin̄ a nujən̄ yá̰á̰ kə́ majə gə̄ ń ī-rāā kə ta kūl̄ kum kedə̄ yāí ní kɔ̄ɔ́ kə kaskaraá ō, nin̄ a kídə̄n̄ bo yāí ō.

⁸ Nin̄ a rāāīn̄ kadə̄ ī-risə āw̄ ɓádá, ā oy yo kə́ majaĺ ngá̰ý dan bā boó.

⁹ Dan ń ā ī-ra no ngé tɔ̄līí gə̄ tə́ ní, ā ə́da na ḭ̄ na i nə́ɓā kógə̄ḿ ɓáý a? Dan ń ḭ̄ i kem jī ngé tɔ̄līí gə̄ tə́ ní, yá̰á̰ kógə̄ḿ kə́ ɔjə kadə̄ ḭ̄ i nə́ɓā ní gətóo.

¹⁰ Ā óy yo kə́ to rɔ̄sɔl̄ yā de gə̄ ń əjan̄ mɔtədə́ aĺ ní, jī tə̄rā gə̄ kə́ ngé tɔ́sī tə́. I mā Kɔ́ɔ̄ɓē Nə́ɓā n m-ɔ̄r̄ najə̄ ní ō, yá̰á̰ ń m-ə́dá ní n noó ō.

¹¹ Kɔ́ɔ̄ɓē ɔr̄ najə̄ seḿ ɓáý to̰, ni ədam̄ na:

¹² Ḭ̄ ngōn̄ deē, ún pā yo kógə̄ḿ dɔ mban̄g kə́ Tir tə́. Ā ə́dan na: Najə̄ ń Kɔ́ɔ̄ɓē Nə́ɓā ɔr̄ ní n toó: Kété ní ḭ̄ i yá̰á̰ ndájə̄ kə́ majə ɔtə̄ kə taá, kum kedə̄ yāí i ngá̰ý ō, ī-majə deē ngá̰ý ō.

¹³ Ī-ndi i Eden, kem ndɔr̄ yā Nə́ɓā tə́, mbal̄ gə̄ kə́ gātə̄də́ i ngá̰ý gə̄ utə̄n̄ gidií, adə̄ i mbal̄ sarduan ō, topajə ō, diyamā̰a̰ ō, kərijolitə ō, kɔrnalin ō, jaspə ō, sapir ō, gərenatə ō, emerodə ō. Ḭ̄ ō̰ō̰ nə̄ngá kə́ tayā tayā gə̄ kə́ rāān̄də́ kə lɔ́r, rāān̄ nə̄ngá gə̄ ní i ndɔ̄ ń rāānəń ḭ̄ tə́ ní.

¹⁴ Kété ní m̄-gə̄rāī kadə̄ ḭ̄ i Serubḛ kə́ nge ngɔ̄m̄ loo kə́ ī-jā̰ā̰ bɔ̄gīí. Ī-ndi dɔ mbal̄ yāḿ kə́ táĺ tə́ ō, ā ī-njə̄rā i dan mbal̄ kə́ ndə́lē ngá̰ý gə̄ tə́ ō.

¹⁵ Əla gír ndɔ̄ ń rāāīnəń tə́ ní, najə̄ kə́ majaĺ kə́ yā kəda dɔí tə́ gətóo, bátə́ ndɔ̄ ń háĺ kə́ majaĺ ɔjəń rɔ̄n kə̄ ndágá rɔ̄í tə́ ní.

¹⁶ Gātə̄ yāí tél gātə̄ kə́ bo. I nge ń noō n rāāī adə̄ údə kem rāā yá̰a̰ kə dɔ́nɔ́ tə́ ní, adə̄ ī-rāā yá̰á̰ kə́ majaĺ. Loo ń noō tə́ m̄-tə̄ɓāī kɔ̄ɔ́ dɔ mbal̄ yāḿ tə́, ba m-ə̄ndāī dan de kə́ karī gə̄ tə́. Ḭ̄ ń i Serubḛ kə́ nge ngɔ̄m̄ loo ní, m-ā m̄-tə̄ɓāī kɔ̄ɔ́ dan mbal̄ kə́ ndə́lē ngá̰ý gə̄ tə́.

¹⁷ Majə ń ī-majə deē ní rāāī adə̄ ɔ́jə rɔ̄í. Teēń ī-teē deē ní rāāī adə̄ dɔí ndi gōtə́ aĺ kɔ̄ɔ́. I tām̄ najə̄ ń noō tə́ n m-ə̄nī nang tə́ m-ādə̄ mban̄g kə́ rang gə̄ a̰a̰īn̄ ní.

