EJEKIEL 26 - Bibəl ta Sar̄

Najə̄ kə́ əlanə̄ń ɓōĺ kem de gə̄ kə́ Tir tə́

¹ Kutə̄ gō ń ɔyn̄ de gə̄ dɔ gúú tə́ aw̄n̄ sedə́ dɔ ɓē kə́ rang tə́ á rāā ɓāl̄ kutə gidə i kógə̄ḿ kɔ̄ɔ́ ní, Kɔ́ɔ̄ɓē ɔr̄ najə̄ seḿ kə ndɔ̄ kə́ ta kəga dɔ yā nāá, ni ədam̄ na:

² Ḭ̄ ngōn̄ deē, ōō! De kə́ Tir gə̄ mbóon̄ kə de kə́ Jerusalem gēé ədan̄ na: Haw! Haw! Nujən̄ ɓē ń de gə̄ malang aw̄n̄ kemeé ní kɔ̄ɔ́! Ta i dɔjí tə́ kadə̄ jə-téliī de kə́ ngé kənge yá̰a̰ gə̄. Tɔdɔ̄ Jerusalem tél i kūbə̄rū mbal̄ gə̄ kə́ ran̄ dɔ naā tə́ bing!

³ Tām̄ najə̄ ń noō tə́ ní, Kɔ́ɔ̄ɓē Nə́ɓā əda na: Ɓē kə́ Tir, m-ā m̄-rāā yá̰á̰ kə́ tōr̄ seí. M-ā m̄-rāā kadə̄ nápar de kə́ ngá̰ý gə̄ a ḭḭn̄ seí yā rɔ̄ɔ̄ī, tītə̄ ń bā bo rāań adə̄ bəngálən gə̄ ḭḭn̄ ní.

⁴ Nin̄ a nujən̄ ndogə̄ mbal̄ yāí gə̄ ń ɔ̄gəń de gə̄ rɔ̄ɔ̄ī ní ō, a tétə̄n̄ kújə yāí kə́ ngāl̄ ɓururu kum kə̄ dɔɔ́ gə̄ nang tə́ kɔ̄ɔ́ ō. M-ā m-ɔ́ý gájən gə̄ kɔ̄ɔ́ ba mā m-ə́ya̰ i dɔ mbal̄ kə́ ndágə doy karī.

⁵ Tir a tél i loo kə́ dan bā bo tə́ kə́ ngé ndo̰ gə̄ a najənə̄ń réng yādə́ gə̄. I mā Kɔ́ɔ̄ɓē n m-ɔ̄r̄ najə̄ ō, najə̄ ń m-ə́dá ní n noó ō. Nápar de gə̄ a reēn̄ yā kɔy yá̰a̰ kənge gə̄ kə́ kem ɓē kə́ Tir tə́ dɔ gúú tə́.

⁶ Nin̄ a nujən̄ ɓē kə́ kadə tə́ gə̄ kə gō kadə bāá. Loo ń noō tə́ de gə̄ malang a gerə̄n̄ kadə̄ Kɔ́ɔ̄ɓē i mā.

⁷ Yá̰á̰ ń mā Kɔ́ɔ̄ɓē Nə́ɓā m-ə́dá ɓáý to̰ ní n toó: Nabukodonosor, mban̄g kə́ Babilon ń i mban̄g kə́ bo tɔȳ madə̄n gə̄ ní, m-ā m̄-rāā kadə̄ ni a ḭḭ dām̄ mbɔ́r kə́ geleé tə́ yā reē rɔ̄ɔ̄ī ḭ̄ ɓē kə́ Tir. Ni a reē kə sə́nda gə̄ ō, kə púsə rɔ̄ɔ̄ gə̄ ō, kə ngé kal̄ sə́nda gə̄ ō, kə ngé rɔ̄ɔ̄ kə́ ngá̰ý gə̄ ō.

