EJEKIEL 27 - Bibəl ta Sar̄

Pā ń nōōnəń ɓē kə́ Tir kə́ nujə sák sák kɔ̄ɔ́ ní

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ún pā yo kógə̄ḿ ī-nōoń ɓē kə́ Tir.

³ Ni-ndi i ta bā bo tə́ ō, a rāā gātə̄ i kə gír de kə́ ngá̰ý gə̄ kə́ ndin̄ ɓē dɔ dor̄ gə̄ tə́ ō. Ā ə́dan na: Najə̄ ń Kɔ́ɔ̄ɓē Nə́ɓā ɔr̄ ní n toó: Ḭ̄ ɓē kə́ Tir, ḭ̄ ɔ́jə rɔ̄í tām̄ majə kə́ ī-majə ɔ̄tə̄ ta tə́.

⁴ Loo yāí to mbóńg ta kaw̄ kə̄ dan bā bo tə́ ō, de gə̄ ń əndāīn̄ ní, rāāīn̄ adə̄ ī-majə ɔ̄tə̄ kə taá.

⁵ Rāāīn̄ i tītə̄ loo rāā to beé. Nin̄ tə́gān̄ i kāgə̄ sipəres gə̄ kə́ Senir n rāān̄nəń kāgə̄ to yāí malang ní. Nin̄ tə́gān̄ i kāgə̄ sédər kə́ Liban n rāān̄nəń kāgə̄ ngaadan to yāí ní.

⁶ Nin̄ tə́gān̄ i kāgə̄ sén gə̄ kə́ Basan n rāān̄nəń háy yāí gə̄ ní. Rāān̄ loo ra ngé nēl̄ to gə̄ i kə kāgə̄ sédər gə̄ kə́ dor̄ loo yā Gərek gə̄ tə́ kə́ rāān̄ ro̰n gə̄ i kə ngān̄g dā̰á̰.

⁷ Nin̄ rāān̄ kūbə̄ to yāí gə̄ kə́ kadə̄ nél əsō kemeé i kə lḛ́ḛ́ kə́ Ejiptə tə́ ō, ɔsən̄ desḛ̄ḛ gə̄ tū tə́ ō. Ré deē a̰a̰ī kə̄ sa̰y anī, a gerī i kə ta kūl̄də́. Utə̄n̄ gidə yá̰a̰ gātə̄ yāí gə̄ i kə kūbə̄ kə́ ndul gusə gusə gə̄ ō, kə́ kərē bḭḭ gə̄ ō, kə́ ḭḭnə̄ń i dor̄ kə́ Sipər tə́.

⁸ Ngé nēl̄ to yāí gə̄ ń ḭ̄ḭ̄ ɔ́ýdə́ kəlaá ní, i de gə̄ kə́ Sidon ō, kə́ Arbad ō. Ba ngé kəhɔ dɔ ga̰ to ní gə̄ i de kə́ Tir gə̄ ń nin̄ i de gə̄ kə́ ɔlən̄ ngá̰ý ní.

⁹ De gə̄ ń ə̄ndādə́ ta kəla rāā loo kə́ nujə gə̄ kə́ tū to tə́ ní, i ngé kəla gə̄ kə́ Bibəlos ń nin̄ i de gə̄ kə́ gerə̄n̄ kəla ngá̰ý ō, ɔlən̄ ngá̰ý ō ní. To bo gə̄ malang kə́ kum bā bo gə̄ tə́ a dəban̄ i ɓēé looí ō, ngé rāā kəla kemeé gə̄ a mangən̄ i yá̰a̰ gātə̄ yāí ḭ̄ gə̄ ō.

¹⁰ Persə gə̄ ō, Lud gə̄ ō, Put gə̄ ō, Nin̄ a ɓōkə́n̄ der yādə́ gə̄ ō, jākā rɔ̄ɔ̄ yādə́ gə̄ ō i ɓēé looí. Nin̄ i ngé rāā kadə̄ rīí ɓār̄ gə̄.