¹⁸ Dan ń ā ī-rāań gātə̄ yāí gə̄ tə́ ní, ḭ̄ ā ī-rāā i yá̰á̰ kə́ gōtə́ aĺ tá dejə ō, ḭ̄ i de kə́ rɔ̄kum aĺ ō. I tītə̄ ń noō n ī-kídəń loo kə́ táĺ yāí gə̄ ní. I tām̄ najə̄ ń toō tə́ n m̄-rāā hor kógə̄ḿ kə́ a nujiī kɔ̄ɔ́ kem ɓē yāí tə́ ní. M-ā m̄-rāāī kadə̄ ā ī-tél bū hor ta kum de gə̄ malang ra a a̰a̰īn̄ tə́ ní.

¹⁹ Gír de gə̄ malang ń gerīīn̄ ní, rɔ̄də́ a nel̄də́ aĺ ngá̰ý najə̄ yāí ḭ̄ tə́. Ā ī-rāā de gə̄ malang kadə̄ ɓōĺ rāādə́. A nujən̄ seí i kə́ njɔ́ḿ gə̄ tə́.

Najə̄ ń əlanən̄ ɓōĺ kem ɓē kə́ Sidon tə́ ní

²⁰ Kɔ́ɔ̄ɓē ɔr̄ najə̄ seḿ, ədam̄ na:

²¹ Ḭ̄ ngōn̄ deē, ī-tūr̄ kumií kə̄ dɔ ɓē kə́ Sidon tə́, ba ɔ̄r̄ najə̄ kə de kə́ kemeé gə̄ ādə̄m̄.

²² Ā ə́dan na: Najə̄ ń Kɔ́ɔ̄ɓē Nə́ɓā ɔr̄ ní n toó: Ḭ̄ ɓē kə́ Sidon, m-ā m̄-rāā yá̰á̰ kə́ tōr̄ seí! I tītə̄ ń noō n m-ā m̄-rāań kadə̄ de gə̄ a̰a̰n̄ kɔsə gɔn yāḿ kem ɓēé ní. M-ā m̄-rāāī yá̰á̰ ń m̄-sāā rāā seí ní. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā. I tītə̄ ń noō n m-ā m-ɔ́jəń kadə̄ Nə́ɓā kə́ táĺ i mā ní.

²³ M-ā m-ə̄nī mo̰y ngāl̄bɔ̄gīí dɔí tə́ ō, mósə a a̰ȳ nang tə́ kum róbə kɔsə yāí gə̄ tə́ ō. Madə̄ ba̰ā̰í gə̄ a ənīīn̄ rɔ̄ɔ̄ kə̄ ta gə̄ tə́ ō, de gə̄ ń ndin̄ kemií tə́ ní, ngá̰ý gə̄ a tə́sōn̄ kem ɓēé ō. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā.

Israel a ndi kanjə̄ sōl̄ yá̰á̰ kógə̄ḿ

²⁴ Kɔ́ɔ̄ɓē əda ɓáý to̰ na: Tə̄rā gə̄ ń ndin̄ gīrə̄n̄ gidə ɓē kə́ Israel ní, nin̄ a kídə̄n̄ Israel gə̄ to̰ alé. Nin̄ a télən̄ túpə kōn̄ gə̄ tām̄ yān tə́ to̰ alé. Adə̄ nin̄ a tɔ́sə̄n̄ deē ō, a já̰ā̰n̄ deē ō to̰ alé. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā.

²⁵ Najə̄ ń Kɔ́ɔ̄ɓē Nə́ɓā ɔr̄ ní n toó: Ngán Israel gə̄ ń m̄-tə̄ndā m̄-tḭ̄ḭ̄də́ dan gír de gə̄ tə́ ní, m-ā m-ɔ́sə njadə́ kə̄ naā tə́. I tītə̄ ń noō n m-ā m-ɔ́jəń gotə nápar de gə̄ kadə̄ mā i Nə́ɓā kə́ táĺ ní. Ngán Israel gə̄ a ndin̄ dɔ nang yādə́ tə́, dɔ nang ń m-ādə̄ nge kəla yāḿ Jakob ní.

²⁶ Nin̄ a ndin̄ loo ń kanjə̄ sōl̄ yá̰á̰ kógə̄ḿ. Nin̄ a rāān̄ kújə gə̄ ō, a ndɔrə̄n̄ kāgə̄ nduú gə̄ ō. Nin̄ a ndin̄ kanjə̄ sōl̄ yá̰á̰ kógə̄ḿ. Tɔdɔ̄ gír de gə̄ ndin̄ kadədə́ gə̄ tə́ á i madə̄ ɓēdə́ kə́ ngé kídə̄də́ gə̄ ní, m-ā m-ún sarya gāngə̄ḿ yā rāań yá̰a̰ sedə́. Loo ń noō tə́ nin̄ a gerə̄n̄ kadə̄ Kɔ́ɔ̄ɓē Nə́ɓā yādə́ i mā.