⁸ Ni a nujə ɓē kə́ kadií tə́ gə̄ ń ndin̄ kə gō kadə bāá ní. Gō tə́ anī, Babilon gə̄ a ndērə̄n̄ bəlo gə̄ ō, a əndān̄ ndogə̄ mbal̄ gə̄ kə́ yā kənīń rɔ̄ɔ̄ ō. Nin̄ a əndān̄ ndogə̄ der yā rɔ̄ɔ̄iń ḭ̄ ɓē kə́ Tir.

⁹ Nin̄ a mbə́rēn̄ ndogə̄ mbal̄ yāí gə̄ kə yá̰a̰ rɔ̄ɔ̄ yādə́ gēé yā tə́nī. Nin̄ a tɔ́sə̄n̄ kújə yāí kə́ ngāl̄ ɓururu gə̄ kə sáā gində̄ gēé yā tɔ́sə̄ nujəń.

¹⁰ Dan ń nin̄ a a̰ȳn̄ ngɔ̄də̄ anī, sə́nda yādə́ kə́ ngá̰ý gə̄ a rāān̄ kadə̄ bumbə́ru əga nding dɔí tə́. Kōō ngé kal̄ sə́nda gə̄ ō, kōō nja púsə rɔ̄ɔ̄ gə̄ ń a ndūbə̄rūn̄ ní ō, a rāān̄ ndogə̄ mbal̄ yāí gə̄ kadə̄ a ndewn̄. Nin̄ a udən̄ kem ɓēé kə ta róbə yāí gēé, tītə̄ ń deē a udəń kem ɓēé gō tɔ́sə̄ kə́ ni tɔ́sə̄ ndogə̄ mbal̄ kə́ gidə ɓēé mbutə tə́ ní.

¹¹ Nja sə́nda yādə́ gə̄ a tɔ̄ɔ̄ nán̄g kə́ kum róbə kɔsə yāí gə̄ tə́ ō, de gə̄ ń ndin̄ kemií tə́ ní, nin̄ a tɔ̄lə̄n̄də́ kə kaskaraá ō, mbal̄ yāí kə́ túdə̄ kə nja dɔɔ́ gə̄ ń tɔ́gə́də́ i ngá̰ý ní, nin̄ a tə́nīn̄də́ nang tə́ kɔ̄ɔ́ ō.

¹² Nin̄ a ɓogən̄ yá̰a̰ kənge yāí gə̄ ō, a ɔyn̄ yá̰a̰ gātə̄ yāí gə̄ dɔ gúú tə́ ō. A mbə́rēn̄ ndogə̄ mbal̄ yāí gə̄ yā tə́nī nang tə́ kɔ̄ɔ́ ō, a nujən̄ kújə yāí gə̄ ń yá̰a̰ i ngá̰ý tū tə́ ní ō, ba a ɔyn̄ mbal̄ kə́ tū tə́ gə̄ ō, kāgə̄ kə́ tū tə́ gə̄ ō, butə̄ yá̰á̰ kə́ tū tə́ gə̄ ń a na̰y ní ō, yā ɓōkə́ gír bāá kɔ̄ɔ́.

¹³ M-ā m̄-dəba tā pā yāí gə̄ kɔ̄ɔ́, adə̄ deē a oō kōō kənde yāí gə̄ to̰ alé.

¹⁴ M-ā m̄-rāāī kadə̄ ā ī-tél mbal̄ kə́ dɔn ndágə doy, kə́ ngé ndo̰ kānjə̄ gə̄ a najən̄ rə́ng yādə́ gə̄ tū tə́. Deē a tél yā rāāī gogə́ rang alé. A̰á̰ā̰, i mā Kɔ́ɔ̄ɓē Nə́ɓā n m-ɔ̄r̄ najə̄ ní ō, yá̰á̰ ń m-ə́dá ní n noó ō.

¹⁵ Yá̰á̰ ń mā Kɔ́ɔ̄ɓē Nə́ɓā m-ə́da ɓē kə́ Tir ní n toó: Kum mbang ń a nujiīń tə́ ní, a tɔ̄lə̄n̄ de gə̄ malang ń ndin̄ kem ndogə̄ mbal̄ yāí tə́ ní ō, de gə̄ ń əngen̄ dɔ ní, a oōn̄ kōōdə́ loo nōō tə́ ō. Kum mbang ngeé ń noō tə́ ní, de gə̄ ń ndin̄ dor̄ kə́ sa̰y gə̄ tə́ ní, ɓōĺ a rāādə́ adə̄ nin̄ a ndewn̄.