¹¹ De kə́ Arbad gə̄ kum naā tə́ kə ngé rɔ̄ɔ̄ yāí gēé ngɔ̄mə̄n̄ ndogə̄ mbal̄ yāí gə̄ ō, de kə́ Gamad gə̄ ngɔ̄mə̄n̄ kújə́ kə́ ngāl̄ ɓururu yāí gə̄ ō. Nin̄ náān̄ der yādə́ gə̄ kadə ndogə̄ mbal̄ gə̄ ń gīrə̄n̄ gidií tə́ ní ō, rāān̄ adə̄ ī-majə ɔ̄tə̄ kə taá i tītə̄ ń noō ō.

Tir i ɓē bo yā ngé rāā gātə̄ gə̄

¹² De kə́ Tarsis gə̄ adīn̄ yá̰a̰ kənge kə́ tayā tayā gə̄ ngá̰ý mbél̄nəń gíŕ yá̰a̰ seí. Nin̄ mangən̄ yá̰a̰ gātə̄ yāí gə̄ i kə gində̄ arjā̰a̰á̰ ō, gində̄ kə́ karīí ō, kə gində̄ etḛ̄ḛḛ́ ō, kə gində̄ pəlɔm ō.

¹³ Gír de gə̄ kə́ dɔ nang kə́ Gəresə tə́ ō, kə́ gō nang kə́ Tubal tə́ ō, kə́ Mesek tə́ ō, a rāān̄ gātə̄ i seí ḭ̄ḭ́. Nin̄ adīn̄ ɓəlo gə̄ ō, yá̰á̰ kə́ rāā kə gində̄ nə̄ngá kasaá gə̄ ō, gíŕ yá̰a̰ gātə̄ yāí gə̄ tə́.

¹⁴ De kə́ Bet Togarma gə̄ gātə̄n̄ kə sə́ndá kə́ yā rāań kəla gə̄ ō, sə́ndá kə́ yā rɔ̄ɔń gə̄ ō, kərō rapáy gə̄ ō, jīí tə́.

¹⁵ De kə́ Dedan gə̄ a rāān̄ gātə̄ seí ḭ̄ḭ́ ō. De gə̄ kə́ ndin̄ dɔ dor̄ loo gə̄ kə́ ngá̰ý tə́ reē a mangən̄ yá̰a̰ gātə̄ gə̄ i jīí ḭ̄ tə́. Nin̄ a mangən̄ yá̰a̰ jīí tə́ i kə ngān̄g dā̰á̰ ō, i kə kāgə̄ eben ō.

¹⁶ Edom gə̄ mangən̄ yá̰a̰ jīí tə́ ngá̰ý. Nin̄ adīn̄ i mbal̄ gə̄ kə́ gātə̄də́ i ngá̰ý gə̄ ō, i ta kūbə̄ kə́ kɔsə desḛ̄ḛ tū tə́ gə̄ ō, i kūbə̄ lḛ́ḛ gə̄ ō, i məde kɔ̄l̄ gə̄ ō, i mbal̄ rubis gə̄ ō gírí n taānəń yá̰a̰ gə̄ ní.

¹⁷ Gír de gə̄ kə́ Juda tə́ ō, kə́ Israel tə́ ō a rāān̄ gātə̄ i seí ḭ̄ḭ́ ō. Kōō gémē ō, tḛ̄ȳ ō, tejə ō, yibə̄ ō, nō kāgə̄ kə́ otə majə ō ní, nin̄ igənə̄ń i jīí ḭ̄ tə́.