¹⁶ Ngār gə̄ yā gír de gə̄ ń ndin̄ kə gō kadə bā boó ní, a ḭḭn̄ kɔ̄ɔ́ dɔ kōr̄ kāgə̄ mbang yādə́ gə̄ tə́ yā ndi nang tə́. Nin̄ a ɔrə̄n̄ kūbə̄ yādə́ kə́ majə gə̄ rɔ̄də́ tə́ kɔ̄ɔ́ ō, a ɔrə̄n̄ kūbə̄ yādə́ gə̄ ń ɔsən̄ desḛ̄ḛ tū tə́ ní rɔ̄də́ tə́ kɔ̄ɔ́ ō. Nin̄ a əlan̄ ɓōĺ rɔ̄də́ tə́ tītə̄ kūbə̄ beé ō, a ndin̄ nang tə́ ō. A asədə́ ndew aĺ ō, ɓōĺ a rāādə́ ngá̰ý sɔɔ̄iń ḭ̄ ō.

¹⁷ Nin̄ a unən̄ pā yo ń toō dɔí tə́: Ajá, nujiīn̄ kɔ̄ɔ́, ḭ̄ ɓē ń rīí ɓār̄ ngá̰ý ní, ī-gətóo kɔ̄ɔ́ dan bā boó! Kété ní, de gə̄ ń ndin̄ kemií tə́ ní, tɔ́gə́də́ i ngá̰ý dɔ bā bo tə́, adə̄ de gə̄ malang ɓōlə́n̄də́.

¹⁸ Ngɔlaā ní, gír de gə̄ ń ndin̄ kə gō kadə bā boó ní ndewn̄, tɔdɔ̄ ḭ̄ ī-gətóo kɔ̄ɔ́. Ngé gə̄ ń ndin̄ dɔ dor̄ gə̄ tə́ ní, ndíĺdə́ a̰ȳ, tɔdɔ̄ ḭ̄ ī-hində̄ lim kɔ̄ɔ́.

¹⁹ A̰á̰ā̰, mā Kɔ́ɔ̄ɓē Nə́ɓā m-ə́da na: M-ā m̄-rāāī kadə̄ ā ī-to tītə̄ ɓē gə̄ ń nujən̄də́ kɔ̄ɔ́ ní, ɓē gə̄ ń de kə́ kemeé gə̄ gətóon̄ kɔ̄ɔ́ ní. M-ā m̄-rāā kadə̄ man̄ kə́ ngá̰ý ḭḭ gír bā bo tə́ reē un dɔí kɔ̄ɔ́.

²⁰ M-ā m̄-rāāī kadə̄ ā ī-risə yā kaw̄ ndi dan de kə́ koy gə̄ tə́, naā tə́ kə ngé gə̄ ń ton̄ kem bəlo ɓádə gə̄ tə́ ní, adə̄ ā āw̄ gō de kə́ kété jóo gə̄ tə́. M-ā m̄-rāāī kadə̄ ā ī-ndi ɓē gíŕ nángāá. Ā ī-to tītə̄ mbal̄ kə́ jóo gə̄, ā ī-ndi naā tə́ kə ngé gə̄ ń nin̄ i kem bəlo ɓádə gə̄ tə́ ní. Ā ásə teē loo ń noō tə́ aĺ ō, dɔ nang ń de kə́ kə kumuú gə̄ ndin̄ tū tə́ ní, ā ə́nge loo tū tə́ aĺ ō.

²¹ Ɓōĺ a rāā de gə̄ malang kadə̄ a ndewn̄ najə̄ yāí ḭ̄ tə́, tɔdɔ̄ ā ī-ndi to̰ alé. De gə̄ a ndəleīn̄, banī de kə́ yā kəngeī a gətóo i kə́ bátə́ gə̄ tə́. Najə̄ ń Kɔ́ɔ̄ɓē Nə́ɓā əda ní n noó.