¹⁸ Yá̰á̰ kə́ tayā tayā gə̄ ń ḭ̄ ī-rāādə́ ngá̰ý ní, de kə́ Damas gə̄ mangən̄ jīí tə́ ō. Nin̄ a mangən̄ jīí tə́ i kə kasə nduú kə́ Helbon ō, i kə kūbə̄ bḭḭ̄ batə̄ kə́ Sahar ō

¹⁹ Əla gír i Ujal tə́ nú n de gə̄ kə́ gír ɓē yā Dan tə́ ō, Yaban tə́ ō a adīnəń yá̰a̰ gə̄ ń sɔɔ̄ kadə̄ nin̄ adīn̄ ní. Nin̄ adīn̄ gində̄ kə́ koo ō, kāgə̄ kanel ō, mu tə̄ɓā kə́ kotə majə ō.

²⁰ De kə́ Dedan gə̄ gātə̄n̄ bájo gə̄ kə́ yā kənī gidə sə́ndá tə́ ba ndi dɔ tə́ gə̄ jīí tə́.

²¹ De kə́ Arab tə́ gə̄ ō, ngār gə̄ malang kə́ Kedar gə̄ ō rāān̄ gātə̄ i seí ḭ̄ḭ́. Nin̄ a mangən̄ yá̰a̰ jīí tə́ i kə ngán batə̄ gēé ō, i kə batə̄ gēé ō, i kə bə̄yā̰ gēé ō.

²² Ngé rāā gātə̄ gə̄ kə́ Saba ō, kə́ Ragəma ō a mbélə̄n̄ gíŕ yá̰a̰ gə̄ i seí ḭ̄ḭ́. Nin̄ a mbélə̄n̄ gíŕ yá̰a̰ gātə̄ yāí gə̄ ní i kə ítər kə́ majə ngá̰ý gə̄ ō, i kə mbal̄ gə̄ kə́ gātə̄də́ i ngá̰ý gə̄ kə́ tayā tayā gə̄ ō, i kə lɔ́r ō.

²³ Ɓē gə̄ kə́ Haran ō, kə́ Kane ō, kə́ Eden ō, ngé rāā gātə̄ gə̄ Saba ō, ɓē gə̄ kə́ Asur ō, kə́ Kilmad ō, a rāān̄ gātə̄ i seí ḭ̄ḭ́.

²⁴ Nin̄ a mbélə̄n̄ gír kūbə̄ gə̄ kə́ gātə̄də́ i ngá̰ý gə̄ i seí ḭ̄ḭ́. Nin̄ reēn̄ kə kūbə̄ kə́ majə ngá̰ý gə̄ kə́ kərē bḭḭ gə̄ ō, kūbə̄ kə́ kɔsə desḛ̄ḛ tū tə́ gə̄ ō, kūbə̄ tapīi gə̄ kə́ ɓáĺdə́ i tayā tayā gə̄ ō, kəlā kə́ ngan̄g gə̄ kə́ sétə̄ gidə naā tə́ ō, loo súkə̄ yāí gə̄ tə́.

²⁵ To kə́ bo gə̄ ətōn̄ yá̰a̰ yāí gə̄. Tir, yá̰a̰ i ngá̰ý kem ɓē yāí tə́, yá̰a̰ kətō yāí i ngá̰ý adə̄ ɔyī tītə̄ to bo kə́ ndi dan bā boó beē.

Ta pā yo ń nōōnəń ɓē kə́ Tir ní

²⁶ Ngé háy gə̄ nēlīn̄ aw̄n̄ seí dan ɓūlūú ō, néĺ kə́ dūn̄ ɓē tə́ a tétī rárák dan bā boó ō.

²⁷ Yá̰a̰ kənge yāí gə̄ ō, yá̰a̰ gātə̄ yāí gə̄ ō, rāā gātə̄ yāí ō, ngé rāā kəla kem to bo yāí gə̄ tə́ ō, ngé rāā loo kə́ nujə gə̄ kə́ tū to bo yāí gə̄ tə́ ō, ngé rɔ̄ɔ̄ gə̄ kə́ ngé rāā kəla yāí gə̄ ō, kósə de kə́ ɓēé looí gə̄ ō, yá̰a̰ malang a aw̄ kum bā bo tə́ ndɔ̄ ń ā ī-jə̄ngań ta kaw̄ gír maná tə́ ní.

²⁸ Dan ń de gə̄ ń ndin̄ kə gō kadə bā boó ní a oōn̄ kōō ngé rāā kəla kem to bo yāí gə̄ tə́ loo gán̄g kɔŕ tə́ anī, ɓōĺ a rāādə́ adə̄ nin̄ a ndewn̄ ngangan.

²⁹ Ngé nēl̄ to kə háyá gə̄ malang a teēn̄ kɔ̄ɔ́ kem to bo yādə́ gə̄ tə́. Ngé rāā kəla kem to bo gə̄ tə́ ō, ngé kəla gə̄ malang ō, a risən̄ nang tə́.

³⁰ Nin̄ a nōōn̄ rɔ̄də́ dɔí tə́, kə nōō kə́ kə wur katāá. Nin̄ a əgan̄ bumbə́ru kə̄ dɔdə́ tə́ ō, a wángə̄lān̄ kum bū tə́ ō, yā kɔjəń rɔ̄nelāĺ yādə́ kə̄ ndágá.

³¹ Nin̄ dəsān̄ dɔdə́ ō, a o̰o̰n̄ kūbə̄ kəhɔ ndoō ō, najə̄ yāí tə́. Nin̄ a nōōīn̄ kə man̄ kumdə́, tɔdɔ̄ kemdə́ nel̄də́ aĺ ngá̰ý ō, nin̄ a nōōn̄ rɔ̄də́ kə wur katāá ō.

³² Dan ń wurdə́ tōr̄də́ ngá̰ý ní, nin̄ unən̄ pā yo ń toō dɔí tə́, nin̄ nōōn̄ ədan̄ na: Ɓē kə́ to tītə̄ ɓē kə́ Tir gətóo, ba ngɔlaā ɓáa i ni n nujənən̄ kɔ̄ɔ́ dan bā bo tə́ toō!

³³ Dan ń yá̰a̰ gātə̄ yāí gə̄ teēn̄ kem to bo yāí gə̄ tə́ ní, ḭ̄ ī-rāā adə̄ gír de kə́ ngá̰ý gə̄ ndānə̄n̄. Yá̰a̰ yāí kə́ ngá̰ý gə̄ ō, yá̰a̰ gātə̄ yāí kə́ ngá̰ý ō, rāā adə̄ mban̄g gə̄ kə́ dɔ nang tə́ əngen̄ yá̰á̰ ngá̰ý.

³⁴ Ngɔlaā ní, ḭ̄ n bəngál man̄ gə̄ tɔ̄ɔ̄īn̄ kɔ̄ɔ́ toō ō, ḭ̄ n údə lim kɔ̄ɔ́ dan ɓūl̄ maná toō ō. Yá̰a̰ gātə̄ yāí gə̄ ō, ngé kəla yāí gə̄ malang ō, udən̄ gír maná seí kum bā bo tə́.

³⁵ De gə̄ malang ń ndin̄ kə̄ dɔ dor̄ loo gə̄ tə́ ní, rɔ̄də́ nel̄də́ aĺ ngá̰ý najə̄ yāí ḭ̄ tə́. Ɓōĺ rāā mban̄g yādə́ gə̄ adə̄ ndewn̄ ngangan ō, deē a̰a̰ ɓōĺ kə́ ngá̰ý dɔ kumdə́ tə́ ger̄ ō.

³⁶ Ɓōĺ rāā ngé rāā gātə̄ gə̄ yā gír de kə́ nin̄ i tə̄rā gə̄ adə̄ əgan̄ kɔŕ ɓōĺ najə̄ yāí tə́. Ḭ̄ ī-rāā ādə̄ de gə̄ malang ɓōlə́n̄, nujən̄ seí kɔ̄ɔ́ i kə́ njɔ́ḿ gə̄ tə́.